“எங்க ஊருக்கு மாற்று சமகத்தினரின் சுடுகாடு வேண்டாம்” - ரேஷன் அட்டையை வீசிச் சென்ற மக்கள் - என்ன ஆச்சு?

தீபாவளி ஷாப்பிங்: மதுரை விளக்குத்தூணில் அலைமோதும் மக்கள் கூட்டம்!

அருண் சின்னதுரை — Sun, 1 Nov 2026 22:14:58 +0530

ஞாயிற்றுக்கிழமை என்பதால் ஏராளமான பொதுமக்கள் குடும்பத்துடன் வந்து புத்தாடைகளை தீபாவளி பொருட்களை வாங்கி வருகின்றனர்.

மதுரை விளக்குத்தூண் பகுதியில் குவிந்துள்ளனர்

மதுரையை சுற்றியுள்ள மாவட்டங்களில் இருந்து ஏராளமான பொதுமக்கள் தீபாவளி பொருட்களை வாங்குவதற்கு மதுரை விளக்குத்தூண் பகுதியில் குவிந்துள்ளனர். உலகம் முழுவதும் நவம்பர் 8 தேதி அடுத்த வாரம் ஞாயிற்றுக்கிழமை தீபாவளி பண்டிகை கோலாகலமாக கொண்டாடப்பட உள்ளது தீபாவளி பண்டிகைக்கு ஒரு வாரமே உள்ள நிலையில் மதுரை மாசி வீதிகளில் பொதுமக்கள் தீபாவளி பண்டிகைக்கு தேவையான புத்தாடைகள், நகை வீட்டு உபயோக பொருட்களை வாங்குவதற்காக குவிந்து வருகின்றனர்.

தீபாவளி பண்டிகைக்கு தேவையான பொருட்களை வாங்கி வருகின்றனர்.

மதுரை விளக்குத்தூண், தெற்கு மாசி வீதி, மேலமாசி வீதி, வடக்கு மாசி வீதி மற்றும் வெளி வீதிகள், ஆவணி மூல வீதிகளில் மதுரை மட்டுமின்றி மதுரையை சுற்றியுளள மாவட்டங்களான ராமநாதபுரம், சிவகங்கை, தேனி திண்டுக்கல், விருதுநகர், உள்ளிட்ட பல்வேறு மாவட்டங்களிலும் இருந்து ஏராளமான பொதுமக்கள் குடும்பத்தினரோடு வருகை தந்து தீபாவளி பண்டிகைக்கு தேவையான பொருட்களை வாங்கி வருகின்றனர். இன்று ஞாயிற்றுக்கிழமை என்பதால் காலை முதலே ஏராளமான பொதுமக்கள் ஆர்வமுடன் மதுரை விளக்குத்தூண் பகுதிக்கு வருகை தந்து புத்தாடைகள் வாங்கி வருகின்றனர்.

போக்குவரத்து காவலர்கள் போக்குவரத்தை சீரமைப்பு

கூட்டத்தை மாநகர காவல் துறை கட்டுப்படுத்தி போக்குவரத்து காவலர்கள் போக்குவரத்தை சீரமைத்து வரும் பணியில் ஈடுபட்டு வருகின்றனர். குறிப்பாக புத்தாடைகள் வாங்குவதற்கு பெற்றோர்கள் தங்களது குழந்தைகளை அழைத்து வந்துள்ளதால் குழந்தைகளை பத்திரமாக பார்த்துக் கொள்ளவும் உடைமைகளை பாதுகாப்பாக வைத்துக் கொள்ள வேண்டும் என ஒலிபெருக்கி மூலமாக பொதுமக்களுக்கு காவல்துறையினர் விழிப்புணர்வை ஏற்படுத்தி வருகின்றனர். இந்தப் பகுதிக்கு தீபாவளி பர்ச்சேஸ் செய்ய வரும் கூட்டமானது காலை முதலே அதிகமாக இருந்து வந்த நிலையில் தற்போது மாலையிலும் மக்கள் விளக்கத்ததூண் பகுதியில் குவிந்து வருகின்றனர். குடும்பமாக மதுரை மக்கள் தங்களுக்குத் தேவையான தீபாவளி பொருட்களை ஆர்வமுடன் வாங்கி வருகின்றன. தீபாவளி பண்டிகைக்கு இன்னும் 6 நாட்கள் மட்டுமே உள்ள நிலையில் பொதுமக்கள் ஆர்வமுடன் பொருட்களை வாங்கி வருகின்றனர்.

26 ஆயிரம் வரி செலுத்துவோருக்கு நிம்மதி! புதுச்சேரியில் புதிய ஜி.எஸ்.டி. தீர்ப்பாயம் தொடக்கம்!

சிவரஞ்சித் — Sun, 1 Nov 2026 21:55:19 +0530

புதுச்சேரி: புதுச்சேரி மாநிலத்தில் ஜி.எஸ்.டி. வரி செலுத்தும் வர்த்தகர்கள் மற்றும் வியாபாரிகளின் நீண்டநாள் கோரிக்கையை ஏற்று, ஜி.எஸ்.டி. மேல்முறையீட்டு தீர்ப்பாயத்தின் (GST Appellate Tribunal) புதுச்சேரி சர்க்யூட் பெஞ்ச் தொடங்கப்பட்டுள்ளது. இதன் மூலம் ஜி.எஸ்.டி. வரி தொடர்பான அபராதம் மற்றும் வரி விதிப்பு உத்தரவுகளால் பாதிக்கப்படும் வர்த்தகர்கள், மேல்முறையீடு செய்வதற்காக சென்னை உள்ளிட்ட பிற நகரங்களுக்குச் செல்ல வேண்டிய சிரமம் குறைந்துள்ளது.

புதுச்சேரியில் மத்திய சரக்கு மற்றும் சேவை வரியின் (Central GST) கீழ் சுமார் 11 ஆயிரம் பேரும், மாநில சரக்கு மற்றும் சேவை வரியின் (State GST) கீழ் சுமார் 15 ஆயிரம் பேரும் என மொத்தம் 26 ஆயிரம் பேர் ஜி.எஸ்.டி. வரி செலுத்துவோராக உள்ளனர். இவர்கள் தங்களது தொழில் மற்றும் வணிக நடவடிக்கைகளின் அடிப்படையில் குறிப்பிட்ட கால இடைவெளியில் ஜி.எஸ்.டி. கணக்குகளை தாக்கல் செய்து வரி செலுத்தி வருகின்றனர்.

இதில், முறையாக வரி செலுத்தாமல் இருப்பது, வரி ஏய்ப்பில் ஈடுபடுவது, வரி கணக்குகளில் தவறான விவரங்களை அளிப்பது உள்ளிட்ட விதிமீறல்களுக்காக சம்பந்தப்பட்ட வர்த்தகர்கள் மீது ஜி.எஸ்.டி. துறை சார்பில் நடவடிக்கை எடுக்கப்படுகிறது. அதேபோல், உரிய காலக்கெடுவுக்குள் ஜி.எஸ்.டி. கணக்குகளை தாக்கல் செய்யத் தவறினால் தாமதக் கட்டணம் மற்றும் அபராதமும் வசூலிக்கப்படுகிறது.

மேல்முறையீடு செய்ய இருந்த சிரமம்

இவ்வாறு ஜி.எஸ்.டி. துறையால் அபராதம் விதிக்கப்படும்போது அல்லது வரி தொடர்பாக உத்தரவுகள் பிறப்பிக்கப்படும்போது, அதில் ஆட்சேபனை இருந்தால் சம்பந்தப்பட்டவர்கள் முதலில் ஜி.எஸ்.டி. முதல் மேல்முறையீட்டு அதிகாரியிடம் முறையிடலாம். அங்கு வழங்கப்படும் உத்தரவுகளிலும் திருப்தி இல்லாதவர்கள், அடுத்தகட்டமாக ஜி.எஸ்.டி. மேல்முறையீட்டு தீர்ப்பாயத்தை அணுகி தங்களது தரப்பு நியாயங்களை எடுத்துரைத்து மேல்முறையீடு செய்யலாம்.

ஆனால், புதுச்சேரியில் இதுவரை ஜி.எஸ்.டி. மேல்முறையீட்டு தீர்ப்பாயத்தின் தனி அமர்வு இல்லாததால், மேல்முறையீடு செய்ய வேண்டிய வர்த்தகர்கள் சென்னை உள்ளிட்ட பிற நகரங்களுக்குச் செல்ல வேண்டிய நிலை இருந்து வந்தது. இதனால் பயணச் செலவு, நேர விரயம், வழக்கறிஞர்களை அணுகுவதில் ஏற்படும் சிரமம் உள்ளிட்ட பல்வேறு நடைமுறைப் பிரச்னைகளை அவர்கள் எதிர்கொண்டு வந்தனர்.

இதையடுத்து, புதுச்சேரியிலேயே ஜி.எஸ்.டி. மேல்முறையீட்டு தீர்ப்பாயத்தின் சர்க்யூட் பெஞ்ச் அமைக்க வேண்டும் என வர்த்தகர்கள், வியாபாரிகள் மற்றும் வரி செலுத்துவோர் நீண்டகாலமாக மத்திய அரசிடம் கோரிக்கை விடுத்து வந்தனர்.

ஓம் சக்தி என்.எஸ்.சி. போஸ் ஹாலில் சர்க்யூட் பெஞ்ச்

இந்நிலையில், வர்த்தகர்களின் கோரிக்கையை ஏற்று புதுச்சேரி மறைமலை அடிகள் சாலையில் அமைந்துள்ள ஓம் சக்தி என்.எஸ்.சி. போஸ் ஹாலில் ஜி.எஸ்.டி. மேல்முறையீட்டு தீர்ப்பாயத்தின் புதுச்சேரி சர்க்யூட் பெஞ்ச் அமைக்கப்பட்டுள்ளது.

இதன் தொடக்க விழா நேற்று நடைபெற்றது. புதுடில்லியில் செயல்பட்டு வரும் ஜி.எஸ்.டி. மேல்முறையீட்டு தீர்ப்பாயத்தின் முதன்மை பெஞ்ச் தலைவர் சஞ்சய் குமார் மிஸ்ரா காணொலி காட்சி வாயிலாக புதுச்சேரி சர்க்யூட் பெஞ்சை தொடங்கி வைத்தார்.

இந்த நிகழ்ச்சியில் புதுச்சேரி மத்திய ஜி.எஸ்.டி. ஆணையர் மிலிந்த் லஞ்சேவார், புதுச்சேரி அரசு செயலர் அனூப் தாகூர் உள்ளிட்ட அதிகாரிகள் கலந்து கொண்டனர். தொடர்ந்து, புதுச்சேரி சர்க்யூட் பெஞ்சின் முதல் வழக்கு விசாரணையும் நடைபெற்றது. இதன் மூலம் புதுச்சேரியில் ஜி.எஸ்.டி. தொடர்பான மேல்முறையீட்டு வழக்குகளை விசாரிப்பதற்கான நடைமுறை அதிகாரப்பூர்வமாக தொடங்கியுள்ளது.

மாதந்தோறும் இரண்டு வெள்ளிக்கிழமைகளில் விசாரணை

புதிய நடைமுறையின்படி, ஒவ்வொரு மாதமும் நான்காவது மற்றும் ஐந்தாவது வெள்ளிக்கிழமைகளில் புதுச்சேரி சர்க்யூட் பெஞ்சில் மேல்முறையீட்டு வழக்குகள் விசாரணைக்கு எடுத்துக்கொள்ளப்பட உள்ளன.

இந்த அமர்வுகளில் ஜி.எஸ்.டி. மேல்முறையீட்டு தீர்ப்பாயத்தின் துணைத் தலைவர் பிரவீன் குமார் ஜெயின் மற்றும் தொழில்நுட்ப உறுப்பினர் ஷேக் காதர் ரஹ்மான் ஆகியோர் அடங்கிய அமர்வு வழக்குகளை விசாரிக்க உள்ளது.

இதன் மூலம் புதுச்சேரி மற்றும் அதனைச் சுற்றியுள்ள பகுதிகளைச் சேர்ந்த வரி செலுத்துவோர், தங்களது ஜி.எஸ்.டி. மேல்முறையீட்டு வழக்குகளை உள்ளூரிலேயே விசாரிக்கச் செய்வதற்கான வாய்ப்பு கிடைத்துள்ளது.

எளிதாக அணுக முடியும் - தொழில்நுட்ப உறுப்பினர் கருத்து

இதுகுறித்து சென்னை பெஞ்சின் தொழில்நுட்ப உறுப்பினர் ஷேக் காதர் ரஹ்மான் கூறுகையில், புதுச்சேரிக்கு என தனியாக சர்க்யூட் பெஞ்ச் அமைக்கப்பட்டிருப்பது மிக முக்கியமான நடவடிக்கையாகும். இதன் மூலம் புதுச்சேரி மற்றும் அதன் சுற்றுவட்டாரப் பகுதிகளைச் சேர்ந்த வரி செலுத்துவோர், வர்த்தகர்கள் மற்றும் வியாபாரிகள் மேல்முறையீட்டு வழக்குகளுக்காக தீர்ப்பாயத்தை மிகவும் எளிதாக அணுக முடியும். இதனால் அவர்கள் எதிர்கொண்டு வந்த பயணச் சிரமங்கள் குறைவதுடன், தங்களது வழக்குகளைத் தொடர்ந்து நடத்துவதற்கும் வசதியாக இருக்கும் என்று தெரிவித்தார்.

புதுச்சேரியில் ஜி.எஸ்.டி. மேல்முறையீட்டு தீர்ப்பாயத்தின் சர்க்யூட் பெஞ்ச் தொடங்கப்பட்டிருப்பது, மாநிலத்தின் வர்த்தகத் துறையினருக்கு முக்கியமான நிர்வாக மற்றும் சட்டரீதியான முன்னேற்றமாகப் பார்க்கப்படுகிறது. 26 ஆயிரம் வரி செலுத்துவோர் பயன்பெறும் வகையில் அமைந்துள்ள இந்த புதிய வசதி, வரி தொடர்பான மேல்முறையீடுகளை எளிதாக்குவதுடன், புதுச்சேரி வர்த்தகர்களின் நீண்டநாள் கோரிக்கைக்கும் தீர்வாக அமைந்துள்ளது.

கறிவேப்பிலை வெள்ளை முடியைக் கருப்பாக்குமா? வீட்டில் கறிவேப்பிலை எண்ணெய் செய்வது எப்படி?

ராஜேஷ். எஸ் — Sun, 1 Nov 2026 21:31:00 +0530

இளம் வயதில் நரை முடி வருவது பலருக்கும் ஒரு பெரிய பிரச்சனையாக உள்ளது. முன்பு வயதான பிறகு தோன்றி வந்த நரை முடி, இப்போது 20 வயதிலேயே தோன்றத் தொடங்கிவிட்டது. இதனால், நரை முடியைக் கருமையாக்க பல்வேறு எண்ணெய்களும் ஹேர் மாஸ்க்குகளும் பயன்படுத்தப்படுகின்றன. வீட்டில் எளிதாகக் கிடைக்கும் கறிவேப்பிலையைக் கொண்டும், நரை முடியை மீண்டும் கருமையாக்க முடியும் என்று கூறப்படுகிறது. இது எந்த அளவிற்கு உண்மை? முடிக்கு கறிவேப்பிலையின் நன்மைகள் என்ன? வீட்டிலேயே கறிவேப்பிலை எண்ணெய் தயாரிப்பது எப்படி என்று தெரிந்து கொள்வோம்.

கறிவேப்பிலை நரை முடியைக் கருப்பாக்குமா?

கறிவேப்பிலையில் சில வைட்டமின்கள், ஆன்டிஆக்ஸிடன்ட்கள் மற்றும் பிற ஊட்டச்சத்துக்கள் உள்ளன. இவை முடி மற்றும் உச்சந்தலையின் ஆரோக்கியத்திற்கு உதவுகின்றன. உடலில் அதிகரிக்கும் ஆக்ஸிஜனேற்ற அழுத்தம், இளநரை ஏற்படவும் காரணமாகலாம். இருப்பினும், உச்சந்தலையில் கறிவேப்பிலையைத் தடவுவது ஆக்ஸிஜனேற்ற அழுத்தத்தைக் குறைத்து, நரை முடியை மீண்டும் கருப்பாக மாற்றும் என்று நம்பப்படுகிறது.

முடிக்கு அதன் இயற்கையான நிறத்தை வழங்கும் மெலனின் உற்பத்தி குறையும்போது முடி நரைக்கிறது. மரபணுக்கள், வயது, சில ஊட்டச்சத்துக் குறைபாடுகள் மற்றும் தைராய்டு பிரச்சனைகள் போன்ற காரணிகளால் இது ஏற்படலாம். கறிவேப்பிலை எண்ணெயைப் பயன்படுத்துவது மெலனின் உற்பத்தியை மீண்டும் தொடங்கும் என்றோ அல்லது ஏற்கனவே நரைத்த முடியைக் கருப்பாக்கும் என்றோ கூறப்படவில்லை, ஆனாலும் பலர் அதைப் பயன்படுத்துகின்றனர்.

வீட்டில் கறிவேப்பிலை எண்ணெய் செய்வது எப்படி

கூந்தல் பராமரிப்பிற்காக கறிவேப்பிலையைப் பயன்படுத்த விரும்பினால், வீட்டிலேயே எண்ணெய் தயாரிக்க என்னென்ன பொருட்கள் தேவை, அதை எப்படித் தயாரிப்பது என்று பார்ப்போம்.

கறிவேப்பிலை – 15 முதல் 20 வரை

தேங்காய் எண்ணெய் – 2 தேக்கரண்டி

தயாரிப்பு முறை

முதலில், கறிவேப்பிலையைக் கழுவி உலர வைக்கவும். ஒரு சிறிய கடாயில் தேங்காய் எண்ணெயை மிதமான சூட்டில் சூடாக்கவும். கறிவேப்பிலையைச் சேர்த்து சிறிது நேரம் சூடாக்கவும். இலைகள் கருகிவிடாமல் கவனமாக இருக்கவும். எண்ணெய் முழுமையாக ஆறிய பிறகு அதை வடிகட்டவும். இந்த எண்ணெயில் சிறிதளவு எடுத்து உங்கள் உச்சந்தலையிலும் முடியிலும் தடவி மெதுவாக மசாஜ் செய்யவும். முதலில் ஒரு சிறிய பகுதியில் சோதித்துப் பார்ப்பது நல்லது. வாரத்திற்கு இரண்டு அல்லது மூன்று முறை இதைப் பயன்படுத்துவது சிறந்தது.

கூந்தலுக்கு கறிவேப்பிலையைப் பயன்படுத்துவதால் கிடைக்கும் நன்மைகள்

கறிவேப்பிலையில் உள்ள தாவரச் சேர்மங்களின் ஆன்டிஆக்ஸிடன்ட் பண்புகள் முடி ஆரோக்கியத்திற்கு நன்மை பயக்கும். கறிவேப்பிலையுடன் தேங்காய் எண்ணெயைக் கலந்து தலைக்குத் தடவுவது முடியை ஈரப்பதமாக்குகிறது. வறட்சி மற்றும் சிக்கு ஆகியவற்றை ஓரளவிற்கு குறைக்கலாம். தேங்காய் எண்ணெய் முடியின் மேற்பரப்பில் ஒரு பாதுகாப்புப் படலமாகச் செயல்பட்டு, முடியைப் பளபளப்பாகக் காட்டுகிறது. முடிக்கு முறையான பராமரிப்பை வழங்குவதன் மூலம், முடி உடைவதை ஓரளவிற்கு குறைக்கலாம்.

இளம் வயதிலேயே நரை முடி வருகிறதா?

இளம் வயதில் முடி நரைப்பதற்கு குடும்பப் பின்னணி முக்கிய காரணமாக இருக்கலாம். இருப்பினும், சில சமயங்களில் வைட்டமின் பி12 குறைபாடு மற்றும் தைராய்டு பிரச்சனைகள் போன்ற காரணிகளும் ஒரு பங்கு வகிக்கலாம். உங்கள் முடி திடீரெனவோ அல்லது வேகமாகவோ நரைக்கத் தொடங்கினால், மருத்துவரை அணுகுவது நல்லது. அவர்கள் தேவைக்கேற்ப பரிசோதனைகளைச் செய்வார்கள். ஊட்டச்சத்துக் குறைபாடு கண்டறியப்பட்டால், அதற்கேற்ற சிகிச்சை அளிக்கப்படும்.

குறிப்பு: இந்தக் கட்டுரையில் வழங்கப்பட்டுள்ள தகவல்கள் வல்லுநர்களால் பகிரப்பட்டுள்ளன. இது பொதுவான தகவல் நோக்கங்களுக்காக மட்டுமே வழங்கப்படுகிறது. இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றாகாது. மருத்துவ நிலை குறித்து உங்களுக்கு ஏதேனும் கேள்விகள் இருந்தால், எப்போதும் உங்கள் மருத்துவரிடம் ஆலோசனையைப் பெறுங்கள்.

Chennai Rain: நள்ளிரவு முதல் கனமழை எச்சரிக்கை.. சென்னையில் நாளை பள்ளிகளுக்கு விடுமுறையா?

வினோத்குமார் — Sun, 1 Nov 2026 21:07:29 +0530

வடகிழக்குப் பருவமழை தொடங்கியதை அடுத்து முதல் புயல் வங்கக்கடலில் கடந்த 25-ம் தேதி அர்னாப் புயலாக உருவானது. இந்த புயல் தமிழகத்தில் எந்த பாதிப்பும் ஏற்படுத்தாமல் ஆந்திராவை புரட்டி எடுத்தது. இதனால் ஆந்திராவில் பல்வேறு இடங்களில் 25 செ.மீ. மேல் பதிவானது. இந்நிலையில் தற்போது 2-வது புயல் தற்போது உருவாகியுள்ளது. இது தற்போது அதி தீவிர புயலாக உருவாகியுள்ளது. இதற்கு முரசு என பெயரிடப்பட்டுள்ளது.

ஆரஞ்ச் அலர்ட்

இந்த புயலானது நவம்பர் 3-ம் தேதி அன்று நெல்லூர்-நர்சாப்பூர் இடையே பலத்த காற்றுடன் கரையைக் கடக்க வாய்ப்புள்ளதாக தெரிவிக்கப்பட்டுள்ளது. இதன் காரணமாக இன்று திருவள்ளூர், மாவட்டத்தில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன முதல் மிக கன மழை பெய்யக்கூடும். சென்னை, ராணிப்பேட்டை, காஞ்சிபுரம் மற்றும் நீலகிரி மாவட்டங்களில் ஓரிரு இடங்களில், இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கனமழை பெய்யக்கூடும்.

இதையும் படிங்க: Cyclone Murasu: தீவிரமடையும் முரசு புயல்! சென்னையில் மழை எப்படி இருக்கும்? வெதர்மேன் பிரதீப் ஜான் முக்கிய அப்டேட்!

நாளை காலை முதல் மழை எச்சரிக்கை

மேலும் வேலூர், திருவண்ணாமலை, விழுப்புரம், கள்ளக்குறிச்சி, கடலூர், ஈரோடு, திருப்பூர், சேலம், நாமக்கல், கரூர், திருச்சி, மதுரை, திருநெல்வேலி, கன்னியாகுமரி மாவட்டங்கள், மேற்குத் தொடர்ச்சி மலை மாவட்டங்களில் ஓரிரு இடங்களிலும், மற்றும் புதுவையிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய மிதமான மழை பெய்யக்கூடும் என சென்னை வானிலை மையம் தெரிவித்துள்ளது. அதேபோல் சென்னை, காஞ்சிபுரம், திருவள்ளூர், செங்கல்பட்டு (KTCC) மாவட்டங்களில் நாளை காலை முதல் மழை பெய்யக்கூடும் என தமிழ்நாடு வெதர்மேன் பிரதீப் ஜான் எச்சரிக்கை விடுத்துள்ளார்.

17 மாவட்டங்களுக்கு மழை

இதனிடையே அடுத்த 3 மணிநேரத்தில் அதாவது இரவு 10 மணி வரை 17 மாவட்டங்களுக்கு மழை எச்சரிக்கை விடுக்கப்பட்டுள்ளது. அதாவது சென்னை, காஞ்சிபுரம், செங்கல்பட்டு, திருள்ளூர், கடலூர், தருமபுரி, கன்னியாகுமரி, கிருஷ்ணகிரி, புதுக்கோட்டை, ராணிப்பேட்டை, நீலகிரி, நெல்லை, திருப்பத்தூர், வேலூர், மதுரை, விழுப்புரம், திருவண்ணாமலை மாவட்டங்களில் மழைக்கு வாய்ப்புள்ளதாக சென்னை வானிலை மையம் தெரிவித்துள்ளது.

எதிர்பார்ப்பில் பள்ளி மாணவர்கள்?

இந்நிலையில் சென்னை, திருவள்ளூர் ஆகிய மாவட்டங்களுக்கு நாளை கன முதல் மிக கனமழைக்கான ஆரஞ்ச் அலர்ட் எச்சரிக்கை விடுக்கப்பட்டுள்ளதால் பள்ளிகளுக்கு விடுமுறை அறிவிக்கப்படுமா என்ற எதிர்பார்ப்பில் பள்ளி மாணவர்கள் இருந்து வருகின்றனர். தற்போது சென்னையில் பல்வேறு பகுதிகளில் மழை பெய்து வருகிறது. நள்ளிரவு அல்லது அதிகாலையில் கனமழையின் பெய்யும் பட்சத்தில் விடுமுறை தொடர்பான அறிவிப்பு வெளியாகும்.

ABP Nadu Top 10, 1 November 2026: இன்றைய மாலைப் பொழுதின் டாப் 10 முக்கியச் செய்திகள்! - Evening

ABP NADU — Sun, 1 Nov 2026 21:00:04 +0530

ABP Nadu Top 10, 1 November 2026: இன்றைய பிற்பகல் டாப் 10 ஹாட் நியூஸ்! - Afternoon
ABP Nadu Top 10 Afternoon Headlines, 1 November 2026: ஏபிபி நாடுவின் டாப் 10 பிற்பகல் முக்கியச் செய்திகளை இங்கே காணலாம். Read More
ABP Nadu Top 10, 1 November 2026: இன்றைய காலைப் பொழுதின் டாப் 10 முக்கியச் செய்திகள்! - Morning
ABP Nadu Top 10 Morning Headlines, 1 November 2026: ஏபிபி நாடுவின் டாப் 10 காலை தலைப்புச் செய்திகளை இங்கே காணலாம். Read More
தீவிர காற்று மாசுபாட்டால் திண்டாடும் தேசியத்தலைநகர்! - அமலுக்கு வந்த கடும் கட்டுப்பாடுகள் என்ன?
புது வாகனப்போக்குவரத்து விதிகள் அமல்: கட்டுமானப்பணிகளுக்கு கட்டுப்பாடு: 50% அரசு ஊழியர்களுக்கு WFH! Read More
ஏவுகணைகளை பெற அமெரிக்காவுடன் ஒப்பந்தம்! - தீவிரமடையும் போர்: ஆயுதங்களை வாங்கிக்குவிக்கும் உக்ரைன்!
2.1 பில்லியன் டாலர் மதிப்பீட்டில் 500 பேட்ரியாட் ஏவுகணைகளை உக்ரைனுக்கு வழங்க அமெரிக்கா ஒப்புதல் Read More
ரூ.200 கோடி மோசடி வழக்கில் பிரபல நடிகைக்கு சம்மன்! - நவ.2 இல் ஆஜராக உத்தரவு
மோசடியில் ஈடுபட்ட சுகேஷ் சந்திரசேகருடனான தொடர்பு குறித்து விசாரிக்க சம்மன் Read More
நவம்பர் முதல் ஜனவரி வரை வரிசைகட்டும் தமிழ்ப் படங்கள்.. ரிலீஸுக்குத் தயாராகும் 20 படங்கள்!
2026 நவம்பர் முதல் 2027 ஜனவரி வரை வெளியாகத் திட்டமிடப்பட்டுள்ள சூர்யா, நயன்தாரா, தனுஷ், விஜய் சேதுபதி உள்ளிட்ட முன்னணி நடிகர்களின் படங்களின் முழு பட்டியல். Read More
2027-ஐபிஎல் தொடருக்கு முன்பாக ஓய்வா? - ட்விஸ்ட் ஆன பதிலளித்த தோனி
ஐபிஎல்லில் பங்கேற்பது குறித்த முடிவு என்ன என்பது தோனியிடமே இல்லையாம்! - டிசம்பருக்கு முடிவு அறிவிப்பு Read More
பாரா விளையாட்டு போட்டியில் இதுவரை இல்லாத அளவுக்கு பதக்கங்களை வென்ற இந்தியா!
30 தங்கங்கங்களுடன் மொத்தமாக 114 பதக்கங்களை வென்று இந்திய வீரர், வீராங்கனைகள் அசத்தல் Read More
Pressure Cooker: சின்ன கவனக்குறைவு உயிருக்கே ஆபத்து.. பிரஷர் குக்கரை பயன்படுத்தும் போது இந்த 5 தப்பை பண்ணிடாதீங்க!
Pressure Cooker: சமையல் நேரத்தை வெகுவாகக் குறைத்தாலும், சின்னக் கவனக்குறைவு உயிருக்கே ஆபத்தை ஏற்படுத்தி விடும். இந்த ஆபத்தில் இருந்து தப்பிக்க பின்பற்ற வேண்டிய 5 மிக முக்கியமான வழிமுறைகள். Read More
Jio IPO: அடித்து தூக்கிய ஜியோ..! நாட்டின் மதிப்புமிக்க இரண்டாவது நிறுவனமாகி அதிரடி - ரூ.12.5 லட்சம் கோடி
Jio IPO: ஜியோ ப்ளாட்ஃபார்ம்ஸ் பங்குகள் ஐபிஓ உடன் ஒப்பிடுகையில் 21 சதவிகிதம் கூடுதல் விலையில் பட்டியலிடப்பட்டு, நாட்டின் இரண்டாவது மிகவும் மதிப்புமிக்க நிறுவனமாக மாறியுள்ளது. Read More

Cyclone Murasu: தீவிரமடையும் முரசு புயல்! சென்னையில் மழை எப்படி இருக்கும்? வெதர்மேன் பிரதீப் ஜான் முக்கிய அப்டேட்!

வினோத்குமார் — Sun, 1 Nov 2026 20:27:19 +0530

வடகிழக்கு பருவமழை தொடங்கியதும் அர்னாப் புயல் உருவானது. இந்த புயல் ஆந்திராவை நோக்கி சென்றதால் தமிழகத்தில் பெரிய அளவில் மழை பொழிவை கொடுக்கவில்லை. இதனையடுத்து 2வது புயல் தற்போது உருவாகியுள்ளது. இந்த புயலுக்கு இந்தியா சார்பில் முரசு என பெயர் வைக்கப்பட்டது. தொடர்ந்து மேற்கு - வடமேற்கு திசையில் நகர்ந்து நாளை தீவிர புயலாக வலுப்பெறும் என்று வானிலை ஆய்வு மையம் கணித்துள்ளது. இந்த முரசு புயல் நவம்பர் 3-ம் தேதி நெல்லூர்-நர்சபூர் இடையே பலத்த காற்றுடன் கரையைக் கடக்க வாய்ப்புள்ளது. இதன் காரணமாக வடதமிழகத்தில் மழைக்கு வாய்ப்புள்ளதாக தெரிவிக்கப்பட்டுள்ளது.

தீவிரமடையும் முரசு புயல்

இந்நிலையில் முரசு புயல் எப்படி இருக்கும், தமிழகத்தில் மழையின் தாக்கம் எப்படி என்பது தொடர்பாக முக்கிய அப்டேடை தமிழ்நாடு வெதர்மேன் பிரதீப் ஜான் வெளியிட்டுள்ளார். இதுதொடர்பாக அவர் வெளியிட்டுள்ள எக்ஸ் தளத்தில்: முரசு புயல் தெற்கு ஆந்திரக் கடலோர பகுதியான காவலி பகுதிக்கு அருகில், ஒரு தீவிர புயலாக மாறி கரையைக் கடக்கும் என்று எதிர்பார்க்கப்படுகிறது. தற்போது நிலவும் வளிமண்டல மற்றும் கடல்சார் சூழல்கள், இந்த புயல் மேலும் வலுவடைவதற்கு மிகவும் சாதகமாக உள்ளதாக தெரிவித்துள்ளார்.

இதையும் படிங்க: சென்னை, திருவள்ளூருக்கு ஆரஞ்ச் அலர்ட்! எங்கெல்லாம் கனமழை கொட்டப்போகுது... மக்களே உஷார்!

புயலை விரைவாக வலுவிழக்கச் செய்யக்கூடிய இரண்டு முக்கிய பிரச்சனைகள்

பலமான காற்று

காற்றின் வேகம் மற்றும் திசையில் மாற்றமானது புயலின் செங்குத்து அமைப்பைச் சாய்த்து, அதன் மேல்மட்ட மேகங்களைச் சுழற்சி மையத்திலிருந்து நகர்த்திவிடக்கூடும்; இது புயலின் கட்டமைப்பை சீர்குலைத்துவிடும். குறிப்பாக, 30 நாட்ஸ்களுக்கு அதிகமான காற்றின் வேகம் மற்றும் திசை மாற்றம் புயல் மேலும் வலுவடைவதை தடுக்கும்.

வறண்ட காற்று

புயலுக்கு மத்தியில் வறண்ட காற்று ஊடுருவும். வறண்ட காற்று புயலின் சுழற்சிக்குள் நுழைந்து அதன் மையப்பகுதியை அடைந்தால், அது வெப்பச்சலனத்தைக் குறைத்து, புயலுக்குத் தேவையான ஈரப்பத விநியோகத்தைத் தடுத்துவிடும்.

கடல் சூழல்

புயல் செல்லும் பாதையில் கடல் மேற்பரப்பு வெப்பநிலை 29°C-க்கு மேல் உள்ளது. இத்தகைய கடல் நீர், தீவிர வெப்பச்சலனத்தைத் தக்கவைக்கவும், புயல் மேலும் வலுவடையத் தேவையான வெப்பத்தையும் ஈரப்பதத்தையும் வழங்குகிறது. ஒட்டுமொத்த சூழலும் புயல் வலுவடைவதற்கே சாதகமாக உள்ளது. இதனால் முரசு புயல் இன்னும் வலிமை பெற வாய்ப்புள்ளது. கரையைக் கடக்கும் போது காற்றின் வேகம் மணிக்கு 110 கி.மீ. ஆக இருக்கும் என இந்திய வானிலை ஆய்வு மையம் கணித்துள்ளது.

KTCCல் மழை

சென்னை, காஞ்சிபுரம், திருவள்ளூர், செங்கல்பட்டு (KTCC) மாவட்டங்களில் நாளை காலை முதல் மழை பெய்யக்கூடும். அதிகனமழை பெய்யக்கூடிய பகுதி பெரும்பாலும் கடற்பகுதியிலேயே நகர்ந்து விடுகிறது. ஆனாலும் நிலப்பகுதியில் பெரிய அளவில் மழை இருக்காது. வட சென்னையின் கடற்கரை ஒட்டிய பகுதிகளில் நல்ல மழை மேக கூட்டங்கள் இருந்தால் கனமழை பெய்யலாம். மேலும், பொன்னேரி, கும்மிடிப்பூண்டி மற்றும் பழவேற்காடு உள்ளிட்ட பகுதிகளில் பலத்த மழை பெய்ய வாய்ப்புள்ளது என தெரிவித்துள்ளார்.

மஹிந்திரா XUV 3XO CNG எவ்வளவு மைலேஜ் கொடுக்கிறது? ரியல் வேர்ல்ட் மைலேஜ் டெஸ்ட் ரிப்போர்ட் இதோ

ராஜேஷ். எஸ் — Sun, 1 Nov 2026 20:18:19 +0530

மஹிந்திரா XUV 3XO CNG SUV காரின் மைலேஜ் குறித்த சுவாரஸ்யமான விவரங்கள் வெளியாகியுள்ளன. தொழிற்சாலையிலேயே பொருத்தப்பட்ட CNG கிட் உடன் வரும் இந்த SUV, உண்மையாகவே எவ்வளவு மைலேஜ் தருகிறது என்பதைக் கண்டறிய நிபுணர்களால் சோதிக்கப்பட்டது. இந்தச் சோதனையில், நகரப் பயணத்திற்கும் நெடுஞ்சாலைப் பயணத்திற்கும் இடையே தெளிவான வேறுபாடு காணப்பட்டது. பெட்ரோலுடன் ஒப்பிடும்போது CNG-யில் எவ்வளவு தூரம் பயணிக்க முடியும் என்பதையும் இந்தச் சோதனையால் மதிப்பிட முடியும்.

மஹிந்திரா XUV 3XO CNG-யின் எக்ஸ்-ஷோரூம் விலை ரூ. 9.99 லட்சம் முதல் ரூ. 12.27 லட்சம் வரை உள்ளது. இது நான்கு வேரியண்ட்டுகளில் கிடைக்கிறது. பெட்ரோல் வேரியண்ட்டுகளுடன் ஒப்பிடும்போது, நீங்கள் கூடுதலாக ரூ. 1 லட்சம் முதல் ரூ. 1.2 லட்சம் வரை செலுத்த வேண்டியிருக்கும். KUV100 CNG-யைத் தவிர, தனியார் வாடிக்கையாளர்களைக் குறிவைத்து மஹிந்திரா வழங்கும் முதல் CNG வாகனம் XUV 3XO ஆகும்.

ரியல் வேர்ல்ட் டெஸ்டில் எவ்வளவு மைலேஜ் கொடுத்தது?

நிபுணர்களால் நடத்தப்பட்ட ரியல் வேர்ல்ட் டெஸ்டில், XUV 3XO CNG நகர்ப்புறத்தில் ஒரு கிலோ CNG-க்கு 16.75 கி.மீ மைலேஜையும், நெடுஞ்சாலையில் ஒரு கிலோ CNG-க்கு 22.29 கி.மீ மைலேஜையும் தந்தது. இரண்டு நிலைகளுக்குமான சராசரி மைலேஜ் ஒரு கிலோ CNG-க்கு 19.52 கி.மீ ஆகும்.

நிறுவனம் அறிவித்துள்ள ARAI மைலேஜ் 24.7 கி.மீ/கிலோ ஆகும். நெடுஞ்சாலை மைலேஜான 22.29 கி.மீ/கிலோ, இந்த அளவிற்கு நெருக்கமாக உள்ளது. இருப்பினும், அனைவருக்கும் ஒரே மாதிரியான மைலேஜ் கிடைக்காமல் போகலாம். ஓட்டும் முறை, போக்குவரத்து நெரிசல், சாலை நிலைமைகள் மற்றும் வாகனத்தின் எடை போன்ற காரணிகளைப் பொறுத்து மைலேஜ் மாறுபடும்.

இன்ஜினின் செயல்திறன் எப்படி இருக்கிறது?

XUV 3XO CNG,10-பார் CNG இன்ஜெக்ஷன் சிஸ்டம் கொண்ட 1.2-லிட்டர் MPFi டர்போ பெட்ரோல் இன்ஜின் மூலம் இயக்கப்படுகிறது. பெட்ரோல் மற்றும் CNG ஆகிய இரண்டு மோட்களிலும் இது 111hp பவரையும் 200Nm டார்க்கையும் வழங்கும் என நிறுவனம் கூறுகிறது.

இந்த எஸ்யூவியின் பூட் தளத்தின் கீழ் இரண்டு சிஎன்ஜி சிலிண்டர்கள் பொருத்தப்பட்டுள்ளன. அவற்றின் மொத்த கொள்ளளவு 60 லிட்டர் ஆகும். பூட் இடத்தின் மீதான தாக்கத்தைக் குறைப்பதற்காக இந்த இரட்டை சிலிண்டர் அமைப்பு பயன்படுத்தப்பட்டுள்ளது. நகரத்தில் உள்ள போக்குவரத்து சிக்னல்களில் எரிபொருள் பயன்பாட்டைக் குறைக்க, ஆட்டோமேட்டிக் ஸ்டாப்-ஸ்டார்ட் அம்சம் பயனுள்ளதாக இருக்கிறது. இந்த அம்சம் சிஎன்ஜி பயன்முறையிலும் செயல்படுகிறது. கிளட்ச் பெடல் அழுத்தப்படும் வரை இன்ஜின் அணைந்திருக்கும் வகையில் இது செயல்படுகிறது. நெடுஞ்சாலையில் மணிக்கு 100 கி.மீ. வேகத்தில் பயணிக்கும்போது, இன்ஜின் சுமார் 2,300 ஆர்பிஎம்-இல் இயங்கியது. இன்ஜினை குறைந்த ஆர்பிஎம்-இல் இயக்குவது மைலேஜுக்கும் நல்லது.

முழு டேங்க் பெட்ரோலுடன் எவ்வளவு தூரம் செல்ல முடியும்?

காலியான சிஎன்ஜி டேங்கை மீண்டும் நிரப்பும்போது, இந்தச் சோதனையில் 7.94 கிலோகிராம் எரிவாயு பயன்படுத்தப்பட்டது. சோதனையில் கிடைத்த ஒரு கிலோகிராமுக்கு 19.52 கி.மீ. என்ற சராசரி மைலேஜைக் கருத்தில் கொண்டு, ஒரு முழு சிஎன்ஜி டேங்கால் சுமார் 150–160 கி.மீ. வரை பயணிக்க முடியும் என்று வல்லுநர்கள் மதிப்பிடுகின்றனர்.

பெட்ரோல் பயன்முறையில் மைலேஜ் எப்படி இருக்கும்?

பெட்ரோலில் சோதனை செய்யப்பட்டபோது, XUV 3XO CNG நகர்ப்புறத்தில் 9.68 கி.மீ/லிட்டரும், நெடுஞ்சாலையில் 14.47 கி.மீ/லிட்டரும் மைலேஜ் தந்தது. ஒட்டுமொத்த சராசரி 12.07 கி.மீ/லிட்டராகப் பதிவு செய்யப்பட்டது. இதில் 42 லிட்டர் பெட்ரோல் டேங்க் உள்ளது. இதன் அடிப்படையில், பெட்ரோலில் நடைமுறைப் பயன்பாட்டில் சுமார் 500 கி.மீ தூரம் வரை பயணிக்க முடியும் என எதிர்பார்க்கலாம்.

சோதனைகளின் அடிப்படையில், சிஎன்ஜி மற்றும் பெட்ரோல் இரண்டையும் ஒன்றாகப் பயன்படுத்தும்போது மொத்த பயண வரம்பு சுமார் 650–660 கி.மீ. ஆக இருக்கும் என மதிப்பிடப்பட்டுள்ளது. இருப்பினும், இது ஓட்டும் நிலைமைகளைப் பொறுத்து மாறுபடும்.

மைலேஜ் சோதனை எவ்வாறு நடத்தப்பட்டது?

ஒவ்வொரு முறையும் சிஎன்ஜி டேங்களை ஒரே அளவில் நிரப்புவது கடினம் என்பதால், வழக்கமான டேங்குக்கு டேங்க் மாற்றும் முறைக்குப் பதிலாக, வல்லுநர்கள் ஒரு சிறப்பு நடைமுறையைப் பின்பற்றினர். முதலில், சிஎன்ஜி டேங்க் முழுவதுமாகக் காலி செய்யப்பட்டு, பின்னர் 2 கிலோ எரிவாயு நிரப்பப்பட்டது. அதன் பிறகு, எரிவாயு தீரும் வரை வாகனம் நகரச் சூழலில் இயக்கப்பட்டது. நெடுஞ்சாலை சோதனைக்கும் இதே நடைமுறை பின்பற்றப்பட்டது.

டயர்களில் உள்ள காற்று அழுத்தம், நிறுவனம் பரிந்துரைக்கப்பட்ட அளவில் வைக்கப்பட்டது. இந்தச் சோதனை, நவி மும்பையைச் சுற்றியுள்ள தேர்ந்தெடுக்கப்பட்ட நகர மற்றும் நெடுஞ்சாலைப் பாதைகளில் நடத்தப்பட்டது. காரில் ஒரே ஒரு நபர் மட்டுமே பயணம் செய்தார். ஏசி 22 டிகிரியில் ஆட்டோ பயன்முறையில் வைக்கப்பட்டது. ஆடியோ சிஸ்டம், இண்டிகேட்டர்கள், வைப்பர்கள் போன்ற மின் சாதனங்கள், பொது மக்கள் பயன்படுத்துவதைப் போலவே பயன்படுத்தப்பட்டன. ஓட்டுநரை மாற்றுவதன் மூலம், ஓட்டும் பாணியில் உள்ள வேறுபாடுகளின் தாக்கத்தைக் குறைக்க ஒரு முயற்சி மேற்கொள்ளப்பட்டது.

மொத்தத்தில், நகரப் பயணங்களில் CNG மைலேஜ் ஒரு கிலோகிராமுக்கு 16.75 கி.மீ ஆகவும், நெடுஞ்சாலையில் ஒரு கிலோகிராமுக்கு 22.29 கி.மீ ஆகவும் உள்ளது. தினமும் அதிகம் பயணம் செய்பவர்களுக்கு, இந்த CNG மாடல் செலவுகளைக் குறைக்கும். இருப்பினும், பெட்ரோல் மாடலுடனான விலை வித்தியாசம், உங்கள் தினசரி பயணத் தூரம் மற்றும் அருகிலுள்ள CNG நிலையங்களின் இருப்பு ஆகியவற்றின் அடிப்படையில் வாங்கும் முடிவை எடுப்பது சிறந்தது.

நிலா முற்றத்தில் கவிமழை.... சிவகங்கையில் நூல் வெளியீடு: இலக்கியப் பெருவிழா!

அருண் சின்னதுரை — Sun, 1 Nov 2026 19:45:12 +0530

சிவகங்கையில் நிலா முற்றத்தில் கவிமழை எனும் கவிதை நூல் வெளியீட்டு விழா நடைபெற்றது.

கவிதை நூல் வெளியீட்டு விழா.

சிவகங்கை தமிழவைய ஒருங்கிணைப்பில் புலவர் கா.காளிராசா எழுதிய நிலா முற்றத்தில் கவிமழை என்னும் கவிதை நூல் வெளியீட்டு விழா சிவகங்கை சிவன் கோவில் எதிரே உள்ள தனியார் திருமண மண்டபத்தில் நடைபெற்றது. தமிழ்த்தாய் வாழ்த்துடன் தொடங்கிய இந்நிகழ்வில் ஸ்ரீ சாய் கலாச்சேத்ரா நாட்டியப் பள்ளி மாணவர்கள் தமிழ் வணக்கப் பாடலை தந்தனர், செல்வன் பிரசாந்த் தமிழ் முழக்கப் பாடலை பாடினார்.

சிவகங்கை தமிழவையச் செயலர் சுரேஷ் வரவேற்புரைத்தார்.

சிவகங்கை மன்னர் மேல்நிலைப்பள்ளி தலைமை ஆசிரியரும் சிவகங்கை தொல்நடைக் குழுவின் தலைவருமான நா. சுந்தரராஜன் தலைமை வகித்தார். சிவகங்கை தமிழவைய செயற்குழு உறுப்பினரும் சிவகங்கை இராணி வேலுநாச்சியார் அரிமா சங்கத் தலைவருமான வித்யா கணபதியும் சிவகங்கை தமிழ்சங்கத் தலைவரும் ஓவியருமான கலைமகள் முத்துக்கிருஷ்ணனும் முன்னிலை வகித்தனர். திருச்சி தூயவளனார் (சென் ஜோசப் ) கல்லூரி மேனாள் பேராசிரியர், முனைவர் பொன். புஷ்பராஜ் அவர்கள் நூலை வெளியிட்டு சிறப்புரை நிகழ்த்தினார்.

கரூர் அரசு கலைக் கல்லூரி தமிழ்த்துறைத் தலைவர் சரவணன் நூலுக்கு மதிப்புரை வழங்கினார்.

காளையார்கோவில் காளையப்பா சாமில் உரிமையாளர், திருமதி மரகத மீனாட்சி முத்துக்குமரன், சிவகங்கை வழக்கறிஞர் இராம் பிரபாகர், த.மு.எ.க.ச, சிவகங்கை மாவட்டத்தலைவர் கவிஞர் சிபூ,உலகத் திருக்குறள் கூட்டமைப்பு முனைவர் வனிதா, செங்காந்தள் சோழன் பதிப்பகர் முனைவர் இயேசு ராஜா, கவிஞர் சாதிக் முகமது, இளம் பேச்சாளர் நவீன் ஆகியோர் வாழ்த்துரைத்தனர். நூலாசிரியர் புலவர் கா.காளிராசா ஏற்புரை வழங்கினார், இந்நிகழ்வில் சிவகங்கை தமிழ்ச்சங்கம், தமிழ்நாடு அறிவியல் இயக்கம், டாக்டர் அப்துல் கலாம் உதவும் கரங்கள் த.மு.எ.க.ச போன்ற அமைப்புகளின் பொறுப்பாளர்களும்

சிவகங்கை நகர் மற்றும் சுற்று வட்டார ஆசிரியர்கள், தொழில் முனைவர்கள், இளைஞர்கள் மற்றும் இலக்கியச் சுவைஞர்கள் போன்ற நூற்றுக்கும் மேற்பட்டோர் கலந்து கொண்டனர். நிகழ்வை சிவகங்கை தமிழவைய உறுப்பினர் கிருஷ்ணவேணி காளிராசா தொகுத்து வழங்கினார், சிவகங்கை தொல்நடைக் குழு செயலர் இரா. நரசிம்மன் நன்றியுரைத்தார்

VS Babu Health Condition: தவெக எம்எல்ஏ வி.எஸ்.பாபுவிற்கு 54 நாட்களாக சிகிச்சை! அமைதி காக்கும் அரசு! புலம்பும் தொகுதி மக்கள்!

வினோத்குமார் — Sun, 1 Nov 2026 19:00:09 +0530

நடந்து முடிந்த சட்டமன்ற தேர்தலில் கொளத்தூர் தொகுதியில் திமுக தலைவர் மு.க.ஸ்டாலினை வி.எஸ்.பாபு தோற்கடித்து அனைவரின் கவனத்தையும் ஈர்த்தார். இந்நிலையில் கடந்த 9ம் தேதி திடீரென உடல்நலக்குறைவு ஏற்பட்டதை அடுத்து சென்னை அமைந்தகரையில் உள்ள எம்ஜிஎம் ஹெல்த்கேர் மருத்துவமனையில் தீவிர சிகிச்சை பிரிவில் அனுமதிக்கப்பட்டார்.

தவெக எம்எல்ஏ வி.எஸ்.பாபு

பின்னர் அவரது உடலை குறித்து பல்வேறு வதந்திகள் சமூக வலைதளங்களில் வெளியான நிலையில் மருத்துவனை நிர்வாகம் அவ்வப்போது வி.எஸ்.பாபு உடல்நிலை குறித்து அறிக்கை வெளியிட்டு வந்தது. மூச்சு விடுவதில் சிரமம் இருப்பதால் அவருக்கு செயற்கை சுவாசக் கருவிகள்(வென்டிலேட்டர்) உதவியுடன் சிகிச்சை அளிக்கப்படுவதாகவும், மருத்துவ நிபுணர்கள் வி.எஸ்.பாபு உடல்நிலையை தீவிரமாக கண்காணித்து வருவதாகவும் மருத்துவமனை தரப்பில் தெரிவிக்கப்பட்டது.

கடைசியாக செப்டம்பர் 22ம் தேதி மருத்துவமனை தரப்பிலிருந்து வி.எஸ்.பாபுவின் உடல்நிலை குறித்து அறிக்கை வெளியானது. கடந்த நவம்பர் மாதம் 23ம் தேதி முதல்வர் விஜய் மருத்துவமனைக்கு சென்று வி.எஸ்.பாபுவை சந்தித்து நலம் விசாரித்து சென்றார். அமைச்சர்கள் அருண்ராஜ், வெங்கட்ரமணன், மரியம் வில்சன் போன்றோரும் மருத்துவமனைக்கு சென்று வந்தனர். சமீபத்தில் சபாநாயகர் ஜே.சி.டி.பிராபகர் வி.எஸ்.பாபுவிடம் போனில் பேசியதாகவும் கூறியிருந்தார்.

அறிக்கை வெளியிடாத மருத்துவமனை

வி.எஸ்.பாபுவின் உடல்நிலை குறித்து அதிமுக, புதிய தமிழகம் கட்சியினர் போன்றோரும் கேள்வி எழுப்பியிருந்தனர். அதாவது வி.எஸ்.பாபு உடல்நிலை குறித்து தொகுதி மக்களுக்கு தெரிவிக்க வேண்டியது தமிழக அரசின் கடமை. பொதுநலன் கருதி, வெளிப்படைத்தன்மையை உறுதிப்படுத்துவது அரசின் பொறுப்பு என அதிமுக மாநிலங்களவை எம்.பி. இன்பதுரை தெரிவித்திருந்தார். அப்படி இருந்த போதிலும் வி.எஸ்.பாபு உடல்நிலை குறித்து மருத்துவமனை தரப்பில் எந்த அறிக்கையும் வெளியாகவில்லை.

குழப்பத்தில் தொகுதி மக்கள்

இதனிடையே சென்னையில் தற்போது வடகிழக்குப் பருவமழை தொடங்கியிருக்கும் நிலையில் தீவிரமாக மழை பெய்யும் நாட்கள் வந்துக்கொண்டிருக்கிறது. இது மாதிரியான சூழலில் கொளத்தூர் தொகுதி எம்எல்ஏ குறித்து எந்தவித அதிகாரப்பூர்வ அறிவிப்பும் வெளியாகாததால் அத்தொகுதி மக்களிடையே குழப்பத்தை ஏற்படுத்தியுள்ளது. அரசு அல்லது மருத்துவமனை தரப்பில் எம்எல்ஏ வி.எஸ்.பாபு உடல்நிலை குறித்து வெளியிட வேண்டும் என கொளத்தூர் மக்களின் கோரிக்கையாக உள்ளது. வி.எஸ்.பாபு மருத்துவமனையில் அனுமதிக்கப்பட்டு 54 நாட்கள் ஆகிறது என்பது குறிப்பிடத்தக்கது.

“எங்க ஊருக்கு மாற்று சமகத்தினரின் சுடுகாடு வேண்டாம்” - ரேஷன் அட்டையை வீசிச் சென்ற மக்கள் - என்ன ஆச்சு?

ராஜேஷ். எஸ் — Sun, 1 Nov 2026 18:33:11 +0530

திருப்பத்தூர் மாவட்டத்தில் மாற்று சமூகத்தினருக்கு சுடுகாடு அமைக்க எதிர்ப்பு தெரிவித்து குடும்ப அட்டையை தூக்கிப்போட்டு கிராம சபை கூட்டத்தை புறக்கணித்த மக்களால் பரபரப்பு ஏற்பட்டது.

நவம்பர் 1 உள்ளாட்சிகள் தினத்தை முன்னிட்டு தமிழக முழுவதும் உள்ள கிராமங்களில் கிராம சபை கூட்டம் நடைபெற்று வருகிறது. அதேபோல, திருப்பத்தூர் மாவட்டம் கந்திலி ஊராட்சி ஒன்றியம் குனிச்சி பகுதியில் கிராமசப கூட்டம் துறை வட்டார வளர்ச்சி அலுவலர் ஆணிகிரேஸ் தலைமையில் நடைபெற்றது. இந்த கிராமத்தில் சுமார் 11 ஏக்கர் புறம்போக்கு நிலம் உள்ளதாகவும் அதில் மூன்று ஏக்கர் நிலத்தில் வெளியூர் பகுதியைச் சேர்ந்த கிறிஸ்தவர்கள் மற்றும் இஸ்லாமியர்களுக்கு சுடுகாடு அமைக்க நிதி ஒதுக்கப்பட்டதாக கூறப்படுகிறது.

இதனை அறிந்த உள்ளூர் பொதுமக்கள் எந்த ஒரு தீர்மானமும் போடாமல், எப்படி வெளியூர் மாற்று சமூகத்தினருக்கு சுடுகாடு ஒதுக்குனீங்க எனக்கூறி இன்று நடைபெற்ற கிராம சபை கூட்டத்தை பல்வேறு கேள்விகள் எழுப்பினர்.

மேலும், அதிகாரிகளிடமிருந்து முறையான பதில் கிடைக்கப்பெறாத காரணத்தால் ஆத்திரமடைந்த அப்பகுதி மக்கள் தங்களுடைய குடும்ப அட்டையை கிராம நிர்வாக அலுவலரின் காலடி போட்டுவிட்டு கிராம சபை கூட்டத்தை புறக்கணித்து அங்கிருந்து வெளியேறினர்.பின்னர், திடீர் என சாலை மறியலில் ஈடுபட முயற்சி செய்தனர். அப்போது பாதுகாப்பு பணியில் இருந்த போலீசார் இதுகுறித்து நடவடிக்கை எடுக்கப்படும் என்று கூறியதன் பேரில் அங்கிருந்து கலைந்து சென்றனர்.

மேலும், மாற்று சமூகத்தினருக்கு இப்பகுதியில் மாவட்ட நிர்வாகத்தால் சுடுகாடு ஒதுக்கி கொடுத்தால் வருகின்ற சட்டமன்றத் தேர்தலை புறக்கணிப்போம், தங்களுடைய ஆவணங்களை மாவட்ட நிர்வாகத்திடமே ஒப்படைப்போம் என எச்சரிக்கை விடுத்தனர்.