2011 - 2016 வரை அதிமுக ஆட்சி காலத்தில் தமிழ்நாட்டின் ஆளுநராக பதவி வகித்த ரோசய்யா, அதற்கு முன்பாக ஆந்திராவின் முதலமைச்சராக ஓராண்டு பதவி வகித்தார். ஓய். எஸ்.ராஜசேகர் ரெட்டி முதலமைச்சர் பதவியில் இருக்கும்போது, ஹெலிகாப்டர் விபத்தில் உயிரிழந்ததால், 2009ஆம் ஆண்டு முதல் 2010 வரை ஆந்திராவின் முதலமைச்சராக பதவி வகித்தார்.


இவர், 1979ஆம் முதல் தொடர்ந்து காங்கிரஸ் அரசாங்கங்களில் அமைச்சராக இருந்த மூத்த காங்கிரஸ் தலைவர் ஆவார். எந்த சர்ச்சைகளிலும் சிக்காத தலைவர் என்ற பெயரை பெற்றுள்ள ரோசய்யா, ஆந்திராவின் பல்வேறு முதலமைச்சர்களின் கீழ் பல்வேறு துறைகளை வகித்துள்ளார். ஆனால் அவர் நிதி அமைச்சராக மிகவும் பிரபலமானவர். அவர், சட்டசபையில் 15 பட்ஜெட்களை தாக்கல் செய்து சாதனை படைத்துள்ளார்.


ஆந்திராவின் குண்டூர் மாவட்டத்தில் உள்ள வேமுருவில் ஜூலை 1933 இல் பிறந்த இவர், குண்டூர் இந்துக் கல்லூரியில் மாணவப் பருவத்தில் இருந்தே அரசியலில் தீவிரமாக ஈடுபட்டுள்ளார்.




ரோசய்யா, மறைந்த நாடாளுமன்ற உறுப்பினரும் விவசாயிகளின் தலைவருமான பேராசிரியர் என் ஜி ரங்காவின் நெருங்கிய சீடராக இருந்தார். வைஷ்ய சமூகத்தைச் சேர்ந்த ரோசய்யா, 1968, 1974 மற்றும் 1980 ஆம் ஆண்டுகளில் ஆந்திர சட்டமன்ற உறுப்பினராகவும், 1979 இல் மரி சன்னா ரெட்டியின் கீழ் சாலைகள் மற்றும் கட்டிடங்கள் அமைச்சராகவும் இருந்தார்.


அதன்பிறகு, டி அஞ்சய்யா, கோட்லா விஜய பாஸ்கர ரெட்டி, என் ஜனார்த்தன ரெட்டி ஆகியோரின் அமைச்சரவையில் அமைச்சராகப் பணியாற்றிய ரோசய்யா, மே 2004 முதல் ஒய்எஸ் ராஜசேகர ரெட்டி அமைச்சரவையில் அமைச்சராகப் பணியாற்றினார். அவர் உள்துறை, சுகாதாரம், கல்வி மற்றும் போக்குவரத்து போன்ற துறைகளை வகித்தார். .


அவர் 1995 மற்றும் 1997 க்கு இடையில் ஆந்திர பிரதேச காங்கிரஸ் கமிட்டி தலைவராகவும் பணியாற்றினார் மற்றும் 1998 இல் நர்சராவ்பேட்டையில் இருந்து மக்களவைக்கு தேர்ந்தெடுக்கப்பட்டார்.


ஆந்திரப் பல்கலைக்கழகம் 2007 இல் ரோசய்யாவுக்கு கெளரவ டாக்டர் பட்டம் வழங்கிய சிறப்பபித்துள்ளது. ரோசய்யாவின் மனைவி பெயர் சிவலட்சுமி. இவர்களுக்கு மூன்று மகன்களும் ஒரு மகளும் உள்ளனர்.


ரோசய்யா கடைசியாக வகித்த பதவி தமிழ்நாடு ஆளுநர். 2016ஆம் ஆண்டு செப்டம்பர் மாதம் அவர் பதவி விலகிய பிறகு, தனக்கு தீவிர அரசியலுக்கு திரும்புவதில் விருப்பமில்லை என்று கூறினார்.


அப்போது சென்னையில் அவர் அளித்த பேட்டியில், 60 ஆண்டு கால அரசியல் வாழ்க்கைக்கு  பிறகு தற்போது ஓய்வு பெறப் போவதாகவும், ஹைதராபாத்திற்கு திரும்பி அமைதியான, ஓய்வுபெற்ற வாழ்க்கையை எதிர்பார்த்துக் கொண்டிருப்பதாகவும் கூறினார்.


ரோசய்யா வகித்த பதவிகள்:


1968, 1974 மற்றும் 1980 ஆந்திர மாநில சட்டப்பேரவை
1977-1979 ஆந்திர மாநிலம் தொழில்துறை உட்கட்டமைப்பு அபிவிருத்தி நிறுவனத்தின் தலைவர்.
1978-1979, 1983-1985 ஆந்திர மாநில சட்டப்பேரவை எதிர்கட்சி தலைவர்.
1979-1980 ஆந்திர மாநில சாலை மற்றும் கட்டிடத்துறை அமைச்சர்.
1980-1981 ஆந்திர மாநில வீட்டு வசதி மற்றும் போக்குவரத்துத்துறை அமைச்சர்.
1982-1983 ஆந்திர மாநில உள்துறை அமைச்சராக இருந்தார்.
1989-1990 ஆந்திர மாநில நிதி, மின்சாரம், போக்குவரத்து, உயர்கல்வி, கைத்தறி மற்றும் கதர்துறை, அமைச்சர்.
1991-1992 ஆந்திர மாநில மருத்துவம் மற்றும் சுகாதாரத்துறை அமைச்சர்.
1992-1994 ஆந்திர மாநில நிதி, மின்சாரம், மருத்துவம் மற்றும் சுகாதாரத்துறை அமைச்சர்.
1995-1997 ஆந்திரமாநிலம் காங்கிரஸ் கட்சித் தலைவர்.
1998 நரசரொபேட் மக்களவை தொகுதி நாடாளுமன்ற உறுப்பினர்.
2004-2009 ஆந்திர மாநில நிதி, திட்டம், குடும்ப நலத்துறை அமைச்சர்.
2009-2010 ஆந்திர மாநில முதல்வர்.
2011-2016 தமிழ்நாடு ஆளுநர்


 


ABP நாடு செய்திகளை Google News -ல் பின் தொடர இங்கே கிளிக் செய்யவும்


 


ABP நாடு செய்திகளை சமூக வலைத்தள பக்கங்களிலும் பின் தொடரலாம்







 


ட்விட்டர் பக்கத்தில் தொடர


 


யூடியூபில் வீடியோக்களை காண