தரங்கம்பாடி: மயிலாடுதுறை மாவட்டத்தின் வரலாற்றுச் சிறப்புமிக்க கடற்கரை நகரமான தரங்கம்பாடியில் அமைந்துள்ள கடல்சார் அருங்காட்சியகத்தில் உலக சுற்றுலா தின விழா மிகவும் விமரிசையாகவும் கலைக்கட்டோடும் கொண்டாடப்பட்டது. சர்வதேச வரலாற்று முக்கியத்துவம் வாய்ந்த இந்நிகழ்ச்சிக்கு தரங்கம்பாடி பேரூராட்சித் தலைவர் சுகுணசங்கரி குமரவேல் தலைமை தாங்கி விழாவினைச் சிறப்போடு தொடங்கி வைத்தார்.

Continues below advertisement

ஆன்மீக மற்றும் வரலாற்று உணர்வோடு நடைபெற்ற இவ்விழாவில் புனித ரோசரியல் அன்னை ஆலயப் பங்குத்தந்தை அருளானந்தம் மற்றும் புதிய எருசலேம் தேவாலயப் போதகர் சார்லஸ் எட்வின் ஆகியோர் கலந்துகொண்டு சிறப்பான ஆசியுரைகளை வழங்கி விழாவிற்கு மேலும் பொலிவு சேர்த்தனர்.

சிறப்பு அழைப்பாளர்கள் மற்றும் முக்கிய நிகழ்வு

இவ்விழாவில் டென்மார்க் நாட்டைச் சேர்ந்த டேனிஷ் தரங்கம்பாடி நலச்சங்கத்தின் தலைவர் பால் பீட்டர்சன் மற்றும் அதன் துணைத் தலைவர் நூட் ஹெல்ஸ் ஆகியோர் சிறப்பு அழைப்பாளர்களாகப் பங்கேற்று விழாவைச் சிறப்பித்தனர். இந்த உலக சுற்றுலா தின விழாவின் மிக முக்கிய முத்தாய்ப்பான நிகழ்வாக, கடந்த 1620-ஆம் ஆண்டு முதன்முதலில் டென்மார்க்கில் இருந்து தரங்கம்பாடி துறைமுகத்திற்கு வந்தடைந்த 'எலிஃபண்ட்' என்ற வரலாற்றுச் சிறப்புமிக்க டேனிஷ் கப்பலின் அச்சு அசலான மாதிரி வடிவம் கடல்சார் அருங்காட்சியகத்திற்கு அர்ப்பணிக்கப்பட்டது. டேனிஷ் தரங்கம்பாடி நலச்சங்கத்தின் சார்பில் இந்த அரிய கப்பல் மாதிரி முறைப்படி அன்பளிப்பாக அருங்காட்சியக நிர்வாகத்திடம் வழங்கப்பட்டது.

Continues below advertisement

சிற்பிக்கு கௌரவம் மற்றும் பாராட்டு

வரலாற்று வரலாற்றுச் சான்றாக விளங்கும் இந்தக் கப்பல் மாதிரியை மிக நேர்த்தியாகவும் நுட்பமாகவும் உருவாக்கிய டென்மார்க்கைச் சேர்ந்த கை பஞ்ச் என்ற கலை வல்லுநருக்கு விழாவில் சிறப்புப் பாராட்டுகள் தெரிவிக்கப்பட்டன. அவருடன் சேர்ந்து இந்த வரலாற்றுப் பணியில் துணைநின்ற நலச்சங்க நிர்வாகிகளுக்கும் பொன்னாடை போர்த்தி, சிறப்புச் சின்னங்கள் வழங்கி கௌரவம் செய்யப்பட்டது.

அவர்களின் இந்த உழைப்பும் பங்களிப்பும் தரங்கம்பாடியின் பழம்பெரும் வரலாற்றை உலகறியச் செய்வதில் முக்கிய பங்கு வகிக்கிறது என விழாவில் திரண்டிருந்த சான்றோர்கள் வெகுவாகப் பாராட்டினர்.

டேனிஷ் நலச்சங்கத் தலைவரின் செய்தியாளர் சந்திப்பு

இதனைத் தொடர்ந்து செய்தியாளர்களிடம் பேசிய டேனிஷ் தரங்கம்பாடி நலச்சங்கத் தலைவர் பால் பீட்டர்சன், 1620-ஆம் ஆண்டு தரங்கம்பாடிக்கு வந்த முதல் டேனிஷ் கப்பலின் மாதிரியை உலக சுற்றுலா தினமான இந்த நல்லநாளில் இங்கு வழங்குவதில் தாங்கள் அளப்பரிய பெருமையடைவதாகப் நெகிழ்ச்சியுடன் தெரிவித்தார்.

மேலும் அவர் பேசுகையில், டென்மார்க் மற்றும் இந்தியா ஆகிய இரு நாடுகளுக்கும் இடையேயான 400 ஆண்டுகளுக்கும் மேலான நீடித்த நல்லுறவின் ஆழமான அடையாளமாக இந்தக் கப்பல் மாதிரி திகழ்கிறது. என்று குறிப்பிட்டார். டேனிஷ் வரலாற்றை மட்டுமின்றி, டென்மார்க் மற்றும் இந்தியா இடையேயான ஆழமான வரலாற்றுத் தொடர்புகளையும் எதிர்காலத் தலைமுறையினர் மிகத் தெளிவாக அறிந்துகொள்ள இந்த தரங்கம்பாடி கடல்சார் அருங்காட்சியகம் மிக முக்கியப் பங்காற்றும் என்றும் அவர் உறுதியாகத் தெரிவித்தார். இந்த வரலாற்றுச் சிறப்புமிக்க அருங்காட்சியகத்திற்குத் தொடர்ந்து ஆதரவளிக்கும் நோக்கத்திலும், இரு நாடுகளின் நட்புறவைப் பறைசாற்றும் வகையிலும் இந்தக் கப்பல் மாதிரியை அன்பளிப்பாக வழங்குவதில் தாங்கள் பெரும் மகிழ்ச்சியடைவதாக பூரிப்புடன் கூறினார்.

சுற்றுலாப் பயணிகளுக்கான வரலாற்றுச் பொக்கிஷம்

இவ்விழாவில் மாவட்ட சுற்றுலாத்துறை அலுவலர் பவுன்ராஜ், சீகன்பால்க் அருங்காட்சியக இயக்குநர் சாமுவேல் மனுவேல் உட்பட அரசு அதிகாரிகள், வரலாற்று ஆய்வாளர்கள், பேராசிரியர்கள் மற்றும் ஊர் பொதுமக்கள் திரளான எண்ணிக்கையில் கலந்துகொண்டு சிறப்பித்தனர். 

400 ஆண்டுகளைக் கடந்த இந்தியா - டென்மார்க் வரலாற்று உறவை மீண்டும் நினைவூட்டிப் பறைசாற்றும் வகையில், தரங்கம்பாடி கடல்சார் அருங்காட்சியகத்தில் புதியதாக இடம்பெற்றுள்ள இந்தக் கப்பல் மாதிரி இனிவரும் காலங்களில் இங்கு வருகை தரும் ஆயிரக்கணக்கான சுற்றுலாப் பயணிகளுக்கும், வரலாற்று ஆர்வலர்களுக்கும் ஒரு மிக முக்கியக் காட்சிப் பொருளாகவும் கல்விச் சான்றாகவும் அமையும் என்பதில் எவ்வித ஐயமும் இல்லை என சமூக ஆர்வலர்கள் கருத்து தெரிவித்துள்ளார்.