Trump Vs Tiruppur: அய்யய்யோ.! இடியை இறக்கிய ட்ரம்ப் - முடங்கப் போகும் திருப்பூர் - அப்போ தொழிலாளர்களோட கதி.?

அமெரிக்க அதிபர் விதித்த பெரும் வரியால், திருப்பூர் முடங்கப்போகிறது என்றால் நம்புவீர்களா.? ஆம், அதுதான் உண்மை. ஏற்றுமதியில் பாதிக்கு மேல் குறையும் என்பதால், ஆடை உற்பத்தியாளர்கள் கவலையில் ஆழ்ந்துள்ளனர்.

ட்ரம்ப்பின் வரியால் திருப்பூர் ஆடை தொழிலுக்கு ஆபத்து

Source : Social Media

இந்தியாவிற்கு மொத்தமாக 50 சதவீத வரியை விதித்து, அதற்கான நிர்வாக உத்தரவிலும் அமெரிக்க அதிபர் ட்ரம்ப் கையெழுத்திட்டு, அந்த வரி அமலுக்கும் வந்துவிட்டது. இந்நிலையில், இரு நாடுகளுக்கும் இடையே பேச்சுவார்த்தை ஏதும் நடைபெறுமா என்பதும் சந்தேகமாகவே உள்ளது. இந்நிலையில், இந்த வரி உயர்வல், திருப்பூரில், ஆயத்த ஆடை ஏற்றுமதி பெருமளவில் பாதிக்கப்படும் என தெரிகிறது. இதனால், ஆடை உற்பத்தியாகள், அவர்களை நம்பி இருக்கும் தொழிலாளர்களின் வாழ்வாதாரமே பாதிக்கும் நிலை ஏற்பட்டுள்ளது. அது குறித்து தற்போது பார்க்கலாம்.

இந்தியாவிற்கு ட்ரம்ப் விதித்த இமாலய வரி

அமெரிக்க அதிபராக பொறுப்பேற்ற ட்ரம்ப், தங்கள் நாட்டு பொருட்களுக்கு பல்வேறு நாடுகளும் அதிக வரிகளை விதிப்பதாக குற்றம்சாட்டினார். அதோடு நிற்காமல், தங்களுக்கு அதிக வரி விதிக்கும் நாடுகளுக்கு பதில் வரியை விதிக்கப் போவதாக அறிவித்தார்.

அதைத் தொடர்ந்து இந்தியா உள்ளிட்ட பல்வேறு நாடுகளுக்கும் வரிகளை அறிவித்த ட்ரம்ப், அது அமலுக்கு வரும் தேதியை இரு முறை தள்ளி வைத்தார். அதற்குள், அனைத்து நாடுகளும் அமெரிக்கா உடன் வர்த்தக ஒப்பந்தம் மேற்கொள்ள வேண்டும் என அவர் கெடு விதித்திருந்தார்.

ஆனால், இந்தியா உள்பட பல்வேறு நாடுகளும் பேச்சுவார்த்தைகளை நடத்திய நிலையில், சில நாடுகள் மட்டுமே ஒப்பந்தங்களை மேற்கொண்டன. இந்நிலையில், ஒப்பந்தங்களை மேற்கொள்ளாத நாடுகளுக்கு வரி தற்போது அமலுக்கு வந்துள்ளது. அமெரிக்கா உடன் வர்த்தக ஒப்பந்தம் மேற்கொள்ள இந்திய குழு வாஷிங்டனில் முகாமிட்டு, பலகட்ட பேச்சுவார்த்தைகளை நடத்தியது. ஆனால், அமெரிக்கா விதித்த நியாயமற்ற நிபந்தனைகளை ஏற்க இந்தியா மறுத்துவிட்டது.

இந்த நிலையில், ரஷ்யாவிடம் எண்ணெய் வாங்குவதை நிறுத்த வேண்டும் என்று இந்தியாவை எச்சரித்த ட்ரம்ப், அப்படி செய்யாவிட்டால், கூடுதல் வரியையும், ரஷ்யாவிடம் எண்ணெய் வாங்குவதற்கு அபராதமும் விதிக்கப்போவதாக எச்சரித்திருந்தார்.

ஆனால், இந்தியா எந்தவித சாதகமான பதிலையும் தராததால், ஏற்கனவே இந்தியாவிற்கு விதித்திருந்த 25 சதவீத வரியுடன், அதிரடியாக 25 சதவீதம் கூடுதல் வரியை விதித்தார் ட்ரம்ப். இதனால், இந்தியாவிற்கான மொத்த வரி 50 சதவீதம் என அறிவித்து, அதற்கான நிர்வாக உத்தரவில் கையெழுத்தும் இட்டார். இதனால் வரிகள் தற்போது அமலுக்கு வந்துள்ளன.

திருப்பூருக்கு என்ன பாதிப்பு.?

தமிழ்நாட்டில், ஆயத்த ஆடை உற்பத்திக்கு பெயர் போனது திருப்பூர். அங்கிருந்து, ஆண்டுக்கு 40,000 கோடி ரூபாய் அளவிலான ஆயத்த ஆடைகள் பல்வேறு நாடுகளுக்கும் ஏற்றுமதி செய்யப்படுகின்றன. அதில், அமெரிக்காவிற்கு மட்டும் 12,000 கோடி ரூபாய் மதிப்பிலான ஆயத்த ஆடைகள் ஏற்றுமதி செய்யப்படுகின்றன.

இவ்வாறு இந்தியாவிலிருந்து ஏற்றுமதி செய்யப்பட்டு, அமெரிக்காவில் இறக்குமதி செய்யப்படும் ஆயத்த ஆடைகளுக்கு, அமெரிக்கா ஏற்கனவே 16 சதவித வரியை விதித்து, அது அமலில் இருந்ததாகவும், தற்போது கூடுதலாக 50 சதவீத வரி விதிக்கப்பட்டுள்ளதால், ஆயத்த ஆடைகளுக்கான வரி மொத்தமாக 66 சதவீதம் உயர்ந்துள்ளதாக, திருப்பூர் ஏற்றுமதியாளர்கள் சங்கத் தலைவர் தெரிவித்துள்ளார்.

இதன் காரணமாக ஏற்படும் விலை உயர்வால், அமெரிக்காவில், திருப்பூர் ஆயத்த ஆடைகள் விற்பனை பாதியாக குறைந்துவிடும் என்றும், அதனால், ஆயத்த ஆடை ஏற்றுமதி கடுமையாக பாதிக்கப்படும் எனவும் அவர் கூறியுள்ளார்.

கேள்விக்குறியாகும் தொழிலாளர்களின் வாழ்வாதாரம்

இவ்வாறு ஆயத்த ஆடை ஏற்றுமதி பாதிக்கப்பட்டல், அது உற்பத்தியாளர்களையும் பாதிக்கும். அந்த பாதிப்பு, ஆடை உற்பத்தி நிறுவனங்களில் பணிபுரியும் தொழிலாளர்கள் மீது தான் எதிரொலிக்கும். நிறுவனம் பாதிப்பிற்குள்ளாகும் போது, தொழிலாளர்களுக்கு வேலை இழப்பு ஏற்படும். அப்படி நடக்கும் பட்சத்தில், ஆடை உற்பத்தி தொழில் ஒன்றையே நம்பி, திருப்பூரில் இருக்கும் லட்சக்கணக்கான தொழிலாளர்களின் வாழ்வாதாரம் கேள்விக் குறியாகிவிடும்.

இது, திருப்பூருக்கு மட்டுமல்ல, இந்தியாவில் பல்வேறு துறைகளுக்கும் இது பொருந்தும். அதனால், சூழலை சரி செய்ய இந்திய அரசு விரைந்து உரிய நடவடிக்கை எடுக்க வேண்டும் என்பதே தற்போது அனைவரின் வேண்டுகோளாக உள்ளது.