காங்கிரஸ் கட்சிக்கு மக்களவை தேர்தல் முடிவுகள் புது தெம்பை தந்துள்ளது. கடந்த 10 ஆண்டுகளாக தொடர் தோல்வியை சந்தித்து வந்த காங்கிரஸ் இந்த முறை தனது பலத்தை கூட்டியது மட்டும் இல்லாமல் பல மாநிலங்களில் இழந்த செல்வாக்கை மீட்டுள்ளது.
அதற்கு முக்கிய காரணமாக கூறப்படுவது ராகுல் காந்தி மேற்கொண்ட பிரச்சாரம். இந்திய ஒற்றுமை பயணங்கள் மூலம் தனது இமேஜை உயர்த்திய ராகுல் காந்திக்கு மக்களவை தேர்தல் முடிவுகள் மேலும் புத்துணர்ச்சியை தந்துள்ளது.
நடந்து முடிந்த தேர்தலில் உத்தரப் பிரதேசத்தில் உள்ள ரேபரேலி, கேரளாவில் உள்ள வயநாடு என இரண்டு தொகுதிகளில் போட்டியிட்டு இரண்டையும் கைப்பற்றியுள்ளார் ராகுல் காந்தி. மக்களுக்கு நன்றி தெரிவிக்கும் விதமாக ரேபரேலியில் நேற்று நடைபெற்ற பொதுக்கூட்டத்தில் ராகுல் காந்தி கலந்து கொண்டார்.
குட்டி கதை சொன்ன ராகுல் காந்தி: அதன் தொடர்ச்சியாக, கேரள மக்களுக்கு நன்றி தெரிவிக்கும் விதமாக மலப்புரத்தில் இன்று நடைபெற்ற பொதுக்கூட்டத்தில் ராகுல் காந்தி கலந்து கொண்டார். அப்போது பேசிய அவர், தனது சிறு வயது அனுபவங்களை பகிர்ந்து கொண்டார்.
விரிவாக பேசிய ராகுல் காந்தி, "நான் சிறுவனாக இருந்தபோது, என் அம்மாவும் பாட்டியும் என்னை கதகளி நடன நிகழ்ச்சிக்கு அழைத்துச் சென்றனர். நான் சிறியவன், நடனம் பற்றி எனக்கு எதுவும் புரியவில்லை. அது 2 மணிநேரம் நீடித்தது. ஒவ்வொரு காரணத்தையும் கூறி அறையை விட்டு வெளியேற விரும்பினேன்.
போன வருடம் இன்னொரு கதகளி நிகழ்ச்சியைப் பார்த்தேன். இந்த முறை 3 மணி நேரம் நடந்த நிகழ்ச்சியில் என்ன நடக்கிறது என்பதை ஒரு பெண்மணி எனக்கு சரியாக விளக்கினார். 3 மணி நேரம் எப்படி கடந்தது என்று எனக்கு புரியவில்லை. நான் அவர்களின் நடனத்தை விடாமல் பார்த்துக் கொண்டிருந்தேன்.
நிகழ்ச்சியில் இருந்து வெளியேறும்போது, நான் எவ்வளவு விசித்திரமாக இருந்திருக்கிறேன் என்பதை உணர்ந்தேன். நான் இளமையாக இருந்தபோது, அந்த நடிப்பு சுவாரஸ்யமாக இல்லை. அங்கு வெப்பமாக இருந்தது.
"அரசியல் சாசனம் தொடர்பான போராட்டம்": ஆனால், இப்போது அதே வெப்பம் நிலவியது. ஆனால், நான் வெப்பத்தை உணரவில்லை. வித்தியாசம் என்னவென்றால், இந்த முறை, இது கேரள மக்களின் பாரம்பரியம், குரல் மற்றும் வெளிப்பாடு என்பதை நான் புரிந்துகொண்டேன்.
முதல் முறை அது வெறும் நடனம், இரண்டாவது முறை அது கோடிக்கணக்கான மக்கள், அவர்களின் வரலாறு அவர்களின் வெளிப்பாடு என்பதை உணர்ந்தேன். இந்த தேர்தலில் அரசியல் சாசனம் தொடர்பான போராட்டம் நடந்தது.
ஒருபுறம், கோடிக்கணக்கான இந்தியர்கள் தங்கள் பாரம்பரியம், மொழி, கலாச்சாரம், வரலாறு ஆகியவற்றை விரும்புவதாகவும் நம்புவதாகவும், அவர்கள் தங்கள் எதிர்காலத்தை தீர்மானிக்க போவதாக கூறினார்கள்.
மறுபுறம், பிரதமரும் அமித்ஷாவும் ‘இல்லை’ என்றார்கள்! கேரள மக்கள் இந்தி பேச வேண்டும் என தாங்கள் நினைத்தால் அவர்கள் இந்தி பேச வேண்டும் என நினைத்தார்கள். அவர்கள் ஓணம் கொண்டாட வேண்டும் என்றால், ஓணம் மட்டுமே கொண்டாடப்பட வேண்டும் என நினைத்தார்கள்.
கேரளாவில் கதகளி நடனம் ஆட வேண்டுமா அல்லது வேறு நடனம் ஆட வேண்டுமா என்பதை அவர்களே முடிவு செய்வார்கள்" என்றார்.