விவசாயிகளுக்கு சூப்பர் நியூஸ்! 90% மானியத்தில் மின் இணைப்பு - உடனே விண்ணப்பியுங்கள்!
TAHDCO fast track power supply scheme: "பழங்குடியின விவசாயிகளுக்கு 90 சதவீத மானியத்தில் துரித மின் இணைப்பு வழங்கும் புதிய திட்டம், செங்கல்பட்டு ஆட்சியர் தகவல் தெரிவித்துள்ளார்."
தமிழ்நாட்டில் வாழும் பழங்குடியின விவசாயிகளின் வாழ்வாதாரத்தை உயர்த்தவும், அவர்களின் வேளாண் பணிகளை ஊக்குவிக்கவும் தாட்கோ (TAHDCO) நிறுவனம் பல்வேறு நலத்திட்டங்களைச் செயல்படுத்தி வருகிறது. இதன் ஒரு பகுதியாக, பழங்குடியின விவசாயிகள் எவ்வித தடங்கலுமின்றி பாசன வசதி பெறும் வகையில் "துரித மின் இணைப்புத் திட்டம்" (Fast Track Power Supply) தற்போது புதிய வடிவில் நடைமுறைப்படுத்தப்பட உள்ளது. இத்திட்டம் மூலம் தகுதியுள்ள பழங்குடியின விவசாயிகள் விரைவாகவும், குறைந்த செலவிலும் விவசாயத்திற்கான மின் இணைப்பைப் பெற முடியும்.
ரூ. 2.33 கோடி நிதி ஒதுக்கீடும் அரசாணையும்
இத்திட்டத்தைச் செயல்படுத்துவதற்காகத் தமிழக அரசின் சமூகநீதி மற்றும் மனிதவள மேம்பாட்டுத் துறை சார்பில் அரசாணை (நிலை) எண். 108, நாள் 07.07.2026 பிறப்பிக்கப்பட்டுள்ளது. இந்த அரசாணையின்படி, 2026-2027 ஆம் நிதியாண்டில் தாட்கோ மூலமாக மொத்தம் 100 பழங்குடியின விவசாயிகளுக்கு துரித மின் இணைப்பு வழங்கப்பட உள்ளது. இத்திட்டத்திற்கான மொத்தச் செலவில் 90 சதவீதத் தொகையை அரசே மானியமாக வழங்குகிறது. இதற்காக ரூ. 2.33 கோடி நிதியை ஒதுக்கி அரசு நிர்வாக அனுமதி மற்றும் நிதி ஒப்பளிப்பு அளித்து ஆணை வெளியிட்டுள்ளது.
விண்ணப்பிக்கும் முறை மற்றும் பயன்பெறும் வழிமுறைகள்
இத்திட்டத்தின் மூலம் பயன்பெற விரும்பும் பழங்குடியின விவசாயிகள் தாட்கோவின் அதிகாரப்பூர்வ இணையதமான newscheme.tahdco.com என்ற முகவரியில் தங்களது விண்ணப்பங்களை ஆன்லைன் மூலம் பதிவேற்றம் செய்ய வேண்டும். தேவையான ஆவணங்களுடன் விரைவாக விண்ணப்பித்து, இத்திட்டத்தின் கீழ் வழங்கப்படும் 90 சதவீத மானிய உதவியைப் பெற்று பழங்குடியின விவசாயிகள் தங்களின் விவசாய நிலங்களுக்குத் துரித மின் இணைப்பு பெற்றுப் பயன்பெறுமாறு செங்கல்பட்டு மாவட்ட ஆட்சித்தலைவர் கேட்டுக்கொண்டுள்ளார்.
தலைப்பு செய்திகள்
ட்ரெண்டிங் செய்திகள்
