mayiladuthurai

தவெக மாவட்ட செயலாளருக்கு அரசு மேடையில் முதல் மரியாதை? மயிலாடுதுறையில் தொடரும் சர்ச்சை!

எஸ்.ஜெகநாதன், மயிலாடுதுறை — Wed, 7 Oct 2026 18:25:17 +0530

மயிலாடுதுறை: மயிலாடுதுறை நகராட்சிக்குட்பட்ட தனியார் திருமண மண்டபத்தில், சமூக நலம் மற்றும் மகளிர் உரிமைத் துறையின் கீழ் இயங்கும் ஒருங்கிணைந்த குழந்தை வளர்ச்சித் திட்டப் பணிகள் துறை சார்பில் முந்திய ஆட்சியாளர்களால் கொண்டுவரப்பட்ட சமுதாய வளைகாப்பு விழா இன்று நடைபெற்றது.

மாவட்ட நிர்வாகம் சார்பில் ஒருங்கிணைக்கப்பட்ட இந்த அரசு விழாவில், மயிலாடுதுறை மற்றும் குத்தாலம் வட்டாரங்களைச் சேர்ந்த சுமார் 200 கர்ப்பிணி தாய்மார்களுக்கு சமுதாய வளைகாப்பு நடத்தப்பட்டு, சீர்வரிசை பொருட்கள் வழங்கும் நிகழ்வுகள் ஏற்பாடு செய்யப்பட்டிருந்தன. விழாவுக்கு வந்திருந்த கர்ப்பிணி பெண்களுக்கு மாவட்ட ஆட்சியர் ஹெச்.எஸ்.ஸ்ரீகாந்த் மற்றும் மயிலாடுதுறை சட்டமன்ற உறுப்பினர் ஜமால் முகமது யூனுஸ் ஆகியோர் குத்துவிளக்கேற்றி நிகழ்வை முறைப்படி தொடங்கி வைத்தனர்.

தொடர்ந்து, பயனாளிகளுக்கு தாம்பூலத்தில் புடவை, மங்கலப் பொருட்கள், பூமாலை, வளையல், இனிப்புகள் மற்றும் ஐந்து வகையான சுவையான உணவுகள் அடங்கிய சீர்வரிசைகளை அதிகாரிகளும் மக்கள் பிரதிநிதிகளும் இணைந்து வழங்கினர்.

தமிழ்நாடு அரசு சமூக நலம் மற்றும் மகளிர் உரிமைத் துறை மூலம் செயல்படுத்தும் ஒருங்கிணைந்த குழந்தை வளர்ச்சிப் பணிகள் திட்டம், பிறந்தது முதல் 6 வயதிற்குட்பட்ட குழந்தைகள், கர்ப்பிணிப் பெண்கள், பாலூட்டும் தாய்மார்கள் மற்றும் வளரிளம் பெண்களின் ஊட்டச்சத்து நிலையை மேம்படுத்துவதில் பெரும் பங்காற்றி வருகிறது. வருமான வரம்பு ஏதுமின்றி தகுதியுடைய அனைத்து பொதுமக்களும் தங்களுக்கு அருகில் உள்ள அங்கன்வாடி மையங்களில் பதிவு செய்து பயன்பெறும் வகையில் இத்திட்டம் வடிவம் பெற்றுள்ளது.

இதன் மூலம் 6 மாதம் முதல் 2 வயது வரையிலான குழந்தைகளுக்கு குறிப்பிட்ட அளவீடுகளில் சத்துமாவு பாக்கெட்டுகள், வாரம் மூன்று முட்டைகள் மற்றும் கடுமையான ஊட்டச்சத்து குறைபாடுள்ள குழந்தைகளுக்குச் செறிவூட்டப்பட்ட பிஸ்கெட்டுகள் உள்ளிட்டவை தொடர்ச்சியாக வழங்கப்பட்டு வருகின்றன.

தொடர்கதையாகும் சர்ச்சை:

இத்தகைய மகத்தான நோக்கம் கொண்ட அரசு திட்டத்தின் விழா நகரில் நடைபெற்ற நிலையில், நிகழ்வின் பின்னணியில் எழுந்த அரசியல் தலையீடு தற்போது பெரும் விவாதத்தைக் கிளப்பியுள்ளது.

அரசு நிர்வாகத்தின் வழிகாட்டுதல்களின்படி நடத்தப்பட்ட இந்த அதிகாரப்பூர்வ விழாவில், துறை சார்ந்த மாவட்ட திட்ட அலுவலர் பிரபா, குழந்தை வளர்ச்சித் திட்ட அலுவலர் கிருத்திகா மற்றும் மயிலாடுதுறை வட்டாட்சியர் விஜயராகவன் உள்ளிட்ட முக்கிய அரசு அதிகாரிகள் பலர் கலந்துகொண்டனர்.

இருப்பினும், அதிகாரப்பூர்வமாக அரசுப் பொறுப்பிலோ அல்லது மக்கள் பிரதிநிதித்துவப் பொறுப்பிலோ இல்லாத தமிழக வெற்றிக் கழகத்தின் (தவெக) மயிலாடுதுறை மாவட்ட செயலாளர் கோபிநாத் மேடையில் சிறப்பு முக்கியத்துவம் அளிக்கப்பட்டதாக குற்றச்சாட்டு எழுந்துள்ளது. விழாவின் முன்வரிசையில் அமரவைக்கப்பட்ட அவர், மாவட்ட ஆட்சியர் மற்றும் சட்டமன்ற உறுப்பினருக்கு இணையாக மேடையில் நின்று கர்ப்பிணி பெண்களுக்கு அரசு சார்பில் தயார் செய்யப்பட்ட சீர்வரிசைப் பொருட்களை நேரில் வழங்கியுள்ளார்.

அரசு விதிமுறைகள் மீறப்படுவதாக புகார்

அரசு விழாக்கள் மற்றும் திட்ட உதவிகள் வழங்கும் நிகழ்வுகளில், சம்பந்தப்பட்ட நிர்வாக அதிகாரிகளும் தேர்ந்தெடுக்கப்பட்ட மக்கள் பிரதிநிதிகளும் மட்டுமே முன்னின்று நடத்துவப்பது வழக்கமான நடைமுறையாகும். ஆனால், அரசுக்கு எவ்விதத்திலும் தொடர்பு இல்லாத கட்சியின் மாவட்ட பொறுப்பாளர் ஒருவர், அரசு இயந்திரத்தின் அதிகாரப்பூர்வ மேடையில் நேரடியாகப் பங்கேற்று நலத்திட்ட உதவிகளை வழங்கியது அப் பகுதியில் பெரும் அதிர்வலைகளை ஏற்படுத்தியுள்ளது.

ஏற்கனவே சில தினங்களுக்கு முன்பு நடைபெற்ற அரசு சார்ந்த 'தாய்மாமன் தங்க மோதிரம்' வழங்கும் விழாவிலும், தவெக மாவட்ட செயலாளர் கோபிநாத் மாவட்ட ஆட்சியருடன் இணைந்து மோதிரங்களை வழங்கியது பெரும் சர்ச்சையை ஏற்படுத்தியிருந்தது.

அந்த சர்ச்சை ஓய்வதற்குள்ளாகவே, தற்போது ஒருங்கிணைந்த குழந்தை வளர்ச்சித் திட்டத்தின் வளைகாப்பு விழாவிலும் அதே நபர் முன்வரிசையில் பங்கேற்று சீர்வரிசைகளை வழங்கியிருப்பது தொடர்கதையாக மாறியுள்ளது. அரசு அதிகாரிகளும் நிர்வாகமும் எந்த அடிப்படையில் ஒரு குறிப்பிட்ட அரசியல் கட்சியின் மாவட்ட செயலாளருக்கு அரசு மேடைகளில் இத்தகைய முக்கியத்துவத்தை மீண்டும் மீண்டும் வழங்குகிறார்கள் என்ற கேள்வியை பொதுமக்கள் மற்றும் சமூக ஆர்வலர்கள் பலமாக எழுப்பி வருகின்றனர்.

அரசு விழாக்களில் பொது விதிமுறைகள் மீறப்படுவதாகவும், கட்சிச் சார்பற்ற முறையில் நடைபெற வேண்டிய நிகழ்ச்சிகள் அரசியல் ஆதாயத்திற்காகப் பயன்படுத்தப்படுவதாகவும் பொதுமக்கள் தங்களது கடுமையான அதிர்ச்சியையும் அதிருப்தியையும் பதிவு செய்து வருகின்றனர்.

மயிலாடுதுறை மாவட்டத்தில் நீளும் குண்டாஸ் பட்டியல்... இதுவரை 67 கைது...!

எஸ்.ஜெகநாதன், மயிலாடுதுறை — Wed, 7 Oct 2026 17:23:42 +0530

மயிலாடுதுறை மாவட்டத்தில் நடப்பாண்டில் பல்வேறு வழக்குகளில் தொடர்புடைய குற்றவாளிகள் 67 பேர் இதுவரை குண்டாஸ் வழக்கில் கைது செய்யப்பட்டு சிறையில் அடைக்கப்பட்டுள்ளனர்.

மயிலாடுதுறை: மயிலாடுதுறை மாவட்டத்தில் போக்சோ வழக்கிலும், பொது அமைதிக்கு பங்கம் விளைவித்த வழக்கிலும் கைது செய்யப்பட்ட இரு ரவுடிகள் மீது குண்டர் தடுப்புச் சட்டம் பாய்ந்துள்ளது. மாவட்ட ஆட்சியரின் உத்தரவின் பேரில் இருவரும் கடலூர் மத்திய சிறையில் அடைக்கப்பட்டுள்ளனர்.

போக்சோ வழக்கு மற்றும் ரவுடிசம்

மயிலாடுதுறை மாவட்டம், குத்தாலம் தாலுகா, கஞ்சனூர் புதுத்தெருவைச் சேர்ந்த சித்திருப்பு என்பவரது மகன் மூர்த்தி (44), என்பவர் கடந்த 05.09.2026 அன்று 17 வயது சிறுமியிடம் பாலியல் அத்துமீறலில் ஈடுபட்டதாக மயிலாடுதுறை அனைத்து மகளிர் காவல் நிலையத்தில் வழக்குப்பதிவு செய்யப்பட்டது. அதனைத் தொடர்ந்து ஆய்வாளர் அழகம்மாள் விசாரணையை மேற்கொண்டு, போக்சோ சட்டத்தின் கீழ் மூர்த்தியைக் கைது செய்து நீதிமன்றக் காவலுக்கு அனுப்பினார்.

அதேபோல, சீர்காழி பகுதியைச் சேர்ந்த சரித்திர பதிவேடு குற்றவாளியான கொண்டல் வள்ளுவக்குடி வடக்கு தெரு, ஏசுப்பிள்ளை என்பவரது மகன் விக்னேஷ் (22), என்பவர் கடந்த 13.09.2026 அன்று பொதுமக்களை அச்சுறுத்தும் வகையிலும், பொது அமைதிக்கு பங்கம் விளைவிக்கும் வகையிலும் செயல்பட்டதால் சீர்காழி காவல் நிலையத்தில் வழக்குப் பதிவு செய்யப்பட்டு சிறையில் அடைக்கப்பட்டார்.

குண்டர் சட்டத்தின் கீழ் நடவடிக்கை

தொடர்ந்து சட்டவிரோதச் செயல்களில் ஈடுபட்டு வந்த இவ்விருவர் மீதும் குண்டர் தடுப்புச் சட்டத்தின் கீழ் நடவடிக்கை எடுக்க மயிலாடுதுறை மாவட்ட காவல் கண்காணிப்பாளர் Dr. B.சினேஹா பிரியா, மாவட்ட ஆட்சியருக்குப் பரிந்துரை செய்தார். இதனை ஏற்றுக்கொண்ட மாவட்ட ஆட்சியர், இருவரையும் குண்டர் சட்டத்தின் கீழ் சிறையிலடைக்க உத்தரவிட்டார். இந்த உத்தரவின் அடிப்படையில், மூர்த்தி மற்றும் விக்னேஷ் ஆகிய இருவரும் கடலூர் மத்திய சிறையில் அடைக்கப்பட்டனர்.

நடப்பாண்டில் 67 பேர் மீது பாய்ந்த குண்டாஸ்

மயிலாடுதுறை மாவட்டத்தில் நடப்பாண்டில் (2026) குற்றச் செயல்களில் ஈடுபட்டவர்கள் மீது தீவிர நடவடிக்கை எடுக்கப்பட்டு வருகிறது. அதன்படி இதுவரை;

* கொலை வழக்குகள்: 05 நபர்கள்

* பொது அமைதிக்கு பங்கம் விளைவித்தல்:26 நபர்கள்

* மதுவிலக்கு குற்றங்கள்: 10 நபர்கள்

* கஞ்சா விற்பனை: 21 நபர்கள்

* குட்கா விற்பனை: 01 நபர்

* பாலியல் குற்றங்கள்: 04 நபர்கள்

என மொத்தம் 67 நபர்கள் குண்டர் தடுப்புச் சட்டத்தின் கீழ் கைது செய்யப்பட்டு சிறையில் அடைக்கப்பட்டுள்ளனர்.

மாவட்ட காவல் கண்காணிப்பாளர் எச்சரிக்கை

சமூக விரோதச் செயல்களில் ஈடுபடுபவர்களின் நடவடிக்கைகள் தொடர்ந்து தீவிரமாகக் கண்காணிக்கப்பட்டு வருவதாக மயிலாடுதுறை மாவட்ட காவல் கண்காணிப்பாளர் dr.சினேஹா பிரியா தெரிவித்துள்ளார். மேலும், பொதுமக்களை அச்சுறுத்தும் ரவுடிகள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடுவோர், கஞ்சா மற்றும் தடைசெய்யப்பட்ட புகையிலைப் பொருட்களை விற்பனை செய்வோர் மீது தயவுதாட்சண்யமின்றி குண்டர் தடுப்புச் சட்டத்தின் கீழ் கடும் நடவடிக்கை எடுக்கப்படும் என்றும் அவர் எச்சரித்துள்ளார்.

பாதுகாக்கப்பட்டு ரகசியம்

மேலும், மாவட்டத்தில் கஞ்சா மற்றும் போதைப்பொருட்கள் நடமாட்டத்தைக் கட்டுப்படுத்த தனிப்படைகள் அமைக்கப்பட்டுத் தீவிரக் கண்காணிப்புப் பணிகள் மேற்கொள்ளப்பட்டு வருகின்றன. பொதுமக்கள் தங்கள் பகுதியில் நடைபெறும் சட்டவிரோதச் செயல்கள் மற்றும் சந்தேகத்திற்கிடமான நபர்கள் குறித்து எவ்வித அச்சமுமின்றி காவல்துறைக்கு உடனடியாகத் தகவல் தெரிவிக்கலாம் எனவும், தகவல் தெரிவிப்பவர்களின் விவரங்கள் ரகசியமாகப் பாதுகாக்கப்படும் என்றும் காவல்துறை தரப்பில் தெரிவிக்கப்பட்டுள்ளது.

ரூ.100 கோடி மோசடி வழக்கு: சட்ட சிக்கல் தீர்க்கும் சீர்காழி சட்டநாதர் கோயிலில் தஞ்சம் அடைந்த முன்னாள் அமைச்சர் அன்பில் மகேஷ்!

எஸ்.ஜெகநாதன், மயிலாடுதுறை — Wed, 7 Oct 2026 14:07:30 +0530

சீர்காழி: மயிலாடுதுறை மாவட்டம் சீர்காழியில் வரலாற்றுச் சிறப்புமிக்க தருமபுரம் ஆதீனத்திற்குச் சொந்தமான பிரசித்தி பெற்ற சட்டநாதர் திருக்கோயில் அமைந்துள்ளது. சைவ சமயக் குரவர்களில் ஒருவரான திருஞானசம்பந்தப் பெருமான் தனது முதல் தேவாரப் பதிகத்தைப் பாடி அருளிய பெருமைக்குரியத் தலமாக இந்த மலைக் கோயில் திகழ்கிறது.

சிவபெருமான் இங்கு மூன்று நிலைகளில் எழுந்தருளி பக்தர்களுக்கு அருள் பாலிக்கிறார். குறிப்பாக, மலை மீது வீற்றிருக்கும் சட்டநாதரை மனமுருகி வழிபடுபவர்களுக்கு எத்தகைய கடுமையான சட்டச் சிக்கல்களும், வழக்கு விவகாரங்களும் உடனடியாக விலகி நன்மைகள் நடக்கும் என்பது தொன்றுதொட்டு நிலவி வரும் ஆன்மீக நம்பிக்கையாகும்.

இதன் காரணமாகவே வாரம் தோறும் வெள்ளிக்கிழமை இரவில் சட்டநாத பெருமானுக்கு நடைபெறும் சிறப்புமிக்க சுக்கிர வார பூஜையில் ஆயிரக்கணக்கான பக்தர்கள் பல ஊர்களில் இருந்தும் வருகை தந்து சுவாமி தரிசனம் செய்வதை வழக்கமாகக் கொண்டுள்ளனர்.

பிரசித்தி பெற்ற சன்னதிகளில் சாமி தரிசனம்

இத்தகைய மகத்துவமும் ஆன்மீகச் சிறப்பும் வாய்ந்த சீர்காழி சட்டநாதர் திருக்கோயிலுக்குத் தமிழகத்தின் முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழி திடீர் வருகை தந்தார். கோயிலுக்கு வந்த அவருக்குத் திருக்கோயில் நிர்வாகம் சார்பில் உரிய வரவேற்பு அளிக்கப்பட்டது.

தொடர்ந்து அவர் கோயிலில் உள்ள விநாயகர், பிரம்மபுரீஸ்வரர், தோனியப்பர், சட்டநாதர், முருகன் மற்றும் திருநிலைநாயகி அம்பாள் ஆகிய முக்கியச் சன்னதிகளுக்கு நேரில் சென்று மிக தீவிரமாக வழிபாடு நடத்தினார்.

சாமி தரிசனம் முடிந்ததும் அவருக்குக் கோயில் சிவாச்சாரியார்கள் சிறப்பு தீபாராதனை காட்டி, சுவாமி படங்கள் மற்றும் புனிதப் பிரசாதங்களை வழங்கி ஆசிகளையும் வாழ்த்துகளையும் தெரிவித்தனர்.

தாடாளன் பெருமாள் கோயிலில் நெகிழ்ச்சி சம்பவம்

சட்டநாதர் கோயிலில் வழிபாட்டை நிறைவு செய்த முன்னாள் அமைச்சர் அன்பில் மகேஷ் பொய்யாமொழி, அதனைத் தொடர்ந்து 108 திவ்ய தேசங்களில் ஒன்றாகப் போற்றப்படுவதும், திருமங்கை ஆழ்வாரால் மங்களாசாசனம் செய்யப்பட்டதுமான சீர்காழி தாடாளன் கோயில் என்று அழைக்கப்படும் திருவிக்ரம நாராயண பெருமாள் கோயிலுக்குச் சென்றார். அங்கு பெருமாளை மனதாரச் சேவித்து வழிபட்டுக் கொண்டிருந்தபோது, எதிர்பாராத நெகிழ்ச்சியான சம்பவம் ஒன்று நடைபெற்றது.

அங்கு வந்த ஓய்வுபெற்ற தமிழ் பண்டிட் மூதாட்டி ஒருவர், முன்னாள் அமைச்சர் அன்பில் மகேஷின் கரங்களைப் பற்றிப் பிடித்துக் கொண்டு, உங்களது அமைச்சர் பதவிக் காலத்தில் நீங்கள் ஆற்றிய சிறப்பான சேவைகளையும் சாதனைகளையும் நான் மிகவும் ரசித்தேன் என்றும், உங்களது கல்விப் பணிகள் என்றும் மறக்க முடியாத பாராட்டுகளுக்குரியவை என்றும் நெகிழ்ச்சியுடன் கூறித் தனது மனமார்ந்த பாராட்டுகளைத் தெரிவித்தார்.

மத்தியக் குற்றப்பிரிவு வழக்கு பின்னணி

முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழி மீது சென்னை மத்தியக் குற்றப்பிரிவு போலீசார் அண்மையில் வழக்குப் பதிவு செய்துள்ளனர். கடந்த ஆட்சிக் காலத்தில் தனியார் பள்ளிகளுக்கு நிரந்தர அங்கீகாரம் வழங்குதல், பள்ளிகளின் நிலையைத் தரம் உயர்த்துதல் மற்றும் கட்டடங்களுக்கான டி.டி.சி.பி, சி.எம்.டி.ஏ வரைபட அனுமதிகளைப் பெற்றுத் தருவதாகக் கூறி சுமார் நூறு கோடி ரூபாய்க்கும் மேல் முறைகேடாகப் பணம் வசூலித்து மோசடி செய்ததாக அவர் மீது கடுமையான புகார்கள் எழுந்தன.

இந்த விவகாரம் தொடர்பாகச் சென்னை மற்றும் திருச்சியில் உள்ள அவருக்குச் சொந்தமான இடங்களில் மத்தியக் குற்றப்பிரிவு போலீசார் சோதனைகளை நடத்தி, அவரை நேரில் வரவழைத்து பல மணி நேரம் தீவிர விசாரணையையும் மேற்கொண்டனர்.

நீதிமன்ற வழக்கு மற்றும் ஆன்மீக வழிபாடு

தன் மீது காவல்துறையினரால் பதிவு செய்யப்பட்டுள்ள இந்த முதல் தகவல் அறிக்கையை ரத்து செய்யக் கோரி முன்னாள் அமைச்சர் அன்பில் மகேஷ் பொய்யாமொழி சென்னை உயர் நீதிமன்றத்தில் அவசர மனுத் தாக்கல் செய்திருந்தார். இருப்பினும், அவர் மீதான வழக்கை உடனடியாக ரத்து செய்ய மறுத்த உயர் நீதிமன்றம், இந்த மோசடி புகார் குறித்து காவல்துறை விரிவான பதிலளிக்க வேண்டும் என உத்தரவிட்டுள்ளது.

இத்தகைய சூழலில், வழக்குகள் மற்றும் சட்ட ரீதியான சிக்கல்களைத் தீர்க்கும் பரிகாரத் தலமாக விளங்கும் சீர்காழி சட்டநாதர் கோயிலுக்கு முன்னாள் அமைச்சர் நேரில் வருகை தந்து சிறப்புச் சன்னதிகளில் தீவிர வழிபாடு நடத்தியிருப்பது அரசியல் வட்டாரத்திலும் ஆன்மீக அன்பர்களிடையேயும் பெரும் கவனத்தை ஏற்படுத்தியுள்ளது.

மயிலாடுதுறையில் கொடூர விபத்து: பொறியியல் கல்லூரி மாணவன் பலி - புதுமணத் தம்பதி உள்ளிட்ட மூவர் கவலைக்கிடம்!

எஸ்.ஜெகநாதன், மயிலாடுதுறை — Wed, 7 Oct 2026 10:53:50 +0530

மயிலாடுதுறை: மயிலாடுதுறை மாவட்டம் மயிலாடுதுறை அருகேயுள்ள மாப்படுகை கிராமத்தைச் சேர்ந்தவர் ஆசிரியர் மணிமாறன். இவருடைய 20 வயதான மகன் சுபிக்ஷன் தனியார் கல்லூரியில் பொறியியல் படித்து வந்தார். சுபிக்ஷன் தனது நண்பரான மயிலாடுதுறை தனியூர் சாலிய தெருவைச் சேர்ந்த சீனிவாசன் மகன் 28 வயதான ஸ்ரீராம் என்பவருடன் இருசக்கர வாகனத்தில் குத்தாலம் பகுதியிலிருந்து மயிலாடுதுறை நோக்கி புறப்பட்டு சென்று கொண்டிருந்தார்.

இந்த பயணத்தின் போது ஸ்ரீராம் இருசக்கர வாகனத்தை இயக்கி வந்துள்ளார். வாலிபர்கள் இருவரும் தங்களது பயணத்தை வழக்கம்போல தொடர்ந்த நிலையில், மகாதானபுரம் அருகே அவர்கள் வந்தபோது எதிர்பாராதவிதமாக ஒரு பெரிய அசம்பாவிதம் காத்திருந்தது.

முந்திச்செல்ல முயன்றபோது நேரிட்ட கொடூர விபத்து

மகாதானபுரம் சாலையில் இருசக்கர வாகனம் அதிவேகமாக சென்று கொண்டிருந்தபோது, அவர்களுக்கு முன்னால் சென்றுகொண்டிருந்த ஒரு பேருந்தை கடந்து முந்திச்செல்ல ஸ்ரீராம் முயற்சி செய்துள்ளார். அப்போது எதிரே மற்றொரு இருசக்கர வாகனம் வந்துகொண்டிருந்தது. கண்ணிமைக்கும் நேரத்திற்குள் இரண்டு இருசக்கர வாகனங்களும் பயங்கர சத்தத்துடன் நேருக்கு நேர் மோதி விபத்துக்குள்ளாகின.

இந்த அதிர்ச்சிகரமான மோதலின் வீரியத்தில் வாகனங்களில் வந்த அனைவரும் சாலையில் தூக்கி வீசப்பட்டனர். இதில் பலத்த காயமடைந்த கல்லூரி மாணவன் சுபிக்ஷன், ரத்த வெள்ளத்தில் சம்பவ இடத்திலேயே பரிதாபமாக உயிரழந்தார்.

திருமணமான 10 நாட்களில் தம்பதிக்கு நேர்ந்த சோகம்

எதிரே வந்த இருசக்கர வாகனத்தில் பயணித்தவர்கள் மயிலாடுதுறை தருமபுரம் ரோட்டைச் சேர்ந்த முகமது ரமீஸ் என்பவரின் 19 வயது மகள் பாத்திமா ஜெப்ரானா மற்றும் அவருடைய கணவர் நாகூர் பனங்குடியைச் சேர்ந்த 22 வயதான அப்துல் சர்தார் என்பதும் தெரியவந்தது. இவர்களுக்கு திருமணமாகி வெறும் பத்து நாட்களே ஆகியிருந்த நிலையில், பாத்திமா ஜெப்ரானாவின் தந்தை கீழே விழுந்து உடல்நலக்குறைவு ஏற்பட்டதால் அவரைக் காண்பதற்காக கணவருடன் மயிலாடுதுறைக்கு வந்துள்ளனர்.

தந்தையைப் பார்த்துவிட்டு மீண்டும் மயிலாடுதுறையிலிருந்து குத்தாலம் நோக்கி அவர்கள் இருசக்கர வாகனத்தில் பயணித்தபோதே இந்த கொடூர விபத்தில் சிக்கி படுகாயமடைந்தனர். புதுமணத் தம்பதிக்கு திருமணமான சில நாட்களிலேயே இத்தகைய சோகம் நேரிட்டது அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.

மருத்துவமனையில் உறவினர்கள் கண்ணீர் அஞ்சலி

விபத்து குறித்து தகவலறிந்த பொதுமக்கள் உடனடியாக 108 ஆம்புலன்ஸுக்கு தகவல் தெரிவித்தனர். அதன்பேரில் சம்பவ இடத்திற்கு விரைந்து வந்த ஆம்புலன்ஸ் ஊழியர்கள், படுகாயமடைந்த புதுமணத் தம்பதி பாத்திமா ஜெப்ரானா, அப்துல் சர்தார் மற்றும் வாலிபர் ஸ்ரீராம் ஆகிய மூவரையும் மீட்டு சிகிச்சைக்காக மயிலாடுதுறை மாவட்ட அரசு தலைமை மருத்துவமனைக்கு கொண்டு சென்றனர். அங்கு அவர்களுக்கு முதலுதவி சிகிச்சைகள் தீவிரமாக அளிக்கப்பட்டன.

விபத்து குறித்த தகவல் காட்டுத்தீ போல பரவியதையடுத்து, காயமடைந்தவர்களின் உறவினர்களும் நண்பர்களும் மருத்துவமனை வளாகத்தில் பெருந்திரளாகக் கூடினர். உயிரிழந்த மாணவனின் உடலைக் கண்டு உறவினர்கள் கதறி அழுத காட்சி காண்போரின் நெஞ்சை பதற வைத்தது.

மேல்சிகிச்சைக்காக தஞ்சாவூருக்கு இடமாற்றம்

மயிலாடுதுறை அரசு மருத்துவமனையில் அனுமதிக்கப்பட்ட மூவரின் உடல்நிலையும் மிகவும் கவலைக்கிடமாக இருந்ததால், மேல்சிகிச்சைக்காக தஞ்சாவூருக்கு கொண்டு செல்ல மருத்துவர்கள் பரிந்துரைத்தனர். அதன்படி படுகாயமடைந்த புதுமணத் தம்பதியினர் இருவரும் தஞ்சாவூரில் உள்ள தனியார் மருத்துவமனைக்கும், வாலிபர் ஸ்ரீராம் தஞ்சாவூர் அரசு மருத்துவக் கல்லூரி மருத்துவமனைக்கும் அவசர அவசரமாக அனுப்பி வைக்கப்பட்டனர். அங்கு அவர்களுக்கு அவசர சிகிச்சை பிரிவில் தீவிர சிகிச்சைகள் அளிக்கப்பட்டு வருகின்றன.

போலீசார் வழக்குப்பதிவு செய்து தீவிர விசாரணை

இச்சம்பவம் தொடர்பாக தகவலறிந்த குத்தாலம் காவல்நிலைய போலீசார் சம்பவ இடத்திற்கு விரைந்து சென்று விபத்து நடந்த பகுதியை பார்வையிட்டு ஆய்வு செய்தனர். மேலும் உயிரிழந்த மாணவன் சுபிக்ஷனின் உடலை உடற்கூறாய்வுக்காக கைப்பற்றிய போலீசார், விபத்து குறித்து வழக்குப்பதிவு செய்து தீவிர விசாரணை மேற்கொண்டு வருகின்றனர். அதிவேகமாக வாகனத்தை இயக்கியதும், பேருந்தை முந்திச்செல்ல முயன்றதுமே இந்த சோகத்திற்கு காரணம் என்று முதற்கட்ட விசாரணையில் தெரியவந்துள்ளது. கல்லூரி மாணவன் பலியானதும், புதுமணத் தம்பதி உட்பட மூவர் உயிருக்குப் போராடி வருவதும் மயிலாடுதுறை மற்றும் குத்தாலம் வட்டாரப் பகுதியில் பெரும் சோக அலையை ஏற்படுத்தியுள்ளது.

"என் பொண்டாட்டிய பாரு..." நண்பர்களிடம் லட்சக்கணக்கில் வசூல்: மயிலாடுதுறையில் ஒரு சைக்கோ கணவனின் கொடூரம்!

எஸ்.ஜெகநாதன், மயிலாடுதுறை — Wed, 7 Oct 2026 10:20:48 +0530

மயிலாடுதுறை: திருமணமான 15 நாட்களில் கணவரின் லீலைகள் அம்பலமானதால் அதிர்ச்சியடைந்த பட்டதாரி பெண், தன் கணவர் மீது கடும் நடவடிக்கை எடுக்கக் கோரி மயிலாடுதுறை மாவட்ட காவல் கண்காணிப்பாளரிடம் (எஸ்பி) கண்ணீர்மல்க புகார் அளித்துள்ளார்.

27 பெண்களுடன் தொடர்பில் இருந்ததோடு, மனைவியையும் நிர்வாணப்படுத்தி நண்பர்களுக்கு காண்பித்து பணம் பறித்த கொடூர சம்பவம் அப்பகுதியில் பெரும் பரபரப்பை ஏற்படுத்தியுள்ளது.

சீர்காழி அருண் - காரைக்கால் பெண் திருமணமும்

மயிலாடுதுறை மாவட்டம், சீர்காழி தாலுகா மங்கைமடம் பகுதியைச் சேர்ந்தவர் அருண் (36). ஐடிஐ வரை பயின்றுள்ள இவர், சிங்கப்பூரில் கார் ஓட்டுநராக பணியாற்றி வந்துள்ளார். இவருக்கும், புதுச்சேரி மாநிலம் காரைக்காலைச் சேர்ந்த 25 வயதான பி.காம் பட்டதாரி பெண்ணிற்கும் இடையே கடந்த ஜூலை மாதம் 12-ஆம் தேதி பெற்றோர் முன்னிலையில் விமரிசையாக திருமணம் நடைபெற்றது.

திருமணத்தின் போது மணமகளின் பெற்றோர் தங்களால் முடிந்தளவு 10 சவரன் தங்க நகைகளை வரதட்சணையாகக் கொடுத்து, தன் மகளின் வாழ்க்கை சிறப்பாக இருக்கும் என்ற நம்பிக்கையுடன் அனுப்பி வைத்தனர்.

செல்போன் சந்தேகமும் வெளிவந்த அதிர்ச்சி உண்மையும்

திருமணமான புதிதிலேயே அருணின் நடவடிக்கைகள் மனைவிக்கு சந்தேகத்தை ஏற்படுத்தின. அருண் எப்போதும் தனது செல்போனில் பெண்களிடம் தகாத முறையில் பேசி வந்ததோடு, நள்ளிரவு நேரங்களில் வீடியோ கால்களிலும் பேசி வந்துள்ளார். கணவனின் நடத்தையில் சந்தேகம் அடைந்த மனைவி, ஒரு நாள் அருண் தூங்கிக் கொண்டிருந்தபோது அவரது செல்போனை எடுத்து ஆய்வு செய்தார். அப்போது அதில் அதிர்ச்சியளிக்கும் தகவல்கள் வெளிவந்தன.

அருண் சுமார் 27-க்கும் மேற்பட்ட பெண்களுடன் நெருக்கமாக மற்றும் உல்லாசமாக இருந்த வீடியோக்கள் அந்த செல்போனில் சேமித்து வைக்கப்பட்டிருந்தன. இதைப்பார்த்து அதிர்ச்சியடைந்த அந்த பெண், உடனடியாக தனது கணவரிடம் இதுகுறித்து நியாயம் கேட்டுள்ளார்.

வரதட்சணை கொடுமை மற்றும் தாக்குதல்

தான் மாட்டிக்கொண்டதை உணர்ந்த அருண், மனைவியை தகாத வார்த்தைகளால் திட்டி, கொடூரமாகத் தாக்கியுள்ளார். மேலும், கூடுதல் நகையும் பணமும் பெற்றோர் வீட்டிலிருந்து வாங்கி வர வேண்டும் என்று கூறி அவரை சித்திரவதை செய்துள்ளார். இந்த அநியாயத்திற்கு அருணின் குடும்பத்தினரும் உடந்தையாக இருந்து அருணிற்கே ஆதரவாக செயல்பட்டுள்ளனர்.

கணவரின் தாக்குதலில் பலத்த காயமடைந்த அப்பெண், காரைக்கால் அரசு மருத்துவமனையில் அனுமதிக்கப்பட்டு சிகிச்சை பெற்றார். இதனிடையே, இதுகுறித்து பெண்ணின் குடும்பத்தினர் சீர்காழி அனைத்து மகளிர் காவல் நிலையத்தில் புகார் அளித்தனர். ஆனால், அந்த புகாரின் மீது மகளிர் காவல்துறையினர் எவ்வித உடனடி நடவடிக்கையும் எடுக்கவில்லை எனக் கூறப்படுகிறது.

எஸ்பியிடம் நேரில் கண்ணீர் புகார்

சீர்காழி காவல்துறையினர் நடவடிக்கை எடுக்காததால், பாதிக்கப்பட்ட பெண் தனது குடும்பத்தினருடன் மயிலாடுதுறை மாவட்ட காவல் கண்காணிப்பாளர் (எஸ்பி) சினேகா பிரியாவை நேரில் சந்தித்து கண்ணீருடன் புகார் மனு அளித்தார். மனுவைப் பெற்றுக்கொண்ட எஸ்பி, இந்த விவகாரம் குறித்து தீவிர விசாரணை நடத்தி குற்றவாளி மீது கடுமையான நடவடிக்கை எடுக்கப்படும் என உறுதியளித்தார்.

பாதிக்கப்பட்ட பெண்ணின் வாக்குமூலம்

இதுகுறித்து பாதிக்கப்பட்ட பெண் கூறுகையில்: "எனது கணவர் 27க்கும் மேற்பட்ட பெண்களுடன் தொடர்பில் இருந்ததும், அவர்களுடன் உல்லாசமாக இருந்த வீடியோக்கள் செல்போனில் இருந்ததும் தெரியவந்தது. இது குறித்து கேட்டதற்கு என்னை அடித்து துன்புறுத்தி, கூடுதல் நகை, பணம் கேட்டு சித்திரவதை செய்தார்.

திருமணம் முடிந்த 15 நாட்களிலேயே, மற்ற பெண்களுடன் இருக்கும் ஆபாச வீடியோக்களை எனக்குக் காண்பித்து, அதே போல் நடந்துகொள்ள வேண்டும் என வற்புறுத்தினார். முக்கியமாக, குரூப் வீடியோ காலில் வரும்போது என்னை ஆடைகளைக் கழற்றி நிர்வாணமாக நிற்கச் சொல்வார். அந்த குரூப் வீடியோவில் அவரது நண்பர்கள் இருப்பார்கள். என்னை நிர்வாணமாகக் காட்டி, தனது நண்பர்களிடமிருந்து லட்சக்கணக்கில் பணம் வசூலித்துள்ளார்.

சீர்காழி அனைத்து மகளிர் காவல் நிலையத்தில் புகார் அளித்தும் எந்தப் பலனும் இல்லை. கணவர் வெளியே சுதந்திரமாக சுற்றித்திரிகிறார். கட்டப்பஞ்சாயத்து செய்து எங்களை அச்சுறுத்துகிறார். என் வாழ்க்கை நாசமானது போல் வேறு எந்தப் பெண்ணின் வாழ்க்கையும் சீரழியக்கூடாது. எனக்கு உரிய நீதி கிடைக்க வேண்டும்." என வேதனையுடன் தெரிவித்துள்ளார்.

ஆபாச இணையதளங்களில் வீடியோ விற்பனை: அதிர்ச்சி பின்னணி

இச்சம்பவம் குறித்து காவல்துறை தரப்பில் விசாரிக்கையில் மேலும் பல திடுக்கிடும் தகவல்கள் வெளியாகியுள்ளன. அருண், தனது மனைவி மற்றும் பல பெண்களுடன் உல்லாசமாக இருக்கும் போது, அவர்களுக்குத் தெரியாமல் ரகசியமாக செல்போனில் வீடியோ எடுத்துள்ளார். அந்த வீடியோக்களைத் தனது நண்பர்களுக்கு அனுப்பி பணம் பெற்று வந்ததோடு மட்டுமல்லாமல், பிரபல ஆபாச இணையதளங்களிலும் (Pornographic Websites) பதிவேற்றம் செய்து விற்று பணம் சம்பாதித்து வந்துள்ளார் என்பது தெரியவந்துள்ளது.

தற்போது இச்சம்பவம் தொடர்பாக போலிசார் வழக்குப்பதிவு செய்து, அருணின் செல்போனை பறிமுதல் செய்து தீவிர விசாரணை மேற்கொண்டு வருகின்றனர். முழுமையான விசாரணைக்கு பிறகே இந்த விவகாரத்தில் பின்னணியில் உள்ள மற்ற நபர்கள் பற்றிய விவரங்கள் தெரியவரும் என காவல்துறை தரப்பில் தெரிவிக்கப்பட்டுள்ளது.

10 கிராம் தங்கப் பதக்கம் வெல்ல அரிய வாய்ப்பு! அரசு வெளியிட்ட அதிரடி அறிவிப்பு!

எஸ்.ஜெகநாதன், மயிலாடுதுறை — Tue, 6 Oct 2026 21:31:45 +0530

மயிலாடுதுறை: மயிலாடுதுறை மாவட்டத்தில் மாற்றுத்திறனாளிகளுக்காக அர்ப்பணிப்பு உணர்வுடன் சிறப்பாகச் சேவை புரிந்து வரும் தனிநபர்கள் மற்றும் அமைப்புகளைக் கௌரவிக்கும் பொருட்டு, 2026-ஆம் ஆண்டிற்கான மாநில விருதுகளுக்கு விண்ணப்பிக்க அறிவிப்பு வெளியாகியுள்ளது.

இது தொடர்பாக மயிலாடுதுறை மாவட்ட ஆட்சியர் ஹெச். எஸ். ஸ்ரீகாந்த், வெளியிட்டுள்ள அதிகாரப்பூர்வ செய்திக்குறிப்பில், தமிழக அரசின் மாற்றுத்திறனாளிகள் நலத் துறை சார்பில் ஆண்டுதோறும் வழங்கப்படும் விருதுகளுக்கான அறிவிப்புகளையும், விண்ணப்பிக்கும் முறைகளையும் விரிவாக எடுத்துரைத்துள்ளார்.

மாற்றுத்திறனாளிகளின் வாழ்வில் ஒளியேற்றி, அவர்களின் சமூகப் பங்களிப்பை ஊக்குவிக்கும் வகையில் வழங்கப்படும் இந்த விருதுகளுக்குத் தகுதியானவர்கள் விரைவாக விண்ணப்பிக்குமாறு கேட்டுக்கொள்ளப்பட்டுள்ளனர்.

விருதுகளின் நோக்கம் மற்றும் சிறப்பம்சங்கள்

தமிழ்நாட்டில் உள்ள மாற்றுத்திறனாளிகளுக்கான தொண்டு நிறுவனங்கள், சமூகப் பணியாளர்கள் மற்றும் சேவையாளர்கள் மேலும் ஊக்கத்துடனும் ஆர்வத்துடனும் பணியாற்றுவதை நோக்கமாகக் கொண்டு இந்த விருதுகள் நிறுவப்பட்டுள்ளன. ஒவ்வொரு ஆண்டும் டிசம்பர் 3-ஆம் தேதி உலக மாற்றுத்திறனாளிகள் தினம் விமரிசையாகக் கொண்டாடப்படும் வேளையில், தமிழ்நாடு முதலமைச்சரால் இந்த உயரிய விருதுகள் வழங்கி கௌரவிக்கப்படுவது வழக்கமாகும். வரும் 2026 டிசம்பர் 3 அன்று நடைபெறவுள்ள விழாவிலும், மாநில அளவில் பல்வேறுகட்ட சிறப்பான பங்களிப்புகளை வழங்கிய நபர் மற்றும் நிறுவனங்களுக்குத் தங்கப் பதக்கம் மற்றும் சான்றிதழ்கள் வழங்கிச் சிறப்பிக்கப்படவுள்ளன.

பல்வேறு பிரிவுகளின் கீழ் வழங்கப்படும் விருதுகள்

இந்த விருதுகள் பல்வேறு துறைசார்ந்த சேவைகளையும், பல்வேறு வகையான மாற்றுத்திறனாளிகளின் தன்னம்பிக்கையையும் அங்கீகரிக்கும் வகையில் விரிவாக வகைப்படுத்தப்பட்டுள்ளன. அந்த வகையில், மாநில அளவில் சிறந்த பணியாளர் மற்றும் சுயதொழில் புரியும் மாற்றுத்திறனாளிகளுக்கான விருதுகள் வழங்கப்படுகின்றன.

இதில் கை, கால் பாதிக்கப்பட்டோர், தொழுநோயிலிருந்து குணமடைந்தோர், பார்வைத் திறன் பாதிக்கப்பட்டோர், செவித் திறன் பாதிக்கப்பட்டோர் மற்றும் அறிவுசார் குறைபாடுடையோர் அடங்குவர். மேலும், பேச்சு மற்றும் மொழித்திறன் குறைபாடு, புறவுலக சிந்தனையற்றோர், குறிப்பிட்ட கற்றலில் குறைபாடு, மன நோய், இரத்த உறையாமை, இரத்த அழிவுச்சோகை, அரிவாளனு இரத்த சோகை போன்ற இரத்தக் கோளாறுகளால் பாதிக்கப்பட்டோர், நாள்பட்ட நரம்பியல் பாதிப்பு மற்றும் பல்வகைக் குறைபாடுடைய மாற்றுத்திறனாளிகள் வரை அனைவரும் இதில் சேர்வர். இவர்கள் ஒவ்வொருவருக்கும் 10 கிராம் எடையுள்ள தங்கப் பதக்கம் மற்றும் பாராட்டுச் சான்றிதழ் வழங்கப்படவுள்ளது.

அதேபோன்று, பார்வைத் திறன் மற்றும் செவித் திறன் குறைபாடுடைய மாணவர்களுக்குக் கற்பிக்கும் சிறந்த ஆசிரியர்களுக்கும், ஆரம்ப நிலை பயிற்சி மையங்களில் பயிலும் செவித்திறன் குறையுடையோருக்குக் கற்பிக்கும் சிறந்த ஆசிரியர்களுக்கும் புகழ்பெற்ற ஹெலன் கெல்லர் விருது வழங்கப்படுகிறது.

அறிவுசார் குறைபாடுடையோருக்குக் கற்பிக்கும் சிறந்த ஆசிரியர்கள் மற்றும் ஆரம்ப நிலை பயிற்சி மையங்களில் பணியாற்றும் அறிவுசார் சிறப்பு ஆசிரியர்களுக்கும் 10 கிராம் எடையுள்ள தங்கப் பதக்கமும் சான்றிதழும் வழங்கப்படவுள்ளன.

சிறந்த நிறுவனங்கள் மற்றும் சேவை அமைப்புகளுக்கான அங்கீகாரம்

தனிநபர்கள் மட்டுமன்றி, சமூகத்திற்கு முன்மாதிரியாகத் திகழும் பல்வேறு அமைப்புகளுக்கும் இந்த விருதுகள் வழங்கப்படுகின்றன. மாற்றுத்திறனாளிகளுக்கு அரும்பணியாற்றிய சிறந்த சமூகப் பணியாளர், சிறந்த தொண்டு நிறுவனம் மற்றும் மாற்றுத்திறனாளிகளை அதிக எண்ணிக்கையில் பணியமர்த்தி வாழ்வாதாரம் அளித்த சிறந்த நிறுவனம் ஆகியவற்றுக்கும் 10 கிராம் தங்கப் பதக்கம் மற்றும் சான்றிதழ் வழங்கப்படும். மேலும், அரசுப் போக்குவரத்துத் துறையில் மாற்றுத்திறனாளிகளுக்குச் சிறப்பான மற்றும் சுமுகமான சேவையை வழங்கிய சிறந்த ஓட்டுநர் மற்றும் நடத்துநருக்கும் இந்த விருது வழங்கி கௌரவிக்கப்படுகிறது.

பொதுக் கட்டடங்களில் மாற்றுத்திறனாளிகள் எவ்வித சிரமமுமின்றி எளிதாகச் சென்று வரக்கூடிய தடையற்ற கட்டமைப்புகளை ஏற்படுத்தியுள்ள சிறந்த அரசு மற்றும் தனியார் நிறுவனங்களும் கண்டறியப்பட்டு விருது வழங்கி ஊக்குவிக்கப்படவுள்ளன.

விண்ணப்பிக்கும் முறை மற்றும் கடைசி நாள்

மேற்காணும் அனைத்துப் பிரிவுகளின் கீழ் விருது பெறத் தகுதியும் விருப்பமும் உள்ளவர்கள், தமிழக அரசின் அதிகாரப்பூர்வ இணையதமான https://awards.tn.gov.in என்ற முகவரியின் வாயிலாக மட்டுமே விண்ணப்பிக்க வேண்டும். இணையதளம் மூலம் விண்ணப்பங்களைச் சமர்ப்பிக்க 22.10.2026 அன்று பிற்பகல் 5.00 மணி வரை கால அவகாசம் வழங்கப்பட்டுள்ளது.

ஆன்லைனில் விண்ணப்பித்த பின்னர், சமர்ப்பிக்கப்பட்ட விண்ணப்பத்தின் இரண்டு நகல்களைப் பதிவிறக்கம் செய்து, உரிய ஆவணங்களுடன் மயிலாடுதுறை மாவட்ட மாற்றுத்திறனாளிகள் நல அலுவலரிடம் நேரில் அல்லது தபால் மூலம் சமர்ப்பிக்க வேண்டும். இந்த நகல்களையும் 22.10.2026 பிற்பகல் 5.00 மணிக்குள் ஒப்படைக்க வேண்டும் என்பது கட்டாயமாகும். எனவே, மயிலாடுதுறை மாவட்டத்தைச் சேர்ந்த தகுதியான மாற்றுத்திறனாளிகள், சிறப்பு ஆசிரியர்கள், சமூகப் பணியாளர்கள், தொண்டு நிறுவனங்கள் மற்றும் தடையற்ற கட்டமைப்பு வசதிகளைச் செய்துள்ள நிறுவனங்கள் இந்த வாய்ப்பினைப் பயன்படுத்தி குறித்த நேரத்திற்குள் விண்ணப்பிக்குமாறு மாவட்ட ஆட்சியர் ஹெச். எஸ். ஸ்ரீகாந்த், கேட்டுக்கொண்டுள்ளார்.

மக்களுக்குக் கிடைத்த அதிகாரம்! கிராமங்களின் முகச்சாயலை மாற்றப் போகும் 'TN VETRI' திட்டம்!

எஸ்.ஜெகநாதன், மயிலாடுதுறை — Tue, 6 Oct 2026 15:02:27 +0530

மயிலாடுதுறை: மயிலாடுதுறை மாவட்டத்தில் கிராமப்புற மக்களின் நேரடி பங்களிப்புடன் வளர்ச்சித் திட்டப் பணிகளைத் தேர்வு செய்யும் 'டிஎன் வெற்றி' திட்டத்தின் மாதிரி முன்னெடுப்பு மாவட்டத்தில் அதிகாரப்பூர்வமாகத் தொடங்கியுள்ளது.

கிராமப்புறங்களின் கட்டமைப்பை மேம்படுத்தவும், மக்களின் உண்மையான தேவைகளை அறிந்து அவற்றைச் செயல்படுத்தவும் தமிழ்நாடு அரசால் 'டிஎன் வெற்றி' (TN VETRI - Tamil Nadu Village Empowerment Transformation and Rejuvenation Initiative) என்ற திட்டம் அறிமுகப்படுத்தப்பட்டுள்ளது. வழக்கமாக அரசால் மேற்கொள்ளப்படும் வளர்ச்சிப் பணிகளை அதிகாரிகளே திட்டமிடும் நடைமுறைக்கு மாற்றாக, கிராமப்புற பொதுமக்களின் நேரடி கருத்துக்களுக்கும் கோரிக்கைகளுக்கும் முதன்மை முக்கியத்துவம் அளிப்பதே இந்தத் திட்டத்தின் தனிச்சிறப்பாகும்.

இத்திட்டத்தின் கீழ் பொதுமக்கள் முன்வைக்கும் முன்னுரிமைக் கோரிக்கைகள் அரசின் பரிசீலனைக்கு அனுப்பப்பட்டு, நிதியுதவி ஒப்புதல் பெறப்பட்டு விரைவில் நிறைவேற்றப்படும்.

மன்னம்பந்தல் ஊராட்சியில் மாதிரித் திட்ட ஆய்வு

இத்திட்டத்தின் முதல்கட்டமாக, ஊராட்சிகளுக்கு உட்பட்ட ஒவ்வொரு சிற்றூரிலும் உள்ள பொதுமக்கள் ஒன்றிணைந்து தங்கள் பகுதிக்கான 'சமூக வரைபடத்தை' வரைந்து, அதில் அத்தியாவசியத் தேவைகளைக் குறிக்கும் பணிகள் தொடங்கப்பட்டுள்ளன. அதன் ஒரு பகுதியாக, மயிலாடுதுறை ஊராட்சி ஒன்றியத்திற்கு உட்பட்ட மன்னம்பந்தல் ஊராட்சியில் அமைந்துள்ள மூங்கில் தோட்டம் கிராமத்தில் மாதிரி திட்டமிடல் பணிகள் நடைபெற்றன.

மாவட்ட ஆட்சியர் அலுவலகம் மற்றும் புதிதாக கட்டப்பட்டு வரும் மாவட்ட காவல் கண்காணிப்பாளர் அலுவலகம் ஆகியவை அமைந்துள்ள இப்பகுதியில், மாவட்ட ஆட்சியர் ஸ்ரீகாந்த் தலைமையில் வரைபடக் கலந்தாய்வு நடைபெற்றது. இதில் திரளான பொதுமக்கள் கலந்து கொண்டு தங்கள் பகுதியில் வரையப்பட்ட சமூக வரைபடத்தின் மூலம் தேவைகளை ஆட்சியரிடம் எடுத்துரைத்தனர்.

மக்களின் கோரிக்கைகளும் ஆட்சியரின் உடனடி நடவடிக்கையும்

ஆட்சியரிடம் நேரடியாக உரையாடிய மூங்கில் தோட்டம் கிராம பொதுமக்கள், தங்கள் பகுதிக்குத் தேவையான மேல்நிலை நீர்த்தேக்கத் தொட்டி, அங்கன்வாடி மையம் மற்றும் தரமான சிமெண்ட் சாலை வசதி உள்ளிட்ட அத்தியாவசியத் தேவைகளை முதன்மைப் பணிகளாகச் சுட்டிக்காட்டி கோரிக்கை விடுத்தனர். அப்போது, புதிதாக கட்டப்பட்டு வரும் மாவட்ட காவல் கண்காணிப்பாளர் அலுவலகத்திற்கு அருகில் உள்ள அரசு நிலப்பகுதி தனியாரால் ஆக்கிரமிப்பு செய்யப்பட்டுள்ளதை பொதுமக்கள் ஆட்சியரின் கவனத்திற்கு கொண்டு வந்தனர்.

உடனடியாக அந்தப் இடத்திற்குச் சென்று நேரில் பார்வையிட்டு ஆய்வு செய்த மாவட்ட ஆட்சியர், நிலத்தில் உள்ள ஆக்கிரமிப்புகளை உடனடியாக அப்புறப்படுத்த அதிகாரிகளுக்கு உத்தரவிட்டார். மேலும், மீட்டெடுக்கப்படும் அந்த இடத்தில் கிராமக் குழந்தைகளின் நலனுக்காகப் புதிய அங்கன்வாடி மையத்தை அமைப்பதற்கான நடவடிக்கைகளை விரைந்து மேற்கொள்ளவும் ஆணையிட்டார்.

மாவட்ட முழுமைக்குமான 10 நாள் சிறப்புத் திட்டம்

மயிலாடுதுறை மாவட்டத்தில் இத்தகைய மக்கள் பங்களிப்புடனான திட்டமிடல் பணிகள் வரும் அக்டோபர் 7-ஆம் தேதி முதல் அக்டோபர் 17-ஆம் தேதி வரை 10 நாட்கள் தொடர்ந்து நடைபெறவுள்ளன. இந்த 10 நாட்களில் மாவட்டத்தில் உள்ள அனைத்து ஊராட்சிகளிலும் உள்ள கிராமங்களில் பொதுமக்கள் ஒன்றுகூடி சமூக வரைபடம் வரைந்து, தங்கள் ஊருக்கான முக்கிய வளர்ச்சிப் பணிகளைத் தேர்வு செய்யவுள்ளனர். மன்னம்பந்தல் ஊராட்சியில் நடைபெற்ற இந்த மாதிரி திட்டமிடல் நிகழ்ச்சியில், மாவட்ட ஆட்சியர் அலுவலக உதவித் திட்ட அலுவலர் சங்கர், ஊராட்சி ஒன்றிய அதிகாரிகள் மற்றும் உள்ளாட்சிப் பிரதிநிதிகள் பலர் கலந்துகொண்டு சிறப்பித்தனர்.

B.E, B.Sc, B.Com படித்தவரா? தாட்கோ வழங்கும் இலவச சான்றிதழ் பயிற்சி மற்றும் வேலைவாய்ப்பு! முழு விபரம்..

எஸ்.ஜெகநாதன், மயிலாடுதுறை — Tue, 6 Oct 2026 11:55:32 +0530

மயிலாடுதுறை: தமிழ்நாடு ஆதிதிராவிடர் வீட்டு வசதி மற்றும் மேம்பாட்டுக் கழகம் (தாட்கோ) மற்றும் தகவல் தொடர்பு தொழில்நுட்பக் கழகம் (ICT Academy) இணைந்து, ஆதிதிராவிடர் மற்றும் பழங்குடியினச் சமூகத்தைச் சேர்ந்த இளைஞர்களுக்குப் பல்வேறு நவீனத் தொழிற்பயிற்சிகளை இலவசமாக வழங்கத் திட்டமிட்டுள்ளன.

இத்திட்டத்தின் கீழ் தகுதியான இளைஞர்களுக்கு தொழில்நுட்பம் மற்றும் நிதித் துறை சார்ந்த பயிற்சிகள் அளிக்கப்பட உள்ளதாக மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், தனது செய்திக்குறிப்பில் தெரிவித்துள்ளார்.

தொழிற்பயிற்சிகளின் முக்கியத்துவம் மற்றும் நோக்கங்கள்

இன்றைய நவீனச் சூழலில் கணினி தொழில்நுட்பம் மற்றும் வணிக மேலாண்மைத் துறைகளில் வேலைவாய்ப்புகள் பெருமளவில் அதிகரித்து வருகின்றன. ஆதிதிராவிடர் மற்றும் பழங்குடியின இளைஞர்களின் பொருளாதார மேம்பாட்டையும், அவர்களின் வேலைவாய்ப்புத் திறன்களையும் உயர்த்துவதை முக்கிய நோக்கமாகக் கொண்டு தாட்கோ நிறுவனம் தொடர்ந்து பல நலத்திட்டங்களைச் செயல்படுத்தி வருகிறது.

இதன் ஒரு பகுதியாக, தகவல் தொடர்பு தொழில்நுட்பக் கழகத்துடன் இணைந்து இளைஞர்களின் திறன்களை மேம்படுத்தி, முன்னணி நிறுவனங்களில் அவர்களைப் பணியமர்த்தும் வகையில் இந்த சிறப்புச் சான்றிதழ்ப் பயிற்சிகள் வடிவமைக்கப்பட்டுள்ளன. இத்தொழிற்பயிற்சிகள் இளைஞர்களின் தொழில்முறைத் திறனை அதிகரித்து, நவீன கார்ப்பரேட் துறைகளில் அவர்கள் தடம் பதிக்கப் பெருமளவில் துணையாக இருக்கும்.

சென்னை, கோவை மற்றும் மதுரையில் நடைபெறும் சிறப்புப் பயிற்சிகள்

இப்பயிற்சிகள் தமிழகத்தின் மூன்று முக்கிய நகரங்களான சென்னை, கோயம்புத்தூர் மற்றும் மதுரை மாவட்டங்களில் அமைந்துள்ள பயிற்சி மையங்களில் நடைபெறவுள்ளன. ஒவ்வொரு மாவட்டத்திலும் அப்பகுதியின் தொழிற்துறை தேவைகளுக்கேற்பப் பயிற்சிகள் பிரத்யேகமாக வகைப்படுத்தப்பட்டுள்ளன.

சென்னை மாவட்டம்

தலைநகர் சென்னையில் மென்பொருள் வடிவமைப்பாளர் (Software Designer), வலைதள வடிவமைப்பாளர் (Web Designer) மற்றும் பயன்பாட்டு மென்பொருள் மேம்பாட்டாளர் (Application Software Developer) ஆகிய கணினித் துறை சார்ந்த பயிற்சிகள் வழங்கப்பட உள்ளன.

கோயம்புத்தூர் மாவட்டம்

தொழில் நகரமான கோவையில் மென்பொருள் வடிவமைப்பாளர், வலைதள வடிவமைப்பாளர், பயன்பாட்டு மென்பொருள் மேம்பாட்டாளர், தரவுப் பகுப்பாய்வாளர் (Data Analyst) ஆகிய தொழில்நுட்பப் பயிற்சிகளுடன், நிதித் துறை சார்ந்த நுண்நிதி நிர்வாகம் (Microfinance Management) மற்றும் காப்பீட்டு முகவர் (Insurance Agent) போன்ற பல்வேறு பயிற்சிகளும் அளிக்கப்பட உள்ளன.

மதுரை மாவட்டம்

தென் மாவட்ட இளைஞர்களின் வசதிக்காக மதுரையில் தரவுப் பகுப்பாய்வாளர், மென்பொருள் வடிவமைப்பாளர், நுண்நிதி நிர்வாகம் மற்றும் காப்பீட்டு முகவர் ஆகிய முதன்மையான பயிற்சிகள் ஏற்பாடு செய்யப்பட்டுள்ளன.

கல்வித் தகுதி மற்றும் வயது வரம்பு விவரங்கள்

இப்பயிற்சிகளில் சேர விரும்புவோருக்குப் பயிற்சிகளின் தன்மைக்கு ஏற்ப குறிப்பிட்ட கல்வித் தகுதிகள் நிர்ணயிக்கப்பட்டுள்ளன.

கணினி மற்றும் மென்பொருள் சார்ந்த பயிற்சிகளில் இணைய விரும்புவோர் இளங்கலை பொறியியல் (B.E / B.Tech) அல்லது பி.எஸ்.சி கணினி அறிவியல் (B.Sc Computer Science) ஆகிய பாடப் பிரிவுகளில் பட்டம் பெற்றிருக்க வேண்டும்.

நிதி நிர்வாகம் மற்றும் காப்பீடு சார்ந்த பயிற்சிகளைப் பெற விரும்புவோர் இளங்கலை வணிகவியல் (B.Com) அல்லது இளங்கலை வணிக நிர்வாகவியல் (BBA) ஆகிய பட்டப்படிப்புகளைப் முடித்திருக்க வேண்டும்.

விண்ணப்பதாரர்கள் ஆதிதிராவிடர் மற்றும் பழங்குடியின வகுப்பைச் சேர்ந்தவர்களாக இருக்க வேண்டும். மேலும், விண்ணப்பிக்கும் நபர்களின் வயது வரம்பு 18 முதல் 35 வயதிற்குள் இருக்க வேண்டும். விண்ணப்பதாரரின் குடும்ப ஆண்டு வருமானம் ரூபாய் 3 லட்சத்திற்கு மிகாமல் இருக்க வேண்டும் என்பது குறிப்பிடத்தக்கது.

வேலைவாய்ப்பு முகாம் மற்றும் சான்றிதழ் விவரங்கள்

பயிற்சிக் காலத்தை வெற்றிகரமாக முழுமையாக முடிக்கும் இளைஞர்களுக்குத் தாட்கோ மற்றும் ICT Academy இணைந்து வழங்கும் அதிகாரப்பூர்வ சான்றிதழ்கள் வழங்கப்படும்.

வெறும் பயிற்சியோடு நின்றுவிடாமல், பயிற்சியினை அளிக்கும் நிறுவனத்தின் மூலமாகவே தகுதியுள்ள நபர்களுக்கு முன்னணி தனியார் நிறுவனங்களில் வேலைவாய்ப்புகள் ஏற்படுத்தித் தரப்படும். பயிற்சி பெறும் இளைஞர்கள் நேர்காணல்களைத் தைரியமாக எதிர்கொள்ளும் வகையில் சிறப்புத் திறன் மேம்பாட்டு வகுப்புகளும் இப்பயிற்சியின் போது வழங்கப்படும்.

விண்ணப்பிக்கும் முறை மற்றும் தொடர்பு எண்கள்

இப்பயிற்சியில் இணைந்து பயனடைய விரும்பும் தகுதியான இளைஞர்கள் தாட்கோ நிறுவனத்தின் அதிகாரப்பூர்வ இணையதமான www.tahdco.com என்ற முகவரியில் சென்று தங்களது விவரங்களைப் பதிவு செய்து கொள்ளலாம்.

இத்திட்டம் குறித்த கூடுதல் விவரங்களைப் பெற விரும்புவோர் மயிலாடுதுறை மாவட்ட ஆட்சியர் அலுவலக வளாகத்தின் 6-வது தளத்தில் இயங்கி வரும் தாட்கோ மாவட்ட மேலாளர் அலுவலகத்தை நேரடியாக அணுகலாம்.

மேலும் விவரங்களுக்கு 04364-211217 என்ற தொலைபேசி எண்ணிலோ அல்லது 7448828509 என்ற கைபேசி எண்ணிலோ தொடர்பு கொண்டு தெளிவு பெறலாம் என மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், கேட்டுக்கொண்டுள்ளார். தகுதியுடைய இளைஞர்கள் இந்த நல்வாய்ப்பைப் பயன்படுத்தித் தங்கள் வாழ்க்கைத் தரத்தை உயர்த்திக் கொள்ளுமாறு அறிவுறுத்தியுள்ளனர்.

ஆன்மீக பயணத்திற்கு தமிழ்நாடு அரசு வழங்கும் ரூ.5000 நிதியுதவி - மிஸ் பண்ணாதீங்க!

எஸ்.ஜெகநாதன், மயிலாடுதுறை — Tue, 6 Oct 2026 11:00:28 +0530

சென்னை: தமிழ்நாட்டில் சிறுபான்மையின மக்களின் சமூக, பொருளாதார மற்றும் ஆன்மீக நலன்களைப் பேணும் வகையில் பல்வேறு தொலைநோக்குத் திட்டங்களை மாநில அரசு தொடர்ச்சியாகச் செயல்படுத்தி வருகிறது. அந்த வகையில், தமிழ்நாட்டைச் சேர்ந்த பௌத்த மதத்தைச் சேர்ந்த பெருமக்கள் பயனடையும் வகையில் ஒரு முக்கிய நலத்திட்டம் நடைமுறைப்படுத்தப்பட்டு வருகிறது.

மகாராஷ்டிர மாநிலம் நாக்பூரில் உள்ள வரலாற்றுச் சிறப்புமிக்க 'தீக்ஷா பூமி' பகுதியில் ஆண்டுதோறும் விஜயதசமி திருநாளில் மிக விமரிசையாக நடைபெறும் 'தம்ம சக்கர பரிவர்தன தின' விழாவில் கலந்துகொள்ளச் செல்லும் பௌத்தர்களுக்கு அரசு சார்பில் நிதியுதவி வழங்கப்பட்டு வருகிறது. இந்த புனிதப் பயணத்தை மேற்கொண்டு திரும்பும் பயனாளிகளுக்கு நபர் ஒருவருக்கு அதிகபட்சமாக 5,000 ரூபாய் வரை மானியம் வழங்கும் இத்திட்டம் பௌத்த மக்களிடையே பெரும் வரவேற்பைப் பெற்றுள்ளது.

2026-ஆம் ஆண்டிற்கான விண்ணப்பங்கள் வரவேற்பு

நடப்பு 2026-ஆம் ஆண்டில் நாக்பூர் தீக்ஷா பூமிக்கு புனிதப் பயணம் மேற்கொண்டு இத்திட்டத்தின் கீழ் பயன்பெற விரும்பும் தகுதியான பௌத்த மதத்தைச் சேர்ந்தவர்களிடமிருந்து தற்போது விண்ணப்பங்கள் வரவேற்கப்படுகின்றன. இந்த அரிய வாய்ப்பினை தமிழ்நாட்டில் வசிக்கும் பௌத்த மதத்தைச் சேர்ந்த பொதுமக்கள் அனைவரும் முறைப்படி விண்ணப்பித்துப் பயன்படுத்திக் கொள்ளுமாறு கேட்டுக்கொள்ளப்படுகிறார்கள்.

ஆன்மீக முக்கியத்துவம் வாய்ந்த இந்நிகழ்வில் பங்கேற்க விரும்புவோருக்கு நிதியுதவி வழங்கி ஊக்கப்ப்படுத்துவது அவர்களின் மத நம்பிக்கைகளுக்கும் பண்பாட்டுப் பாரம்பரியத்திற்கும் அளிக்கும் உயரிய அங்கீகாரமாக அமைகிறது.

விண்ணப்பப் படிவங்கள் பெறும் முறைகள்

இத்திட்டத்திற்கான விண்ணப்பப் படிவங்களை பொதுமக்கள் மிகவும் எளிமையான முறையில் கட்டணமின்றிப் பெற்றுக்கொள்ள விரிவான ஏற்பாடுகள் செய்யப்பட்டுள்ளன. தமிழ்நாட்டின் அனைத்து மாவட்ட ஆட்சியர் அலுவலக வளாகங்களிலும் இயங்கி வரும் 'மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகம்' அல்லது 'சிறுபான்மையினர் நல அலுவலகங்களில்' நேரில் சென்று பொதுமக்கள் விண்ணப்பப் படிவங்களை எந்தவிதக் கட்டணமுமின்றி இலவசமாகப் பெற்றுக்கொள்ளலாம்.

அதுமட்டுமன்றி, கணினி வழியில் பதிவிறக்கம் செய்ய விரும்பும் பயனாளிகள் பிற்படுத்தப்பட்டோர், மிகவும் பிற்படுத்தப்பட்டோர் மற்றும் சிறுபான்மையினர் நலத்துறையின் அதிகாரப்பூர்வ இணையதமான www.bcmbcmw.tn.gov.in என்ற முகவரிக்குச் சென்று விண்ணப்பப் படிவத்தை மிக எளிதாகப் பதிவிறக்கம் செய்து அச்சிட்டுக் கொள்ளலாம்.

பூர்த்தி செய்த விண்ணப்பங்களைச் சமர்ப்பிக்க வேண்டிய முகவரி

இணையதளம் மூலமாகவோ அல்லது மாவட்ட அலுவலகங்கள் மூலமாகவோ பெறப்பட்ட விண்ணப்பப் படிவங்களைத் துல்லியமாகப் பூர்த்தி செய்து, அதனுடன் கேட்கப்பட்டுள்ள தேவையான அனைத்துச் சான்றிதழ்கள் மற்றும் பயண ஆவணங்களை இணைக்க வேண்டும். இவ்வாறு தயார் செய்யப்பட்ட பூர்த்தி செய்யப்பட்ட விண்ணப்பங்களை அஞ்சல் மூலமாகவோ அல்லது நேரடியாகவோ 'ஆணையர், சிறுபான்மையினர் நலத்துறை, கலசமஹால் பாரம்பரியக் கட்டடம், முதல் தளம், சேப்பாக்கம், சென்னை-600 005' என்ற முகவரிக்கு உரிய நேரத்திற்குள் சென்று சேருமாறு அனுப்பி வைக்க வேண்டும்.

விண்ணப்பிக்க கடைசி நாள் மற்றும் மாவட்ட ஆட்சியர் கோரிக்கை

இத்திட்டத்தின் கீழ் பயன்பெற விரும்புபவர்கள் பூர்த்தி செய்த விண்ணப்பங்களைச் சமர்ப்பிக்க 15.11.2026 ஆம் தேதி இறுதி நாளாக நிர்ணயிக்கப்பட்டுள்ளது. எனவே, தகுதியுள்ள நபர்கள் அனைவரும் குறித்த காலக்கெடுவிற்குள் தங்களது விண்ணப்பங்களை அனுப்ப வேண்டியது அவசியமாகும். இத்தகவலைத் தெரிவித்துள்ள மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், தமிழ்நாட்டைச் சேர்ந்த பௌத்த பெருமக்கள் இந்த அரசு மானியத் திட்டத்தினை முழுமையாகப் பயன்படுத்தி, நாக்பூர் தீக்ஷா பூமிக்கு புனிதப் பயணம் மேற்கொண்டு பயன்பெறுமாறு கேட்டுக்கொண்டுள்ளார்.

Mayiladuthurai Power Shutdown (06.10.2026) : மயிலாடுதுறையில் இன்று 5 மணி நேரம் மின்தடை! எந்தெந்த பகுதிகளில் தெரியுமா? - முழு விவரம்

எஸ்.ஜெகநாதன், மயிலாடுதுறை — Tue, 6 Oct 2026 08:53:43 +0530

மயிலாடுதுறை: மயிலாடுதுறை கோட்டத்திற்குட்பட்ட நீடூர் துணை மின் நிலையத்தில் நடைபெறவுள்ள மாதாந்திர பராமரிப்பு பணிகள் காரணமாக, இன்றையதினம் அக்டோபர் 6-ஆம் தேதி செவ்வாய்க்கிழமை அன்று காலை 9:00 மணி முதல் மதியம் 2:00 மணி வரை பல்வேறு கிராமங்களில் மின் விநியோகம் தற்காலிகமாக நிறுத்தப்படும் என தமிழ்நாடு மின் பகிர்மான கழகத்தின் மயிலாடுதுறை நகர் இயக்கலும் பராமரித்தலும் பிரிவு உதவி செயற் பொறியாளர் எம். விஜயபாரதி தெரிவித்துள்ளார். இது குறித்து அவர் வெளியிட்டுள்ள செய்திகுறிப்பில் கூறியதாவது.

பராமரிப்பு பணிகளின் முக்கியத்துவம் மற்றும் நோக்கம்

தமிழ்நாடு மின் உற்பத்தி மற்றும் பகிர்மான கழகம் (TANGEDCO) சார்பில் பொதுமக்களுக்கு தடையற்ற மற்றும் சீரான மின்சார விநியோகத்தை வழங்குவதற்காக ஒவ்வொரு துணை மின் நிலையத்திலும் மாதம் ஒருமுறை சுழற்சி முறையில் அவசியமான மாதாந்திர பராமரிப்பு பணிகள் மேற்கொள்ளப்பட்டு வருகின்றன.

இத்தகைய பராமரிப்பு பணிகளின் போது துணை மின்நிலையத்தில் உள்ள முக்கிய மின்மாற்றிகள் (Transformers), உயர் அழுத்த மின்பாதைகள் (High Tension Lines), கட்டுப்பாட்டு கருவிகள், பீடர்கள் (Feeders) மற்றும் பாதுகாப்பு உபகரணங்கள் நுணுக்கமாக ஆய்வு செய்யப்படுகின்றன.

மேலும், பருவமழை தொடங்கவுள்ள நிலையிலும், காற்று மற்றும் புயல் காலங்களில் திடீர் மின்தடை ஏற்படுவதைத் தடுக்கும் பொருட்டும், மின்பாதைகளில் உரசும் மரக்கிளைகளை வெட்டி அகற்றுதல், தளர்ந்த மின் கம்பிகளை சீரமைத்தல் மற்றும் பழுதடைந்த மின் கம்பங்களை மாற்றுதல் போன்ற அத்தியாவசியப் பணிகள் தீவிரமாக மேற்கொள்ளப்பட உள்ளன. இதன் மூலம் எதிர்காலத்தில் எதிர்பாராத மின்தடைகள் தவிர்க்கப்பட்டு, மக்களுக்குச் சீரான மின் விநியோகம் உறுதி செய்யப்படும் என மின்வாரிய அதிகாரிகள் தெரிவித்துள்ளனர்.

மின் விநியோகம் பாதிக்கப்படும் பகுதிகள்

நீடூர் துணை மின்நிலையத்தில் மேற்கொள்ளப்படவுள்ள இந்த மாதாந்திர பராமரிப்பு பணி காரணமாக, இத்துணை மின்நிலையத்திலிருந்து மின்சாரம் பெறும் முக்கிய ஊர்கள் மற்றும் அவற்றைச் சுற்றியுள்ள கிராமப்புறப் பகுதிகளில் குறிப்பிட்ட நேரத்தில் மின் விநியோகம் முழுமையாக நிறுத்தப்படும்.

பாதிக்கப்படும் முக்கிய பகுதிகள்

நீடூர் மற்றும் அதன் சுற்றுவட்டாரப் பகுதிகள்

* நீடூர்

* மல்லியக்கொல்லை

* வில்லியநல்லூர்

* கொண்டல்

* பாலாக்குடி

* தாழஞ்சேரி

அருகிலுள்ள கிராமங்கள்

* கொற்கை

* அருண்மொழிதேவன்

* கங்கணாம்புத்தூர்

* மேலாநல்லூர்

* நடராஜபுரம்

* மருதாந்தநல்லூர்

* கீழமருதாந்தநல்லூர்

* மேலமருதாந்தநல்லூர்

* பொன்மாசநல்லூர்.

பிற புறநகர் பகுதிகள்

* மணலூர்

* மாப்படுகை

* ஆனந்தங்குடி

* சோழம்பேட்டை மற்றும் அதனைச் சுற்றியுள்ள அனைத்து கிராமப் பகுதிகள்.

மின்தடை நேரம் மற்றும் கால அளவு

இன்று 06.10.2026 செவ்வாய்க்கிழமை அன்று காலை 09:00 மணி முதல் மதியம் 02:00 மணி வரை (மொத்தம் 5 மணி நேரம்) மின் விநியோகம் இருக்காது.

பராமரிப்பு பணிகள் திட்டமிட்டபடி விரைவாக முடிவடையும் பட்சத்தில், மதியம் 2:00 மணிக்கு முன்பாகவே மின் விநியோகம் மீண்டும் தொடங்கப்பட வாய்ப்புள்ளது என்றும் மின்சார வாரியம் சார்பில் தெரிவிக்கப்பட்டுள்ளது.

பொதுமக்களுக்கான அவசிய வழிகாட்டுதல்கள் மற்றும் வேண்டுகோள்

மின் விநியோகம் நிறுத்தப்படும் நேரத்தில் பொதுமக்கள், விவசாயிகள், வணிகர்கள் மற்றும் சிறு தொழில் நிறுவனங்கள் தங்களது அன்றாடப் பணிகளை முன்கூட்டியே திட்டமிட்டுக் கொள்ளுமாறு மின்வாரியம் கேட்டுக் கொண்டுள்ளது.

குடிநீர் சேமிப்பு: மின் விநியோகம் தடைபடும் என்பதால் மேல்நிலை நீர்த்தேக்கத் தொட்டிகளில் இருந்து குடிநீர் விநியோகம் பாதிக்கப்படலாம். எனவே, பொதுமக்கள் தங்களுக்குத் தேவையான குடிநீரை முன்கூட்டியே சேமித்து வைத்துக் கொள்ள அறிவுறுத்தப்படுகிறார்கள்.

மின் சாதனங்கள் பாதுகாப்பு: பராமரிப்பு பணிகள் முடிந்து மின்சாரம் மீண்டும் வழங்கப்படும் போது ஏற்படும் திடீர் மின் அழுத்த வேறுபாடுகளைத் தவிர்க்க, மின்சாதனங்களான தொலைக்காட்சி, குளிர்சாதனப் பெட்டி, கணினி மற்றும் மின்மோட்டார்களின் சுவிட்சுகளை அணைத்து வைப்பது பாதுகாப்பானது.

விவசாயிகள் மற்றும் வணிகர்கள்: விவசாய மின் நுகர்வோர்கள் பாசனப் பணிகளையும், வணிக வளாகங்கள் மற்றும் தொழிற்சாலைகள் தங்களது உற்பத்தி சார்ந்த பணிகளையும் இந்த நேரத்திற்கு ஏற்ப மாற்றியமைத்துக் கொள்ளுமாறு கேட்டுக்கொள்ளப்படுகிறார்கள்.

மின்வாரிய பணியாளர்களுக்கான ஒத்துழைப்பு

மின் பாதைகளில் பாதுகாப்பு கருதி மின்சாரம் நிறுத்தப்படுவதால், மின் ஊழியர்கள் பணியில் இருக்கும் போது மின் கம்பங்களிலோ அல்லது மின் உபகரணங்களிலோ பொதுமக்கள் தலையிட வேண்டாம் என்றும், மின்வாரிய ஊழியர்களுக்கு முழு ஒத்துழைப்பு நல்குமாறும் கேட்டுக்கொள்ளப்படுகிறார்கள்.

பொதுமக்களுக்கு ஏற்படும் இந்த தற்காலிக அசௌகரியத்திற்கு வருந்துவதாகவும், சீரான மின் சேவையை தொடர்ந்து வழங்கிட பொதுமக்கள் மின்வாரியத்திற்கு முழு ஒத்துழைப்பு அளிக்க வேண்டும் என்றும் மயிலாடுதுறை நகர் இயக்கலும் பராமரித்தலும் பிரிவு உதவி செயற் பொறியாளர் எம். விஜயபாரதி வேண்டுகோள் விடுத்துள்ளார்.