மயிலாடுதுறை மாவட்ட மீனவர்களுக்கு மாவட்ட ஆட்சியரின் முக்கிய அறிவிப்பு: என்ன தெரியுமா...?

மயிலாடுதுறை மாவட்ட மீனவர்கள் PMMSY குழு விபத்து காப்பீட்டுத் திட்டத்தில் பயன்பெற NFDP டிஜிட்டல் தளத்தில் பதிவு செய்வது கட்டாயம் என மாவட்ட ஆட்சியர் தெரிவித்துள்ளார்.

மாவட்ட ஆட்சியர் மற்றும் சித்தரிப்பு படம்

Source : ABP

மயிலாடுதுறை: மயிலாடுதுறை மாவட்டத்தில் உள்ள மீனவர்கள் மற்றும் மீனவ மகளிரின் வாழ்வாதாரத்தைப் பாதுகாக்கவும், அவர்களுக்குத் தகுந்த சமூகப் பாதுகாப்பை உறுதி செய்யவும் மத்திய, மாநில அரசுகள் பல்வேறு நடவடிக்கைகளை எடுத்து வருகின்றன. அதன் ஒரு பகுதியாக, பிரதான் மந்திரி மத்சயா சம்பட யோஜானா (PMMSY) திட்டத்தின் கீழ் செயல்படுத்தப்படும் குழு விபத்து காப்பீட்டுத் திட்டத்தில் (GAIS) பயன்பெற, மீனவர்கள் அனைவரும் தேசிய மீன்வள டிஜிட்டல் தளத்தில் பதிவு செய்வது கட்டாயம் என மாவட்ட ஆட்சியர் திரு. ஹெச்.எஸ். ஸ்ரீகாந்த் தெரிவித்துள்ளார். இது குறித்து அவர் வெளியிட்டுள்ள விரிவான செய்திக்குறிப்பில் தெரிவித்துள்ளதாவது:

குழு விபத்து காப்பீட்டுத் திட்டம்

தேசிய மீன்வள மேம்பாட்டு வாரியம் (NFDB) மூலம் ஒருங்கிணைக்கப்படும் இத்திட்டம் கடந்த 18.10.2021 முதல் நடைமுறையில் உள்ளது. மீன்பிடித் தொழில் என்பது இயற்கைப் பேரிடர்கள் மற்றும் எதிர்பாராத விபத்துகள் நிறைந்த ஒன்றாக இருப்பதால், மீனவர்களின் குடும்பங்களுக்குப் பொருளாதாரப் பாதுகாப்பு அளிப்பதே இத்திட்டத்தின் நோக்கம்.

காப்பீட்டுத் தொகையின் விவரங்கள்

இத்திட்டத்தின் கீழ் தகுதியுள்ள மீனவர்களுக்கு பின்வரும் நிதியுதவிகள் காப்பீட்டு நிறுவனங்கள் மூலம் வழங்கப்படுகின்றன.

* மரணம் அல்லது நிரந்தர ஊனம்: மீன்பிடிக்கச் செல்லும் போது எதிர்பாராத விதமாக விபத்தில் உயிரிழக்க நேரிட்டாலோ, உடல் உறுப்புகளை இழந்து நிரந்தர ஊனம் அடைந்தாலோ அல்லது கடலில் காணாமல் போனாலோ அவர்களின் குடும்பத்தினருக்கு ரூ. 5,00,000 (ஐந்து லட்சம் ரூபாய்) காப்பீட்டுத் தொகையாக வழங்கப்படும்.

*பகுதி ஊனம்: விபத்தின் காரணமாகத் தொழில் செய்ய இயலாத வகையில் ஊனம் ஏற்படும் நிகழ்வுகளில் ரூ. 2,50,000 (இரண்டரை லட்சம் ரூபாய்) விடுவிக்கப்படும்.

*மருத்துவச் செலவுகள்: விபத்தினால் ஏற்படும் காயங்களுக்குச் சிகிச்சை பெற மருத்துவச் செலவினங்களை ஈடு செய்ய ரூ. 25,000 வரை காப்பீடு வழங்கப்படுகிறது.

தேசிய மீன்வள டிஜிட்டல் தளத்தில் (NFDP) பதிவு அவசியம்

மத்திய அரசின் புதிய வழிகாட்டுதல்களின்படி, வரும் ஆண்டிற்கான (2026-27) காப்பீட்டுப் பலன்களைப் பெற வேண்டுமானால், மீனவர்கள் அனைவரும் கண்டிப்பாக தேசிய மீன்வள டிஜிட்டல் தளத்தில் (National Fisheries Digital Platform - NFDP) பதிவு செய்திருக்க வேண்டும்.

இந்த டிஜிட்டல் தளத்தில் பதிவு செய்யப்பட்ட மீனவர்கள் மற்றும் மீனவ மகளிரின் விவரப் பட்டியலை மட்டுமே தேசிய மீன்வள மேம்பாட்டு வாரியம் காப்பீட்டு நிறுவனங்களுக்குப் பரிந்துரைக்கும். இதற்கான காலக்கெடுவை வாரியம் நிர்ணயித்துள்ளது. அதன்படி, பதிவு செய்யப்பட்ட மீனவர்களின் விவரங்கள் வரும் 10.04.2026-க்குள் காப்பீட்டு நிறுவனங்களுக்கு அனுப்பப்பட வேண்டும். எனவே, அதற்கு முன்னதாகவே அனைத்து மீனவர்களும் தங்களைப் பதிவு செய்துகொள்வது அவசியமாகும்.

விழிப்புணர்வு முகாம்கள் மற்றும் பதிவு செய்யும் முறை

மயிலாடுதுறை மாவட்டத்திலுள்ள அனைத்து மீனவக் கிராமங்களிலும் உள்ள தகுதியான மீனவர்கள் மற்றும் மீனவ மகளிர், இந்த அரிய வாய்ப்பைப் பயன்படுத்திக் கொள்ளுமாறு கேட்டுக்கொள்ளப்பட்டுள்ளனர்.

*பதிவு செய்யும் இடம்: மீனவர்கள் தங்களுக்கு அருகாமையில் உள்ள அரசு அங்கீகாரம் பெற்ற பொது சேவை மையங்களை (e-Seva Centers) அணுகித் தேவையான ஆவணங்களைச் சமர்ப்பித்து NFDP தளத்தில் பதிவு செய்துகொள்ளலாம்.

* நடவடிக்கைகள்: இத்திட்டம் குறித்த விழிப்புணர்வை மீனவ கிராமங்களில் ஏற்படுத்தவும், பதிவு செய்யும் பணிகளை விரைவுபடுத்தவும் மீன்வளத்துறை மூலம் சிறப்பு விழிப்புணர்வு முகாம்கள் நடத்த மாவட்ட நிர்வாகம் உத்தரவிட்டுள்ளது.

தொடர்பு கொள்ள வேண்டிய அலுவலர்கள்

பதிவு செய்வது குறித்தோ அல்லது காப்பீட்டுத் திட்டம் குறித்தோ கூடுதல் விவரங்கள் மற்றும் சந்தேகங்கள் இருந்தால் மீனவர்கள் பின்வரும் மீன்வளத்துறை அலுவலர்களைத் தொடர்பு கொள்ளலாம்:

 * மீன்வள ஆய்வாளர்: 79044 28026

 * மீன்வள சார் ஆய்வாளர்: 63698 64872

* உதவி இயக்குநர் அலுவலகம் (மீன்வளம் மற்றும் மீனவர் நலத்துறை): 04364 271455

"மயிலாடுதுறை மாவட்டத்தின் பொருளாதாரத் தூண்களாகத் திகழும் மீனவர்களின் பாதுகாப்பு மிக முக்கியமானது. எந்தவொரு மீனவரும் காப்பீட்டுப் பலன் கிடைக்காமல் விடுபடக் கூடாது என்பதே எங்களது நோக்கம். எனவே, காலதாமதமின்றி அனைவரும் டிஜிட்டல் தளத்தில் பதிவு செய்து பயன்பெறுங்கள்," என மாவட்ட ஆட்சியர் ஹெச்.எஸ்.ஸ்ரீகாந்த் வேண்டுகோள் விடுத்துள்ளார்.