18 மாதங்களில் புது ரூட்! காஞ்சிபுரம் - அரக்கோணம் விரைவு சாலையில் பறக்க ரெடியா?
Arakkonam-Parandur Expressway Project: சென்னை - பெங்களூரு விரைவு சாலை, அரக்கோணம் - பரந்தூர் பணிக்கு ரூ.633 கோடியில் புதிய டெண்டர் அறிவிப்பு.
மத்திய அரசின் 'பாரத் மாலா' திட்டத்தின் கீழ் சென்னை - பெங்களூரு விரைவு சாலை அமைக்கும் பணி தீவிரமாக மேம்படுத்தப்பட்டு வருகிறது. கர்நாடகாவின் பெங்களூரில் தொடங்கி, ஆந்திர மாநிலம் வழியாகத் தமிழகத்தில் நுழையும் இந்தச் சாலை, காஞ்சிபுரம் மாவட்டம் வழியாக ஸ்ரீபெரும்புதூர் வரை சென்றடைகிறது. இத்திட்டத்தின் ஒரு முக்கிய பகுதியாக, அரக்கோணம் முதல் காஞ்சிபுரம் பரந்தூர் வரை 25.5 கி.மீ. தொலைவிற்கு அமைக்கும் விரைவு சாலைப் பணி தமிழக எல்லைக்குள் மேற்கொள்ளப்பட்டு வருகிறது. இதில் 17.4 கி.மீ. தொலைவு ராணிப்பேட்டை மாவட்டத்திலும், 8.1 கி.மீ. தொலைவு காஞ்சிபுரம் மாவட்டத்திலும் அமைந்துள்ளது. இந்தச் சாலையானது அரக்கோணம் தாலுகாவில் கர்ணாவூர் அருகே தொடங்கி, காஞ்சிபுரம் தாலுகாவில் உள்ள பரந்தூர் வருவாய் கிராமம் அருகே நிறைவடைகிறது.
முடங்கிய பணிகள் மற்றும் புதிய நடவடிக்கை
கடந்த 2022-ஆம் ஆண்டு ஆகஸ்ட் மாதத்தில் தனியார் ஒப்பந்த நிறுவனம் ஒன்று இதன் சாலைப் பணிகளைத் தொடங்கியது. ஆனால், நிதி நெருக்கடி காரணமாக 2025 மே மாதத்தில் அப்பணிகளைக் கைவிட்டு ஒப்பந்ததாரர் பாதியிலேயே வெளியேறினார். இதனால் 53 சதவீதம் மட்டுமே பணிகள் முடிந்த நிலையில், ஓராண்டுக்கும் மேலாக இத்திட்டம் முடங்கிக் கிடந்தது. பணிகள் நிறுத்தப்பட்டதைத் தொடர்ந்து ஒப்பந்தத்தை முடிவுக்குக் கொண்டுவர தேசிய நெடுஞ்சாலை ஆணையம் நடவடிக்கை எடுத்தது. இந்த விவகாரம் நீதிமன்றத்திற்குச் சென்றதால், புதிய ஒப்பந்ததாரரை நியமிப்பதிலும் தாமதம் ஏற்பட்டது.
புதிய டெண்டர் விபரங்கள் மற்றும் நிபந்தனைகள்
தற்போது இச்சாலையின் விடுபட்ட பணிகளை முடிப்பதற்காக, தேசிய நெடுஞ்சாலை ஆணையம் ரூ.633.12 கோடி மதிப்பில் புதிய டெண்டர் அறிவிப்பை வெளியிட்டுள்ளது. இத்திட்டத்தின் பழைய மொத்த மதிப்பு ரூ.1,525 கோடியாகும். தற்போது மீதமுள்ள 47 சதவீதப் பணிகளுக்காகவே இந்தத் தொகை ஒதுக்கப்பட்டுள்ளது. தேர்வு செய்யப்படும் புதிய ஒப்பந்த நிறுவனம், பணிகளைப் பொறுப்பேற்றதில் இருந்து 18 மாதங்களுக்குள் அனைத்து சாலைப் பணிகளையும் முழுமையாக முடிக்க வேண்டும். மேலும், பணிகள் முடிவடைந்த பிறகு 5 ஆண்டுகள் வரையிலான பராமரிப்புப் பணிகளையும் அந்த நிறுவனமே மேற்கொள்ள வேண்டும் என்று நிபந்தனை விதிக்கப்பட்டுள்ளது. டெண்டர் ஆவணங்களை செப்டம்பர் 1 முதல் செப்டம்பர் 28 வரை பதிவிறக்கம் செய்யலாம் என்றும், பெறப்பட்ட விண்ணப்பங்கள் செப்டம்பர் 29-ஆம் தேதி காலை 11:30 மணிக்குத் திறக்கப்படும் என்றும் அறிவிக்கப்பட்டுள்ளது.
கட்டமைக்கப்படும் மேம்பாலங்கள்
இத்திட்டத்தில் விடுபட்ட சாலைப் பகுதிகளை அமைப்பது மட்டுமின்றி, பல்வேறு முக்கிய உள்கட்டமைப்புப் பணிகளும் இணைக்கப்பட்டுள்ளன. இதன் கீழ் 9 மேம்பாலங்கள், 1 ரயில்வே மேம்பாலம், 2 சிறிய பாலங்கள் மற்றும் 18 சுரங்கப்பாதைகள் ஆகியவை அமைக்கப்பட உள்ளன. இந்த அனைத்து கட்டுமானப் பணிகளும் நிர்ணயிக்கப்பட்ட 18 மாத கால இலக்கிற்குள் விரைந்து முடிக்கப்படும் என தேசிய நெடுஞ்சாலை ஆணைய அதிகாரி தெரிவித்துள்ளார்.
Before You Go
Abhijeet Dipke : ”பாட்டி இறந்ததை சொல்லலயா?”பொய் சொன்னாரா அபிஜீத் திப்கேவீடியோ ஆதாரத்துடன் வந்த போலீஸ்
தலைப்பு செய்திகள்
ட்ரெண்டிங் செய்திகள்
