இந்திய விமானப்படையின் அதிரடி! : ரூ.3.25 லட்சம் கோடி ஒப்பந்தம்! 114 ரஃபேல் போர் விமானங்கள் வாங்க ஒப்புதல்!

பாதுகாப்பு அமைச்சர் ராஜ்நாத் சிங் தலைமையில் நடைபெற்ற இந்த கூட்டத்தில், 114 ரஃபேல் போர் விமானங்களை வாங்குவதற்கான வரலாற்றுச் சிறப்புமிக்க முடிவு எடுக்கப்பட்டுள்ளது.

ரஃபேல் போர் விமானங்கள்

Source : PTI

இந்தியாவின் வான்வழிப் பாதுகாப்பை உலகத்தரம் வாய்ந்த நிலைக்கு உயர்த்துவதற்காக, சுமார் ரூ. 3.25 லட்சம் கோடி மதிப்பிலான மெகா ஒப்பந்தத்திற்கு பாதுகாப்பு கையகப்படுத்தல் கவுன்சில் (DAC) கொள்கை அளவிலான ஒப்புதலை வழங்கியுள்ளது. பாதுகாப்பு அமைச்சர் ராஜ்நாத் சிங் தலைமையில் நடைபெற்ற இந்த கூட்டத்தில், 114 ரஃபேல் போர் விமானங்களை வாங்குவதற்கான வரலாற்றுச் சிறப்புமிக்க முடிவு எடுக்கப்பட்டுள்ளது.

ஒப்பந்தத்தின் முக்கிய அம்சங்கள்:

• மல்டி-ரோல் போர் விமானம் (MRFA) திட்டத்தின் கீழ், பிரான்சிடமிருந்து 114 புதிய ரஃபேல் விமானங்கள் வாங்கப்படவுள்ளன. இதில் 88 ஒற்றை இருக்கை போர் விமானங்களும், 26 இரட்டை இருக்கை பயிற்சி விமானங்களும் அடங்கும்.

• இந்தியா ஏற்கனவே 36 ரஃபேல் விமானங்களை இயக்கி வரும் நிலையில், தற்போது வாங்கப்படவுள்ளவை அதிநவீன F4 வகை (Rafale F4) விமானங்களாக இருக்கும்.

• இந்த ஒப்பந்தம் வெறும் விமானங்களை மட்டும் உள்ளடக்கியது அல்ல; மேம்பட்ட ஆயுத அமைப்புகள், சிமுலேட்டர்கள், உதிரி பாகங்கள் மற்றும் நீண்ட கால பராமரிப்பு வசதிகளையும் உள்ளடக்கியது.

கடற்படைக்கான பலம்: P-8I கண்காணிப்பு விமானங்கள்

விமானப்படையைத் தொடர்ந்து, இந்தியக் கடற்படையின் கண்காணிப்புத் திறனை வலுப்படுத்தவும் நடவடிக்கை எடுக்கப்பட்டுள்ளது.

அமெரிக்காவிடமிருந்து சுமார் ரூ. 27,000 கோடி ($3 Billion) செலவில் 6 நீண்ட தூர கடல்சார் கண்காணிப்பு விமானங்களை (P-8I) வாங்க ஒப்புதல் அளிக்கப்பட்டுள்ளது.ஏற்கனவே 12 P-8I விமானங்கள் பயன்பாட்டில் உள்ள நிலையில், இந்த 6 விமானங்கள் இணைக்கப்படுவது கடல் எல்லைப் பாதுகாப்பை மேலும் உறுதிப்படுத்தும்.

உலகளாவிய 'ரஃபேல் மையமாக' மாறும் இந்தியா

இந்த ஒப்பந்தம் செயல்பாட்டுக்கு வரும்போது, இந்தியா உலகின் மிகப்பெரிய ரஃபேல் விமானப் படைகளைக் கொண்ட நாடுகளில் ஒன்றாக மாறும்.

1. மொத்த எண்ணிக்கை: ஏற்கனவே உள்ள 36 ரஃபேல், புதிய 114 ரஃபேல் மற்றும் கடற்படைக்காக திட்டமிடப்பட்டுள்ள 26 ரஃபேல்-எம் என இந்தியாவின் மொத்த ரஃபேல் எண்ணிக்கை 176-ஆக உயரும்.

2. பராமரிப்பு மையம்: ரஃபேல் விமானங்களின் உற்பத்தி மற்றும் பராமரிப்பிற்கான ஒரு சர்வதேச மையமாக இந்தியாவை மாற்ற இத்திட்டம் வழிவகை செய்கிறது.

3. எதிர்பார்ப்பு: பிரெஞ்சு அதிபர் இம்மானுவேல் மக்ரோன் இந்தியா வரும்போது, இந்த அரசு-க்கு-அரசு (G2G) ஒப்பந்தம் அதிகாரப்பூர்வமாக கையெழுத்தாகும் என எதிர்பார்க்கப்படுகிறது.