india

தீவிர காற்று மாசுபாட்டால் திண்டாடும் தேசியத்தலைநகர்! - அமலுக்கு வந்த கடும் கட்டுப்பாடுகள் என்ன?

விவேக் தங்கராஜ் — Sun, 1 Nov 2026 13:55:06 +0530

டெல்லி மற்றும் வட மாநிலங்களில் மழைக்காலம் நிறைவடைந்து குளிர்காலம் தொடங்கியுள்ள நிலையில், கடும் காற்று மாசுபாடு நிலவிவருகிறது. இதன் காரணமாக பொதுமக்களின் இயல்பு வாழ்க்கை பாதிக்கப்படுவதும், வாகன ஓட்டிகள் அவதிக்கு ஆளாவதும் வாடிக்கையாக உள்ளது.

வாகனங்களுக்கு கடும் கட்டுப்பாடு

குளிர்கால காற்று மாசு தடுப்பு நடவடிக்கைகளின் ஒரு பகுதியாக BS-6 தர நிலையை எட்டாத பிறமாநில வாகனங்களுக்கு டெல்லிக்குள் நுழையத்தடை விதிக்கப்பட்டுள்ளது. இதன்மூலம் லட்சக்கணக்கான வெளிமாநில வாகனங்கள் டெல்லிக்குள் நுழைவது தடுக்கப்படுமென கூறப்படும் நிலையில், ஏஐ மற்றும் தானியங்கி கேமராக்களின் உதவியுடன் எல்லைப்பகுதியில் தீவிர கண்காணிப்பு பணி நடைபெறுகிறது. இந்நிலையில் டெல்லியில் ஏற்கனவே மாசு கட்டுப்பாட்டு சான்றிதழ் இல்லாத வாகனங்களுக்கு எரிபொருள் வழங்கக்கூடாது என்ற உத்தரவு நடைமுறையில் உள்ளது குறிப்பிடத்தக்கது.

கட்டுமானப்பணிகளுக்கு செக் வைத்த அரசு

மாசுபாடு ஏற்படுவதை தடுக்கும் நோக்கில் நவம்பர் 1-ந்தேதி முதல் ஜனவரி 31-ந்தேதி வரை வெளிப்புற கட்டுமானம், இடிப்பு போன்ற பணிகளை மேற்கொள்ளப்பட்டுள்ள நிலையில் மருத்துவமனை உள்ளிட்டவற்றிற்கு இதிலிருந்து விலக்களிக்கப்பட்டுள்ளது. மேலும் போக்குவரத்து நெரிசலை குறைக்கும் வகையில் 50% அரசு ஊழியர்கள் மட்டுமே அலுவலகங்களுக்கு வருகைத்தர வேண்டுமெனவும், மீதமுள்ளவர்கள் work from home முறையில் பணியாற்றவும் மத்திய அரசு அறிவுறுத்தியுள்ளது குறிப்பிடத்தக்கது.

40 வில்லாக்கள், விற்ற நிறுவனத்திற்கே குத்தகை, ரூ.1.8 கோடி வாடகை..! வசூலை வாரிக்குவித்த IAS-IPS ஜோடி..!

குலசேகரன் முனிரத்தினம் — Sun, 1 Nov 2026 09:26:27 +0530

Rajasthan IAS IPS: தனியார் நிறுவனங்களுக்கு ஒப்புதல் அளிப்பதில் சலுகைகள் வழங்கியதன் மூலம், வருமானத்திற்கு அதிகமாக சொத்துகளை சேர்த்ததாக ஐஏஎஸ் - ஐபிஎஸ் தம்பதி மீது புகார் எழுந்துள்ளது.

ஐஏஎஸ் - ஐபிஎஸ் தம்பதி மீது குற்றச்சாட்டு:

ராஜஸ்தானைச் சேர்ந்த ஐஏஎஸ் அதிகாரி மற்றும் அவரது குடும்பத்தினர், இரண்டரை ஆண்டுகளில் தனியார் ரிசார்ட்ஸில் உள்ள இரண்டு இடங்களில் 40 வில்லாக்கள் மற்றும் காட்டேஜ்களை ரூ.6.16 கோடிக்கு வாங்கி, பின்னர் அவற்றைஅதே நிறுவனத்திற்கே குத்தகைக்கு விட்டு, ஆண்டுக்கு ரூ.1.8 கோடி வருமானம் ஈட்டியதாக குற்றச்சாட்டு எழுந்துள்ளது. இதையடுத்து அந்த அதிகாரி பதவியைத் தவறாகப் பயன்படுத்தி, குறிப்பிட்ட நிறுவனத்திற்குச் சாதகமான ஒப்பந்தங்களைப் பெற்றுத் தந்ததாகவும், சந்தை விலையை விட மிகக் குறைந்த விலையில் சொத்துக்களை வாங்கியதாகவும் மாநிலத்தின் ஊழல் தடுப்புப் பிரிவு போலீசார் விசாரணையை தொடங்கியுள்ளனர்.

கோடிகளில் புரண்ட ஐஏஎஸ் - ஐபிஎஸ் தம்பதி..!

மாநில தொழில்துறையின் முன்னாள் கூடுதல் தலைமைச் செயலாளரான ஷிகர் அகர்வால், ஏற்கனவே காத்திருப்பு பட்டியலில் வைக்கப்பட்டுள்ளார். அவரது மனைவியும், மூத்த ஐபிஎஸ் அதிகாரியுமான பிரஷாகா மாத்தூரும் காத்திருப்பு பட்டியலுக்கு மாற்றப்பட்டுள்ளார். அனந்தா பிராண்டின் கீழ் ரிசார்ட்டுகளை நடத்தி வரும் கோயல் ஃபேஷன்ஸ் பிரைவேட் லிமிடெட் நிறுவனத்திற்கு முறையற்ற சலுகைகள் வழங்கப்பட்டிருக்கலாம் என்ற, குற்றச்சாட்டுகள் குறித்து விரிவான விசாரணை நடத்த ஊழல் தடுப்புப் பிரிவிற்கு அரசு ஒப்புதல் அளித்துள்ளது. கோயல் ஃபேஷன்ஸ் நிறுவனத்திற்கு முறையற்ற பலன்களைப் பெறுவதற்கும், மாநிலத்திற்குப் பெரும் நிதி இழப்பை ஏற்படுத்துவதற்கும் ஷிகர் அகர்வால் அதன் இயக்குனர்களுடன் கூட்டுச் சதி செய்ததற்கான முதற்கட்ட ஆதாரங்கள் கண்டறியப்பட்டுள்ளதாக கூறப்படுகிறது.

இதையும் படியுங்கள்: German SUV: ரூ.8 லட்சத்துக்கு புதிய ஜெர்மன் எஸ்யுவி..! டர்போ இன்ஜின், 8 ஸ்பீட் ஆட்டோமேடிக் ஆப்ஷன் - முழு விவரம்

குற்றச்சாட்டுகள் என்ன?

ஊழல் தடுப்பு ஆணையத்தின்படி, அந்த நிறுவனம் ரிசார்ட் கட்டுமானத் தேவைகளில் சலுகைகளையும், கட்டாயச் சான்றிதழ்களை முறையாகச் சரிபார்க்காமலேயே ஒப்புதல்களையும், சாதகமான நிபந்தனைகளின் பேரில் சிறப்பு நிதித் தொகுப்புகளையும் பெற்றுள்ளது. இதற்காக ஷிகர் அகர்வால் பணப்பலனை பெற்றுள்ளார். 2023 செப்டம்பரில், அந்தக் குடும்பம் உதய்பூர், புஜ்தாவில் உள்ள ரிசார்ட்டில் 20 காட்டேஜ்களை வாங்கியது. 2026 மார்ச்சில், அவர்கள் அல்வார், அஜப்கரில் உள்ள ரிசார்ட்டில் மேலும் 20 வில்லாக்களை வாங்கினர். கோயல் ஃபேஷன்ஸ் நிறுவனத்திடமிருந்து இந்தச் சொத்துக்கள் மொத்தம் ரூ. 6.16 கோடிக்கு வாங்கப்பட்டன. சில வில்லாக்கள் அவற்றின் சந்தை மதிப்பை விட கணிசமாகக் குறைந்த விலையில் வாங்கப்பட்டிருக்கலாம் என்று கூறப்படுகிறது.

விலையை குறைத்து பத்திரப்பதிவு:

அந்த முகமையின்படி, அகர்வால் மற்றும் மாத்தூர் இருவரும் உதய்பூர் ரிசார்ட்டில் தலா 15 லட்சம் ரூபாய்க்கு 10 வில்லாக்களை வாங்கியுள்ளனர். அல்வார் ரிசார்ட்டில், எட்டு வில்லாக்கள் தலா 16.5 லட்சம் ரூபாய்க்கு அவர்கள் பெயரில் பதிவு செய்யப்பட்டுள்ளன. அவர்களுடைய இரண்டு மகன்கள் தலா சுமார் 15 லட்சம் ரூபாய்க்கு நான்கு வில்லாக்களை வாங்கியதாகவும், மேலும் நான்கு வில்லாக்கள் மாத்தூரின் பெற்றோர் பெயரில் சுமார் 16.5 லட்சம் ரூபாய்க்கு பதிவு செய்யப்பட்டுள்ளதாகவும் கூறப்படுகிறது. ஷிகர் அகர்வாலின் குடும்பத்தினர், சொத்துக்கள் யாரிடமிருந்து வாங்கப்பட்டனவோ அதே கோயல் ஃபேஷன்ஸ் நிறுவனத்துடன் பதிவு செய்யப்பட்ட குத்தகை ஒப்பந்தங்களை மேற்கொண்டனர்.

ஒப்பந்தங்களின்படி, உதய்பூரில் உள்ள ஒவ்வொரு காட்டேஜும் ஆண்டுக்கு ரூ. 4 லட்சத்திற்கும், அல்வாரில் உள்ள ஒவ்வொரு வில்லாவும் ஆண்டுக்கு ரூ. 5 லட்சத்திற்கும் நிறுவனத்திற்கே மீண்டும் குத்தகைக்கு விடப்பட்டது. இந்த 40 சொத்துக்களும் இணைந்து ஆண்டுக்கு ரூ. 1.80 கோடி குத்தகை வருமானத்தை ஈட்டும் என மதிப்பிடப்பட்டுள்ளது. இதில் உதய்பூரிலிருந்து ரூ. 80 லட்சமும், அல்வாரிலிருந்து ரூ. 1 கோடியும் அடங்கும்.

மணிப்பூரில் துப்பாக்கிச்சூடு: 3 பேர் பலி - மீண்டும் தீவிரமடையும் கலவரம்?

விவேக் தங்கராஜ் — Sun, 1 Nov 2026 08:33:23 +0530

மணிப்பூர் மாநிலத்தின் நானி மாவட்டம் கிக்ரு நாகா உள்ள மலைக்கிராமத்தில் கும்பல் ஒன்று நடத்திய துப்பாக்கிச்சூட்டில் 3 பேர் உயிரிழந்தனர்.

மணிப்பூரில் மீண்டும் தலையெடுக்கும் கலவரம்?

கடந்த 2023-ஆம் ஆண்டு மணிப்பூர் மக்கள்தொகையில் பெரும்பான்மையாக உள்ள மைதேயி சமூகம், தங்களை 'பட்டியல் பழங்குடியினர்' பட்டியலில் சேர்க்க வேண்டும் என்ற கோரிக்கையின் தொடர்பாக, மைதேயி - குக்கி சமூகத்தினரிடையே கலவரம் ஏற்பட்டு சுமார் 200 பேருக்கு மேல் உயிரிழந்தனர். நிலைமை கைமீறியதை அடுத்து மாநிலத்தில் குடியரசு தலைவர் ஆட்சி அமல்படுத்தப்பட்டு வன்முறை பெருமளவு கட்டுக்குள் கொண்டுவரப்பட்டது.

முதல்வர் பதவி விலகக்கோரி நடைபெற்ற பேரணி

இந்நிலையில்,கலவரம் அடக்கப்பட்டிருந்தாலும் அதன் வீரியம் இன்னும் குறையாத நிலையில் ஆங்காங்கே வன்முறைகள் அரங்கேறிவருவது வாடிக்கையாகி உள்ளது. இந்நிலையில் வன்முறையை கண்டித்தும், அமைதியை ஏற்படுத்த தவறியதாக கூறி அம்மாநில முதல்வரை பதவிவிலக வலியுறுத்தியும் நேற்று மைதேயி இனமக்கள் இம்பாலில் பிரமாண்ட பேரணியில் ஈடுபட்டனர்.

துப்பாக்கிச்சூடு: 3 பேர் பலி

நானி மாவட்டம் கிக்ரு நாகா மலைக்கிராமத்தில் கும்பல் ஒன்று நடத்திய துப்பாக்கிச்சூட்டில் குக்கி சமூகத்தை சேர்ந்த மூவர் உயிரிழந்தனர். இதனால் மீண்டும் பதற்றநிலை அதிகரித்துள்ள நிலையில், அப்பகுதியில் பாதுகாப்பு படையினர் குவிக்கப்பட்டுள்ளனர்.இந்நிலையில் இதேபோன்று சில நாட்களுக்கு முன்பாக மைதேயி சமூகத்தினர் மீது நடத்தப்பட்ட தாக்குதலில் மூவர் பலியாகினர் என்பது குறிப்பிடத்தக்கது.

முதலமைச்சர் திடீர் 2ஆவது திருமணம்.. வைரலாகும் புகைப்படம் - யார் அந்த பிரபல பெண்?

ராஜேஷ். எஸ் — Sat, 31 Oct 2026 20:55:20 +0530

ஜம்மு - காஷ்மீர் முதலமைச்சர் உமர் அப்துல்லா, மூத்த பத்திரிகையாளர் நிதி ரஸ்தானை திருமணம் செய்து கொண்டார். முதல் மனைவியை விவாகரத்து செய்து மூன்று மாதங்களே ஆன நிலையில் இந்த திருமணம் நடந்துள்ளது.

திருமணம் குறித்த அறிவிப்பை இருவரும் அதிகாரப்பூர்வமாக தங்களின் சமூகவலைதளப்பக்கத்தில் அறிவித்துள்ளனர். உமர் அப்துல்லா தனது எக்ஸ் தளப்பக்கத்தில், ‘நேற்று ஒரு புதிய பயணம் தொடங்கியது’ என்று குறிப்பிட்டு இருவரும் ஒன்றாக இருக்கும் புகைப்படங்களை வெளியிட்டுள்ளார். நிதி ரஸ்தானுவும் ‘இட்ஸ் டன் ப்ரோ’ எனக் குறிப்பிட்டு பதிவிட்டிருக்கிறார். இதன் மூலம் இருவரும் திருமணம் செய்து கொண்டதாக தெரிவித்துள்ளனர்.

A new journey began yesterday 💍@Nidhi https://t.co/BXbdLq2d1H
— Omar Abdullah (@OmarAbdullah) October 31, 2026

திருமணத்திற்கு முன்னதாக ஸ்ரீநகரில் நடைபெற்ற சின்ன விழாவில் இரண்டு குடும்பங்களின் நெருங்கிய உறவினர்கள் மட்டுமே கலந்து கொண்டுள்ளனர். உமர் அப்துல்லாவின் பெற்றோரான, தேசிய மாநாட்டுக் கட்சியின் தலைவர் ஃபாரூக் அப்துல்லா மற்றும் மொல்லி அப்துல்லா, அவரது மூன்று சகோதரிகள் மற்றும் பிற நெருங்கிய உறவினர்கள் கலந்துகொண்டனர். ரஸ்தானின் பெற்றோரான, மூத்த பத்திரிகையாளர் எம்.கே. ரஸ்தான் மற்றும் சர்லா ரஸ்தான் ஆகியோரும் உடனிருந்தனர்.

It’s done bro 💍 @OmarAbdullah https://t.co/I3V5HnCz7C
— Nidhi Razdan (@Nidhi) October 31, 2026

ஜம்மு - காஷ்மீர் முதலமைச்சர் உமர் அப்துல்லாவின் முதல் திருமணம் பயல் அப்துல்லாவுடன் நடைபெற்றது. இவர்களுக்கு இரண்டு மகன்கள் உள்ளனர். இருவருக்கும் இடையே ஏற்பட்ட கருத்து வேறுபாடு காரணமாக கடந்த 2011ஆம் ஆண்டு பிரிந்துவிட்டனர். பல ஆண்டுகளாக நீதிமன்றத்தில் விவாரகத்து வழக்கு இருந்து வந்தது. கடந்த ஜூலை மாதம் உச்சநீதிமன்றம் இருவருக்கும் விவாகரத்து வழங்கி வழக்கை முடித்து வைத்த நிலையில், தற்போது இந்த திருமணம் நடைபெற்றுள்ளது. உமல் அப்துல்லா - நிதி ரஸ்தானின் திருமண செய்தி, புகைப்படங்கள் இணையத்தில் வைரலாகி வருகின்றன. தம்பதியருக்கு அரசியல் தலைவர்கள் உட்பட பலர் வாழ்த்து தெரிவித்தனர்.

ரயில் பயணத்தில் முதியவர்களுக்கு குட் நியூஸ்! லோவர் பெர்த் ஒதுக்கீடு பற்றி தெரியுமா?

நாகராஜ் — Sat, 31 Oct 2026 17:54:08 +0530

இந்தியாவில் முக்கிய போக்குவரத்துகளில் ஒன்றாக இருப்பது ரயில் சேவை. ரயில்களில் தினமும் லட்சக்கணக்கான பயணிகள் பயணித்து வருகின்றனர். அவர்களுக்காக பல்வேறு சலுகைகள் திட்டங்களை கொண்டு வருகிறது. குறிப்பாக தொலைதூரம் பயணிப்பவர்களுக்கு, ரயில் சேவை வரப்பிரசாதமாக இருந்து வருகிறது.

இந்திய ரயில்வே நாள்தோறும் 19,000 ரயில்களை இயக்கி வருகிறது. இதில் நாள்தோறும் 4 கோடி மக்கள் பயணிக்கிறார்கள். குறிப்பாக பண்டிகை காலங்களில் ரயில் பயணிகளுக்கு ஏற்றார்போல் அவ்வப்போது ரயில் நேரங்கள் மாற்றம் உட்பட பல்வேறு சேவைகளை செய்து வருகிறது ரயில்வே நிர்வாகம். ரயில்வே பயணிகளின் நலனை கருத்தில் கொண்டு எண்ணற்ற வசதிகளை வழங்கி வருகிறது. அந்த வகையில் மூத்த குடிமக்கள் மற்றும் 45 வயதுடைய பெண்கள் சிரமமின்றி பயணம் செய்ய வேண்டும் என்பதற்காக லோவர் பர்த் ஒதுக்கீட்டில் முன்னுரிமை வழங்கி வருகிறது.

நீண்ட தூரம் ரயிலில் பயணிக்கும் முதியவர்களுக்கு அப்பர் பர்த் மற்றும் மிடில் பர்த் போன்றவற்றில் ஏறி இறங்குவதற்கு சிரமமாக இருக்கும். இதைக் கருத்தில் கொண்டு இந்திய ரயில்வே இவர்களுக்கு லோவர் பர்த் கோட்டாவை வழங்குகிறது. ஆண்களாக இருந்தால் 60 வயது அல்லது அதற்கு மேற்பட்ட முதியவர்கள் மற்றும் பெண்களாக இருந்தால் 45 வயது அல்லது அதற்கு மேற்பட்டவர்களுக்கு இந்த வசதி வழங்கப்பட்டுள்ளது. எல்லா நேரங்களிலும் முதியவர்களுக்கு முன்னுரிமை வழங்கப்படும் என்று சொல்ல முடியாது. ஏனெனில் ரயில் பெட்டிகளில் உள்ள காலியிடங்கள், நீங்கள் முன்பதிவு செய்யும் நேரம் மற்றும் கிளாஸ் ஆகியவற்றை பொருத்தும் இருக்கைகள் ஒதுக்கீடு செய்யப்படுகிறது.

ஸ்லீப்பர் கிளாஸில் ஒரு பெட்டிக்கு 6 முதல் 7 லோவர் பர்த் முதியவர்களுக்காக ஒதுக்கப்படுகிறது. 2AC கிளாஸில் 3 முதல் 4 லோவர் பர்த்தும், 3AC கிளாஸில் 4 முதல் 5 லோவர் பர்த்தும் ஒதுக்கப்படுகிறது. முதியவர்கள், 45 வயதுக்கு மேற்பட்ட பெண்கள் மற்றும் கர்ப்பிணிகளுக்காக இந்த ஒதுக்கீடு பயன்படுத்தப்படுகிறது. நீங்கள் யாருக்காக முன்பதிவு செய்தாலும் சரி அவர்களுடைய வயது விவரங்களை சரியாக வழங்க வேண்டும். சீட்டை கவனமாக தேர்ந்தெடுக்க வேண்டும். எனவே தவறான விவரங்களை வழங்கினால் பிரச்சனை ஏற்படலாம். ரயிலில் எத்தனை பெட்டிகள் இருக்கிறது என்பதைப் பொறுத்து முதியவர்களுக்காக ஒதுக்கப்படும் இந்த கோட்டாவில் சில மாற்றங்கள் இருக்கலாம்.

நீங்கள் முன்பதிவு செய்தும் உங்களுக்கு அப்பர் பர்த் அல்லது மிடில் பர்த் கிடைத்திருந்தால் நீங்கள் டிக்கெட் செக்கரிடம் பேசிப் பார்க்கலாம். பயணத்தின் போது காலியாக இருக்கும் லோவர் பர்த்தை மூத்த குடிமக்கள், மாற்றுத்திறனாளிகள் மற்றும் கர்ப்பிணி பெண்களுக்கு ஒதுக்க விதிமுறை இருக்கிறது. எனவே டிக்கெட் செக்கரை அணுகி உங்கள் சூழ்நிலையை அவரிடம் எடுத்துக் கூறலாம். ஆனால் ரயிலில் காலியிடம் இருந்தால் மட்டுமே இது சாத்தியமாகும். கட்டாயம் கிடைக்கும் என்று சொல்லிவிட முடியாது.

நவம்பர் 1 முதல் அதிரடி ! சிலிண்டர் விலை, வங்கி கட்டணங்களில் முக்கிய மாற்றங்கள்! விவரம் இதோ

நாகராஜ் — Sat, 31 Oct 2026 17:42:58 +0530

நவம்பர் 1 ம் தேதி நாளை முதல் நம் மாத பட்ஜெட்டில் நிறைய ஏற்றம் காணப்போவதை குறித்து விரிவாக பார்க்கலாம். ஒவ்வொரு மாதமும் முதல் தேதியில் இண்டேன் , பாரத் கேஸ், ஹெச்பி ஆகிய நிறுவனங்கள் சிலிண்டர் விலைகளை மாற்றி அறிவிப்பு வெளியிடும்.

ஈரான் போர் காரணமாக மார்ச் மாதம் முதல் இந்தியாவில் வீட்டு உபயோக சிலிண்டர் மற்றும் கடைகள், ஓட்டல்களில் பயன்படுத்தப்பட கூடிய வணிக பயன்பாட்டு சிலிண்டரின் விலைகள் உயர்த்தப்பட்டன. இன்னமும் போர் முடியவில்லை இந்த சூழலில் நாளை சிலிண்டர் விலை மாற்றப்படுமா என்ற எதிர்பார்ப்பு மக்களிடையே எழுந்துள்ளது.

விலை குறைந்தால் நம்முடைய பட்ஜெட்டிற்கு நல்லது , விலை கூடினாலும் மாறாமல் இருந்தாலும் நமக்கு ஏமாற்றம் தான். 2026-27 மதிப்பீட்டு ஆண்டிற்கு கணக்குகளை தணிக்கை செய்ய வேண்டிய கட்டாயத்தில் உள்ள நிறுவனங்கள் மற்றும் தனிநபர் வரி செலுத்துவோருக்கு ஐடிஆர் தாக்கல் செய்வதற்கான கடைசி தேதி நவம்பர் 21 வரை நீட்டிக்கப்பட்டுள்ளது.

இந்த நீட்டிப்பு வழக்கமாக மாத சம்பளம் வாங்கும் தனிநபர்களுக்கு பொருந்தாது. 80 வயதிற்குட்பட்ட அரசு ஓய்வூதியதாரர்கள் தங்களது வாழ்நாள் சான்றிதழை (Jeevan Pramaan) சமர்ப்பிப்பதற்கான கால அவகாசம் நவம்பர் 1 அன்று தொடங்குகிறது. ஓய்வூதியம் தடையின்றி தொடர்ந்து கிடைக்க, அனைத்து ஓய்வூதியதாரர்களும் நவம்பர் 30-க்குள் தங்களது வாழ்நாள் சான்றிதழை கட்டாயம் சமர்ப்பிக்க வேண்டும்.

SEBI வெளியிட்ட புதிய வழிகாட்டுதல்களின்படி, அசெட் மேனேஜ்மென்ட் நிறுவனங்களின் (AMCs) டிஜிட்டல் தளங்களில் Direct Planகள் இனி Default Option-ஆக மாற்றப்படுகின்றன. எனவே Regular Plan களில் உள்ள அதிகப்படியான செலவு விகிதங்களை நிறுவனங்கள் வெளிப்படையாக காட்ட வேண்டிய கட்டாயம் ஏற்பட்டுள்ளது. இண்டஸ்இண்ட் வங்கியின் சேமிப்புக் கணக்குகளுக்கான பரிவர்த்தனை கட்டண விதிகள் மாற்றப்பட்டுள்ளன.

கணக்கில் போதிய பணம் இல்லாத காரணத்தால் ஏடிஎம் பரிவர்த்தனைகள் அல்லது பிஓஎஸ் மூலம் செய்யப்படும் வர்த்தகங்கள் தோல்வியடைந்தால், தோல்வியடைந்த ஒவ்வொரு பரிவர்த்தனைக்கும் 25 ரூபாய் கட்டணமாக வசூலிக்கப்படும். பஞ்சாப் நேஷனல் வங்கி தனது கிரெடிட் கார்டு சேவைக்கான கட்டணங்களை மாற்றியமைத்துள்ளது. கிரெடிட் கார்டு ரிவார்டு பாய்ண்ட்களை Redeem செய்யும் ஒவ்வொரு கோரிக்கைக்கும் 99 ரூபாய் கட்டணம் வசூலிக்கப்படும்.

சபரிமலை யாத்திரை செல்லும் பக்தர்கள் கவனத்திற்கு! தேவசம் போர்டு வெளியிட்ட முக்கிய அறிவிப்பு!

நாகராஜ் — Sat, 31 Oct 2026 17:28:41 +0530

மண்டல பூஜை சீசன் தொடங்க இன்னும் சில வாரங்களே உள்ள நிலையில், பக்தர்களுக்கான முக்கிய அறிவிப்புகளை வெளியிட்டுள்ளது திருவிதாங்கூர் தேவசம் போர்டு. நாளொன்றுக்கு 2 லட்சம் டின் அரவணை தயாரிப்பு, ரூ.2 லட்சம் ஆயுள் காப்பீடு எனப் பல்வேறு புதிய அறிவிப்புகளை அறிவித்துள்ளன.

சபரிமலை ஐயப்பன் கோவிலில் ஆண்டுதோறும் நடைபெறும் மண்டல கால யாத்திரை நவம்பர் 17-ம் தேதி தொடங்க உள்ளது. இதையொட்டி, பக்தர்களுக்குத் தேவையான அரவணை பிரசாதம் தட்டுப்பாடின்றிக் கிடைக்க நடவடிக்கை எடுக்கப்பட்டுள்ளதாக திருவிதாங்கூர் தேவசம் போர்டு (TDB) தலைவர் கே. ஜெயக்குமார் தெரிவித்துள்ளார். திருவனந்தபுரத்தில் நடைபெற்ற தேவசம் போர்டு கூட்டத்திற்குப் பிறகு செய்தியாளர்களிடம் பேசிய அவர், தற்போது நாளொன்றுக்கு சுமார் 2 லட்சம் டின் அரவணை தயாரிக்கப்பட்டு வருவதாகக் கூறினார்.

மேலும், புதிதாகக் கட்டப்பட்டுள்ள அரவணை தயாரிப்பு மையம் நவம்பர் 3 அல்லது 4-ம் தேதி முதல் செயல்பாட்டுக்கு வரவுள்ளதாகவும் தெரிவித்தார். மண்டல கால யாத்திரையை முன்னிட்டு, 50 முதல் 60 லட்சம் டின் அரவணையை முன்கூட்டியே இருப்பு வைக்க தேவசம் போர்டு இலக்கு நிர்ணயித்துள்ளது.

அரவணை தயாரிப்புப் பணிகள் தற்போது இரவு, பகல் என 24 மணி நேரமும் நடைபெற்று வருகின்றன. அரிசி மற்றும் வெல்லம் உள்ளிட்ட பொருட்களால் தயாரிக்கப்படும் இந்தப் பிரசாதம், சபரிமலைக்கு வரும் பக்தர்களுக்கு எவ்விதத் தட்டுப்பாடுமின்றி கிடைக்க வேண்டும் என்பதே இந்த நடவடிக்கையின் நோக்கமாகும். இந்த ஆண்டு சபரிமலை யாத்திரைக்கு வரும் பக்தர்களுக்காக மற்றொரு முக்கிய அறிவிப்பையும் தேவசம் போர்டு வெளியிட்டுள்ளது.

மேலும் இந்திய ஆயுள் காப்பீட்டுக் கழகத்துடன் (எல்.ஐ.சி.யுடன்) இணைந்து புதிய ஆயுள் காப்பீட்டுத் திட்டம் அறிமுகப்படுத்தப்பட்டுள்ளது. இதன்படி, யாத்திரைக் காலத்தில் சபரிமலையில் உயிரிழக்கும் பக்தர்களின் குடும்பத்தினருக்கு தலா ரூ.2 லட்சம் இழப்பீடு வழங்கப்படும். இந்தக் காப்பீட்டுத் திட்டத்திற்கான முழு பிரீமியம் தொகையையும் தேவசம் போர்டே ஏற்கும் என அதன் தலைவர் கே. ஜெயக்குமார் தெரிவித்துள்ளார்.

இந்தத் திட்டத்திற்கான பிரீமியம் தொகை தேவசம் போர்டின் நல நிதியில் இருந்து செலுத்தப்பட உள்ளது. நடப்பு யாத்திரைக் காலத்தில் இந்தக் காப்பீட்டுத் திட்டத்திற்காக சுமார் ரூ.1 கோடி செலவாகும் என எதிர்பார்க்கப்படுகிறது. இதற்காகப் பக்தர்கள் தனியாக எந்தப் பிரீமியமும் செலுத்த வேண்டியதில்லை. ஆன்லைன் விர்ச்சுவல் கியூ முன்பதிவின்போது, பக்கதர்களின் பெயர் மற்றும் அவருடனான உறவு குறித்த விவரங்கள் சேகரிக்கப்படும்.

சபரிமலை யாத்திரைக்கு வரும் பக்தர்களுக்கு இதுபோன்ற ஆயுள் காப்பீடு வழங்கப்படுவது இதுவே முதல்முறை என்றும் தேவசம் போர்டு தலைவர் குறிப்பிட்டுள்ளார். யாத்திரைக்கு வரும் பக்தர்களின் வசதிக்காக நிலக்கல் மற்றும் பம்பை ஆகிய இடங்களில் வரவேற்பு மற்றும் உதவி மையங்கள் அமைக்கப்பட உள்ளன.

மேலும், சபரிமலையில் மேற்கொள்ளப்பட்டு வரும் பல்வேறு உள்கட்டமைப்பு மேம்பாட்டுப் பணிகள் மற்றும் பராமரிப்புப் பணிகள் நவம்பர் 10-ம் தேதிக்குள் நிறைவடையும் என எதிர்பார்க்கப்படுகிறது. அரவணை தட்டுப்பாடின்றி கிடைக்க உற்பத்தி அதிகரிப்பு, பக்தர்களின் குடும்பங்களுக்கு ரூ.2 லட்சம் காப்பீடு, அடிப்படை வசதிகள் மேம்பாடு என இந்த ஆண்டு சபரிமலை யாத்திரைக்காகப் பல்வேறு ஏற்பாடுகளைச் செய்து வருகிறது திருவிதாங்கூர் தேவசம் போர்டு.

இந்தியாவின் இரும்பு மனிதர்: பிரதமர் பதவிக்கான நேருவின் போட்டியாளர் - யார் இந்த வல்லபாய் படேல்?

விவேக் தங்கராஜ் — Sat, 31 Oct 2026 09:43:51 +0530

இந்தியாவின் இரும்பு மனிதர் என அழைக்கப்படும் முன்னாள் துணைப்பிரதமர் வல்லபாய் படேலின் இன்று கொண்டாடப்படுகிறது. அவர் ஏன் இரும்பு மனிதர் என அழைக்கப்படுகிறார்?, அவர் ஏன் இந்தியாவின் பிரதமராகவில்லை என்பதை விரிவாக பார்க்கலாம்.

யார் இந்த வல்லபாய் படேல்?

குஜராத் மாநிலத்தில் உள்ள நடியாத் பகுதியில் 1875-ஆம் ஆண்டு வல்லபாய் படேல் பிறந்தார். 1891-ஆம் ஆண்டு பள்ளிக்கல்வியை கரமசாத்தில் ஆரம்பப் பள்ளியிலும், பெட்லாடில் உயர்நிலைப் பள்ளியிலும் நிறைவு செய்த படேல் தனது 16-வது வயதில் ஜாவேர்பா என்பவரை திருமணம் செய்துக்கொண்டார். இங்கிலாந்தின் மிடில் டெம்பிளுக்கு சென்று சட்டப்படிப்பை நிறைவுசெய்த படேல், இந்தியாவிற்கு திரும்பி தனது வழக்கறிஞர் பணியை மேற்கொண்டார்.

சர்தார் ஆக மாறிய படேல்!

ஆங்கில பாணி ஆடைகள் அணிந்து, மேற்கத்திய விளையாட்டுகளில் பங்கேற்று வந்த படேலின் வாழ்க்கை பாதை மகாத்மா காந்தியின் செயல்பாடுகளால் ஈர்க்கப்பட்ட பின்னர் முற்றிலும் திசைமாறியது.அதன் பின்னர் இந்தியமுறை உடைகளை அணிந்து ஆடம்பரங்களை தவிர்த்து காந்திய வழியில் வாழத்தொடங்கினார். 1917-1924 வரை அகமதாபாத்தின் முதல் இந்திய நகராட்சி ஆணையராகவும், 1924 - 1928 வரை அதன் தேர்ந்தெடுக்கப்பட்ட நகராட்சித் தலைவராகவும் படேல் பணியாற்றினார். முதன்முதலில் 1918-ஆம் ஆண்டு விவசாயிகளுக்கு ஆதரவாக கேதா சத்தியாகிரகத்தில் ஈடுபட்டு பிரபலமானார். இதனையடுத்து 1928-ஆம் ஆண்டு வரி உயர்வை கண்டித்து நில உரிமைகளுக்கு எதிராக படேல் நடத்திய போராட்டத்தின் விளைவாக அவருக்கு சர்தார் பட்டம் வழங்கப்பட்டது.

அரசியல் பிரவேசம்

இந்திய தேசிய காங்கிரசில் தீவிரமாக செயல்பட்டு வந்தவல்லபாய் படேல் 1920-இல் குஜராத் காங்கிரஸ் கமிட்டி தலைவராகவும், மார்ச் 1931-இல் அகில இந்திய தேசிய காங்கிரஸ் கமிட்டியின் தலைவராகவும் தேர்ந்தெடுக்கப்பட்டார். பிரதமராக தேர்வாக 1946-ஆம் ஆண்டு நடைபெற்ற காங்கிரஸ் தலைவர் தேர்தல் முக்கியமானதாக கருதப்பட்டது. இந்நிலையில் அதன் பிரதான போட்டியாளர்களாக நேருவும், படேலும் மாறிய நிலையில் அப்போது மொத்தமிருந்த 15 மாகாண காங்கிரஸ் கமிட்டிகளில் 12 கமிட்டிகளின் ஆதரவு படேலுக்கே இருந்தது. மீதமிருந்த 3 மாகாண கமிட்டிகளும் யாரையும் ஆதரிக்காமல் நடுநிலை வகித்தன.படேலுக்கு இத்தனை செல்வாக்கு இருந்தபோதிலும் தன் வழிகாட்டியான காந்தியின் ஆதரவு நேருவுக்கு இருந்ததால் தலைவர் பதவிக்கான போட்டியில் இருந்து படேல் விலகினார்.ஒருவேளை அப்போதைய காங்கிரஸ் கமிட்டி தலைவராக தேர்வாகி இருந்திருந்தால் நாட்டின் முதல் பிரதமராக படேல்தான் இருந்திருப்பார்.

இரும்புமனிதர்: நாட்டின் முதல் துணைப்பிரதமர்

1946-ஆம் ஆண்டு செப்டம்பரில் அமைக்கப்பட்ட இடைக்கால அரசில் உள்துறை அமைச்சராகவும், அதன் தொடர்ச்சியாக அமைந்த நாட்டின் முதல் அமைச்சரவையில் துணைப்பிரதமராகவும் உள்துறை அமைச்சராகவும் பணியாற்றினார். சுதந்திரத்திற்கு பின் சிதறுண்டு கிடந்த சுதேசி மாகாணங்களை இந்தியாவுடன் இணைக்கும் கடினமான பொறுப்பெடுத்து திறம்பட செய்துமுடித்த படேல் இரும்புமனிதர் எனவும், இந்தியாவின் பிஸ்மார்க் எனவும் அழைக்கப்பட்டார். இவர் ராஜதந்திர நடவடிக்கைகளின் காரணமாக 560-க்கும் மேற்பட்ட சுதேச மாகாணங்கள் இந்தியாவுடன் இணைக்கப்பட்ட நிலையில், இந்தியாவுடன் இணையாமல் முரண்பாட்டை கடைபிடித்த ஹைதராபாத் மற்றும் ஜூனாகத் மாகாண இணைப்புகளிலும் இவரது பங்கு முக்கியமானது.

இறப்பும், பாரத ரத்னா விருதும்!

1950-ஆம் ஆண்டு டிசம்பர் 15-ஆம் தேதியன்று மாரடைப்பு காரணமாக வல்லபாய் படேல் உயிரிழந்தார். நாட்டின் ஒருங்கிணைப்பில் இன்றியமையாத பணியாற்றிய சர்தார் வல்லபாய் படேலுக்கு அவரது இறப்புக்கு பின் 41 ஆண்டுகள் கழித்து 1991-இல்தான் நாட்டின் உயரிய விருதான பாரத ரத்னா வழங்கப்பட்டது என்பது குறிப்பிடத்தக்கது.

விண்ணில் பாய்ந்த GSLV - F18: வெற்றிகரமாக நிலை நிறுத்தப்பட்ட NVS-03 செயற்கைக்கோள்!

விவேக் தங்கராஜ் — Sat, 31 Oct 2026 07:10:27 +0530

ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி மையத்தில் இருந்து ஜி.எஸ்.எல்.வி - எப்18 ராக்கெட் இரவு 11.51 மணிக்கு வெற்றிகரமாக விண்ணில் ஏவப்பட்டது. ராக்கெட் ஏவுதலுக்கான 24 மணி நேரக்கவுன்டவுன் 29-ஆம் தேதி தொடங்கிய நிலையில், நேற்று இரவு 11.51 மணிக்கு வெற்றிகரமாக ராக்கெட் விண்ணில் பாய்ந்தது. இதனைத்தொடர்ந்து புவி வட்டப்பாதையில் என்விஎஸ்-03 செயற்கைக்கோள் வெற்றிகரமாக புவி வட்டப்பாதையில் நிலைநிறுத்தப்பட்டது.

வழிகாட்டும் சேவைக்கு உதவும் செயற்கைக்கோள்

இருப்பிட மற்றும் வழிகாட்டும் சேவைக்கு உதவும் நேவிக் அமைப்பை வலுப்படுத்தி குறைபாடுகளை களையும் நோக்கில் என்விஎஸ்-03 செயற்கைக்கோள் வடிவமைக்கப்பட்டுள்ளது.இதன் மூலம் ஜிபிஎஸ் சேவைக்கு மாற்றாக இந்திய உருவாக்கமான நேவிக் தொழில்நுட்ப சேவை வலுப்பெற்று பாதுகாப்பு, பேரிடர் மேலாண்மை மற்றும் வழிகாட்டும் சேவைக்கு பேருதவியாக அமையுமென தெரிவிக்கப்பட்டுள்ளது. இச்செயற்கைக்கோளின் ஆயுட்காலாம் 12 ஆண்டுகள் என்வும் இந்திய விண்வெளி ஆய்வு மையமான இஸ்ரோ அறிவித்துள்ளது.

உத்தரகாண்ட்: விபத்தில் சிக்கிய ஹெலிகாப்டர் - பயணித்த 6 பேரும் உயிரிழந்த சோகம்!

விவேக் தங்கராஜ் — Fri, 30 Oct 2026 18:22:56 +0530

விபத்தில் சிக்கிய ஹெலிகாப்டர்

உத்தரகாண்ட் மாநிலம் பத்ரிநாத்தில் இருந்து டேராடூன் நோக்கிச் சென்ற ஹெலிகாப்டர் விபத்துக்குள்ளானது. இதில் 5 பயணிகள் மற்றும் ஒரு விமானி உட்பட மொத்தமாக 6 பேர் பயணித்துள்ளனர். டிரான்ஸ் பாரத் ஏவியேஷன் நிறுவனத்திற்கு சொந்தமான இந்த ஹெலிகாப்டர் சமோலி மாவட்டத்தில் உள்ள ஜோஷிமத் அருகே சென்றபோது தொடர்பு துண்டிக்கப்பட்டு மாயமானது.

6 பேரும் உயிரிழப்பு

ஹெலிகாப்டர் மாயமான சுற்றுவட்டாரப் பகுதிகளில் ஹெலிகாப்டரில் காவல்துறை, மாநில பேரிடர் மீட்புப் படை மற்றும் ராணுவத்தின் கூட்டுக் குழுக்கள் நடத்திய தீவிர மீட்புப் பணியில் விபத்துக்குள்ளான ஹெலிகாப்டர் கண்டறியப்பட்ட நிலையில், பயணித்த ஆறு பேரும் உயிரிழந்ததாகவும் தெரிவிக்கப்பட்டுள்ளது. உத்தரகாண்ட் சிவில் விமானப் போக்குவரத்து மேம்பாட்டு ஆணையத் தகவலின்படி ஹெலிகாப்டரை இயக்கிய விமானி கேப்டன் ஹிமான்ஷு என அடையாளம் காணப்பட்ட நிலையில், ஐந்து பயணிகள் முறையே பிரதாபா, அருண், சங்கர் கௌடா, சுதீர் மற்றும் எச்.எஸ்.நடராஜா ஆகியோர் என தெரியவந்துள்ளது. இறந்தோரின் சடலங்கள் கண்டெடுக்கப்பட்ட நிலையில் விபத்துக்கான காரணம் குறித்து விசாரணை நடைபெற்று வருவதாகவும் தெரிவிக்கப்பட்டுள்ளது.