Kovai Child Murder Case: சூலூர் சிறுமி மரண வழக்கில் சிக்கிய அரக்கர்கள்... கோவையை உலுக்கிய நள்ளிரவு சம்பவம்...

சூலூர் சிறுமி மரண வழக்கில் கைது செய்யப்பட்ட நாகப்பட்டினத்தைச் சேர்ந்த கார்த்தி, கை மற்றும் கால் முறிவு காரணமாக கோவை அரசு மருத்துவமனையில் அனுமதி.

சூலூர் சிறுமி மரண வழக்கில் குற்றவாளிகள் கைது

Source : abp nadu

கோவை மாவட்டம் சூலூர் அருகே 10 வயது சிறுமி மர்மமான முறையில் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. வீட்டின் அருகே விளையாடிக்கொண்டிருந்த சிறுமி திடீரென மாயமான நிலையில், மறுநாள் காலை கண்ணம்பாளையம் பகுதியில் உள்ள குளக்கரையில் சடலமாக மீட்கப்பட்டார். தகவலறிந்து சம்பவ இடத்துக்கு வந்த சூலூர் போலீஸார், சிறுமியின் உடலை கைப்பற்றி உடற்கூறு பரிசோதனைக்காக கோவை அரசு மருத்துவமனைக்கு அனுப்பி வைத்தனர்.

சிறுமி பாலியல் வன்கொடுமைக்கு உட்படுத்தப்பட்டு, பின்னர் கழுத்தை நெரித்துக் கொலை செய்யப்பட்டிருக்கலாம் என்ற சந்தேகத்தின் பேரில் போலீஸார் பல்வேறு கோணங்களில் விசாரணை மேற்கொண்டு வருகின்றனர். மாவட்ட காவல் கண்காணிப்பாளர் மற்றும் துணை காவல் கண்காணிப்பாளர் நேரில் ஆய்வு நடத்தினர்.

மருத்துவமனையில் பலத்த போலீஸ் பாதுகாப்புடன் குற்றவாளிகள் அனுமதி

இந்த வழக்கில் தொடர்புடையதாக நாகப்பட்டினம் மாவட்டத்தை சேர்ந்த கார்த்தி மற்றும் அவருக்கு உதவியதாக கூறப்படும் மோகன்ராஜ் ஆகியோரை போலீஸார் கைது செய்து ரகசிய இடத்தில் வைத்து தீவிர விசாரணை நடத்தி வருகின்றனர். கைது செய்யப்பட்ட மோகன்ராஜுக்கு வரும் 27-ம் தேதி வரை நீதிமன்ற காவல் வழங்கி சூலூர் நீதிமன்ற குற்றவியல் நடுவர் அருண்குமார் உத்தரவிட்டார்.

இதற்கிடையில், கை மற்றும் கால் முறிவு காரணமாக கார்த்தி கோவை அரசு மருத்துவமனையில் அனுமதிக்கப்பட்டுள்ளார். அவரைச் சுற்றி 20-க்கும் மேற்பட்ட போலீஸார் பாதுகாப்பு பணியில் ஈடுபடுத்தப்பட்டுள்ளனர். சட்டம்-ஒழுங்கு பிரச்சினைகள் ஏற்படாத வகையில் மருத்துவமனை வளாகத்தில் பாதுகாப்பு பலப்படுத்தப்பட்டுள்ளது.

சிறுமியின் உயிரிழப்புக்கு நீதி கேட்டு, பெற்றோர் மற்றும் உறவினர்கள் சூலூர் காவல் நிலையம் முன்பு திருச்சி சாலையில் இரவு முழுவதும் சாலை மறியல் போராட்டத்தில் ஈடுபட்டனர். இதனால் போக்குவரத்து பாதிக்கப்பட்டது. பின்னர் போலீஸார் பேச்சுவார்த்தை நடத்தி போராட்டக்காரர்களை கலைந்து செல்லச் செய்தனர். இந்த சம்பவம் கோவை மாவட்டம் முழுவதும் சோகத்தையும் பரபரப்பையும் ஏற்படுத்தியுள்ளது.