madurai

தீபாவளி ஷாப்பிங்: மதுரை விளக்குத்தூணில் அலைமோதும் மக்கள் கூட்டம்!

அருண் சின்னதுரை — Sun, 1 Nov 2026 22:14:58 +0530

ஞாயிற்றுக்கிழமை என்பதால் ஏராளமான பொதுமக்கள் குடும்பத்துடன் வந்து புத்தாடைகளை தீபாவளி பொருட்களை வாங்கி வருகின்றனர்.

மதுரை விளக்குத்தூண் பகுதியில் குவிந்துள்ளனர்

மதுரையை சுற்றியுள்ள மாவட்டங்களில் இருந்து ஏராளமான பொதுமக்கள் தீபாவளி பொருட்களை வாங்குவதற்கு மதுரை விளக்குத்தூண் பகுதியில் குவிந்துள்ளனர். உலகம் முழுவதும் நவம்பர் 8 தேதி அடுத்த வாரம் ஞாயிற்றுக்கிழமை தீபாவளி பண்டிகை கோலாகலமாக கொண்டாடப்பட உள்ளது தீபாவளி பண்டிகைக்கு ஒரு வாரமே உள்ள நிலையில் மதுரை மாசி வீதிகளில் பொதுமக்கள் தீபாவளி பண்டிகைக்கு தேவையான புத்தாடைகள், நகை வீட்டு உபயோக பொருட்களை வாங்குவதற்காக குவிந்து வருகின்றனர்.

தீபாவளி பண்டிகைக்கு தேவையான பொருட்களை வாங்கி வருகின்றனர்.

மதுரை விளக்குத்தூண், தெற்கு மாசி வீதி, மேலமாசி வீதி, வடக்கு மாசி வீதி மற்றும் வெளி வீதிகள், ஆவணி மூல வீதிகளில் மதுரை மட்டுமின்றி மதுரையை சுற்றியுளள மாவட்டங்களான ராமநாதபுரம், சிவகங்கை, தேனி திண்டுக்கல், விருதுநகர், உள்ளிட்ட பல்வேறு மாவட்டங்களிலும் இருந்து ஏராளமான பொதுமக்கள் குடும்பத்தினரோடு வருகை தந்து தீபாவளி பண்டிகைக்கு தேவையான பொருட்களை வாங்கி வருகின்றனர். இன்று ஞாயிற்றுக்கிழமை என்பதால் காலை முதலே ஏராளமான பொதுமக்கள் ஆர்வமுடன் மதுரை விளக்குத்தூண் பகுதிக்கு வருகை தந்து புத்தாடைகள் வாங்கி வருகின்றனர்.

போக்குவரத்து காவலர்கள் போக்குவரத்தை சீரமைப்பு

கூட்டத்தை மாநகர காவல் துறை கட்டுப்படுத்தி போக்குவரத்து காவலர்கள் போக்குவரத்தை சீரமைத்து வரும் பணியில் ஈடுபட்டு வருகின்றனர். குறிப்பாக புத்தாடைகள் வாங்குவதற்கு பெற்றோர்கள் தங்களது குழந்தைகளை அழைத்து வந்துள்ளதால் குழந்தைகளை பத்திரமாக பார்த்துக் கொள்ளவும் உடைமைகளை பாதுகாப்பாக வைத்துக் கொள்ள வேண்டும் என ஒலிபெருக்கி மூலமாக பொதுமக்களுக்கு காவல்துறையினர் விழிப்புணர்வை ஏற்படுத்தி வருகின்றனர். இந்தப் பகுதிக்கு தீபாவளி பர்ச்சேஸ் செய்ய வரும் கூட்டமானது காலை முதலே அதிகமாக இருந்து வந்த நிலையில் தற்போது மாலையிலும் மக்கள் விளக்கத்ததூண் பகுதியில் குவிந்து வருகின்றனர். குடும்பமாக மதுரை மக்கள் தங்களுக்குத் தேவையான தீபாவளி பொருட்களை ஆர்வமுடன் வாங்கி வருகின்றன. தீபாவளி பண்டிகைக்கு இன்னும் 6 நாட்கள் மட்டுமே உள்ள நிலையில் பொதுமக்கள் ஆர்வமுடன் பொருட்களை வாங்கி வருகின்றனர்.

நிலா முற்றத்தில் கவிமழை.... சிவகங்கையில் நூல் வெளியீடு: இலக்கியப் பெருவிழா!

அருண் சின்னதுரை — Sun, 1 Nov 2026 19:45:12 +0530

சிவகங்கையில் நிலா முற்றத்தில் கவிமழை எனும் கவிதை நூல் வெளியீட்டு விழா நடைபெற்றது.

கவிதை நூல் வெளியீட்டு விழா.

சிவகங்கை தமிழவைய ஒருங்கிணைப்பில் புலவர் கா.காளிராசா எழுதிய நிலா முற்றத்தில் கவிமழை என்னும் கவிதை நூல் வெளியீட்டு விழா சிவகங்கை சிவன் கோவில் எதிரே உள்ள தனியார் திருமண மண்டபத்தில் நடைபெற்றது. தமிழ்த்தாய் வாழ்த்துடன் தொடங்கிய இந்நிகழ்வில் ஸ்ரீ சாய் கலாச்சேத்ரா நாட்டியப் பள்ளி மாணவர்கள் தமிழ் வணக்கப் பாடலை தந்தனர், செல்வன் பிரசாந்த் தமிழ் முழக்கப் பாடலை பாடினார்.

சிவகங்கை தமிழவையச் செயலர் சுரேஷ் வரவேற்புரைத்தார்.

சிவகங்கை மன்னர் மேல்நிலைப்பள்ளி தலைமை ஆசிரியரும் சிவகங்கை தொல்நடைக் குழுவின் தலைவருமான நா. சுந்தரராஜன் தலைமை வகித்தார். சிவகங்கை தமிழவைய செயற்குழு உறுப்பினரும் சிவகங்கை இராணி வேலுநாச்சியார் அரிமா சங்கத் தலைவருமான வித்யா கணபதியும் சிவகங்கை தமிழ்சங்கத் தலைவரும் ஓவியருமான கலைமகள் முத்துக்கிருஷ்ணனும் முன்னிலை வகித்தனர். திருச்சி தூயவளனார் (சென் ஜோசப் ) கல்லூரி மேனாள் பேராசிரியர், முனைவர் பொன். புஷ்பராஜ் அவர்கள் நூலை வெளியிட்டு சிறப்புரை நிகழ்த்தினார்.

கரூர் அரசு கலைக் கல்லூரி தமிழ்த்துறைத் தலைவர் சரவணன் நூலுக்கு மதிப்புரை வழங்கினார்.

காளையார்கோவில் காளையப்பா சாமில் உரிமையாளர், திருமதி மரகத மீனாட்சி முத்துக்குமரன், சிவகங்கை வழக்கறிஞர் இராம் பிரபாகர், த.மு.எ.க.ச, சிவகங்கை மாவட்டத்தலைவர் கவிஞர் சிபூ,உலகத் திருக்குறள் கூட்டமைப்பு முனைவர் வனிதா, செங்காந்தள் சோழன் பதிப்பகர் முனைவர் இயேசு ராஜா, கவிஞர் சாதிக் முகமது, இளம் பேச்சாளர் நவீன் ஆகியோர் வாழ்த்துரைத்தனர். நூலாசிரியர் புலவர் கா.காளிராசா ஏற்புரை வழங்கினார், இந்நிகழ்வில் சிவகங்கை தமிழ்ச்சங்கம், தமிழ்நாடு அறிவியல் இயக்கம், டாக்டர் அப்துல் கலாம் உதவும் கரங்கள் த.மு.எ.க.ச போன்ற அமைப்புகளின் பொறுப்பாளர்களும்

சிவகங்கை நகர் மற்றும் சுற்று வட்டார ஆசிரியர்கள், தொழில் முனைவர்கள், இளைஞர்கள் மற்றும் இலக்கியச் சுவைஞர்கள் போன்ற நூற்றுக்கும் மேற்பட்டோர் கலந்து கொண்டனர். நிகழ்வை சிவகங்கை தமிழவைய உறுப்பினர் கிருஷ்ணவேணி காளிராசா தொகுத்து வழங்கினார், சிவகங்கை தொல்நடைக் குழு செயலர் இரா. நரசிம்மன் நன்றியுரைத்தார்

ஷாக் நியூஸ்: நவம்பரில் இந்த ரயில்கள் எல்லாம் ரத்தா? முழு விவர ரயில் பட்டியல் இதோ!

எஸ்.ஜெகநாதன், மயிலாடுதுறை — Sun, 1 Nov 2026 11:59:01 +0530

திருச்சி: தெற்கு ரயில்வேயின் திருச்சிராப்பள்ளி மற்றும் மதுரை கோட்டங்களுக்கு உட்பட்ட பல்வேறு பிரிவுகளில் பராமரிப்பு மற்றும் பொறியியல் பணிகள் தீவிரமாக நடைபெற்று வருவதால், பயணிகளின் பாதுகாப்பு மற்றும் வசதியை கருத்தில் கொண்டு ரயில் தேதிகளில் பல்வேறு மாற்றங்கள் செய்யப்பட்டுள்ளன.

இந்த பொறியியல் பணிகள் காரணமாக நவம்பர் மாதத்தில் குறிப்பிட்ட சில நாட்களில் சில ரயில்கள் முழுமையடையாமல் இயக்கப்படுவதும், சில ரயில்களின் வழித்தடங்கள் மாற்றப்படுவதும், மற்றும் சில ரயில்கள் கால தாமதமாக இயக்கப்பட உள்ளது. இது தொடர்பான விரிவான விவரங்களை தெற்கு ரயில்வேயின் திருச்சிராப்பள்ளி கோட்ட மக்கள் தொடர்பு அலுவலர் என். ஜெயந்த் வெளியிட்டுள்ள செய்திக்குறிப்பில் தெரிவித்துள்ளார்.

திருச்சிராப்பள்ளி கோட்டத்தில் பகுதியாக ரத்து மற்றும் தொடக்க மாற்றம்

திருச்சிராப்பள்ளி கோட்டத்திற்கு உட்பட்ட பல்வேறு பிரிவுகளில் நடைபெறும் பொறியியல் பணிகள் காரணமாக பல முக்கிய ரயில்களின் இயக்கத்தில் மாற்றம் கொண்டு வரப்பட்டுள்ளது. அதன்படி, திருச்சிராப்பள்ளியிலிருந்து காலை 08.40 மணிக்கு காரைக்கால் செல்லும் டெமு ரயில் (வண்டி எண்: 76820) நவம்பர் 1, 2, 4, 5, 6, 7, 8 மற்றும் 9 ஆகிய தேதிகளில் திருவாரூர் நிலையத்துடன் நிறுத்தப்படும். இந்த ரயில்கள் திருச்சிராப்பள்ளியிலிருந்து திருவாரூர் வரை மட்டுமே இயக்கப்படும் என்றும், திருவாரூரிலிருந்து காரைக்கால் வரை பகுதியாக ரத்து செய்யப்பட்டுள்ளதாகவும் தெரிவிக்கப்பட்டுள்ளது.

இதேபோல், தாம்பரத்திலிருந்து காலை 09.45 மணிக்கு விழுப்புரம் செல்லும் மெமு பயணிகள் ரயில் (வண்டி எண்: 66045) நவம்பர் 2, 4 மற்றும் 7 ஆகிய தேதிகளில் முண்டியம்பாக்கம் வரை மட்டுமே இயக்கப்படும் என்றும், அங்கிருந்து தாம்பரம் திரும்பும் என்றும் அறிவிக்கப்பட்டுள்ளது. மறுமார்க்கமாக இயக்கப்படும் சில ரயில்களின் தொடக்க இடங்களிலும் மாற்றங்கள் செய்யப்பட்டுள்ளன.

காரைக்காலிலிருந்து பிற்பகல் 14.55 மணிக்கு திருச்சிராப்பள்ளி புறப்படும் டெமு ரயில் (வண்டி எண்: 76819) நவம்பர் 1, 2, 4, 5, 6, 7, 8 மற்றும் 9 ஆகிய தேதிகளில் காரைக்கால் மற்றும் திருவாரூர் இடையே பகுதியாக ரத்து செய்யப்படுகிறது. இந்த ரயில் தனது பயணத்தை திருவாரூர் நிலையத்திலிருந்து வழக்கமான நேரமான பிற்பகல் 16.15 மணிக்குத் தொடங்கும்.

மேலும், விழுப்புரத்திலிருந்து சென்னை கடற்கரை செல்லும் மெமு ரயில் (வண்டி எண்: 66046) மற்றும் விழுப்புரம் - மயிலாடுதுறை மெமு ரயில் (வண்டி எண்: 66019) ஆகியவையும் குறிப்பிட்ட தேதிகளில் முண்டியம்பாக்கம் மற்றும் சேர்தனூர் போன்ற மாற்றுத் தொடக்க நிலையங்களிலிருந்து இயக்கப்படும் என ரயில்வே நிர்வாகம் அறிவித்துள்ளது.

ரயில் ஒழுங்குபடுத்துதல் மற்றும் புறப்படும் நேரம் மாற்றம்

பராமரிப்பு பணிகள் நடைபெறும் பாதைகளில் பாதுகாப்பான ரயில் போக்குவரத்தை உறுதி செய்யும் நோக்கில் சில விரைவு மற்றும் எக்ஸ்பிரஸ் ரயில்கள் வழியில் குறிப்பிட்ட நிமிடங்கள் வரை ஒழுங்குபடுத்தப்பட்டு (நிறுத்தி வைக்கப்பட்டு) இயக்கப்பட உள்ளன. இதன் அடிப்படையில், பெரோஸ்பூர் கன்ட் - ராமேஸ்வரம் சூப்பர்பாஸ்ட் ஹம்சஃபர் எக்ஸ்பிரஸ் (வண்டி எண்: 20498) மற்றும் ஜோத்பூர் - மன்னார்குடி எக்ஸ்பிரஸ் (வண்டி எண்: 22673) ஆகிய ரயில்கள் வழியில் உள்ள பாதுகாப்பான இடங்களில் முறையே 120 நிமிடங்கள் வரை ஒழுங்குபடுத்தப்படும்.

மேலும், திருச்சிராப்பள்ளி - மயிலாடுதுறை மெமு எக்ஸ்பிரஸ் (வண்டி எண்: 16834), புதுச்சேரி - ஹவுரா சூப்பர்பாஸ்ட் எக்ஸ்பிரஸ் (வண்டி எண்: 12868), மற்றும் சார்லப்பள்ளி - திருச்சிராப்பள்ளி எக்ஸ்பிரஸ் (வண்டி எண்: 17077) உள்ளிட்ட ரயில்களும் குறிப்பிட்ட கால அவகாசத்திற்கு வழியில் நிறுத்தி இயக்கப்படும் எனத் தெரிவிக்கப்பட்டுள்ளது.

இது தவிர, சில முக்கிய ரயில்களின் புறப்படும் நேரத்திலும் மாற்றம் செய்யப்பட்டுள்ளது. சென்னை எழும்பூரிலிருந்து குருவாயூர் செல்லும் எக்ஸ்பிரஸ் ரயில் (வண்டி எண்: 16127) நவம்பர் 2, 4 மற்றும் 7 ஆகிய தேதிகளில் சென்னை எழும்பூரிலிருந்து புறப்படுவதற்குப் பதிலாக, தாம்பரத்திலிருந்து 60 நிமிடங்கள் தாமதமாக அதாவது பிற்பகல் 12.10 மணிக்கு இயக்கப்படும்.

அதேபோல், புதுச்சேரியில் இருந்து இயக்கப்படும் காகிநாடா போர்ட் சர்க்கார் எக்ஸ்பிரஸ் (வண்டி எண்: 17656) மற்றும் திருச்சிராப்பள்ளியில் இருந்து சென்னை எழும்பூர் செல்லும் சோழன் சூப்பர்பாஸ்ட் எக்ஸ்பிரஸ் (வண்டி எண்: 22676) ஆகிய ரயல்களும் குறிப்பிட்ட தேதிகளில் மாற்றப்பட்ட நேரத்தில்கூட இயக்கப்படும் என அறிவிக்கப்பட்டுள்ளது.

மதுரை கோட்டம்: கள்ளிக்குடி - திருமங்கலம் இடையே வழித்தட மாற்றம்

மதுரை கோட்டத்திற்கு உட்பட்ட கள்ளிக்குடி மற்றும் திருமங்கலம் இடையே இன்ஜினியரிங் பணிகள் தீவிரமாக நடைபெற்று வருவதன் காரணமாக, சில விரைவு ரயில்களின் வழித்தடங்கள் முற்றிலுமாக மாற்றியமைக்கப்பட்டு இயக்கப்படுகின்றன.

குருவாயூரிலிருந்து இரவு 23.15 மணிக்குப் புறப்பட்டு சென்னை எழும்பூர் செல்லும் எக்ஸ்பிரஸ் ரயில் (வண்டி எண்: 16128) நவம்பர் 1 மற்றும் 3 ஆகிய தேதிகளில் விருதுநகர், மானாமதுரை, காரைக்குடி மற்றும் திருச்சிராப்பள்ளி வழியாக மாற்றுப் பாதையில் இயக்கப்படும். இந்த மாற்றப்பட்ட வழித்தடத்தின் காரணமாக இவ்வண்டி மதுரை, சோழவந்தான், கொடைக்கானல் ரோடு, திண்டுக்கல் மற்றும் மணப்பாறை ஆகிய ரயில் நிலையங்களுக்குச் செல்லாது. மாறாக, அருப்புக்கோட்டை, மானாமதுரை, சிவகங்கை, காரைக்குடி மற்றும் புதுக்கோட்டை ஆகிய நிலையங்களில் இந்த ரயிலுக்கு கூடுதல் நின்று செல்லும் வசதி (Stoppages) அளிக்கப்படும்.

இதேபோன்று, நாகர்கோவிலில் இருந்து கோயம்புத்தூர் செல்லும் எக்ஸ்பிரஸ் ரயிலும் (வண்டி எண்: 16321) நவம்பர் 2 மற்றும் 4 ஆகிய தேதிகளில் வழக்கமான பாதையை மாற்றி அமைத்து இயக்கப்படுகிறது. இந்த ரயில் விருதுநகர், மானாமதுரை, காரைக்குடி, திருச்சிராப்பள்ளி மற்றும் கரூர் வழியாக இயக்கப்படும். இதனால் திருமங்கலம், திருப்பரங்குன்றம், மதுரை, சோழவந்தான், கொடைக்கானல் ரோடு, அம்பத்துரை, திண்டுக்கல், எரியோடு மற்றும் பாளையம் ஆகிய நிலையங்களில் வழக்கமான நிறுத்தங்கள் தவிர்க்கப்பட்டு, அதற்குப் பதிலாக அருப்புக்கோட்டை, மானாமதுரை, சிவகங்கை, காரைக்குடி, புதுக்கோட்டை மற்றும் திருச்சிராப்பள்ளி ஆகிய நிலையங்களில் கூடுதல் நிறுத்தங்கள் வழங்கப்படும் என தெற்கு ரயில்வே நிர்வாகம் சார்பில் தெரிவிக்கப்பட்டுள்ளது. பயணிகள் இந்த மாற்றங்களைக் கருத்தில் கொண்டு தங்களது பயணங்களைத் திட்டமிடுமாறு அறிவுறுத்தப்பட்டுள்ளனர்.

பாலம் கட்ட ஒதுக்கப்பட ரூ.10 கோடி பணம்... திசை மாறியது எப்படி? நீதிமன்றம் அதிர்ச்சி !

அருண் சின்னதுரை — Sat, 31 Oct 2026 22:59:47 +0530

பாலம் சீரமைப்புக்கு 10 கோடி ரூபாய் ஒதுக்கீடு செய்தல் வேறு பணிக்கு எப்படி செலவு செய்தீர்கள் - நீதிபதிகள் கேள்வி.

தொண்டியை சேர்ந்த வழக்கறிஞர் கலந்தார் ஆசிக் உயர் நீதிமன்ற மதுரை கிளைகள் தாக்கல் செய்த பொதுநல வழக்கு.

தொண்டி அருகே சோழியக்குடியில் விசைப்படகு மற்றும் நாட்டுப்படகு மீனவர்கள் சுமார் ஆயிரத்துக்கும் மேற்பட்டோர் உள்ளனர். இக்கடலில் சிறிய ஜெட்டி பாலம் மீனவர்கள் நலன் கருதி கட்டப்பட்டுள்ளது இந்த பாலத்தின் மூலம் தான் மீனவர்கள் வலைகள் உள்ளிட்ட பொருட்களை படகுகளில் ஏற்றுவதும் மீன்பிடித்து திரும்பி வந்து மீன் உள்ளிட்ட பொருட்களை இறக்குவதும் போன்ற பணிகள் நடைபெற்று வருகிறது மேற்படி பாலம் கட்டி பல ஆண்டுகள் ஆகிவிட்டதால் மேற்படி பாலம் மிகப்பெரிய அளவில் சேதமடைந்து இடிந்து விழும் அபாய நிலையில் உள்ளது பாலத்தின் நடுவில் பெரிய ஓட்டை விழுந்துள்ளது. இது மீனவர்களுக்கு கடும் சிரமத்தை ஏற்படுத்தி உள்ளது இரவு நேரத்தில் மீன் சரக்குகளை கொண்டு செல்ல மீனவர்கள் அவதிப்படுகின்றனர் இந்த பாலம் படகுகளை கடல் பகுதியில் நிறுத்தி சரக்குகளை ஏற்ற இறக்க வசதியாக உள்ளது இல்லையென்றால் மேற்படி மீனவர்கள் தலை சுமையாக சரக்குகளை தூக்கி செல்ல வேண்டும் என்ற நிலையே உள்ளது தற்போது ஜெட்டி பாலம் மிகவும் சேதமடைந்து இடிந்து விழும் அபாய நிலையிலும் பாலத்தின் நடுவில் மேற்படி பெரிய ஓட்டை விழுந்துள்ளதால் இரவு நேரத்தில் அடிக்கடி மீனவர்கள் தவறி விழுந்து விபத்தில் பாதிக்கப்படுகின்றனர். மேலும் மேற்படி ஜெட்டி பாலத்தை பார்வையிட வரும் சுற்றுலா பயணிகளும் உடன் அழைத்துவரும் குழந்தைகள் விழுந்து பெரிய அளவில் விபத்து பாதிப்பு ஏற்படுகிறது. ஜெட்டி பாலம் சீரமைப்பது குறித்து ஏற்கனவே உயர் நீதிமன்றத்தில் வழக்கு தாக்கல் செய்திருந்தேன் வழக்கு விசாரணையின் போது அரசு தரப்பில் 10 கோடி ரூபாய் சீரமைப்புக்காக நிதி ஒதுக்கப்பட்டுள்ளது என தெரிவிக்கப்பட்டது இதனை ஏற்று நீதிமன்றம் வழக்கை முடித்து வைத்தது.

நீதிபதிகள் பாலம் சீரமைப்பு குறித்து இரண்டு வாரத்தில் அறிக்கை தாக்கல் செய்ய உத்தரவு

நீதிமன்றம் உத்தர பிறப்பித்தும் இரண்டு ஆண்டுகளாகி இதுவரை பாலம் சீரமைக்கப்படவில்லை எனவே உடனடியாக நீதிமன்ற உத்தரவை நிறைவேற்ற வேண்டுமென மனு தாக்கல் செய்திருந்தார். இந்த மனு நீதிபதிகள் வேல்முருகன் மற்றும் நீதிபதி ராமகிருஷ்ணன் ஆகியோர் அடங்கிய அமர்வு முன் விசாரணைக்கு வந்தது. அரசு தரப்பில் ஆஜரான வழக்கறிஞர் ஏற்கனவே 10 கோடி ரூபாய் நிதி ஒதுக்கீடு செய்யப்பட்டது ஆனால் அவசரகால கருதி மீனவர்களின் வேறு நல திட்டத்திற்காக 5 கோடி ரூபாய் செலவிடப்பட்டு விட்டது என தெரிவிக்கப்பட்டது. அப்பொழுது நீதிபதிகள் பாலம் சீரமைப்புக்கு 10 கோடி ரூபாய் ஒதுக்கீடு செய்தல் வேறு பணிக்கு எப்படி செலவு செய்தீர்கள் என கேள்வி எழுப்பினர். அரசு தரப்பில் பாலம் சீரமைப்புக்கு புதிதாக ஒப்பந்த விவரம் கோறப்பட்டுள்ளது விரைவில் வந்து விடும் என தெரிவிக்கப்பட்டது. இதை ஏற்றுக் கொண்ட நீதிபதிகள் பாலம் சீரமைப்பு குறித்து இரண்டு வாரத்தில் அறிக்கை தாக்கல் செய்ய உத்தரவிட்டு வழக்கை ஒத்தி வைத்தனர்.

டாக்டர் அம்பேத்கர் விருது 2026-27: சமூகப் பணியாளர்களுக்கு அரிய வாய்ப்பு... விண்ணப்பிக்க அழைப்பு !

அருண் சின்னதுரை — Sat, 31 Oct 2026 22:25:29 +0530

2026-27ஆம் ஆண்டிற்கான டாக்டர் அம்பேத்கர் விருதிற்கு தகுதியுள்ள நபர்கள் விண்ணப்பித்திடலாம் என மாவட்ட ஆட்சித்தலைவர் திருமதி ஷரண்யா அறி தெரிவித்துள்ளார்.

டாக்டர் அம்பேத்கர் விருது"

தமிழ்நாட்டில் பட்டியல் இன மக்களின் வாழ்க்கை முன்னேற்றத்திற்காகவும், அவர்களின் சமூக, கல்வி, பொருளாதார மற்றும் ஒட்டுமொத்த முன்னேற்றத்திற்காகவும் பலர் அறிய தொண்டாற்றி வருகின்றனர். பட்டியல் இன மக்களின் முன்னேற்றத்திற்காக தங்களை முழுமையாக இணைத்துக்கொண்டு, சிறப்பான மற்றும் பாராட்டத்தக்க வகையில் ஆற்றிவரும் அறிய தொண்டினை கருத்தில் கொண்டு, தமிழ்நாட்டைச் சேர்ந்த ஒருவருக்கு ஆண்டுதோறும் திருவள்ளுவர் தினத்தன்று “டாக்டர் அம்பேத்கர் விருது" தமிழ்நாடு அரசால் வழங்கப்பட்டு சிறப்பிக்கப்படுகிறது.

ஆதிதிராவிடர் மற்றும் பழங்குடியினர் நல அலுவலகத்திலும் விண்ணப்பப் படிவத்தைப் பெற்றுக்கொள்ளலாம்.

அந்த வகையில், 2026-ஆம் ஆண்டிற்கான டாக்டர் அம்பேத்கர் விருது 2027 ஜனவரி மாதம் திருவள்ளுவர் தினத்தன்று வழங்கப்படவுள்ளது. இதற்கான விண்ணப்பப் படிவத்தை தமிழ்நாடு அரசின் www.tn.gov.in இணையதளத்தில் https://www.tn.gov.in/form_view.php? dep_id=MQ== என்ற இணைப்பை (Link) கிளிக் செய்து பதிவிறக்கம் செய்து கொள்ளலாம் அல்லது ஆதிதிராவிடர் நல இயக்குநரக அலுவலகம், சேப்பாக்கம் சென்னை-600 005-ல் நேரில் பெற்றுக்கொள்ளலாம் அல்லது சம்பந்தப்பட்ட மாவட்ட ஆதிதிராவிடர் மற்றும் பழங்குடியினர் நல அலுவலகத்திலும் விண்ணப்பப் படிவத்தைப் பெற்றுக்கொள்ளலாம்.

அரிய தொண்டுகள், சாதனைகள் மற்றும் அதற்கான உரிய ஆவணங்கள்

எனவே விருதினை பெற விரும்புவோர், தங்களைப் பற்றிய முழுவிவரங்கள் மற்றும் ஆதிதிராவிடர் மற்றும் பழங்குடியினர் இன மக்களின் முன்னேற்றத்திற்காக தாங்கள் ஆற்றியுள்ள அரிய தொண்டுகள், சாதனைகள் மற்றும் அதற்கான உரிய ஆவணங்கள்/சான்றுகள் ஆகியவற்றை இணைத்து பூர்த்தி செய்யப்பட்ட விண்ணப்பப்படிவத்துடன் சமர்ப்பிக்க வேண்டும், இவ்விருதிற்கு விண்ணப்பித்திட 30.11.2026 அன்ற கடைசி நாளாகும் என மாவட்ட ஆட்சித்தலைவர் ஷரண்யா அறி தெரிவித்துள்ளார்.

தமிழ்நாடு பாரத்நெட்: கிராமப்புற இணைய சேவைக்கு தொழில் பங்கீட்டாளர் ஆக அரிய வாய்ப்பு!

அருண் சின்னதுரை — Sat, 31 Oct 2026 20:51:36 +0530

பாரத்நெட் திட்டத்தின் கீழ் கிராமப்புறங்களில் உயர்தர இணைய சேவைகளை வழங்குவதற்கு, மாவட்ட அளவிலான தொழில் பங்கீட்டாளர்களாக (DLFP) பணிபுரிய விருப்பமுள்ள நபர்களிடமிருந்து இணையத்தளத்தின் வாயிலாக விண்ணப்பங்கள் வரவேற்கப்படுகின்றன.

கிராமப்புறங்களில் உயர்தர இணைய சேவை

தமிழ்நாடு அரசு நிறுவனமான, தமிழ்நாடு கண்ணாடி இழை வலையமைப்பு நிறுவனம் (TANFINET), பாரத்நெட் திட்டத்தின் கீழ் கிராமப்புறங்களில் உயர்தர இணைய சேவைகளை வழங்கும் நோக்கில், மாவட்ட அளவிலான தொழில் பங்கீட்டாளர்களை (DLFP) தேர்வு செய்யும் பணிகளை தொடங்கியுள்ளது. மேலும், மாநிலத்தில் பாரத்நெட் பணிகள் சுமார் 95 சதவீதம் வரை நிறைவடைந்துள்ளன. அந்தவகையில், தமிழ்நாட்டின் 37 மாவட்டங்களிலும், ஒவ்வொரு மாவட்டத்திலும் குறைந்தது இரண்டு தொழில் பங்கீட்டாளர்களை தேர்வு செய்து, தடையில்லா இணைய சேவைகள் வழங்குவதற்கான நடவடிக்கை எடுக்கப்பட்டுள்ளது. அதற்கென, ஒவ்வொரு மாவட்டமும் வருவாய் உட்கோட்டம் (Revenue Division) அடிப்படையில் 2 முதல் 6 வட்டாரங்களை கொண்ட துணைப் பிரிவுகளாக பிரிக்கப்பட்டு, தொழில் பங்கீட்டாளர்கள் தேர்வு செய்யப்படுவர். விண்ணப்பதாரர் அதிகபட்சம் இரண்டு மாவட்டங்களுக்கு விண்ணப்பிக்க அனுமதிக்கப்படுவார்.

தனிப்பட்ட விண்ணப்பதாரரின் முகவரி அமைந்துள்ள மாவட்டமாகவோ இருத்தல் வேண்டும்.

விண்ணப்பதாரர் குறிப்பிடும் மாவட்டங்கள், நிறுவனம், நிறுவனத்தின் வணிகச் செயல்பாட்டுப் பகுதி அமைந்துள்ள மாவட்டமாகவோ அல்லது தனிப்பட்ட விண்ணப்பதாரரின் முகவரி அமைந்துள்ள மாவட்டமாகவோ இருத்தல் வேண்டும். -2- அவ்வாறாக, தேர்வு செய்யப்படும் தொழில் பங்கீட்டாளர்களின் முக்கிய பொறுப்புகளில் Optical Fibre Cable (OFC) மற்றும் Optical Network Terminal (ONT) பராமரிப்பு, தடையில்லா இணைய சேவை வழங்குதல், OFC பராமரிப்பு பணிகள், சேவை தடைகளை காலதாமதமின்றி சரிசெய்தல், Service Level Agreement (SLA) விதிமுறைகளை பின்பற்றுதல் மற்றும் சேவை கிடைப்புத் தரத்தை பராமரித்தல் ஆகியவை அடங்கும். மேலும், விண்ணப்ப பதிவானது TANFINET இணையதள போர்டலின் https://tanfinet.tn.gov.in என்ற இணையதள முகவரியின் வாயிலாக நடைபெறும்.

இணையதளம் வாயிலாக விண்ணப்பிக்கலாம்.

விண்ணப்பதாரர்கள் அறிவிப்பு மற்றும் தொடர்புடைய ஆவணங்களைப் பதிவிறக்கம் செய்து, தேவையான ஆவணங்களை பதிவேற்றம் செய்து, தாங்கள் செயல்பட விரும்பும் துணைப் பிரிவு-ஐ (Division) தேர்வு செய்திடல் வேண்டும். விண்ணப்பதாரர் ஒவ்வொரு துணைப் பிரிவுக்கும் ரூ.25,000- (திரும்பப்பெறக்கூடிய, வட்டியில்லா) விண்ணப்ப பாதுகாப்பு வைப்பு தொகை செலுத்த வேண்டும். தேர்வு செய்யப்படும் பங்கீட்டாளர்கள், ஒவ்வொரு வட்டாரத்திற்கும் ரூ.2,00,000-பாதுகாப்பு வைப்பு தொகை செலுத்திட வேண்டும். அதனைத்தொடர்ந்து, சென்னை TANFINET தலைமையகத்தால் பணி ஆணை (Work Order) வழங்கப்படும். மேலும், https://tanfinet.tn.gov.in என்ற இணையதளம் வாயிலாக 02.11.2026 அன்று மாலை 06.00 மணி வரை விண்ணப்பிக்கலாம். கூடுதல் விவரங்களுக்கு 044-24965595 என்ற உதவி மைய தொலைபேசி எண்ணை தொடர்பு கொண்டு விபரங்கள் பெற்று பயன்பெறலாம் என மாவட்ட ஆட்சித்தலைவர் ப.ஆகாஷ், தெரிவித்துள்ளார்.

கொடைக்கானலில் முன்கூட்டியே தொடங்கிய பனிக்காலம்! கடும் குளிரால் மக்கள் அவதி!

நாகராஜ் — Sat, 31 Oct 2026 18:55:35 +0530

கொடைக்கானல் குளிரால் உள்ளூர் மக்கள், முதியவர்கள், குழந்தைகள் பாதிக்கப்பட்டு வருகின்றனர். கொடைக்கானலில் முன்கூட்டியே பனிக்காலம் தொடங்கிவிட்ட அறிகுறி தென்படுவதாக பொதுமக்கள் கூறுகின்றனர்.

இந்தியாவிலேயே மிக அழகான மலைவாசஸ்தலங்களில் ஒன்றான கொடைக்கானல் தமிழ்நாட்டின் திண்டுக்கல் மாவட்டத்தில் அமைந்துள்ளது. 'காடுகளின் பரிசு' என்று மொழிபெயர்க்கும் ஒரு பெயருடன், இந்த இடத்தின் அமைதியும், அழகும் நம்மை மெய் சிலிர்க்க வைக்கிறது. மேற்குத் தொடர்ச்சி மலைகளில் அமைந்துள்ள இந்த அற்புதமான இடம் மூடுபனி காடுகள், மயக்கும் நிலப்பரப்புகள், அமைதியான ஏரிகள் மற்றும் இனிமையான வானிலை ஆகியவற்றால் சூழப்பட்டுள்ளது.

இயற்கையாகவே, மலைவாசஸ்தலத்தின் இந்த அம்சங்கள் ஒவ்வொரு ஆண்டும் பல சுற்றுலாப் பயணிகளை ஈர்க்கின்றது என சொல்லலாம். கோடைகாலங்களில் பல லட்சக்கணக்கான சுற்றுலாப் பயணிகள் படையெடுக்கும் இடமாகவும் உள்ளது.

கொடைக்கானலில் கடந்த வாரம் வரை வடகிழக்கு பருவமழை வெளுத்து வாங்கியது. இதனால் நகரில் உள்ள பேரிஜம், நட்சத்திர ஏரி, பெப்பர், புலவிச்சாறு, ஓராதி, கரடிச்சோலை, வெள்ளி நீர்வீழ்ச்சி உள்ளிட்ட பல்வேறு அருவிகளில் வெள்ளப்பெருக்கு ஏற்பட்டது. இதுதவிர புதிய அருவிகளும் உருவாகின.

கொடைக்கானலில் வழக்கமாக நவம்பர் மாதம் 2வது வாரத்தில் தொடங்கி, பிப்ரவரி வரை பனிக்காலமாக இருக்கும். ஆனால் தற்போது மழை பெய்து ஓய்ந்துள்ள நிலையில் கடந்த 2 நாட்களாக பகல் பொழுதில் அதிக வெப்பம் நிலவி வந்தது. காலையில் நட்சத்திர ஏரி பகுதியில் உள்ள செடி, புல்வெளிகளில் பனி படர்ந்து காணப்பட்டது. இரவு நேரங்களில் கடுமையான குளிர் வாட்டி எடுத்து வருகிறது.

நட்சத்திர ஏரியின் நீர்ப்பிடிப்பு பகுதிகளான ஜிம்கானா, கீழ்பூமி, பிரையண்ட் பூங்கா உள்ளிட்ட பகுதிகளிலும் அதிகாலை நேரத்தில் பனித்துளிகள் படர்ந்து காணப்பட்டது. சாலையோரம் நிறுத்தப்பட்டிருந்த மோட்டார் சைக்கிள், கார்கள் உள்ளிட்ட வாகனங்களிலும் பனித்துகள்கள் படர்ந்து காணப்பட்டது. இந்த பகுதியில் 10 டிகிரி செல்சியசுக்கும் குறைவான வெப்பநிலை பதிவானது.

கொடைக்கானலில் தற்போது சுற்றுலா பயணிகள் வருகை குறைவாகவே உள்ளது. வார இறுதி நாட்களில் மட்டும் சுற்றுலா பயணிகள் வருகை தருகின்றனர். அதன்படி தரைப்பகுதியில் கடும் வெப்பம் வாட்டி வரும் நிலையில் கொடைக்கானலில் நிலவும் கடும் குளிர் அவர்களுக்கு புதுவித அனுபவத்தை கொடுக்கும்.

அதே சமயம் கடும் குளிரால் உள்ளூர் மக்கள், முதியவர்கள், குழந்தைகள் பாதிக்கப்பட்டு வருகின்றனர். கொடைக்கானலில் முன்கூட்டியே பனிக்காலம் தொடங்கிவிட்ட அறிகுறி தென்படுவதாக மக்கள் கூறுகின்றனர். இதனால் காலை நேரங்களில் குளிருக்கு இதமான ஆடைகளை அணிந்தபடி ஏரிச்சாலையில் நடைபயிற்சி மேற்கொண்டு வருகின்றனர்.

தமிழக சிறைகளில் அதிரடி தணிக்கை ஆய்வு! கூடுதல் ஏடிஜிபி சங்கர் வெளியிட்ட முக்கிய அறிவிப்பு!

நாகராஜ் — Sat, 31 Oct 2026 17:18:44 +0530

தமிழகம் முழுவதும் உள்ள சிறைகளில் நிர்வாகம் மற்றும் பாதுகாப்பு தொடர்பாக தணிக்கை ஆய்வு செய்ய உள்ளோம். தேனியில் சிறைத்துறை கூடுதல் டிஜிபி சங்கர் பேட்டி.

தேனி மாவட்டம் ஆண்டிப்பட்டி அருகே உள்ள மாவட்ட சிறையில் இருந்து கடந்த 26-ந்தேதி இரவு காவலர்களை தாக்கி மொத்தம் 17 கைதிகள் தப்பிச்சென்றனர். ஒரே நேரத்தில் இத்தனைகள் கைதிகள் தப்பியது பேசுபொருளாகிய நிலையில், இது சிறைத்துறையினரின் அலட்சியப்போக்கை வெளிக்காட்டியதாக கடும் கண்டனங்கள் எழுந்தன. இதனையடுத்து படிப்படியாக 17 கைதிகளும் பிடிபட்டனர்.

சிறைக்கைதிகள் தப்பிய விவகாரத்தின் எதிரொலியாக சிறைத்துறை டிஜிபியாக இருந்த சந்தீப்ராய் ரத்தோர் அப்பதவியில் இருந்து மாற்றம் செய்யப்பட்டு அவர் மின்வாரிய லஞ்ச ஒழிப்புப்பிரிவு கண்காணிப்பு அதிகாரியாக நியமிக்கப்பட்டுள்ளார். இந்நிலையில் சிறைத்துறை காவல் இயக்குநர் பதவி ஏடிஜிபி தரத்திற்கு குறைக்கப்பட்டு அப்பதவிக்கு ஏடிஜிபி சங்கர் ஐபிஎஸ் நியமிக்கப்பட்டுள்ளார்.

இந்த நிலையில், தேக்கம்பட்டி மாவட்ட சிறைச்சாலையில் 17 சிறை கைதிகள் தப்பி ஓடிய விவகாரத்தில் புதிதாக பொறுப்பேற்றுள்ள சிறைத்துறை ஏடிஜிபி சங்கர் இன்று தேனி மாவட்ட சிறைச்சாலையில் ஆய்வு மேற்கொண்டார். சிறையில் பாதுகாப்பு நடவடிக்கைகள் குறித்து சிறை காவலர்களுக்கு அறிவுரை வழங்கினார் .

பின்னர் சிறைத்துறை ஏடிஜிபி சங்கர் செய்தியாளர்களை சந்தித்து பேசுகையில், தேக்கம்பட்டி சிறையில் இன்று ஆய்வு செய்தோம், இதே போல் தமிழகம் முழுவதும் உள்ள சிறைகளில் நிர்வாகம் மற்றும் பாதுகாப்பு தொடர்பாக தணிக்கை செய்து மீண்டும் ஆய்வு செய்ய உள்ளோம், சிறைகளில் என்னென்ன குறைபாடுகள் இருக்கின்றதோ அதனை சரி செய்யப்படும்.

ஏற்கனவே நடைமுறையில் உள்ள நிலையான செயல்பாட்டு வழிகாட்டு நெறிமுறைகளை (SOS) 100% அமல்படுத்துவதை உறுதி செய்துள்ளோம் சிறைகளில் உள்ள குறைபாடுகள் தவிர்க்க சிறை காவலர்களுக்கு பாதுகாப்பு தொடர்பான அறிவுரைகளை வழங்கி உள்ளோம், சிறை நடைமுறைகளை பின்பற்ற காவலர்களுக்கு அறிவுரை வழங்கப்பட்டுள்ளது அதனை பின்பற்றினால் இது போன்ற சம்பவங்களை தவிர்க்கலாம் என தெரிவித்தார்.

தேனி சிறையில் பாதுகாப்பு கெடுபிடி அதிகரிப்பு! கூடுதல் டிஜிபி சங்கர் நேரில் ஆய்வு!

நாகராஜ் — Sat, 31 Oct 2026 17:07:27 +0530

தேனி மாவட்டச் சிறையில் இருந்து 17 கைதிகள் தப்பிய பரபரப்பான சம்பவத்தைத் தொடர்ந்து, தமிழக சிறைத்துறை கூடுதல் டிஜிபி சங்கர் அவர்கள் இன்று சிறையில் நேரில் ஆய்வு மேற்கொண்டார்.

தேனி மாவட்டச் சிறையில் சமீபத்தில் நேர்ந்த அசாதாரண சம்பவத்தைத் தொடர்ந்து, அங்கு மேற்கொள்ளப்பட்டுள்ள புதிய மற்றும் பலப்படுத்தப்பட்ட பாதுகாப்பு ஏற்பாடுகள் குறித்து சிறைத்துறை அதிகாரிகளிடம் கூடுதல் டிஜிபி சங்கர் கேட்டறிந்தார். மேலும், சிறைக் காவலர்களின் அன்றாடப் பணிகள், ரோந்து முறைகள் மற்றும் பாதுகாப்புத் திட்டமிடல் குறித்தும் விரிவாக ஆய்வு செய்தார்.

இந்த ஆய்வின் போது, காவலர்கள் எப்போதும் விழிப்புடன் செயல்பட வேண்டும் என்றும், பாதுகாப்புப் பணியில் எந்தவிதமான தொய்வும் ஏற்படக்கூடாது என்றும் அவர் அறிவுறுத்தல்களை வழங்கினார். முன்னதாக, இந்தத் தப்பியோடும் சம்பவத்தைத் துரிதமாகச் செயல்பட்டு தடுத்திடத் தவறியதாகக் கூறி, 9 சிறைக் காவலர்கள் மற்றும் மாவட்டச் சிறையின் பொறுப்பு கண்காணிப்பாளர் நாகேஸ்வரன் ஆகியோர் உடனடியாக பணியிடை நீக்கம் செய்யப்பட்டுள்ளனர் என்பது குறிப்பிடத்தக்கது.

எனினும், சிறையிலிருந்து தப்பியோடிய அனைத்து கைதிகளையும் காவல்துறையினர் அதிரடியாகத் தேடி, வெறும் 43 மணி நேரத்திற்குள் அனைத்துக் கைதிகளையும் வெற்றிகரமாகக் கைது செய்து மீண்டும் சிறையில் அடைத்தனர். காவல்துறையினரின் இந்தத் துரித நடவடிக்கைக்குப் பல தரப்பிலிருந்தும் பாராட்டுகள் குவிந்தன.

சமீபத்தில் கோவை மற்றும் சென்னை சிறைகளிலும் கைதிகள் தப்பியதாக அடுத்தடுத்து தகவல்கள் வெளியான நிலையில், தமிழகம் முழுவதும் உள்ள சிறைகளின் பாதுகாப்பு குறித்து பொதுமக்களிடையே பெரும் கேள்விக்குறி எழுந்தது. இதன் எதிரொலியாகவே, தேனி சிறையில் கூடுதல் டிஜிபி அவர்களின் இந்த நேரடி ஆய்வு மிக முக்கியத்துவம் வாய்ந்ததாகப் பார்க்கப்படுகிறது.சிறைச் சுவர்களில் துளையிட்டோ அல்லது முறையான பாதுகாப்பு நெறிமுறைகளில் ஏற்பட்ட தொய்வைப் பயன்படுத்தியோ கைதிகள் தப்பியிருக்கலாம் என்ற கோணத்தில் விசாரணை நடைபெற்று வருகிறது.

கைதிகள் தப்பியோடிய சம்பவங்கள் மாநிலம் முழுவதும் உள்ள சிறைத்துறை நிர்வாகத்திற்கு ஒரு எச்சரிக்கை மணியாக அமைந்துள்ளதால், உளவுத்துறை மற்றும் சிறைத்துறை கூடுதல் கண்காணிப்புப் பணிகளை தீவிரப்படுத்தியுள்ளது. எதிர்காலத்தில் இது போன்ற சம்பவங்களைத் தவிர்க்க, தேனி உள்பட அனைத்து மாவட்டச் சிறைகளிலும் நவீன சிசிடிவி கேமராக்கள், மோஷன் சென்சார்கள் மற்றும் இரவு நேர ரோந்துப் பணிகளை மேலும் தீவிரப்படுத்த தமிழக அரசு திட்டமிட்டுள்ளது.

பக்கவாதம் தடுக்க, விரைந்து செயல்பட: முன்கூட்டியே கண்டறிவதன் முக்கியத்துவம் குறித்து வலியுறுத்தல்

அருண் சின்னதுரை — Sat, 31 Oct 2026 16:34:26 +0530

பக்கவாத விழிப்புணர்வு தினம் அனுசரிப்பு: தடுப்பது மற்றும் முன்கூட்டியே கண்டறிவதன் முக்கியத்துவம் குறித்து வலியுறுத்தல்.

பக்கவாதம் வராமல் தடுப்பது, அதன் அறிகுறிகளை அடையாளம் காண்பது,

மதுரை மீனாட்சி சூப்பர் ஸ்பெஷாலிட்டி மருத்துவமனையில் பக்கவாத விழிப்புணர்வு தினம் இன்று அனுசரிக்கப்பட்டது. பக்கவாதம் வராமல் தடுப்பது, அதன் அறிகுறிகளை ஆரம்பத்திலேயே அடையாளம் காண்பது, சரியான நேரத்திற்குள் சிறப்பு சிகிச்சையை நாடிப்பெறுவது ஆகியவற்றின் முக்கியத்துவத்தை வலியுறுத்துவதே இந்நிகழ்வின் நோக்கமாகும். “ஒவ்வொரு நிமிடமும் முக்கியம் - விரைந்து செயல்படுங்கள் (#ActFAST)” என்ற விழிப்புணர்வுச் செய்தியின் மூலம், பக்கவாத எச்சரிக்கை அறிகுறிகளை அடையாளம் காணும் திறனை மக்களுக்கு வழங்குவது இந்நிகழ்வின் இலக்காகும். அறிகுறிகளை அடையாளம் கண்டவுடன், உடனடியாக மருத்துவ சிகிச்சையைப் பெறுவது, நோயாளிகளின் உயிரைக் காப்பதோடு நீண்டகால உடல் பாதிப்பையும் குறைக்கும் என்பதைப் புரியவைப்பதும் உலக பக்கவாத தின அனுசரிப்பின் நோக்கமாகும்.

பக்கவாதம் வராமல் தடுப்பது மற்றும் சிகிச்சை முறைகள்

பக்கவாதம் வராமல் தடுப்பது மற்றும் சிகிச்சை முறைகள் குறித்த விழிப்புணர்வை மக்களிடம் ஏற்படுத்தும் குறிக்கோளோடு ஆண்டுதோறும் அக்டோபர் 29-ஆம் தேதி 'உலக பக்கவாத தினம்' கடைப்பிடிக்கப்படுகிறது. உலக பக்கவாத அமைப்பின் (WSO) 2025-ஆம் ஆண்டின் தரவுகளின்படி, உலகெங்கிலும் ஒவ்வொரு ஆண்டும் சுமார் 1.2 கோடி பேருக்குப் புதிதாகப் பக்கவாத பாதிப்புகள் ஏற்படுகின்றன; அதாவது ஒவ்வொரு மூன்று வினாடிக்கும் ஒருவர் பக்கவாதத்தால் பாதிக்கப்படுகிறார். இந்தியாவில், பக்கவாதம் தொடர்ந்து உயிரிழப்புக்கும் உடல் இயக்கத்திறன் குறைபாட்டிற்கும் முக்கியக் காரணமாக இருந்து வருகிறது. இது பொதுமக்களிடையே விழிப்புணர்வை ஏற்படுத்த வேண்டியதன் அவசியத்தையும், நேரத்தை வீணடிக்காமல் விரைவாகச் சிறப்பு சிகிச்சையைப் பெற வேண்டியதன் அவசரத் தேவையையும் உணர்த்துகிறது.

நரம்பியல் அறுவைசிகிச்சை போன்ற நவீன சிகிச்சை

விரைவான அவசரகால மதிப்பீடு, உடனடியாக மூளை மீதான ஸ்கேன் சோதனை, உரிய நேரத்தில் சிகிச்சையை வழங்குவது மற்றும் பல்வேறு துறைகளின் ஒருங்கிணைந்த பராமரிப்பு ஆகியவை பக்கவாதத்தைத் திறம்படக் கையாளவும், பாதிப்புகளைக் குறைத்து நோயாளிகளை மீட்கவும் மிகவும் அவசியம் என்று நிபுணர்கள் தெரிவித்தனர். இங்குள்ள நிபுணர்கள் ஒன்றிணைந்து, நோயாளிகளுக்கு ஆரம்பகட்ட நிலைப்படுத்தல் முதல் முழுமையான மீட்பு வரை விரிவான சிகிச்சைத் திட்டத்தைச் செயல்படுத்துகின்றனர். மூளைக்கு இரத்தஓட்டத் தடையால் ஏற்படும் பக்கவாதத்திற்குத் தகுதியின் அடிப்படையில் 'நரம்பு வழி த்ரோம்போலிசிஸ்' சிகிச்சை வழங்கப்படுகிறது. மூளையின் பெரிய ரத்த நாளங்களில் ஏற்படும் அடைப்புகளுக்கு 'மெக்கானிக்கல் த்ரோம்பெக்டமி' சிகிச்சையும், மூளையில் ரத்தக்கசிவால் ஏற்படும் பக்கவாதம் தொடர்பான தீவிர சிக்கல்களுக்கு நரம்பியல் அறுவைசிகிச்சை போன்ற நவீன சிகிச்சைகளையும் இம்மருத்துவமனை வழங்கி வருகிறது.

பக்கவாதத்தை முன்கூட்டியே கண்டறிவதற்கான வழிகள் குறித்துப் பேசிய நிபுணர்கள், பொதுமக்கள் நினைவில் கொள்ள வேண்டிய எளிய BE FAST நெறிமுறையைப் பரிந்துரைத்தனர்:

· B - சமநிலை: திடீரென உடல் சமநிலையை இழப்பது அல்லது தடுமாறுவது.

· E - கண்கள்: திடீரெனப் பார்வை மங்கலாவது அல்லது பார்வை இழப்பு.

· F - முகம்: சிரிக்கும்போது முகத்தின் ஒரு பக்கம் கோணுவது அல்லது தொங்குவது.

· A - கைகள்: திடீரென கைகளில் ஏற்படும் பலவீனம் அல்லது கையைத் தூக்க முடியாமல் கீழ்நோக்கிச் சரிவது.

· S - பேச்சு: குழறலான பேச்சு, பேசுவதில் அல்லது பிறர் பேசுவதைப் புரிந்துகொள்வதில் சிரமம்.

· T - நேரம்: மேற்கண்ட அறிகுறிகளுள் ஏதாவது தென்படுமானால், நேரத்தை வீணாக்காமல் உடனடியாக அவசர சேவைகளை அழைக்கவும்; மருத்துவமனைக்கு விரைவாகச் செல்லவும்.

பெரும்பாலான பக்கவாத பாதிப்புகள் வராமல் தடுக்க ஆபத்து காரணிகளைக் கட்டுப்படுத்துவதும், ஆரோக்கியமான பழக்கவழக்கங்களைப் பின்பற்றுவதும் பெரிதும் உதவும் என்று அவர்கள் கூறினர். இரத்த அழுத்தத்தைக் கண்காணிப்பது, சர்க்கரை நோய் மற்றும் கொலஸ்ட்ராலைக் கட்டுக்குள் வைப்பது, புகைப்பிடிப்பதை நிறுத்துவது, சத்தான உணவை உட்கொள்வது, உடற்பயிற்சி செய்வது, ஆரோக்கியமான உடல் எடையைப் பராமரிப்பது மற்றும் மது அருந்துவதைக் கட்டுப்படுத்துவது ஆகியவை பக்கவாத ஆபத்துக்கான வாய்ப்புகளைக் குறைக்கும் என்பதால், இவற்றை மக்கள் பின்பற்றுமாறு இம்மருத்துவமனை ஊக்குவிக்கிறது. சீரற்ற இதயத் துடிப்பு போன்ற பிரச்சனைகளுக்குப் பரிசோதித்து உரிய சிகிச்சை பெற வேண்டும்; மருத்துவரின் ஆலோசனையின்றி மருந்துகளை நிறுத்தக் கூடாது. மீனாட்சி சூப்பர் ஸ்பெஷாலிட்டி மருத்துவமனை பல ஆண்டுகளாக மக்கள் விழிப்புணர்வுத் திட்டங்கள் மூலம் பக்கவாத விழிப்புணர்வை ஊக்குவித்து வருகிறது. குறிப்பாக, ஆரம்பக்கட்ட அறிகுறிகளை அறிந்துகொள்வதையும், முதல் சில மணிநேரங்களில் சிகிச்சையைப் பெறுவதன் அவசியத்தையும் வலியுறுத்துகிறது.

நடமாடும் ஆம்புலன்ஸ் சேவைகள் மூலமாகவே 'ஸ்ட்ரோக் த்ரோம்போலிசிஸ்' சிகிச்சையை வழங்கும் எதிர்காலத் தொழில்நுட்ப முன்னேற்றங்களைச் செயல்படுத்தவும் திட்டமிட்டுள்ளது. இந்த முன்னெடுப்பின் மூலம், பக்கவாத எச்சரிக்கை அறிகுறிகளைப் பற்றித் தெரிந்துகொள்ளவும், காலம் தாழ்த்தாமல் செயல்பட்டு, விழிப்புணர்வுள்ள சமுதாயத்தை உருவாக்க உதவவும் சமூகங்களுக்கு இம்மருத்துவமனை அழைப்பு விடுக்கிறது.