கொடநாடு கொலை கொள்ளை வழக்கு தொடர்புடைய முன்னாள் முதல்வர் ஜெயலலிதாவின் கார் டிரைவர் கனகராஜ் விபத்தில் மரணமடைந்த வழக்கை நேற்று மீண்டும் விசாரிக்க போலீஸ் அதிகாரிகள் முடிவு செய்துள்ளனர். நீலகிரி மாவட்டம் கோத்தகிரி அருகே உள்ள கொடநாட்டில் மறைந்த முன்னாள் முதல்வர் ஜெயலலிதா மற்றும் சசிகலாவிற்கு சொந்தமான தேயிலை எஸ்டேட் உள்ளது கடந்த 2017 ஆம் ஆண்டு ஏப்ரல் மாதம் 23 ஆம் தேதி நள்ளிரவு, எஸ்டேட்டுக்கு உள்நுழைந்த மர்ம கும்பல், அங்கு பாதுகாப்பு பணியில் இருந்த ஓம்பகதூரை கொலை செய்துவிட்டு, பங்களாவுக்குள் சென்று அங்குள்ள பாறைகளை உடைத்து பல்வேறு முக்கிய ஆவணங்களை கொள்ளையடித்து சென்றனர். இச்சம்பவத்தில் ஜெயலலிதாவின் முன்னாள் கார் டிரைவர் கனகராஜ் உட்பட 11 பேர் ஈடுபட்டதை காவல்துறையினர் விசாரணையில் கண்டுபிடித்தனர்.
அச்சம்பவம் நடந்த அடுத்த சில நாட்களில் ஆத்தூர் அருகில் உள்ள சந்தனகிரி என்ற இடத்தில் நடந்த விபத்தில் சந்தேகத்திற்கிடமான முறையில் ஜெயலலிதாவின் முன்னாள் டிரைவர் கனகராஜ் உயிரிழந்தார். மற்றொரு முக்கிய குற்றவாளியாக கருதப்பட்ட சயான், அவரது மனைவி, மகளுடன் கேரளாவில் காரில் செல்லும்போது ஏற்பட்ட விபத்தில் சயானின் மனைவி மற்றும் மகள் உயிரிழந்தனர். சயான் படுகாயத்துடன் உயிர் தப்பினார். இதைத் தொடர்ந்து சயான் உட்பட 10 பேர் மீது வழக்குப்பதிவு செய்து கைது செய்யப்பட்டனர். இவ்வழக்கு ஊட்டியில் உள்ள மாவட்ட நீதிமன்றத்தில் நடைபெற்று வருகிறது.
இந்த நிலையில் கடந்த 13 ஆம் தேதி ஊட்டி நீதிமன்றத்தில் வழக்கு விசாரணைக்கு வந்தபோது, சயான் தன்னை மீண்டும் விசாரணை வேண்டும் என்று நீதிமன்றத்தில் மனு அளித்தார். இதையடுத்து, மூன்று மணிநேர விசாரணை மேற்கொள்ளப்பட்டு வீடியோவில் பதிவு செய்யப்பட்டது. இந்த விசாரணையில் கொடநாடு கொலை கொள்ளை சம்பவத்தில் தொடர்புடைய பல்வேறு புதிய தகவல்கள் சயான் கூறியதாக தெரிகிறது. இதனால் கொடநாடு வழக்கில் ஆரம்ப கட்டத்தில் இருந்து ஊட்டி போலீசார் மீண்டும் விசாரணையை தொடங்கியுள்ளனர். இந்த விவகாரத்தில் 5 தனிப்படை அமைக்கப்பட்டு விசாரணை நடத்தி வருகின்றனர். இந்த விவகாரத்தில் சேலம் மாவட்டம் ஆத்தூரில் சாலை விபத்தில் சந்தேகமான முறையில் உயிரிழந்த கனகராஜ் சகோதரர் தனபாலிடமும் போலீஸார் விசாரணை நடத்தினர். போது அவர் தனது சகோதரர் விபத்தில் இறக்கவில்லை என்றும் திட்டமிட்டு கொலை செய்துள்ளனர் என்று கூறினார். அதேபோல கனகராஜன் மனைவி கலைவாணி, தனது கணவர் விபத்தில் பலியாக வில்லை. அவரை கொலை செய்து விட்டார்கள் என்று கூறினார். எனவே கொடநாடு வழக்கில் தொடர்பு உள்ளவர்களுக்கு கனகராஜ் விபத்தில் தொடர்பு உள்ளதா என விசாரிக்க தனிப்படை போலீசார் விரைவில் சேலம் வந்து விசாரணை நடத்த உள்ளதாக தகவல் வெளியாகி உள்ளது.