இனி ஆபீஸைத் தேடி அலைவதெல்லாம் பழசு... 'உங்களைத் தேடி உங்கள் ஊரில்' வருகிறது அரசு!

நாகப்பட்டினம் வட்டத்தில் நாளை (15.07.2026) முதல் 24 மணி நேர 'உங்களைத் தேடி உங்கள் ஊரில்' திட்டம் தொடங்குகிறது. 

செயற்கை நுண்ணறிவு சித்தரிப்பு படம்

Source : AI

நாகப்பட்டினம்: தமிழ்நாடு முதலமைச்சரின் ஆணைப்படி, பொதுமக்களை நேரடியாக நாடிச் சென்று, அவர்களின் குறைகளைக் கேட்டு உடனுக்குடன் தீர்வு காண்பதற்காக "உங்களைத் தேடி, உங்கள் ஊரில்" என்ற சிறப்பான திட்டம் கடந்த திமுக ஆட்சியில் இருந்து செயல்படுத்தப்பட்டு வருகிறது. இத்திட்டத்தின் கீழ், நாகப்பட்டினம் மாவட்டம் மற்றும் வட்டத்தில் நாளை (15.07.2026) காலை 09.00 மணி முதல் மறுநாள் (16.07.2026) காலை 09.00 மணி வரை 24 மணி நேரத் தொடர் கள ஆய்வுப் பணிகள் நடைபெற உள்ளதாக மாவட்ட ஆட்சியர் கே.ஜே.பிரவீன்குமார், தெரிவித்துள்ளார்.

24 மணி நேரத் தொடர் கள ஆய்வு

அரசு இயந்திரம் முழுமையாகக் களத்தில் இறங்கி மக்களின் தேவைகளை அறிவதே இத்திட்டத்தின் முக்கிய நோக்கமாகும். இதன்படி, நாகப்பட்டினம் மாவட்ட ஆட்சியர் மற்றும் மாவட்ட நிலை அலுவலர்கள் அனைவரும் ஒருங்கிணைந்து, ஒவ்வொரு கிராமத்திலும் உள்ள அரசு அலுவலகங்கள் மற்றும் அரசால் செயல்படுத்தப்பட்டு வரும் பல்வேறு நலத்திட்டப் பணிகள் குறித்து நேரடியாகக் கள ஆய்வு மேற்கொள்ள உள்ளனர்.

வட்டார வளர்ச்சி அலுவலகங்கள், நியாயவிலைக் கடைகள், அரசுப் பள்ளிகள், ஆரம்பச் சுகாதார நிலையங்கள் மற்றும் மேம்பாட்டுப் பணிகள் நடைபெற்று வரும் இடங்கள் ஆகியவற்றில் இந்த அதிகாரிகள் குழுவினர் நேரில் சென்று ஆய்வு நடத்துவர்.

5 சரகங்களில் தீவிரக் கண்காணிப்பு

நாகப்பட்டினம் வட்டத்தில் உள்ள முக்கியப் பகுதிகளான
 * நாகப்பட்டினம்
 * திருமருகல்
 * கங்களாஞ்சேரி
 * தெற்கு பொய்கைநல்லூர்
 * திருகண்ணபுரம்
ஆகிய 5 சரகங்களுக்கும் உட்பட்ட அனைத்து கிராமங்களிலும் மாவட்ட நிலை அலுவலர்கள் தனித்தனி குழுக்களாகப் பிரிந்து சென்று ஆய்வு செய்ய உள்ளனர். இந்த ஆய்வின் போது, பொதுமக்கள் தங்கள் கிராமங்களுக்குத் தேவையான குடிநீர் வசதி, சாலை வசதி, தெருவிளக்குகள், சுகாதாரப் பணிகள் போன்ற அடிப்படை வசதிகள் குறித்தும், இதர தேவைகள் குறித்தும் தங்களது கோரிக்கை மனுக்களை நேரடியாக அதிகாரிகளிடம் வழங்கிப் பயன்பெறலாம்.

மாலை 5 மணிக்கு மக்கள் குறைதீர்ப்பு மற்றும் கலந்தாலோசனை கூட்டம்

இத்திட்டத்தின் ஒரு பகுதியாக, நாளை மாலை 05.00 மணியளவில் திருமருகல் வட்டார வளர்ச்சி அலுவலகத்தில் (BDO Office) சிறப்பு கலந்தாலோசனை கூட்டம் மற்றும் மக்கள் குறைதீர்ப்பு முகாம் நடைபெற உள்ளது. இக்கூட்டத்திற்கு மாவட்ட ஆட்சியர் கே.ஜே.பிரவீன்குமார் தலைமை தாங்குகிறார். அப்போது திருமருகல் மற்றும் அதனைச் சுற்றியுள்ள பகுதி பொதுமக்கள் தங்களின் நீண்ட நாள் கோரிக்கைகள், பட்டா மாறுதல், முதியோர் உதவித்தொகை, குடிநீர் மற்றும் உள்கட்டமைப்பு சார்ந்த புகார்களை மாவட்ட ஆட்சியரிடம் நேரடியாக மனுக்களாக வழங்கலாம். வரப்பெறும் மனுக்கள் மீது உடனடியாகப் பரிசீலனை செய்யப்பட்டு, உரிய நடவடிக்கைகள் மேற்கொள்ளப்படும் எனத் தெரிவிக்கப்பட்டுள்ளது. "அரசுத் துறைகளின் சேவைகள் தடையின்றி, கடைகோடி மனிதருக்கும் விரைவாகச் சென்றடைவதை உறுதி செய்யவே இந்த 24 மணி நேரக் கள ஆய்வுத் திட்டம் வடிவமைக்கப்பட்டுள்ளதாக மாவட்ட ஆட்சியர் 
கே.ஜே.பிரவீன்குமார், தெரிவித்துள்ளார்.

பொதுமக்களுக்கு மாவட்ட ஆட்சியர் அழைப்பு

நாகப்பட்டினம் வட்டத்தில் முழு வீச்சில் நடைபெற உள்ள இந்த "உங்களைத் தேடி, உங்கள் ஊரில்" திட்ட முகாமினைப் பொதுமக்கள் நல்முறையில் பயன்படுத்திக் கொள்ள வேண்டும். தங்கள் கிராமங்களின் முன்னேற்றத்திற்கும், தனிப்பட்ட குறைகளுக்கும் உரிய தீர்வுகளைப் பெற, கிராமங்களுக்கு வரும் அதிகாரிகளிடமும், மாலையில் நடைபெறும் கலந்தாலோசனை கூட்டத்திலும் கலந்துகொண்டு கோரிக்கை மனுக்களை வழங்கிப் பயன்பெறுமாறு மாவட்ட ஆட்சியர் கே.ஜே.பிரவீன்குமார்,  தனது செய்திக்குறிப்பில் கேட்டுக் கொண்டுள்ளார். அரசு அதிகாரிகள் தங்களின் கிராமங்களுக்கே வந்து குறைகளைக் கேட்கும் இந்தத் திட்டம், நாகப்பட்டினம் வட்டார மக்களிடையே பெரும் வரவேற்பையும் எதிர்பார்ப்பையும் ஏற்படுத்தியுள்ளது.