Mayana Kollai 2026: நள்ளிரவில் சுடுகாட்டில் பூஜை – வாயில் எலும்புடன் பூசாரியின் ஆவேச நடனம்
கோவை சொக்கம்புதூர் சுடுகாட்டில் மயான கொள்ளை நிகழ்வு. மகா சிவராத்திரியை முன்னிட்டு வெகு விமர்சையாக நடைபெற்ற பாரம்பரிய பூஜை
கோவை சொக்கம்புதூர் பகுதியில் உள்ள சுடுகாட்டில், மகா சிவராத்திரி மற்றும் மாசி மாத அமாவாசையை முன்னிட்டு ஆண்டுதோறும் நடைபெறும் பாரம்பரிய மயான கொள்ளை நிகழ்வு இந்த ஆண்டும் நள்ளிரவில் வெகு விமர்சையாக நடைபெற்றது. இந்த நிகழ்வை காணவும், வழிபடவும் ஏராளமான பக்தர்கள் கலந்து கொண்டனர்.
சுடுகாட்டில் நடனம்
மகா சிவராத்திரி நாளை முன்னிட்டு, சொக்கம்புதூர் சுடுகாட்டில் மண்ணால் மாசாணியம்மன் சிலை வடிவமைக்கப்பட்டு, மலர்கள் மற்றும் அலங்காரங்களால் சிறப்பாக அலங்கரிக்கப்பட்டது. இதனைத் தொடர்ந்து, அங்காள பரமேஸ்வரி அம்மன் கோவில்யிலிருந்து பம்பை, உடுக்கை உள்ளிட்ட பாரம்பரிய வாத்தியங்களுடன் ஊர்வலமாக வந்த கோவில் பூசாரி, சுடுகாட்டில் மாசாணியம்மனைச் சுற்றி ஆக்ரோசமாக நடனமாடி சிறப்பு பூஜைகளை நடத்தினார்.
பூஜையின் முக்கிய நிகழ்வாக, மாசாணியம்மன் சிலையின் இதயப் பகுதியில் வைக்கப்பட்டிருந்த மனித எலும்பை பூசாரி தனது வாயால் கடித்தபடி எடுத்து, தீவிர ஆவேசத்துடன் நடனமாடினார். இந்த நிகழ்வு பக்தர்களிடையே பெரும் பரவசத்தையும், ஆன்மிக உணர்வையும் ஏற்படுத்தியது. பூசாரியின் ஆக்ரோச நடனத்தைக் கண்டு, பக்தர்கள் “அரோகரா” முழக்கமிட்டு, மாசாணியம்மனையும் பூசாரியையும் வழிபட்டனர்.
மண் எடுத்து வழிபாடு
நிகழ்வு நிறைவடைந்த பின்னர், மாசாணியம்மன் சிலையிலிருந்து மண் எடுத்து, அதனை அங்காள பரமேஸ்வரி அம்மன் கோவிலுக்கு கொண்டு சென்று சிறப்பு வழிபாடுகள் நடத்தப்பட்டன. மகா சிவராத்திரியை முன்னிட்டு நள்ளிரவில் நடைபெறும் இந்த மயான கொள்ளை நிகழ்வில் கலந்து கொண்டு வழிபட்டால், வேண்டிய காரியங்கள் நிறைவேறும் என்பது பக்தர்களின் ஆழ்ந்த நம்பிக்கையாக இருந்து வருகிறது.
இந்த நிகழ்வைத் தொடர்ந்து, நாளை அங்காள பரமேஸ்வரி அம்மன் கோவிலில் திருக்கல்யாண வைபவம் மற்றும் குண்டம் இறங்கும் முக்கிய நிகழ்ச்சிகள் நடைபெற உள்ளதாக கோவில் நிர்வாகம் தெரிவித்துள்ளது. பாரம்பரியம், நம்பிக்கை மற்றும் ஆன்மிக உணர்வுகள் ஒன்றிணையும் இந்த மயான கொள்ளை நிகழ்வு, சொக்கம்புதூர் பகுதியில் ஒவ்வோர் ஆண்டும் முக்கிய ஆன்மிக விழாவாகக் கொண்டாடப்பட்டு வருகிறது.
தலைப்பு செய்திகள்
ட்ரெண்டிங் செய்திகள்
