chennai

Chennai Rain: நள்ளிரவு முதல் கனமழை எச்சரிக்கை.. சென்னையில் நாளை பள்ளிகளுக்கு விடுமுறையா?

வினோத்குமார் — Sun, 1 Nov 2026 21:07:29 +0530

வடகிழக்குப் பருவமழை தொடங்கியதை அடுத்து முதல் புயல் வங்கக்கடலில் கடந்த 25-ம் தேதி அர்னாப் புயலாக உருவானது. இந்த புயல் தமிழகத்தில் எந்த பாதிப்பும் ஏற்படுத்தாமல் ஆந்திராவை புரட்டி எடுத்தது. இதனால் ஆந்திராவில் பல்வேறு இடங்களில் 25 செ.மீ. மேல் பதிவானது. இந்நிலையில் தற்போது 2-வது புயல் தற்போது உருவாகியுள்ளது. இது தற்போது அதி தீவிர புயலாக உருவாகியுள்ளது. இதற்கு முரசு என பெயரிடப்பட்டுள்ளது.

ஆரஞ்ச் அலர்ட்

இந்த புயலானது நவம்பர் 3-ம் தேதி அன்று நெல்லூர்-நர்சாப்பூர் இடையே பலத்த காற்றுடன் கரையைக் கடக்க வாய்ப்புள்ளதாக தெரிவிக்கப்பட்டுள்ளது. இதன் காரணமாக இன்று திருவள்ளூர், மாவட்டத்தில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன முதல் மிக கன மழை பெய்யக்கூடும். சென்னை, ராணிப்பேட்டை, காஞ்சிபுரம் மற்றும் நீலகிரி மாவட்டங்களில் ஓரிரு இடங்களில், இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கனமழை பெய்யக்கூடும்.

இதையும் படிங்க: Cyclone Murasu: தீவிரமடையும் முரசு புயல்! சென்னையில் மழை எப்படி இருக்கும்? வெதர்மேன் பிரதீப் ஜான் முக்கிய அப்டேட்!

நாளை காலை முதல் மழை எச்சரிக்கை

மேலும் வேலூர், திருவண்ணாமலை, விழுப்புரம், கள்ளக்குறிச்சி, கடலூர், ஈரோடு, திருப்பூர், சேலம், நாமக்கல், கரூர், திருச்சி, மதுரை, திருநெல்வேலி, கன்னியாகுமரி மாவட்டங்கள், மேற்குத் தொடர்ச்சி மலை மாவட்டங்களில் ஓரிரு இடங்களிலும், மற்றும் புதுவையிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய மிதமான மழை பெய்யக்கூடும் என சென்னை வானிலை மையம் தெரிவித்துள்ளது. அதேபோல் சென்னை, காஞ்சிபுரம், திருவள்ளூர், செங்கல்பட்டு (KTCC) மாவட்டங்களில் நாளை காலை முதல் மழை பெய்யக்கூடும் என தமிழ்நாடு வெதர்மேன் பிரதீப் ஜான் எச்சரிக்கை விடுத்துள்ளார்.

17 மாவட்டங்களுக்கு மழை

இதனிடையே அடுத்த 3 மணிநேரத்தில் அதாவது இரவு 10 மணி வரை 17 மாவட்டங்களுக்கு மழை எச்சரிக்கை விடுக்கப்பட்டுள்ளது. அதாவது சென்னை, காஞ்சிபுரம், செங்கல்பட்டு, திருள்ளூர், கடலூர், தருமபுரி, கன்னியாகுமரி, கிருஷ்ணகிரி, புதுக்கோட்டை, ராணிப்பேட்டை, நீலகிரி, நெல்லை, திருப்பத்தூர், வேலூர், மதுரை, விழுப்புரம், திருவண்ணாமலை மாவட்டங்களில் மழைக்கு வாய்ப்புள்ளதாக சென்னை வானிலை மையம் தெரிவித்துள்ளது.

எதிர்பார்ப்பில் பள்ளி மாணவர்கள்?

இந்நிலையில் சென்னை, திருவள்ளூர் ஆகிய மாவட்டங்களுக்கு நாளை கன முதல் மிக கனமழைக்கான ஆரஞ்ச் அலர்ட் எச்சரிக்கை விடுக்கப்பட்டுள்ளதால் பள்ளிகளுக்கு விடுமுறை அறிவிக்கப்படுமா என்ற எதிர்பார்ப்பில் பள்ளி மாணவர்கள் இருந்து வருகின்றனர். தற்போது சென்னையில் பல்வேறு பகுதிகளில் மழை பெய்து வருகிறது. நள்ளிரவு அல்லது அதிகாலையில் கனமழையின் பெய்யும் பட்சத்தில் விடுமுறை தொடர்பான அறிவிப்பு வெளியாகும்.

சென்னை, திருவள்ளூருக்கு ஆரஞ்ச் அலர்ட்! எங்கெல்லாம் கனமழை கொட்டப்போகுது... மக்களே உஷார்!

ராஜேஷ். எஸ் — Sun, 1 Nov 2026 17:57:04 +0530

சென்னை, திருவள்ளூர் ஆகிய மாவட்டங்களுக்கு நாளை கன முதல் மிக கனமழை பெய்யக்கூடும் என்று வானிலை மையம் எச்சரிக்கை விடுத்துள்ளது.

இன்றைய வானிலை அறிக்கையில்,

01-11-2026: திருவள்ளூர், மாவட்டத்தில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன முதல் மிக கன மழை பெய்யக்கூடும்.

சென்னை, ராணிப்பேட்டை, காஞ்சிபுரம் மற்றும் நீலகிரி மாவட்டங்களில் ஓரிரு இடங்களில், இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கனமழை பெய்யக்கூடும்.

வேலூர், திருவண்ணாமலை, விழுப்புரம், கள்ளக்குறிச்சி, கடலூர், ஈரோடு, திருப்பூர், சேலம், நாமக்கல், கரூர், திருச்சிராப்பள்ளி, மதுரை, திருநெல்வேலி, கன்னியாகுமரி மாவட்டங்கள், மேற்குத் தொடர்ச்சி மலை மாவட்டங்களில் ஓரிரு இடங்களிலும், மற்றும் புதுவையிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய மிதமான மழை பெய்யக்கூடும்.

ஏனைய தமிழகத்தில் ஓரிரு இடங்களிலும் மற்றும் காரைக்கால் பகுதிகளிலும் இடங்களில் இடி மின்னலுடன் கூடிய லேசான மழை பெய்யக்கூடும்.

02-11-2026: சென்னை மற்றும் திருவள்ளூர், மாவட்டத்தில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன முதல் மிக கன மழை பெய்யக்கூடும்.

செங்கல்பட்டு, காஞ்சிபுரம், ராணிப்பேட்டை, வேலூர் மற்றும் நீலகிரி மாவட்டங்களில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன மழை பெய்யக்கூடும்.

மேற்கு தொடர்ச்சி மலை மாவட்டங்கள், வட தமிழகத்தில் ஒருசில இடங்களிலும், புதுவையிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) லேசானது முதல் மிதமான மழை பெய்யக்கூடும் ஏனைய தமிழகத்தில் ஒருசில இடங்களிலும், இடி மின்னலுடன் கூடிய லேசான மழை பெய்யக்கூடும்.

03-11-2026: நீலகிரி மாவட்டத்தில் ஓரிரு இடங்களில், இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) கூடிய கன மழை பெய்யக்கூடும். மேற்கு தொடர்ச்சி மலை மாவட்டங்கள், வட தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) மிதமான மழை பெய்யக்கூடும்.

ஏனைய தமிழகத்தில் ஓரிரு இடங்களில் இடி மின்னல் மற்றும் பலத்த காற்றுடன் (மணிக்கு 40 முதல் 50 கிலோ மீட்டர் வேகத்தில்) லேசானது முதல் மிதமான மழை பெய்யக்கூடும்

04-11-2026 மற்றும் 05-11-2026: தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும்.

06-11-2026 மற்றும் 07-11-2026: தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் லேசானது முதல் மிதமான மழை பெய்யக்கூடும்.

இயல்பு நிலையிலிருந்து அதிகபட்ச வெப்ப அளவின் வேறுபாடு:

01-11-2026: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை ஒருசில இடங்களில் 2-3° செல்சியஸ் அதிகமாக இருக்கக்கூடும்.

02-11-2026 முதல் 05-11-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டி இருக்கக்கூடும்.

சென்னை மற்றும் புறநகருக்கான வானிலை முன்னறிவிப்பு:

இன்று (01-11-2026): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய மிதமான / கன மழை பெய்ய வாய்ப்புள்ளது. அதிகபட்ச வெப்பநிலை 34-35° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்வானம்

நாளை (02-11-2026): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய கன/மிக கன மழை பெய்ய வாய்ப்புள்ளது. அதிகபட்ச வெப்பநிலை 31-32° செல்சியஸை ஒட்டியும், குறைந்தபட்ச வெப்பநிலை 24-25° செல்சியஸை ஒட்டியும் இருக்கக்கூடும்

காஞ்சிபுரம், செங்கல்பட்டு மக்களே உஷார்! இரவு 7 மணி வரை இடியுடன் மழை – வானிலை மையம் எச்சரிக்கை!

கிஷோர் — Sun, 1 Nov 2026 17:10:49 +0530

தமிழகத்தில் வடகிழக்குப் பருவமழை தொடர்ந்து வரும் நிலையில், இன்று (நவம்பர் 1, 2026) சென்னை வானிலை ஆய்வு மையம் வெளியிட்டுள்ள அறிவிப்பின்படி, தமிழகத்தின் பல்வேறு மாவட்டங்களில் மிதமான மழை பெய்ய வாய்ப்புள்ளதாகத் தெரிவிக்கப்பட்டுள்ளது. குறிப்பாக, காஞ்சிபுரம், செங்கல்பட்டு, சென்னை உள்ளிட்ட வட தமிழக மாவட்டங்களில் ஓரிரு இடங்களில் இடியுடன் கூடிய மழை பெய்யக்கூடும் என வானிலை ஆய்வு மையம் எச்சரிக்கை விடுத்துள்ளது.

சென்னை வானிலை ஆய்வு மையம் இன்று மாலை 4.45 மணிக்கு வெளியிட்ட மழை மற்றும் இடியுடன் கூடிய மழைக்கான எச்சரிக்கையில், இன்று இரவு 7 மணி வரை தமிழகத்தின் பல்வேறு மாவட்டங்களில் மழைப்பொழிவு ஏற்பட வாய்ப்புள்ளதாகக் குறிப்பிடப்பட்டுள்ளது.

காஞ்சிபுரம், செங்கல்பட்டு மாவட்டங்களில் மழைக்கு வாய்ப்பு

இன்றைய வானிலை நிலவரப்படி, காஞ்சிபுரம் மற்றும் செங்கல்பட்டு மாவட்டங்களில் ஓரிரு இடங்களில் மிதமான மழையுடன் லேசான இடியுடன் கூடிய மழை பெய்ய மிக அதிக வாய்ப்புள்ளதாக வானிலை ஆய்வு மையம் தெரிவித்துள்ளது. இதேபோல் சென்னை, கடலூர், ராணிப்பேட்டை, திருவள்ளூர், திருவண்ணாமலை, வேலூர் மற்றும் விழுப்புரம் மாவட்டங்களிலும் ஓரிரு இடங்களில் மிதமான மழை பெய்யக்கூடும் எனக் கணிக்கப்பட்டுள்ளது.

குறிப்பாக, காஞ்சிபுரம் மற்றும் செங்கல்பட்டு மாவட்டங்களில் மாலை மற்றும் இரவு நேரங்களில் வானம் மேகமூட்டத்துடன் காணப்படுவதுடன், சில பகுதிகளில் திடீர் மழைப்பொழிவும், இடியுடன் கூடிய மழையும் ஏற்பட வாய்ப்புள்ளது. இதனால் பொதுமக்கள் வெளியில் செல்லும்போது வானிலை மாற்றங்களைக் கவனத்தில் கொள்ள வேண்டும்.

தமிழகத்தின் பிற மாவட்டங்களிலும் மழை பெய்யும்

தமிழகத்தின் பிற பகுதிகளிலும் அடுத்த மூன்று மணி நேரத்தில் மழை பெய்ய வாய்ப்புள்ளதாக அறிவிக்கப்பட்டுள்ளது. கோயம்புத்தூர், திண்டுக்கல், கன்னியாகுமரி, மதுரை, தென்காசி, தேனி, நீலகிரி, திருநெல்வேலி, திருப்பூர் மற்றும் விருதுநகர் ஆகிய மாவட்டங்களில் ஓரிரு இடங்களில் லேசானது முதல் மிதமான மழை பெய்யக்கூடும் என வானிலை ஆய்வு மையம் தெரிவித்துள்ளது.

இதனால் மேற்கு தொடர்ச்சி மலைப் பகுதிகள் மற்றும் தென் மாவட்டங்களிலும் சில இடங்களில் மழைப்பொழிவு ஏற்பட வாய்ப்புள்ளது. தமிழகத்திற்கான மழை மற்றும் இடியுடன் கூடிய மழை எச்சரிக்கைகள் நவம்பர் 1 முதல் அடுத்தடுத்த நாட்களுக்கும் வெளியிடப்பட்டுள்ளன.

பொதுமக்களுக்கு வானிலை ஆய்வு மையம் எச்சரிக்கை

மழையுடன் லேசான இடியுடன் கூடிய மழையும், மின்னல் தாக்கமும் ஏற்பட வாய்ப்புள்ளதால் பொதுமக்கள் எச்சரிக்கையுடன் இருக்க வேண்டும் என அறிவுறுத்தப்பட்டுள்ளது. குறிப்பாக, மழை பெய்யும் பகுதிகளில் சாலைகளில் தண்ணீர் தேங்குவதற்கும், சாலைகள் வழுக்கலாக மாறுவதற்கும் வாய்ப்புள்ளது. இதனால் வாகன ஓட்டிகள் கவனமாகப் பயணிக்க வேண்டும்.

மேலும், மழைப்பொழிவு காரணமாக சில இடங்களில் போக்குவரத்து பாதிக்கப்பட வாய்ப்புள்ளதாகவும் வானிலை ஆய்வு மையம் சுட்டிக்காட்டியுள்ளது. இடியுடன் கூடிய மழையின்போது திறந்தவெளிப் பகுதிகள், மரங்களின் அடிப்பகுதி மற்றும் மின்கம்பங்களுக்கு அருகில் நிற்பதைத் தவிர்க்க வேண்டும்.

நவம்பர் 1 இன்றைய வானிலை நிலவரம் – முக்கிய அறிவிப்பு

இன்றைய அறிவிப்பின்படி, காஞ்சிபுரம், செங்கல்பட்டு, சென்னை உள்ளிட்ட வட தமிழக மாவட்டங்களில் மிதமான மழையுடன் இடியுடன் கூடிய மழை பெய்ய மிக அதிக வாய்ப்புள்ளது. இந்த எச்சரிக்கை இன்று இரவு 7 மணி வரை மட்டுமே செல்லுபடியாகும் என சென்னை வானிலை ஆய்வு மையம் தெரிவித்துள்ளது. வடகிழக்குப் பருவமழை காலத்தில் தமிழகத்தின் பல்வேறு பகுதிகளில் வானிலை மாற்றங்கள் தொடர்ந்து காணப்படுவதால், பொதுமக்கள் வானிலை ஆய்வு மையத்தின் அடுத்தடுத்த அறிவிப்புகளைக் கவனித்து செயல்பட வேண்டும்.

ரூ.1.5 லட்சம் கோடி திட்டம்! 24 மணி நேர குடிநீர் முதல் AI நிர்வாகம் வரை – 2026ல் புதிய மாற்றம்!

கிஷோர் — Sun, 1 Nov 2026 17:02:34 +0530

தமிழகத்தின் நகர்ப்புற உள்கட்டமைப்பு வசதிகளை அடுத்த கட்டத்திற்கு எடுத்துச் செல்லும் வகையில், 2026 முதல் 2031ஆம் ஆண்டு வரையிலான ஐந்து ஆண்டுகளுக்கு ரூ.1.5 லட்சம் கோடி மதிப்பீட்டில் முதலமைச்சரின் ஒருங்கிணைந்த நகர்ப்புற மேம்பாட்டுத் திட்டம் (Chief Minister’s Integrated Urban Development Mission – CMIUDM) செயல்படுத்தப்பட உள்ளதாகத் தெரிவிக்கப்பட்டுள்ளது. மாநிலம் முழுவதும் உள்ள மாநகராட்சிகள், நகராட்சிகள் மற்றும் பேரூராட்சிகளை உள்ளடக்கிய இந்தத் திட்டம், நகர்ப்புற மக்களின் அடிப்படைத் தேவைகளை மேம்படுத்துவதையும், நவீன நகர்ப்புறக் கட்டமைப்பை உருவாக்குவதையும் முக்கிய நோக்கமாகக் கொண்டுள்ளது.

ஐந்து ஆண்டுகளில் ரூ.1.5 லட்சம் கோடி முதலீடு

தமிழகத்தின் வேகமான நகரமயமாக்கலுக்கு ஏற்ப குடிநீர், சாலை, கழிவுநீர் மேலாண்மை, மழைநீர் வடிகால் உள்ளிட்ட அடிப்படை வசதிகளுக்கான தேவையும் அதிகரித்து வருகிறது. இதனைக் கருத்தில் கொண்டு, நகர்ப்புற உள்ளாட்சி அமைப்புகளில் ஒருங்கிணைந்த வளர்ச்சியை ஏற்படுத்தும் நோக்கில் இந்த ஐந்தாண்டுத் திட்டம் முன்னெடுக்கப்படுகிறது. ஒவ்வொரு நகர்ப்புறப் பகுதியின் தேவைகளுக்கு ஏற்ப உள்கட்டமைப்புப் பணிகளைத் திட்டமிட்டு செயல்படுத்துவது இதன் முக்கிய அம்சமாக இருக்கும்.

24 மணி நேரமும் தடையில்லாத குடிநீர் விநியோகம்

இந்தத் திட்டத்தின் முக்கிய நோக்கங்களில் ஒன்றாக அனைத்து நகர்ப்புற வீடுகளுக்கும் பாதுகாப்பான குடிநீர் கிடைப்பதை உறுதி செய்வது இடம்பெற்றுள்ளது. குறிப்பாக, மாநகராட்சிப் பகுதிகளில் 24 மணி நேரமும் தடையில்லாமல் குடிநீர் விநியோகம் செய்யும் வகையில் கட்டமைப்புகளை மேம்படுத்தத் திட்டமிடப்பட்டுள்ளது. குடிநீர் குழாய்கள், நீர்த்தேக்கத் தொட்டிகள், விநியோகக் கட்டமைப்புகள் மற்றும் நீர் மேலாண்மை வசதிகளை மேம்படுத்துவதன் மூலம் பொதுமக்களின் குடிநீர் தேவையைப் பூர்த்தி செய்வது இலக்காக உள்ளது.

சாலை வசதிகள் மற்றும் கழிவுநீர் கட்டமைப்புக்கு முக்கியத்துவம்

நகர்ப்புறங்களில் போக்குவரத்து நெரிசலைக் குறைப்பதற்கும், பொதுமக்களின் பயணத்தை எளிதாக்குவதற்கும் சாலை கட்டமைப்புகள் மேம்படுத்தப்பட உள்ளன. சேதமடைந்த சாலைகளைச் சீரமைத்தல், புதிய சாலைகள் அமைத்தல் உள்ளிட்ட பணிகளுடன் நகர்ப்புற உள்கட்டமைப்பு வசதிகளும் விரிவுபடுத்தப்பட உள்ளன. அதேபோல், பாதாளச் சாக்கடைத் திட்டங்கள், கழிவுநீர் சுத்திகரிப்பு நிலையங்கள் மற்றும் முறையான கழிவுநீர் வெளியேற்றக் கட்டமைப்புகளை உருவாக்குவதற்கும் முக்கியத்துவம் அளிக்கப்படுகிறது. இதன் மூலம் கழிவுநீர் தேக்கம் மற்றும் சுற்றுச்சூழல் மாசுபாடு போன்ற பிரச்சினைகளைக் கட்டுப்படுத்த முடியும் என எதிர்பார்க்கப்படுகிறது.

குப்பை மேலாண்மை மற்றும் பசுமைப் பகுதிகள் மேம்பாடு

நகர்ப்புறங்களில் நாளுக்கு நாள் அதிகரித்து வரும் திடக்கழிவுகளை அறிவியல் முறையில் கையாள்வதற்கான நடவடிக்கைகளும் இந்தத் திட்டத்தில் இடம்பெற்றுள்ளன. வீடுகள் மற்றும் வணிக நிறுவனங்களில் உருவாகும் குப்பைகளைச் சேகரித்தல், மக்கும் மற்றும் மக்காத குப்பைகளைத் தரம் பிரித்தல், மறுசுழற்சி செய்தல் மற்றும் பாதுகாப்பான முறையில் அகற்றுதல் போன்ற பணிகள் மேம்படுத்தப்பட உள்ளன. இதனுடன் நகர்ப்புறங்களில் பூங்காக்கள், மரக்கன்றுகள் நடுதல் மற்றும் திறந்தவெளிப் பசுமைப் பகுதிகளை அதிகரிப்பதன் மூலம் சுற்றுச்சூழலுக்கு உகந்த நகரங்களை உருவாக்கவும் திட்டமிடப்பட்டுள்ளது.

ஏரிகள், குளங்கள் மற்றும் ஆறுகள் மறுசீரமைப்பு

நகர்ப்புற நீர்நிலைகளைப் பாதுகாப்பதும் இந்தத் திட்டத்தின் மற்றொரு முக்கிய அம்சமாகும். ஏரிகள், குளங்கள் மற்றும் ஆறுகளைப் புனரமைத்தல், நீர்நிலைகளில் கழிவுநீர் கலப்பதைத் தடுப்பது, நீர்நிலைகளின் சுற்றுச்சூழல் தரத்தை மேம்படுத்துவது போன்ற பணிகள் மேற்கொள்ளப்பட உள்ளன. மழைக்காலங்களில் மழைநீர் சேமிப்பை அதிகரிப்பதற்கும், நிலத்தடி நீர்மட்டத்தைப் பாதுகாப்பதற்கும் நீர்நிலைகள் மறுசீரமைப்பு உதவியாக இருக்கும்.

AI தொழில்நுட்பத்தில் நவீன நகராட்சி நிர்வாகம்

உள்கட்டமைப்பு வசதிகளுடன் தொழில்நுட்ப அடிப்படையிலான நிர்வாகத்தையும் மேம்படுத்துவது இந்தத் திட்டத்தின் சிறப்பம்சமாகக் கூறப்படுகிறது. செயற்கை நுண்ணறிவு எனப்படும் AI தொழில்நுட்பத்தைப் பயன்படுத்தி நகராட்சி நிர்வாகப் பணிகளை நவீனப்படுத்தத் திட்டமிடப்பட்டுள்ளது. பொதுமக்களின் புகார்களைக் கண்காணித்தல், சேவைகளை விரைவாக வழங்குதல், நகர்ப்புறப் பிரச்சினைகளைக் கண்டறிதல் மற்றும் நிர்வாகப் பணிகளின் செயல்திறனை மேம்படுத்துதல் போன்றவற்றில் நவீன தொழில்நுட்பம் பயன்படுத்தப்பட வாய்ப்புள்ளது.

காஞ்சிபுரம் உள்ளிட்ட நகர்ப்புறப் பகுதிகளுக்கு என்ன பயன்?

இந்தத் திட்டம் மாநிலம் முழுவதும் உள்ள நகர்ப்புற உள்ளாட்சி அமைப்புகளை உள்ளடக்குவதால், காஞ்சிபுரம் மாநகராட்சி உள்ளிட்ட பகுதிகளிலும் அடிப்படை வசதிகளை மேம்படுத்துவதற்கான வாய்ப்புகளை உருவாக்குகிறது. குறிப்பாக குடிநீர் விநியோகம், பாதாளச் சாக்கடை வசதி, மழைநீர் வடிகால், சாலை மேம்பாடு, குப்பை மேலாண்மை மற்றும் ஏரி, குளங்கள் சீரமைப்பு போன்ற பணிகளுக்கான திட்ட முன்மொழிவுகளை உள்ளூர் தேவைகளுக்கு ஏற்ப தயாரிக்க முடியும். இருப்பினும், ஒவ்வொரு பகுதிக்கும் எவ்வளவு நிதி ஒதுக்கப்படும், எந்தெந்தப் பணிகள் முன்னுரிமை அடிப்படையில் செயல்படுத்தப்படும் என்பது தொடர்பான விவரங்கள் தனித்தனியாக அறிவிக்கப்பட வேண்டும்.

முதற்கட்டப் பணிகளுக்கு அரசு ஒப்புதல்

இந்த ஐந்தாண்டுத் திட்டத்தின் கீழ், ரூ.376.65 கோடி மதிப்பிலான 2,880 உள்கட்டமைப்புப் பணிகளுக்கு அரசு ஒப்புதல் அளித்துள்ளதாகவும் தகவல் வெளியாகியுள்ளது. மாநிலம் முழுவதும் நகர்ப்புற வளர்ச்சியை ஒருங்கிணைத்து செயல்படுத்தும் வகையில் திட்டங்கள் முன்னெடுக்கப்படுகின்றன. மொத்தம் அறிவிக்கப்பட்டுள்ள ரூ.1.5 லட்சம் கோடி என்பது ஐந்து ஆண்டுகளுக்கான திட்ட மதிப்பீடாகும். இதற்கான நிதி ஒதுக்கீடுகள் மற்றும் பணிகள் படிப்படியாகச் செயல்படுத்தப்படும்.

மொத்தத்தில், குடிநீர், சாலை, கழிவுநீர், மழைநீர் வடிகால், சுற்றுச்சூழல் பாதுகாப்பு மற்றும் நவீன தொழில்நுட்ப நிர்வாகம் என நகர்ப்புற மக்களின் அன்றாட வாழ்க்கையுடன் தொடர்புடைய பல்வேறு துறைகளை ஒருங்கிணைத்து மேம்படுத்துவதை இந்த முதலமைச்சரின் ஒருங்கிணைந்த நகர்ப்புற மேம்பாட்டுத் திட்டம் நோக்கமாகக் கொண்டுள்ளது.

Murasu Cyclone: உருவானது முரசு புயல்..! சென்னையை ஒட்டியபடி வால் பகுதி? வடமாவட்டங்களில் கனமழை பொளக்குமா?

குலசேகரன் முனிரத்தினம் — Sun, 1 Nov 2026 13:41:24 +0530

Murasu Cyclone TN Weather: முரசு புயலின் வால்பகுதி தமிழ்நாட்டை ஒட்டி இருப்பதால், வடமாவட்டங்களில் கனமழைக்கு வாய்ப்புள்ளதாக கூறப்படுகிறது.

வங்கக் கடலில் உருவானது ”முரசு” புயல்

தென்மேற்கு மற்றும் அதனை ஒட்டிய மேற்கு மத்திய வங்காள விரிகுடா பகுதியில் நிலவிய ஆழ்ந்த காற்றழுத்த தாழ்வுநிலை, முரசு புயலாக வலுப்பெற்றது என வானிலை மையம் அறிவித்துள்ளது. இதுதொடர்பான ட்விட்டர் பதிவில், தென்கிழக்கு மற்றும் அதனை ஒட்டிய தென்மேற்கு வங்காள விரிகுடாவில் நிலைகொண்டிருந்த ஆழ்ந்த காற்றழுத்தத் தாழ்வுநிலை, கடந்த 3 மணி நேரத்தில் மணிக்கு 20 கி.மீ. வேகத்தில் மேற்கு-வடமேற்கு திசையில் நகர்ந்து, இன்று, 01 நவம்பர், 2026, இந்திய நேரப்படி காலை 0830 மணியளவில் தென்மேற்கு மற்றும் அதனை ஒட்டிய தென்கிழக்கு வங்காள விரிகுடாவில், அட்சரேகை 11.8°N மற்றும் தீர்க்கரேகை 85.9°E-க்கு அருகில், சென்னைக்கு (தமிழ்நாடு) கிழக்கு-தென்கிழக்கே சுமார் 630 கி.மீ., விசாகப்பட்டினத்திற்கு (ஆந்திரப் பிரதேசம்) தெற்கு-தென்கிழக்கே 710 கி.மீ., நெல்லூருக்கு (ஆந்திரப் பிரதேசம்) கிழக்கு-தென்கிழக்கே 710 கி.மீ., மச்சிலிப்பட்டினத்திற்கு (ஆந்திரப் பிரதேசம்) தென்கிழக்கே 710 கி.மீ. மற்றும் ஒங்கோலுக்கு (ஆந்திரப் பிரதேசம்) கிழக்கு-தென்கிழக்கே 750 கி.மீ. தொலைவில் மையம் கொண்டிருந்தது.

நவ.3ல் கரையை கடக்கும் புயல்

இது மேற்கு-வடமேற்கு திசையில் நகர்ந்து, அடுத்த 6 மணி நேரத்தில் தென்மேற்கு மற்றும் அதனை ஒட்டிய மேற்கு-மத்திய வங்காள விரிகுடாப் பகுதிகளில் புயலாக வலுப்பெற அதிக வாய்ப்புள்ளது” என தெரிவிக்கப்பட்டு இருந்தது. இந்நிலையில் தான் நண்பகலிலேயே குறைந்த காற்றழுத்தத் தாழ்வுப்பகுதியானது புயலாக உருவெடுத்துள்ளதாக அறிவிக்கப்பட்டுள்ளது. தொடர்ந்து இது நாளை மேற்கு-மத்திய வங்காள விரிகுடாப் பகுதிகளில் கடுமையான புயலாக வலுப்பெறுவதோடு, மேற்கு-வடமேற்கு திசையில் நகர்ந்து, நவம்பர் 3 ஆம் தேதி காலைக்குள் நெல்லூர் மற்றும் நர்சபூர் இடையே மணிக்கு 100 முதல் 110 கி.மீ வேகத்துடனும், சில சமயங்களில் மணிக்கு 120 கி.மீ வேகத்தில் திடீர் காற்று வீச்சுடனும் தெற்கு ஆந்திரப் பிரதேச கடற்கரையைக் கடக்க அதிக வாய்ப்புள்ளது என இந்திய வானிலை மையம் எச்சரித்துள்ளது.

வடமாவட்டங்களில் கனமழைக்கு வாய்ப்பு?

புயலின் மையப்பகுதி பெரும்பாலும், ஆந்திராவை ஒட்டியே உள்ளது. அதேநேரம், வால்பகுதி ஓரளவிற்கு அடுத்தடுத்த சில மணி நேரங்களில் தமிழகத்தின் வடமாவட்டங்களை நோக்கி நகர்ந்தால், சென்னை,காஞ்சிபுரம் போன்ற மாவட்டங்கள் கனமழை பெற வாய்ப்புள்ளது. ஆனால், இது புயலின் நகர்வை சார்ந்தே இறுதி செய்யப்படும். தற்போதைய சூழலில் இன்று மாலை 4 மணி வரை சென்னை, திருவள்ளூர், செங்கல்பட்டு, காஞ்சிபுரம், ராணிப்பேட்டை மற்றும் விழுப்புரம் மாவட்டங்களில் இடி, மின்னலுடன் லேசானது முதல் மிதமான மழை பெய்யக்கூடுமென சென்னை வானிலை ஆய்வு மையம் எச்சரித்துள்ளது.

பொழுது போகலையா? விளையாட இடமில்லையா? சென்னைக்கு ஜாக்பாட் - 36 புதிய பூங்காக்கள், 11 மைதானங்கள்

குலசேகரன் முனிரத்தினம் — Sun, 1 Nov 2026 10:59:43 +0530

Chennai Infrastructure: சென்னையில் அடுத்த 5 ஆண்டுகளில் புதிய பூங்காக்கள் மற்றும் விளையாட்டு மைதானங்களை ஏற்படுத்த தமிழ்நாடு அரசு 44 கோடி ரூபாய் நிதி ஒதுக்கியுள்ளது.

நகர்ப்புற வளர்ச்சி திட்டங்கள்

முதலமைச்சரின் ஒருங்கிணைந்த நகர்ப்புற வளர்ச்சி திட்டத்தின் முதற்கட்டமாக, சென்னை பெருநகர மாநகராட்சியானது சுமார் 44 கோடி ரூபாய் செலவில் 36 புதிய பூங்காக்கள் மற்றும் 11 விளையாட்டு மைதானங்களை உருவாக்கவு உள்ளது. நகர்ப்புற உள்ளாட்சி அமைப்புகள் முழுவதும் உட்கட்டமைப்பு மற்றும் குடிமை வசதிகளை மேம்படுத்துவதற்காக, 2026 தொடங்கி 2031 வரையிலான முதலமைச்சரின் ஒருங்கிணைந்த நகர்ப்புற வளர்ச்சி திட்டம் முன்னெடுக்கப்பட்டுள்ளது. இதன் மொத்த மதிப்பு 1.5 லட்சம் கோடி ரூபாய் என அறிவிக்கப்பட்டுள்ளது. இதில், மாநிலத்தின் நகர்ப்புற உள்ளாட்சி அமைப்புகள் முழுவதும் நகர்ப்புற பசுமையாக்கம், பொழுதுபோக்கு மற்றும் திறந்தவெளி இடங்களுக்காக ஐந்தாண்டுகளுக்கு ரூ.2,000 கோடி ஒதுக்கீடு செய்யப்பட்டுள்ளது.

சென்னைக்கு புதிய மைதானங்கள், பூங்காக்கள்:

சென்னையை பொறுத்தவரை ரூ.34.45 கோடி மதிப்பில் 36 பூங்காக்கள், ரூ.9.52 கோடி மதிப்பில் 11 விளையாட்டு மைதானங்கள் அமைப்பதற்கான டெண்டர் பணிகள் நடைபெற்று வருவதாக பெருநகர மாநகராட்சி ஆணையர் சமீரன் தெரிவித்தார். மாநகரம் முழுவதும் மணலி, தண்டையார்பேட்டை, ஆலந்தூர், அம்பத்தூர், அண்ணாநகர், தேனாம்பேட்டை, கோடம்பாக்கம், பெருங்குடி, சோழிங்கநல்லூர் ஆகிய மண்டலங்களில் புதிய பூங்காக்கள் அமைக்கப்பட உள்ளன. மாதவரம், தண்டையார்பேட்டை, கோடம்பாக்கம், சோழிங்கநல்லூர் ஆகிய இடங்களில் 11 விளையாட்டு மைதானங்கள் ஏற்படுத்தப்பட உள்ளன.

பூங்காக்கள், மைதானங்களுக்கான அமைவிடங்கள்:

மணலி மண்டலத்தில், செந்தூர் குமரன் நகர், எலந்தனூர், பெரியார் நகர் மற்றும் அன்பு வளர்மதி நகர் ஆகிய இடங்களில் புதிய பூங்காக்கள் அமைக்கத் திட்டமிடப்பட்டுள்ளது. தண்டையார்பேட்டையில், மணலி சாலையில் உள்ள 2B பாலத்தின் கீழ் ஒரு பூங்கா அமைக்க முன்மொழியப்பட்டுள்ளது. மேலும், அம்பத்தூரில் உள்ள CTH சாலை, குமரன் நகர், பார்க் சாலை, குருசாமி தெரு, முகப்பேர் தொழிற்பேட்டை மற்றும் ஜீவன் பீமா நகருக்கு அருகிலுள்ள பகுதிகளிலும் பூங்காக்கள் அமையவுள்ளன.

இதையும் படியுங்கள்: கைதிகள் எஸ்கேப் ஆன விவகாரம் - 3 சிறைகளின் முக்கிய அதிகாரிகள் அதிரடி மாற்றம் - தமிழக அரசு உத்தரவு

மற்ற இடங்களில் ஆலந்தூரில் உள்ள கத்திப்பாரா - விமான நிலைய நுழைவாயில் மற்றும் விஐபி வருகை/புறப்பாடு பகுதி, தேனம்பேட்டையில் உள்ள நெல்சன் மாணிக்கம் சாலை மற்றும் பீட்டர்ஸ் சாலை ஆகியவை அடங்கும். பெருங்குடியில், விஜிபி 7வது குறுக்குச் சாலை, - சாரதி நகர் 2வது சாலை மற்றும் பாலாஜி நகர் 19வது சாலை நெடுகிலும் பூங்காக்கள் திட்டமிடப்பட்டுள்ளன. சோழிங்கநல்லூர் மண்டலத்தில், கண்ணகி நகரின் 3வது மற்றும் 4வது j பிரதான சாலைகள், ஆதித்யாராம் நகர் மற்றும் பல டிஎன்யு எச்டிபி தெருக்கள் உட்பட பல இடங்கள் அடையாளம் காணப்பட்டுள்ளன.

அதிகரிக்கும் பசுமை இடங்களின் தேவை:

சென்னை பெருநகருக்கு கூடுதல் பசுமை இடங்களின் தேவை என்பது தீவிரமாக உள்ளது. மத்திய நகர்ப்புற மேம்பாட்டு அமைச்சகத்தின் வழிகாட்டுதல்கள், ஒரு நபருக்கு 10-12 சதுர மீட்டர் திறந்தவெளி இருக்க வேண்டும் எனப் பரிந்துரைக்கின்றன. ஆனால், சென்னை பெருநகர வளர்ச்சி ஆணையத்தால் வெளியிடப்பட்ட, சென்னை பெருநகரப் பகுதிக்கான இரண்டாவது பெருந்திட்டம், 2026 (தொகுதி 3)-இன் படி, நான்கு மாநகராட்சிகளை உள்ளடக்கிய சென்னை பெருநகரப் பகுதியில் (CMA), அதன் புவியியல் பரப்பில் சுமார் 2% மட்டுமே அறிவிக்கப்பட்ட பூங்காக்களாக வகைப்படுத்தப்பட்டுள்ளது. பெருநகர சென்னை மாநகராட்சி அதன் 15 மண்டலங்களில் சுமார் 1,000 பூங்காக்களையும் 400 விளையாட்டு மைதானங்களையும் பராமரிக்கிறது என்பது குறிப்பிடத்தக்கது.

TN Weather News: சென்னைக்கு அருகே இன்று உருவாகிறது தீவிர புயல் - தமிழ்நாட்டில் எங்கெல்லாம் கனமழை? வானிலை

குலசேகரன் முனிரத்தினம் — Sun, 1 Nov 2026 06:34:23 +0530

Tamil Nadu Weather Update (01-11-2026): தமிழ்நாட்டில் இன்று எங்கெல்லாம் மழைக்கு வாய்ப்புள்ளது என்ற வானிலை மையத்தின் எச்சரிக்கை கீழே விவரிக்கப்பட்டுள்ளது.

இன்று உருவாகிறது தீவிர புயல்:

இந்திய வானிலை ஆய்வு மையம் வெளியிட்டுள்ள அறிக்கையில், தென்கிழக்கு வங்காள விரிகுடாவில் உருவான காற்றழுத்தத் தாழ்வுநிலை, கடந்த 6 மணி நேரத்தில் மணிக்கு 22 கி.மீ. வேகத்தில் மேற்கு-வடமேற்கு திசையில் நகர்ந்து, நேற்று இரவுப்படி அட்சரேகை 10.9°N மற்றும் தீர்க்கரேகை 87.5°E அருகே மையம் கொண்டிருந்தது. இது சென்னைக்கு கிழக்கு-தென்கிழக்கே சுமார் 830 கி.மீ., விசாகப்பட்டினத்திற்கு (ஆந்திரா) தெற்கு-தென்கிழக்கே 880 கி.மீ., மச்சிலிப்பட்டினத்திற்கு (ஆந்திரா) தென்கிழக்கே 900 கி.மீ., மற்றும் ஒங்கோலுக்கு (ஆந்திர்ஃஆ) கிழக்கு-தென்கிழக்கே 950 கி.மீ. தொலைவில் அமைந்திருந்தது.

இது மேற்கு-வடமேற்கு திசையில் நகர்ந்து, இன்று நண்பகலுக்குள் தென்மேற்கு மற்றும் அதனை ஒட்டிய தென்கிழக்கு வங்காள விரிகுடாப் பகுதியில் ஆழ்ந்த காற்றழுத்தத் தாழ்வுநிலையாகவும், நவம்பர் 1 ஆம் தேதி நள்ளிரவில் தென்மேற்கு மற்றும் அதனை ஒட்டிய மேற்கு-மத்திய வங்காள விரிகுடாப் பகுதியில் புயலாகவும், நவம்பர் 2 ஆம் தேதி மேற்கு-மத்திய வங்காள விரிகுடாப் பகுதியில் கடுமையான புயலாகவும் வலுப்பெற அதிக வாய்ப்புள்ளது. இது நவம்பர் 3 ஆம் தேதி அதிகாலை வேளையில் தெற்கு ஆந்திரப் பிரதேச கடற்கரைக்கு அருகிலுள்ள மேற்கு மத்திய வங்காள விரிகுடாவை அடைவதற்கும், பின்னர் நவம்பர் 3, 2026 காலைக்குள் நெல்லூர் மற்றும் நர்சாபூர் இடையே மணிக்கு 100 முதல் 110 கி.மீ வேகத்துடனும், சில சமயங்களில் மணிக்கு 120 கி.மீ வேகத்தில் திடீர் காற்று வீச்சுடனும் தெற்கு ஆந்திரப் பிரதேச கடற்கரையைக் கடப்பதற்கும் அதிக வாய்ப்புள்ளது” என இந்திய வானிலை மையம் எச்சரித்துள்ளது.

இன்று எங்கெல்லாம் மழைக்கு வாய்ப்பு?

இதனிடையே சென்னை வானிலை ஆய்வு மையம் வெளியிட்டுள்ள அறிக்கையில், “இன்று வடக்கு கடலோர தமிழக மாவட்டங்கள், மேற்கு தொடர்ச்சி மலை மாவட்டங்கள், மதுரை, திருச்சிராப்பள்ளி, நாமக்கல், சேலம், ஈரோடு, கரூர் மாவட்டங்களில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். ஏனைய தமிழகத்தில் ஓரிரு இடங்களில் இடி மின்னலுடன் கூடிய லேசான மழை பெய்யக்கூடும்.

அடுத்த இரண்டு நாட்களுக்கான வானிலை:

02-11-2026: நீலகிரி மற்றும் திருவள்ளூர் மாவட்டங்களில் ஓரிரு இடங்களில் இடி மின்னலுடன் கூடிய கனமழை பெய்யக்கூடும். ஏனைய தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும்.

03-11-2026: கடலூர் மற்றும் விழுப்புரம் மாவட்டங்களில் ஓரிரு இடங்களிலும், புதுவையிலும் இடி மின்னலுடன் கூடிய கனமழை பெய்யக்கூடும். மேற்கு தொடர்ச்சி மலை மாவட்டங்கள், வட தமிழகத்தில் ஓரிரு இடங்களிலும், காரைக்கால் பகுதிகளிலும் இடி மின்னலுடன் கூடிய மிதமான மழை பெய்யக்கூடும். ஏனைய தமிழகத்தில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

அதிகபட்ச வெப்பநிலை பற்றிய முன்னறிவிப்பு:

02-11-2026 முதல் 04-11-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டி இருக்கக்கூடும்.

சென்னை பகுதிகளுக்கான வானிலை முன்னறிவிப்பு:

சென்னையை பொறுத்தவரை இன்று வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை 33-34° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்.

மீனவர்களுக்கான எச்சரிக்கை:

தமிழக கடலோரப்பகுதிகள்:

01-11-2026 முதல் 03-11-2026 வரை: வட தமிழக கடலோரப்பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்.

வங்கக் கடல் பகுதிகள்:

01-11-2026: தெற்கு வங்கக்கடலின் வடக்கு பகுதிகள் மற்றும் மத்தியமேற்கு வங்கக்கடலின்
தெற்கு பகுதிகளில் சூறாவளிக்காற்று மணிக்கு 60 முதல் 90 கிலோ மீட்டர் வேகத்திலும் இடையிடையே 100 கிலோ மீட்டர் வேகத்திலும், மத்தியமேற்கு வங்கக்கடலின் இதர தெற்கு மற்றும் பகுதிகள் தெற்கு வங்கக்கடலின் சில பகுதிகளில் சூறாவளிக்காற்று மணிக்கு 55 முதல் 65 கிலோ மீட்டர் வேகத்திலும் இடையிடையே 75 கிலோ மீட்டர் வேகத்திலும், ஆந்திர கடலோரப்பகுதிகள் மற்றும் அதனை ஒட்டிய மத்தியமேற்கு வங்கக்கடல் பகுதிகள், மத்தியகிழக்கு-தெற்கு வங்கக்கடலின் சில பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்” எனவே மீனவர்கள் இந்த பகுதிகளுக்கு செல்ல வேண்டாம்” என வானிலை மையம் எச்சரித்துள்ளது.

“குழந்தைகள் கடத்தலின் தலைநகரமாக மாறுகிறதா தமிழ்நாடு?” - திமுக எம்பி கனிமொழி அதிர்ச்சி குற்றச்சாட்டு

ராஜேஷ். எஸ் — Sat, 31 Oct 2026 16:21:44 +0530

குழந்தைகள் கடத்தப்பட்டு விற்கப்படுவதன் தலைநகரமாகத் தமிழ்நாடு மாறிக்கொண்டிருக்கிறது என்று திமுக எம்பி கனிமொழி கூறியுள்ளார்.

பெண்கள் மற்றும் குழந்தைகளின் பாதுகாப்பின்மை, விலைவாசி உயர்வு உள்ளிட்ட மக்கள் விரோதச் செயல்பாடுகளைக் கண்டித்து, திமுக மகளிர் அணியின் சார்பில் சென்னை மாவட்ட ஆட்சியர் அலுவலகம் அருகில் மாபெரும் கண்டன ஆர்ப்பாட்டம் நடைபெற்றது.

இந்த ஆர்ப்பாட்டத்தில் உரையாற்றிய கனிமொழி, “இதுதான்தமிழ்நாட்டில் இன்று சட்டம் ஒழுங்கு இருக்கக்கூடிய நிலை. குழந்தைகளுக்குப் பாதுகாப்பு இல்லை. வீட்டில் இருக்கக்கூடிய பெண்களுக்குப் பாதுகாப்பில்லை, ஒரு பெண் வீட்டின் வாசலில் அமர்ந்திருக்கிறார். அந்தப் பெண்ணைக் கொலை செய்கிறார்கள். இத்தனை ஆண்டுகளாகப் பெண்கள் வெளியே வர வேண்டும், படிக்க வேண்டும், வேலைக்குப் போக வேண்டும், சுதந்திரமாக இருக்க வேண்டும் என்று பாடுபட்ட இயக்கம் திராவிட இயக்கம். “நீ நினைத்தபொழுது வெளியே வா” என்றுதான் விடியல் பயணத்தை நம்முடைய முதலமைச்சராக இருந்த அண்ணன் தளபதி அவர்கள் அறிவித்தார்கள். இன்று நீங்கள் பேருந்தில் இலவச பயணச்சீட்டு கொடுத்தால்கூட யோசிக்கிறார்கள் பெண்கள் வெளியே வருவதற்கு. ஒரு அம்மாவிடம் பேசிக்கொண்டிருந்தேன். “எனக்கு இரண்டு ஆண் பிள்ளைகள்தான் அம்மா, பெண் பிள்ளைகளெல்லாம் இல்லை. ஆனால் அந்தப் பசங்களை வெளியே அனுப்புவதற்கே பயமாக இருக்கிறது. நான் முன்னெல்லாம் கேட்க மாட்டேன், எங்கே போகிறாய், எங்கே வருகிறாய், எப்போது வருவாய் என்று. இப்போது அரை மணிநேரத்திற்கு ஒருமுறை நான் தொலைபேசியில் அழைத்து அந்தப் பிள்ளைகளைக் கேட்கிறேன், எங்கே இருக்கிறாய், இருக்கிறாயா, நன்றாக இருக்கிறாயா, வெளியே போகாதே என்றெல்லாம்”.

ஒவ்வொரு தாயும் தமிழ்நாட்டில் இப்படித்தான் மடியில் நெருப்பைக் கட்டிக்கொண்டு பயத்தோடு வாழ்ந்துகொண்டிருக்கிறார்கள். பெண்களுக்குப் பாதுகாப்பு இல்லை, இளைஞர்களுக்குப் பாதுகாப்பு இல்லை, யாருக்குமே பாதுகாப்பு இல்லை. என் தூத்துக்குடி தொகுதியில் இரண்டு பெண்களைக் கடத்திச் செல்வதற்காக வீட்டிற்குள் புகுந்து தாய், தந்தை, மகன் மூன்று பேரையும் தாக்கியதில் தாய் சம்பவ இடத்திலேயே இறந்துவிட்டார். இவர்களுடைய நிர்வாகத் திறமை, இவர்களுடைய அரசு என்ன லட்சணத்தில் இருக்கிறது என்றால், உயிரோடு கொண்டுபோய் மருத்துவமனையில் சேர்த்த தந்தை,மிக மோசமாகத் தாக்கப்பட்டிருந்த அவரைக்கூடப் பிழைக்க வைக்க முடியவில்லை. 10 வயது சிறுவனுக்கு இரண்டு விரல்களைக் காணவில்லை.

இன்று அந்த மூன்று குழந்தைகளும் அம்மா, அப்பா இரண்டு பேரும் இல்லாமல் அனாதைகளாக்கப்பட்டிருக்கிறார்கள். விஜய் மாமாவிற்கு வாக்களியுங்கள் என்று சொன்னாரல்லவா? அந்த விஜய் மாமா ஆட்சியில் எத்தனை குழந்தைகள் அனாதைகளாக்கப்பட்டிருக்கிறார்கள்? எத்தனை குழந்தைகள் பள்ளிக்குச் சென்றுவிட்டுக் வீடு திரும்பி வருவதில்லை? வீட்டில் இருந்த குழந்தைகளை, ஒரு வயதுக் குழந்தையைத் தூக்கிக்கொண்டு போகிறார்கள். இவர்களுடைய கட்சியினரே தூக்கிக்கொண்டு போய் விற்கிறார்கள். நான் கேட்கிறேன், தேர்தல் நேரத்தில் சொன்னீர்களல்லவா “நண்பாஸ், நண்பீஸ், வீட்டில் போய் அடம் பிடித்து எனக்கு வாக்கு வாங்கித்தாருங்கள்” என்று? அப்பொழுது அந்தக் குழந்தைகளைப் பயன்படுத்தினீர்களா இல்லையா? இன்று அந்தக் குழந்தைகளுக்குக்கூடப் பாதுகாப்பு தர முடியாமல் துப்பற்ற ஒரு ஆட்சியை நடத்திக்கொண்டிருக்கிறீர்கள்.

இத்தனை குழந்தைகள் காணாமல் போவைதைப் பற்றி கொஞ்சமாவது மனசாட்சி வேண்டாமா? பத்திரிகைகளில் எழுதுகிறார்கள், “Tamil Nadu has become the hub of child trafficking” என்று. குழந்தைகள் கடத்தப்பட்டு விற்கப்படுவதன் தலைநகரமாகத் தமிழ்நாடு மாறிக்கொண்டிருக்கிறது என்று பத்திரிகைகள் எழுதக்கூடிய அளவிற்கு இன்று தமிழ்நாடு அவ்வளவு மோசமாகிவிட்டது. வீட்டில் குழந்தையை வைத்துக்கொண்டு அமர்ந்திருக்க முடியவில்லை. இப்படிப்பட்ட ஒரு கேடுகெட்ட ஆட்சி இன்று தமிழ்நாட்டிலே நடந்துகொண்டிருக்கிறது. இந்த ஆட்சிக்கு விரைவில் நாம் ஒரு முடிவு கண்டாக வேண்டும், முற்றுப்புள்ளி வைக்க வேண்டும்” என்றார்.

நடிகை ராதிகா வீட்டுப் பணிப்பெண் மகன் கொடூர கொலை: பீர் பாட்டிலால் கழுத்தறுத்து பீச்சில் புதைப்பு

ராஜேஷ். எஸ் — Sat, 31 Oct 2026 15:02:38 +0530

நடிகை ராதிகா வீட்டு பணிப்பெண்ணின் மகனை சென்னை அருகே பழவேற்காடு கடற்கரையில் பீர் பாட்டிலால் கழுத்தை அறுத்து மணலில் புதைத்த சம்பவம் அதிர்ச்சியை ஏற்படுத்தியுள்ளது.

கடலூர் மாவட்டத்தை சேர்ந்த இளைஞர் திருமணத்தை மீறிய உறவால் அடித்து கொலை செய்ததாக கைது செய்யப்பட்டவர்கள் அளித்த தகவலின்பேரில், வருவாய் துறை அதிகாரிகளின் மேற்பார்வையில் உடல் தோண்டி எடுத்து கூராய்வுக்காக அனுப்பி வைக்கப்பட்டுள்ளது.

ராதிகா வீட்டு பணிப்பெண்

கடலூர் மாவட்டம் பண்ருட்டியை அடுத்த சிறுவத்தூர் கிராமத்தைச் சேர்ந்த எழில் செல்வி என்பவரது மகன் பிரசாந்த் (19). எழில் செல்வி சென்னையில் உள்ள நடிகை ராதிகா சரத்குமார் வீட்டில் பணி பெண்ணாக பணியாற்றி வருகிறார். இவரது மகன் பிரசாந்த் தமது மாமா ரமேஷ் என்பவருடன் வீடுகளுக்கு டைல்ஸ் போடும் வேலை பார்த்து வந்ததாக தெரிகிறது. கடந்த 27-ஆம் தேதி சென்னையில் உள்ள தமது தாயை பார்க்க செல்வதாக தாய்மாமனிடம் கூறிவிட்டு வந்த பிரசாந்த், மறுநாள் 28-ஆம் தேதி தமது நண்பருக்கு வீடியோ கால் செய்து தம்மை அடிப்பதாக கூறியதாக சொல்லப்படுகிறது. பின்னர் அவரது தொலைபேசி அணைத்து வைக்கப்பட்டதாக ரமேஷ் கடலூர் மாவட்டம் புதுப்பேட்டை காவல் நிலையத்தில் புகார் அளித்துள்ளார்.

இந்த புகாரின் பேரில் கடலூர் போலீசார், காணாமல் போனவர் பிரிவில் வழக்கு பதிந்து விசாரணை நடத்தி வந்த நிலையில், முதற்கட்ட விசாரணையில் அதே கிராமத்தை சேர்ந்த பிரசாந்தின் நண்பன் வேதராசு என்பவரது மனைவியுடன் பிரசாந்துக்கு திருமணத்தை மீறிய உறவு இருந்ததும், தமது நண்பன் தினேஷ் என்பவருடன் சேர்ந்து பிரசாந்தை சென்னை அடுத்த பழவேற்காடு கடற்கரை பகுதியில் பீர் பாட்டிலால் கழுத்தை அறுத்து கொலை செய்து புதைத்ததாக வாக்குமூலம் அளித்துள்ளனர்.

கடற்கரை மணலில் புதைக்கப்பட்ட சடலம்

இதனைத் தொடர்ந்து கடலூர் போலீசார் இருவரையும் கைது செய்து, சென்னை அழைத்து வந்து பழவேற்காடு அடுத்த சாட்டாங் குப்பம் கடற்கரை பகுதியில் சடலம் புதைத்த இடத்தை அடையாளம் காட்டியுள்ளனர். கடலூர் போலீசார், திருப்பாலைவனம் போலீசாரின் உதவியுடன் கடற்கரை மணலில் மேலோட்டமாக புதைக்கப்பட்ட சடலத்தை கைப்பற்றி உடற்கூறு ஆய்விற்காக பொன்னேரி அரசு மருத்துவமனைக்கு அனுப்பி வைத்தனர்.

மேலும், கொலை சம்பவம் அரங்கேறி உள்ள காவல் நிலைய எல்லையான திருப்பாலைவனம் போலீசார் கொலை வழக்கு பதிந்து கடலூர் போலீசார் கைது செய்து அழைத்து வந்த இருவரையும் கைது செய்து விசாரணை நடத்தி வருகின்றனர்.

நடிகை ராதிகா வீட்டு பணிப்பெண்ணின் மகன் சென்னை அருகே அடித்து கொலை செய்து கடற்கரையில் புதைக்கப்பட்ட சம்பவம் பரபரப்பை ஏற்படுத்தி உள்ளது.

Gold Rate Today: நகைப்பிரியர்களுக்கு ஹேப்பி நியூஸ்! தங்கம் விலை தாறுமாறாக குறைந்தது! 2 நாட்களில் ரூ.3,720 சரிவு!

வினோத்குமார் — Sat, 31 Oct 2026 11:11:27 +0530

தீபாவளி நெருக்கும் நிலையில் தங்கம் விலை தாறுமாறாக உயரும் எதிர்பார்க்கப்பட்ட நகைப்பிரியர்களுக்கு இன்ப அதிர்ச்சி காத்திருக்கிறது. அதாவது அக்டோபர் மாதம் தொடக்கத்தில் தொடர்ந்து சரிவை சந்தித்த வந்த தங்கம் திடீரென கடந்த சில நாட்களாக உயர்ந்தது. இதனால் தீபாவளி நெருங்குவதால் தங்கம் விலை உயரும் கூறப்பட்டு வந்த நிலையில் நேற்று சவரனுக்கு ரூ.1,240 குறைந்ததை அடுத்து நகைக்கடைகளில் கூட்டம் குவிந்தது. இந்நிலையில் இன்றும் எதிர்பாராத வகையில் சரசரவென தங்கம் விலை சரிவை கண்டுள்ளது.

அதாவது நேற்று தங்கம் ஒரு கிராமிற்கு ரூ.155 குறைந்து ரூ.13,040க்கும், ஒரு சவரனுக்கு ரூ.1,240 குறைந்து ரூ.1,04,320க்கும் விற்பனை செய்யப்பட்டு வந்தது.

இதையும் படிங்க: Gold Rate Today: தங்கம் விலையில் ஏற்பட்ட திடீர் மாற்றம்.. போட்டி போட்டுக்கு நகைக்கடைகளில் குவியும் பொதுமக்கள்!

இன்றைய தங்கம் விலை

இந்நிலையில் இன்றைய (அக்டோபர் 31) நிலவரப்படி சென்னையில் 22 கேரட் ஆபரணத் தங்கத்தின் விலை சவரனுக்கு ரூ.2,480 குறைந்து ரூ.1,01,840ஆக விற்பனை செய்யப்படுகிறது. 22 கேரட் தங்கம் கிராமுக்கு ரூ.310 குறைந்து ரூ. 12,730ஆக விற்பனையாகிறது. 24 கேரட் தங்கம் கிராம் ஒன்றுக்கு ரூ. 13,887ஆக விற்பனையாகிறது. சவரன் ரூ. 111,096ஆக விற்பனையாகிறது. கடந்த இரண்டு நாட்களில் மட்டும் சவரனுக்கு ரூ.3,720 குறைந்துள்ளது. தொடர்ந்து தங்கம் சரிவை சந்தித்து வருதால் காலை முதலே நகைக்கடைகளில் கூட்டம் குவிந்து வருகிறது.

வெள்ளி விலை

வெள்ளி விலை கடந்த சில நாட்களாக சரசரவென குறைந்துள்ளது. இன்று கிராமிற்கு ரூ.10 குறைந்துள்ளது. ஒரு கிராம் விலை ரூ.200க்கு விற்பனை செய்யப்படுகிறது. மேலும் ஒரு கிலோ வெள்ளி ரூ.2,00,000க்கும் விற்பனை செய்யப்படுகிறது.