இன்பச் செய்தி மக்களே.. மதுரை, கொச்சி, கோவா ஆகிய நகரங்களுக்கு கூடுதல் விமானங்கள்..!

கிஷோர் Updated at: 12 Jul 2023 03:22 PM (IST)

சென்னை உள்நாட்டு விமான நிலையத்தில் இருந்து, மதுரை, கொச்சி, கோவா நகரங்களுக்கு கூடுதல் விமானங்கள் இயக்கப்படுகின்றன.

சென்னை விமான நிலையம்

மதுரைக்கு 12 விமானங்களில் இருந்து 16 விமானங்களாகவும், கொச்சிக்கு 8 விமானங்களில் இருந்து, 10 விமானங்களாகவும், கோவாவிற்கு 4 விமானங்களில் இருந்து 6 விமானங்களாகவும் அதிகரிக்கப்பட்டுள்ளன. இதனால் பயணிகள் மகிழ்ச்சி அடைந்துள்ளனர்.

பயணிகளிடையே மகிழ்ச்சி

சென்னை ( Chennai Airport ) : சென்னையில் இருந்து மதுரைக்கு தினமும் 6 விமானங்களும், அதை போல் மதுரையிலிருந்து சென்னைக்கு தினமும் 6 விமானங்களும், சென்னை-மதுரை-சென்னை இடையே நாள் ஒன்றுக்கு இதுவரையில், 12 விமான சேவைகள் இயக்கப்பட்டு வந்தன. ஆனால் இன்றிலிருந்து கூடுதலாக சென்னை-மதுரை இடையே 2 சேவைகளும், மதுரை-சென்னை இடையே 2 சேவைகளும், தினமும் இனிமேல் சென்னை- மதுரை- சென்னை இடையே 16 விமான சேவைகள் இயக்கப்படுகின்றன. மதுரைக்கு விமான சேவை அதிகரித்துள்ளது, தென் மாவட்ட மக்களிடையே மகிழ்ச்சியை ஏற்படுத்தியுள்ளது.

சென்னை-கொச்சி இடையே..

அதைப்போல் சென்னை-கொச்சி இடையே இதுவரை தினமும்,4 விமான சேவைகள் உள்ளன. அதைப்போல் கொச்சி-சென்னை இடையே 4 விமான சேவைகள் மொத்தம் 8 விமான சேவைகள் இயக்கப்பட்டு வந்தன. இன்றிலிருந்து சென்னை-கொச்சி இடையே கூடுதலாக ஒரு விமான சேவையும், கொச்சி-சென்னை இடையே கூடுதலாக ஒரு விமான சேவையும் இயக்கப்படுகின்றன. இதனால் இன்றிலிருந்து சென்னை-கொச்சி- சென்னை இடையே நாள் ஒன்றுக்கு 10 விமான சேவைகள் இயக்கப்படுகிறது. கொச்சிக்கு விமான சேவையை அதிகரித்துள்ளது, கேரள மக்களிடையே வரவேற்பை பெற்றுள்ளது.

சென்னை-கோவா- சென்னை

அதைப்போல் சுற்றுலாப் பயணிகள் அதிகமாக செல்லக்கூடிய கோவாவிற்கு, சென்னையில் இருந்து இதுவரையில் காலை ஒரு விமான சேவை, மாலை ஒரு விமான சேவை என்று 2 விமான சேவைகள் மட்டும் இருந்தது. அதைப்போல் கோவாவில் இருந்து சென்னை வருவதற்கும் தினமும் 2 விமான சேவைகள் இருந்து. இப்போது சுற்றுலா பயணிகள் அதிகரிக்க தொடங்கியதை அடுத்து, இன்றிலிருந்து மதியம் 1:50 மணிக்கு சென்னையில் இருந்து கோவாவிற்கு ஒரு விமான சேவை தொடங்கப்பட்டு, அதைப்போல் அந்த விமானம், மாலை 6:55 மணிக்கு கோவாவில் இருந்து சென்னை வந்து சேர்கிறது. இதை அடுத்து இன்றிலிருந்து சென்னை-கோவா 3 விமானங்களும், கோவா-சென்னை 3 விமானங்களும், நாள் ஒன்றுக்கு சென்னை-கோவா- சென்னை இடையே 6 விமானங்கள் இயக்கப்படுகின்றன. கோவாவிற்கு விமான சேவை அதிகரித்துள்ளது சுற்றுலா பயணிகள் இடையே மகிழ்ச்சியை ஏற்படுத்தியுள்ளது.