food

Fasting Facts: 36 மணி நேர விரதம் நல்லதா? உடலில் ஏற்படும் மாற்றங்கள் என்ன? ஆபத்துகள், யாருக்கு செட் ஆகாது?

குலசேகரன் முனிரத்தினம் — Fri, 30 Oct 2026 08:13:28 +0530

36 Hour Fasting Facts: உடலில் பல மாற்றங்களுக்கு வழிவகுக்கக் கூடிய 36 மணி நேர விரதத்தை யாரெல்லாம் பின்பற்றக்கூடாது என கீழே விவரிக்கப்பட்டுள்ளது.

36 மணி நேர விரதம்:

உடல் நலன் மற்றும் வளர்சிதை மாற்றங்களில் விரைவான முன்னேற்றம் காண விரும்பும், உடற்பயிற்சி ஆர்வலர்கள் மத்தியில் 36 மணி நேர விரதம் என்பது மிகவும் பரவலாக விவாதிக்கப்படும் நடைமுறையாக உருவெடுத்துள்ளது. இதுமிகவும் பிரபலமான உணவு பழக்கமாக மாறி வந்தாலும், நீண்ட நேர உணவு விடுப்பானது எல்லோருக்குமானது கிடையாது என மருத்துவ வல்லுநர்கள் எச்சரிக்கின்றனர். மருத்துவ தரவுகளின்படி இந்த விரத்தின் சாத்தியமான நன்மைகள், கவனிக்கப்படாத அபாயங்கள் மற்றும் இந்த விரத முறையைக் கருத்தில் கொள்ளும் எவரும் மனதில் கொள்ள வேண்டிய அத்தியாவசிய முன்னெச்சரிக்கைகள் ஆகியவை கீழே விவரிக்கப்பட்டுள்ளன.

உணவு தவிர்க்கப்படும் விரத நேரம்

36 மணி நேர விரதத்தின் போது, தனிநபர்கள் தண்ணீர், இனிப்பூட்டிகள் சேர்க்காத சாதாரண தேநீர் அல்லது கருப்பு காபியை மட்டுமே உட்கொள்கிறார்கள். இந்த நேரத்தில் சிலர் மனரீதியாக அதிக சுறுசுறுப்புடன் உணர்ந்தாலும், மற்றவர்கள் தங்களின் அன்றாடப் பழக்கவழக்கங்கள், உள்ளார்ந்த உடல்நலக் கோளாறுகள் மற்றும் செயல்பாட்டு நிலைகளைப் பொறுத்து சிரமப்படக்கூடும் என்று மருத்துவர்கள் எச்சரிக்கின்றனர்.

36 மணி நேர விரதத்தின் நன்மைகள் என்ன?

ஆரோக்கியமான சிலர் 36 மணி நேர விரதத்தைக் கடைப்பிடிக்கும்போது நேர்மறையான பலன்களைப் பெறலாம் என மருத்துவர்கள் விளக்குகின்றனர். நீண்ட உண்ணாவிரத காலங்கள் இன்சுலின் உணர்திறனை மேம்படுத்தி, கலோரி உட்கொள்ளலைக் கட்டுப்படுத்த உதவும். சேதமடைந்த செல்களை அகற்றும் உடலின் இயற்கையான செயல்முறையான ஆட்டோஃபேஜியும் ஓரளவிற்குத் தூண்டப்படலாம், இருப்பினும் மனிதர்களிடம் இதற்கான சான்றுகள் குறைவாகவே உள்ளன என்று கூறப்படுகிறது. விரதக் காலத்தில் பலரும் தங்களுக்குக் கவனம் தெளிவாகவும், ஒருமுகத்தன்மை கூர்மையாகவும் இருப்பதாகத் தெரிவிக்கின்றனர். உடல் கொழுப்பை எரிக்கும் நிலைக்கு மாறி, மூளைக்கு மாற்று ஆற்றல் மூலமாகச் செயல்படக்கூடிய கீட்டோன்களை உற்பத்தி செய்வதே இதற்குக் காரணமாக இருக்கலாம். இதுபோன்ற விரதங்கள் தனிநபர்கள் தங்களின் உண்மையான பசி உணர்வுகளை அறியவும், தேவையற்ற சிற்றுண்டிகளைக் குறைக்கவும் உதவக்கூடும். இது நீண்ட காலத்திற்கு மேம்பட்ட உணவுப் பழக்கங்களுக்கு வழிவகுக்கும்.

இதையும் படியுங்கள்: Tasmac: டாஸ்மாக்கில் அதிரடி மாற்றம்..! நவ.1 முதல் உயரும் சரக்கு பாட்டில் விலை - எந்த கடையிலும் ரூ.10 கிடைக்கும்

36 மணி நேர விரதத்தின் அபாயங்கள்:

விரதம் தொடர்பான இணைய விவாதங்கள் பெரும்பாலும் நன்மைகளை முன்னிலைப்படுத்தினாலும், நீண்டகால உண்ணாவிரதங்கள் முக்கியமான உடல்நல அபாயங்களையும் கொண்டுள்ளன. சோடியம் மற்றும் பொட்டாசியம் போன்ற அத்தியாவசிய தாதுக்கள் மீண்டும் நிரப்பப்படாததால், நீண்ட காலத்திற்கு தண்ணீரை மட்டுமே குடிப்பது நீரிழப்பு மற்றும் எலக்ட்ரோலைட் சமநிலையின்மைக்கு வழிவகுக்கக் கூடும். இது எளிதில் பாதிக்கப்படக்கூடிய நபர்களுக்கு பலவீனம் மற்றும் தலைச்சுற்றலைத் தூண்டக்கூடும்.
குறைந்த ரத்தச் சர்க்கரை அளவு ஏற்பட்டு அதனால் தலைச்சுற்றல், எரிச்சல் மற்றும் தலைவலி போன்ற அறிகுறிகள் உண்டாகலாம். விரதத்தின் போது தொடர்ந்து கடுமையான உடல் செயல்பாடுகளில் ஈடுபடும் நபர்களுக்கு இந்த ஆபத்து அதிகரிக்கிறது. அதிகரித்த கார்டிசோல் அளவுகள் தூக்கத்தைக் கெடுத்து, இரவில் அமைதியின்மையை ஏற்படுத்தக்கூடும். குறிப்பாக, வழக்கமான உணவு நாட்களில் போதுமான புரதம் கிடைக்காதபோது, அடிக்கடி மேற்கொள்ளப்படும் நீண்ட விரதங்கள் தசை இழப்புக்கு வழிவகுக்கும். வெறும் வயிற்றில் தேநீர் அல்லது காபி அருந்தும்போது, அமிலத்தன்மை அல்லது இரைப்பை அழற்சி போன்ற செரிமானப் பிரச்சனைகளும் மோசமடையக்கூடும்.

36 மணி நேர விரதம் - யாருக்கு செட் ஆகாது?

நீண்டகால உண்ணாவிரதம் சிலருக்கு நிச்சயமாக பொருத்தமற்றது. நீரிழிவு நோயாளிகளுக்கு ரத்தச் சர்க்கரை குறைவு ஏற்படும் அபாயம் அதிகமாக உள்ளது, அதே சமயம் சிறுநீர்ப்பெருக்கிகளை உட்கொள்ளும் உயர் ரத்த அழுத்த நோயாளிகளுக்கு அபாயகரமான திரவ மற்றும் உப்பு சமநிலையின்மை ஏற்படலாம். மிகக் குறைந்த உடல் நிறை குறியீட்டெண் (BMI) கொண்டவர்கள் அல்லது உண்ணுதல் கோளாறுகள் அல்லது உணவு தொடர்பான பதற்றத்தால் பாதிக்கப்பட்ட நபர்களும் இந்தப் பழக்கத்தைத் தவிர்க்க வேண்டும். அதிகரித்த ஊட்டச்சத்துத் தேவைகள் காரணமாக, கர்ப்பிணி மற்றும் பாலூட்டும் தாய்மார்கள் இதுபோன்ற நீண்டகால உண்ணாவிரதங்களை மேற்கொள்ள வேண்டாம் என்று அறிவுறுத்தப்படுகிறார்கள். நச்சு நீக்கத்திற்கான ஒரு தீர்வாக விரதம் இருப்பது என்பது தவறான கருத்து என்றும் மருத்துவர்கள் குறிப்பிடுகின்றனர். கல்லீரலும் சிறுநீரகங்களும் கழிவுப் பொருட்களைத் தொடர்ந்து வடிகட்டி, உடலின் உள் சமநிலையைப் பராமரிப்பதால், பல இணைய பதிவுகள் கூறுவது போல, நச்சுகளை அகற்ற உடலுக்கு விரதம் தேவைப்படாது.

36 மணி நேர விரதம் - கவனத்தில் கொள்ளவேண்டியவை

36 மணி நேர விரதம் போன்றவற்றை முயற்சித்துப் பார்க்க விரும்பும் ஆரோக்கியமான நபர்கள் பல அத்தியாவசிய முன்னெச்சரிக்கை நடவடிக்கைகளை கவனத்தில் கொள்ள வேண்டும். அதன்படி,

விரதக் காலம் முழுவதும் கனிமங்களின் அளவைப் பராமரிக்க, சாதாரண நீருக்குப் பதிலாக எலக்ட்ரோலைட் நிறைந்த நீரைத் தேர்ந்தெடுக்கலாம்.
கடுமையான உடற்பயிற்சிகளைத் தவிர்க்க வேண்டும்.ஏனெனில் அவை சோர்வு, குறைந்த ரத்த சர்க்கரை மற்றும் நீரிழப்பு ஏற்படும் அபாயத்தை அதிகரிக்கின்றன.
செரிமான அசௌகரியத்தைக் குறைப்பதற்காக, புரதம் நிறைந்த இலகுவான உணவுகளுடன் தொடங்கி, விரதத்தை மெதுவாக முடிக்க வேண்டும்.
நீண்ட விரதங்களை அடிக்கடி மேற்கொள்ளக்கூடாது.
பெரும்பாலான ஆரோக்கியமான நபர்களுக்கு, மாதத்திற்கு ஒரு முறை என்பது பொதுவாக பாதுகாப்பானது என மருத்துவர்கள் எச்சரிக்கின்றனர்.

Curry Leaves Rice: முடிக்கு ஆரோக்கியம் தரும், சுவையான கறிவேப்பிலை சாதம்..! நறுக்குனு செய்வது எப்படி?

குலசேகரன் முனிரத்தினம் — Thu, 29 Oct 2026 13:43:22 +0530

Curry Leaves Rice: கறிவேப்பிலை முடியின் ஆரோக்கியத்திற்கு மட்டுமின்றி உடலின் பல்வேறு நலனிற்கும் வழிக்குக்கும் என்பது குறிப்பிடத்தக்கது.

கறிவேப்பிலை சாதம்:

கறிவேப்பிலை உணவுகளுக்கு நல்ல சுவையையும் மணத்தையும் சேர்க்கிறது. அவற்றில் இரும்புச்சத்து, வைட்டமின்கள் மற்றும் ஆன்டிஆக்ஸிடன்ட்களும் உள்ளன. அவை உடல் நலத்திற்கும் நல்லது. உங்கள் அன்றாட உணவுகளில் சேர்க்கப்படும் கறிவேப்பிலையை தனியாக எடுத்து வைப்பீர்களா? ஆனால் இந்த முறை, அவற்றைக்கொண்டு சுவையான கறிவேப்பிலை சாதம் தயார் செய்யுங்கள். மீதமுள்ள சாதத்தைக் கொண்டும் இந்த செய்முறையை நீங்கள் விரைவாகச் செய்யலாம். இதை எப்படி செய்வது மற்றும் தேவையான பொருட்கள் என்னென்ன என்று பார்ப்போம்.

தேவையான பொருட்கள்

அரிசி சாதம் - 2 கப்
கறிவேப்பிலை - 2 கப்
மிளகாய் - 3
பச்சை மிளகாய் - 2
கொத்தமல்லி விதைகள் - 1 தேக்கரண்டி
சீரகம் - அரை தேக்கரண்டி
உளுந்து - 1 தேக்கரண்டி
வேர்க்கடலை - 1 தேக்கரண்டி
கடலை பருப்பு - 2 தேக்கரண்டி
புளி - ஒரு சிறிய எலுமிச்சை அளவு
பூண்டு - 3 பற்கள்
கடுகு - அரை தேக்கரண்டி
மஞ்சள் - ஒரு சிட்டிகை
எண்ணெய் - 2 தேக்கரண்டி
உப்பு - போதுமான அளவு
அஸ்பாரகஸ் - ஒரு சிட்டிகை

கறிவேப்பிலை சாதம் தயாரிக்கும் முறை

முதலில், கறிவேப்பிலையைக் கழுவி உலர வைக்கவும். ஒரு வாணலியில் சிறிது எண்ணெய் ஊற்றி, குறைந்த தீயில் கறிவேப்பிலையை வதக்கவும். இலைகள் மொறுமொறுப்பானதும், அவற்றை தனியாக எடுத்து வைக்கவும். அதே வாணலியில், கொத்தமல்லி, சீரகம் மற்றும் காய்ந்த மிளகாய்களைச் சேர்த்து மணம் வரும் வரை வதக்கவும். அவற்றை ஆறவைத்து, வதக்கிய கறிவேப்பிலையுடன் கலக்கவும். விரும்பினால் பூண்டையும் சேர்த்துக்கொள்ளலாம்.

இதையும் படியுங்கள்: Anbil Mahesh: அன்பில் மகேஷிற்கு ஜாமின் இல்லை..! நேரு வீட்டில் ரெய்டு, முன்ஜாமின் முன்னேற்றக் கழகம் - தவெக விமர்சனம்

ஏற்கனவே வதக்கிய அனைத்துப் பொருட்களையும் ஒரு மிக்சியில் போட்டு, தேவையான அளவு உப்பு மற்றும் ஊறவைத்த புளியைச் சேர்த்து, நைசாக அல்லது சற்று கொரகொரப்பான பதத்திற்கு அரைக்கவும். அதிகமாகப் புளி சேர்க்க வேண்டாம், சுவைக்கு ஏற்ப கலக்கவும். இப்போது ஒரு கடாயில் எண்ணெய் சூடாக்கி, கடுகு சேர்க்கவும். அவை வெடித்தவுடன், கடலை பருப்பு, உளுந்து , வேர்க்கடலை மற்றும் பச்சை மிளகாய் சேர்த்து வதக்கவும். மஞ்சள் தூள் மற்றும் பெருங்காயம் சேர்த்து கலக்கவும்.

இப்போது சமைத்து ஆறிய சாதத்தை வாணலியில் சேர்க்கவும். தயாராக வைத்துள்ள கறிப் பொடியைச் சேர்த்து, சாதம் உடையாதவாறு மெதுவாகக் கலக்கவும். இரண்டு முதல் மூன்று நிமிடங்கள் குறைந்த தீயில் வைத்தால், கறிவேப்பிலை மசாலா சாதத்தில் நன்றாக ஊறிவிடும். இறுதியாக, உப்பைச் சரிபார்த்து அடுப்பை அணைக்கவும். அவ்வளவுதான்... சுவையான கறிவேப்பிலை சாதம் தயார். இதை தயிர், ரைய்தா அல்லது அப்பளங்களுடன் சாப்பிடுவது நன்றாக இருக்கும். உடலுக்கும் நன்மை சேர்க்கக் கூடிய ஆரோக்கியமான மற்றும் சுவையான கலவை சாதமாகும்.

அரிசி விலை உயர்வு கட்டுக்குள் வரும்; பதுக்கல் மீது கடும் நடவடிக்கை: அமைச்சர் வெங்கட்ராமன் !

அருண் சின்னதுரை — Thu, 22 Oct 2026 18:06:43 +0530

அரிசி பதுக்கலை தடுத்து விரைவில் அரிசி விலை உயர்வை கட்டுக்குள் கொண்டு வருவோம் என மதுரையில் அமைச்சர் வெங்கட்ராமன் பேட்டி.

ஒரு சில இடங்களில் வெள்ளை நிறத்திலான அரிசி வருவதில்லை

மதுரையில் கீழப்பனங்காடியில் உள்ள தனியார் பள்ளி நிகழ்ச்சி ஒன்றில் தமிழக உணவு மற்றும் நுகர்வோர் பாதுகாப்புத் துறை அமைச்சர் வெங்கட்ராமன் சிறப்பு விருந்தினராக பங்கேற்று மாணவர்களுக்கு பரிசுகளை வழங்கினார். பின்னர் செய்தியாளர்களை சந்தித்த அமைச்சர் வெங்கட்ராமன் கூறுகையில் "30 ரூபாய் அரிசி விநியோகம், அரிசி, பருப்பு உற்பத்தி, உணவுப் பொருள் விலைவாசி தொடர்பாக ஆய்வு செய்து வருகிறோம், தமிழ்நாடு முழுதும் அரிசி பதுக்கல் தொடர்பாக அவ்வப்போது ஆய்வு செய்து அறிவுறுத்தல் செய்கிறோம், அரிசி பதுக்கல் தொடர்பாக துரித நடவடிக்கைகள் எடுக்க அதிகாரிகளுக்கு உத்தரவு பிறப்பிக்கப்பட்டுள்ளது. அரிசி பதுக்கலை தடுத்து விரைவில் அரிசி விலை உயர்வை கட்டுக்குள் கொண்டு வருவோம், 30 ரூபாய் அரிசி மக்களிடம் நல்ல வரவேற்பு உள்ளது, ஒரு சில இடங்களில் வெள்ளை நிறத்திலான அரிசி வருவதில்லை என கூறினார்கள்.

எங்கெல்லாம் தரமான அரிசிகள் உள்ளது

எங்கெல்லாம் தரமான அரிசிகள் உள்ளது என கண்டறிந்து அவற்றை மக்களுக்கு விநியோகம் செய்து வருகிறோம். கொள்முதல் செய்யப்பட்ட நெல்லை உடனடியாக அரிசியாக மாற்றி மக்களுக்கு வழங்க உத்தரவிடப்பட்டு உள்ளது. தமிழகத்தில் திறந்தவெளியில் செயல்படும் நெல் கொள்முதல் குடோன்கள் மூடிய பாதுகாப்பான குடோன்களாக மாற்றப்பட்டு வருகிறது. வரும் காலங்களில் நெல்லை பாதுகாப்பாக வைத்து மக்களுக்கு தரமான அரிசி வழங்கப்படும். இதுவரை 50, 100 ரூபாய் மட்டுமே நெல் கொல்முதல் விலை உயர்வை முதல்வர் விஜய் உயர்த்தி வழங்கியுள்ளார். தமிழகத்தில் சன்னரக நெல் உற்பத்தி செய்ய நடவடிக்கைகள் எடுக்கப்பட்டு வருகிறது. நான் அமைச்சர் ஆவதற்கு முன் என்னிடம் ரேஷன் அரிசி கார்டு இருந்தது. அமைச்சர் ஆன பின்னர் அந்த கார்டு உணவு பொருள் அல்லாத அட்டையை மாற்றப்பட்டது. அரிசி அட்டை மாற்றத்தால் மக்களுக்கு கூடுதலாக அரிசி கிடைக்கும். நான் மட்டுமல்லாமல் அமைச்சர், எம்.எல்.ஏ-க்கள் உணவு பொருள் அல்லாத அட்டையாக மாற்றி உள்ளோம்" என கூறினார்.

Pressure Cooker: பிரஷர் குக்கரில் சமைப்பது இவ்வளவு ஆபத்தா? எந்தெந்த உணவு விஷமாக மாறும்? இல்லத்தரசிகளுக்கு அதிர்ச்சி எச்சரிக்கை!

வினோத்குமார் — Wed, 30 Sep 2026 19:30:37 +0530

பிரஷர் குக்கர் என்பது சமையலறையில் பயன்படுத்தப்படும் மிக முக்கியமான மற்றும் அவசியமான ஒன்றாகும். இது நீராவியின் அழுத்தத்தைப் பயன்படுத்தி உணவை மிக விரைவாக சமைக்க உதவுகிறது. அதாவது குக்கருக்குள் உள்ள தண்ணீரை சூடாக்கும்போது உருவாகும் நீராவி வெளியேற முடியாதவாறு மூடப்பட்டிருக்கும். இதனால் உருவாகும் அதிகப்படியான அழுத்தம் மற்றும் வெப்பம் காரணமாக, பருப்பு, காய்கறிகள் மற்றும் அரிசி போன்ற பொருட்கள் மிகக் குறுகிய காலத்தில் சிக்கிரமாக வெந்துவிடும். சமையலை வேகமாக எளிதாகவும் செய்ய உதவுவுதால் குக்கர் இல்லை என்றால் இல்லத்தரசிகளுக்கு கை உடைந்தது போல் இருக்கும்.

பிரஷர் குக்கர் உணவு விஷமாக மாறுமா?

இன்றைய அவசர காலக்கட்டத்தில் சமையல் பணியை விரைந்து முடிக்கவும். சில நிமிடங்களிலேயே சமையலை செய்து முடிக்கவும் குக்கர் மிகவும் வசதியான வழியாகும். இதனால் ஏற்படும் பின்விளைவுகளைப் பற்றி அறியாமலேயே பலர் பிரஷர் குக்கர்களில் பலவிதமான உணவுகளைத் தயார் செய்து வருகின்றனர். இந்நிலையில் குக்கரில் நீங்கள் சமைக்கவே கூடாத சில பொருட்கள் என்னென்ன என்பதை விரிவாக பார்க்கலாம்.

மீன்

பொதுவாக யாரும் மீனை குக்கரில் சமைப்பதில்லை என்றாலும், சில சமயம் குழம்போடு சேர்த்து சிலர் மீனை வேகவைக்கக்கூடும். ஆனால், மீன் மிகவும் மென்மையான தன்மை கொண்டது. குக்கரில் அதிக வெப்பத்தில் சமைக்கும்போது மீன் ஓவர் குக் ஆகி, அதன் சுவை மற்றும் மென்மைத்தன்மையை முழுமையாக இழந்துவிடும். மேலும், தீவிர வெப்பம் காரணமாக மீனில் உள்ள உடலுக்கு மிகவும் அவசியமான 'ஒமேகா-3' கொழுப்பு அமிலங்கள் குறைந்து, அதன் முழு ஊட்டச்சத்தும் வீணாகிவிடும். எனவே, மீன் குழம்பை மண் பானை அல்லது வழக்கமான பாத்திரங்களில் சமைப்பதே ஆரோக்கியத்திற்கு நல்லது மட்டுமல்லாமல் சுவையை அதிகமாக கொடுக்கும்.

பிஸ்தா

நார்ச்சத்து நிறைந்த பிஸ்தா கண் ஆரோக்கியத்திற்கும், இரத்த சர்க்கரை அளவைக் கட்டுப்படுத்தவும் பெரிதும் உதவுகிறது. ஆனால், அதிக வெப்பத்தில் குக்கரில் பிஸ்தாவைச் சமைக்கும்போது அதில் உள்ள சத்துக்கள் அழிந்து, கெட்ட கொழுப்புகள் சேர வாய்ப்புள்ளது. எனவே, குக்கரைத் தவிர்த்துவிட்டு சாதாரண முறையில் வேகவைப்பது உடல் நலத்திற்கு சிறந்தது.

கீரை

நம்மில் பலரும் கீரையைச் குக்கரில் வேக வைப்பது வழக்கமாக கொண்டுள்ளனர். ஆனால், கீரையை எப்போதுமே குறைந்த வெப்பநிலையில் சமைத்தால்தான் அதன் சத்துக்கள் பாதுகாக்கப்படும். மாறாக, குக்கரில் அதிக வெப்பநிலையில் வேகவைக்கும்போது அதன் ஊட்டச்சத்து மதிப்பு கடுமையாகக் குறைகிறது. நிபுணர்களின் எச்சரிப்பின்படி, குக்கரில் சமைக்கப்பட்ட கீரையைத் தொடர்ந்து உட்கொள்வது சிறுநீரகக் கற்கள் (Kidney Stones) உருவாக வழிவகுத்துவிடும்.

காய்கறிகள்

பிரஷர் குக்கரில் காய்கறிகளை சமைக்கும் போது அதிகம் உள்ள தாதுக்கள் மற்றும் வைட்டமின்கள் அழிக்கப்படுகின்றன. பிரஷர் குக்கரில் அதிக வெப்பத்தில் சமைத்தால் காய்கறிகளில் உள்ள அனைத்து புத்துணர்ச்சி மற்றும் ஊட்டச்சத்துக்கள் அழிந்துவிடும். காய்கறிகளின் புத்துணர்ச்சியும் சத்துக்களும் முழுமையாக கிடைக்க வேண்டுமானால், அவற்றை வாணலியிலோ அல்லது சாதாரண பாத்திரங்களிலோ சமைப்பதே சிறந்த வழியாகும்.

உருளைக்கிழங்கு

நம்மில் பெரும்பாலோர் உருளைக்கிழங்கை பிரஷர் குக்கரில் வேகவைக்கிறோம். உருளைக்கிழங்கில் அரிசியைப் போலவே அதிக அளவு மாவுச்சத்து இருக்கிறது. உருளைக்கிழங்கு அதிக வெப்பநிலையில் சமைக்கும் போது அதன் மாவுச்சத்தை இழக்கிறது. கூடுதலாக, கொதிக்கும் உருளைக்கிழங்கில் அதிக செறிவூட்டப்பட்ட ஆன்டி-ன்யூட்ரியண்ட்கள் உள்ளன, இது உடலுக்கு சரியான ஊட்டச்சத்தைப் பெறுவதைத் தடுக்கிறது. அதனால்தான் அவற்றை வேகவைப்பது அல்லது பிரஷர் குக்கரில் சமைப்பது நல்ல யோசனையல்ல.

அரிசி

முன்பெல்லாம் சாதத்தை வடித்து தான் சாப்பிடுவார்கள். ஆனால் தற்போது பெரும்பாலோனோர் சாதத்தை குக்கரில் வைத்து சாப்பிடுகின்றனர். இதனால் பல்வேறு பாதிப்புகளை ஏற்படுத்தக்கூடும். குறிப்பாக உடலில் அதிகப்படியான கொழுப்பை உடனடியாக சேமித்து வைக்கும். குக்கரில் அரிசியை சமைக்கும் போது மனித ஆரோக்கியத்திற்கு கேடு விளைவிக்கும் இரசாயனம் உருவாகிறது. அரிசியின் ஸ்டார்ச் செறிவு அபாயகரமான இரசாயனமான அக்ரிலாமைடு உமிழ்வுக்கு வழிவகுக்கும். இது சில உடல்நலப் பிரச்சனைகளை உண்டாக்கும் என்பதால் குக்கரில் சமைப்பதை தவிர்க்க வேண்டும். சாதம் வடிக்கும் பாத்திரத்தில் அரிசியை சேர்த்து வடித்து சாப்பிடுவது நல்லது.

தஞ்சாவூர் பாரம்பரிய ‘தண்ணி சாறு’: செரிமானத்துக்கும் ஆரோக்கியத்துக்கும் உகந்த கிராமத்து அமிழ்தம்!

என்.நாகராஜன் — Sat, 26 Sep 2026 09:46:26 +0530

தஞ்சாவூர்: தஞ்சை மண்டலத்தின் சமையல் மரபு என்பது வெறும் சுவை சார்ந்தது மட்டுமல்ல; அது உடலின் ஆரோக்கியத்தோடும், தட்பவெப்பநிலையோடு இயைந்த மருத்துவ முறையோடும் பின்னிப் பிணைந்தது. அந்த வகையில், தஞ்சாவூர் கிராமப்புற வீடுகளில் காலம் காலமாகத் தயாரிக்கப்பட்டு வரும் மிக முக்கியமான ஒரு பாரம்பரிய உணவு வகை ‘தண்ணி சாறு’.

தண்ணி சாறு என்றால் என்ன?

பொதுவாக காய்கறிகள், கீரைகள் அல்லது பருப்பு வகைகளை வேக வைக்கும் போது கிடைக்கும் சத்துக்கள் நிறைந்த தண்ணீரைப் பிரித்தெடுத்து, சீரகம், பூண்டு, மிளகு, தாளிப்புப் பொருட்கள் சேர்த்துத் தயார் செய்யப்படும் காரசாரமான, திரவ வடிவ உணவே ‘தண்ணி சாறு’ ஆகும்.

இது ரசத்தைப் போன்ற தோற்றம் கொண்டிருந்தாலும், செய்யும் முறை மற்றும் சுவையில் ரசத்திலிருந்து முற்றிலும் மாறுபட்டது. புளி அதிகம் சேர்க்காமலோ அல்லது புளியே இல்லாமலோ, காய்கறியின் இயற்கையான சாற்றையே முதன்மையாகக் கொண்டு இது செய்யப்படுகிறது.

தண்ணி சாறின் முக்கிய வகைகள்

காய்கறி / மொச்சை தண்ணி சாறு:

கத்தரிக்காய், மொச்சை, முருங்கைக்காய் அல்லது வாழைக்காய் போன்ற காய்கறிகளை அவித்து, அந்தத் தண்ணீரில் செய்யப்படும் சாறு.

கீரை தண்ணி சாறு:

முருங்கைக்கீரை, அரைக்கீரை அல்லது சிறுகீரையை வேகவைத்து, வடிக்கும் சாற்றில் பூண்டு, சீரகம் தட்டிப் போட்டுச் செய்யப்படும் சாறு.

பருப்பு தண்ணி சாறு:

துவரம்பருப்பு அல்லது பாசிப்பருப்பு வேகவைத்த தெளிவு நீரை எடுத்துச் செய்யப்படும் சத்தான சாறு.

செய்முறை (தயாரிக்கும் முறை)

தஞ்சை ஸ்டைல் காய்கறி/மொச்சை தண்ணி சாறு தயாரிக்கும் எளிய முறை:

தேவையான பொருட்கள்: காய்கறி வேகவைத்த தண்ணீர், பூண்டு (தட்டியது), சீரகம், மிளகு, சின்ன வெங்காயம், காய்ந்த மிளகாய், கருவேப்பிலை, பெருங்காயம், கடுகு, நெய் அல்லது நல்லெண்ணெய், உப்பு.

செய்முறை: நறுக்கிய காய்கறிகளை உப்பு சேர்த்து வேகவைத்து, அந்தத் தண்ணீரை மட்டும் தனியாக வடித்து எடுத்துக்கொள்ள வேண்டும். ஒரு வாணலியில் நல்லெண்ணெய் அல்லது நெய் விட்டு கடுகு, சீரகம், காய்ந்த மிளகாய், சின்ன வெங்காயம், தட்டிய பூண்டு மற்றும் கருவேப்பிலை தாளிக்க வேண்டும்.

தாளித்த கலவையில் வேகவைத்த காய்கறித் தண்ணீரை ஊற்றி, தேவையான அளவு பெருங்காயத்தூள் சேர்த்து மிதமான தீயில் கொதிக்க விட வேண்டும்.

நுரைத்து ஒரு கொதி வந்ததும், நசுக்கிய மிளகு-சீரகத்தூள் தூவி இறக்கினால் நறுமணமிக்க தஞ்சாவூர் தண்ணி சாறு தயார்.

மருத்துவ குணங்களும் நன்மைகளும்

செரிமான ஊக்கி: சீரகம், மிளகு, பூண்டு ஆகியவை சேர்வதால், செரிமானக் கோளாறுகள் மற்றும் வயிற்று உப்புசத்தை உடனடியாகச் சரிசெய்யும்.

காய்ச்சல் மற்றும் சளி நிவாரணி: உடல்நிலை சரியில்லாத நேரங்களிலும், காய்ச்சல் அல்லது சளி பிடித்துள்ள நேரத்திலும் நாவிற்குச் சுவையையும், உடலுக்குத் தேவையான புத்துணர்ச்சியையும் தரும்.

சத்துக்கள் வீணாவதில்லை: காய்கறிகள் மற்றும் கீரைகளை வேகவைக்கும் நீரில் உள்ள நீரில் கரையும் வைட்டமின்கள் (Water-soluble vitamins) மற்றும் தாதுக்கள் வீணாகாமல் உடலுக்கு முழுமையாகக் கிடைக்கின்றன.

எளிதில் செரிக்கும் உணவு: முதியவர்கள், குழந்தைகள் மற்றும் நோயிலிருந்து மீண்டு வருபவர்களுக்கு இது ஒரு சிறந்த திரவ உணவாக அமைகிறது.

இதை எதனுடன் கலந்து சாப்பிடலாம்

சுடச்சுட சாதத்தில் இந்தத் தண்ணி சாறை ஊற்றி, வேகவைத்த காய்கறி அல்லது துவையலுடன் தொட்டுச் சாப்பிடுவது தஞ்சாவூர் மக்களின் பாரம்பரிய உணவருந்தும் முறையாகும். மேலும், இதை வெறும் சூப் போல கிண்ணத்தில் ஊற்றிப் பருகவும் செய்யலாம்.

நமது முன்னோர்கள் உணவே மருந்து என்ற கோட்பாட்டின் படி உருவாக்கிய இந்த 'தஞ்சாவூர் தண்ணி சாறு', இன்றைய நவீன கால கட்டத்திலும் ஆரோக்கியம் தரும் சிறந்த பாரம்பரிய உணவாக விளங்குகிறது.

விநாயகர் சதுர்த்தி ஸ்பெஷல்: பூரணம் வெளியே வராமல் பஞ்சு போன்ற கொழுக்கட்டை செய்வது எப்படி?

ராஜேஷ். எஸ் — Sat, 12 Sep 2026 19:32:06 +0530

செப்டம்பர் 14ஆம் தேதி நாடு முழுவதும் விநாயகர் சதுர்த்தி கோலாகலமாக கொண்டாப்பட இருக்கிறது. அந்தந்த மாநிலங்கள், மாவட்டங்கள், நகரங்கள், கிராமங்களில் இதற்கான ஏற்பாடுகளை பக்தர்கள் செய்து வருகின்றனர். வீடுகளிலும் விநாயகர் சதுர்த்தியை கொண்டாட பெண்கள் அதற்கான பணிகளில் ஈடுபட தொடங்கியுள்ளனர்.

விநாயகர் சதுர்த்தி என்றாலே, விநாயகரின் சிலை, அருங்கம்புல், பலகாரம்தான் அனைவருக்கும் நினைவுவரும். முக்கியமாக பிள்ளையாருக்கு மிகவும் பிடித்தமான கொழுக்கட்டையை அன்றைய தினம் செய்வார்கள். இது வீட்டில் உள்ள அனைவரும் விரும்பி சாப்பிடுவார்கள். இனிப்பு கொழுக்கட்டை, பூரண கொழுக்கட்டை என பல கொழுக்கட்டைகளை செய்வார்கள். இதில் பூரண கொழுக்கட்டையை பலர் விரும்பி செய்வார்கள். அதை எப்படி செய்வது என்பதை பார்க்கலாம்.

சுவையான மற்றும் பூரணம் வெளிய வராத கொழுக்கட்டை செய்வதற்கான எளிய செய்முறை இதோ:

தேவையான பொருட்கள்

மேல் மாவிற்கு:

பச்சரிசி மாவு (கொழுக்கட்டை மாவு) - 1 கப்

தண்ணீர் - 14 கப்

நல்லெண்ணெய் அல்லது நெய் - 1 தேக்கரண்டி

உப்பு - ஒரு சிட்டிகை

உள் பூரணத்திற்கு:

துருவிய தேங்காய் - 1 கப்

பொடித்த வெல்லம் - 3/4 கப்

ஏலக்காய் தூள் - 1/2 தேக்கரண்டி

நெய் - 1 தேக்கரண்டி

செய்முறை

1. பூரணம் தயாரித்தல்:

கடாயில் நெய் ஊற்றி சூடானதும், துருவிய தேங்காயைச் சேர்த்து 1-2 நிமிடங்கள் லேசாக வதக்கவும். அதில் பொடித்த வெல்லம் மற்றும் 2 ஸ்பூன் தண்ணீர் சேர்த்து மிதமான தீயில் கிளறவும். வெல்லம் உருகி, தேங்காயுடன் சேர்ந்து கெட்டியாக வரும்போது ஏலக்காய் தூள் தூவி இறக்கி ஆறவைக்கவும். (பூரணம் ஆறினால் மேலும் கெட்டியாகும்).

2. மேல் மாவு தயாரித்தல்:

ஒரு பாத்திரத்தில் தண்ணீர், உப்பு மற்றும் நெய் சேர்த்து கொதிக்க வைக்கவும். தண்ணீர் கொதித்ததும், தீயைக் குறைத்து பச்சரிசி மாவை சிறுகச் சிறுகச் சேர்த்து கட்டிகள் இல்லாமல் கிளறவும். மாவு பாத்திரத்தில் ஒட்டாமல் திரண்டு வரும் போது அடுப்பை அணைத்துவிட்டு, தட்டு போட்டு 5 நிமிடங்கள் மூடி வைக்கவும். மாவு மிதமான சூட்டிற்கு வந்ததும், கைகளில் சிறிதளவு நல்லெண்ணெய் தடவி மாவை சப்பாத்தி மாவு போல மென்மையாக பிசைந்து கொள்ளவும்.

3. மோதகம் செய்தல்:

பிசைந்த மாவிலிருந்து சிறிய உருண்டை எடுத்து, கிண்ணம் போல நடுவில் பள்ளம் செய்து கொள்ளவும். அதன் நடுவில் ஒரு சிறிய உருண்டை தேங்காய் பூரணத்தை வைக்கவும். மாவை மேல்நோக்கி ஒன்றாகக் கொண்டுவந்து, கூம்பு வடிவத்தில் கூர்மையாக மூடி ஒட்டவும். இட்லி பாத்திரத்தில் தண்ணீர் ஊற்றி, தட்டில் துணி அல்லது எண்ணெய் தடவிய வாழைிலை விரித்து, செய்த மோதகங்களை வைக்கவும். மிதமான தீயில் 8 முதல் 10 நிமிடங்கள் வேகவைத்து எடுத்தால் சுவையான கொழுக்கட்டை தயார்.

மதுரை மீனாட்சி கோவில்: விநாயகர் சதுர்த்தி கொழுக்கட்டை நெய்வேத்தியம் ரத்து - காரணம் தெரியுமா?

அருண் சின்னதுரை — Wed, 2 Sep 2026 21:58:45 +0530

மதுரை மீனாட்சி அம்மன் கோயில் மகா கும்பாபிஷேகத்தையொட்டி யாகசாலை பூஜைகள் நடைபெற உள்ளதால் இந்த ஆண்டு முக்குறுணி விநாயகருக்கு கொழுக்கட்டை நெய்வேத்தியம் இல்லை - கோயில் நிர்வாகம் அறிவிப்பு.

விநாயகர் சதுர்த்தியையொட்டி நடைபெறும் சிறப்பு கொழுக்கட்டை நெய்வேத்தியம்

மதுரை மீனாட்சி சுந்தரேசுவரர் திருக்கோயில் முக்குறுணி விநாயகருக்கு விநாயகர் சதுர்த்தியையொட்டி நடைபெறும் சிறப்பு கொழுக்கட்டை நெய்வேத்தியம் மற்றும் விசேஷ பூஜை, அலங்காரங்கள் இந்த ஆண்டு நடைபெறாது என கோயில் நிர்வாகம் அறிவித்துள்ளது.

விநாயகர் சதுர்த்தி சிறப்பு பூஜைகள் மற்றும் கொழுக்கட்டை நெய்வேத்தியம்

மதுரை மீனாட்சி சுந்தரேசுவரர் திருக்கோயிலில் ஒவ்வொரு ஆண்டும் விநாயகர் சதுர்த்தி தினத்தன்று அருள்மிகு முக்குறுணி விநாயகருக்கு சிறப்பு கொழுக்கட்டை நெய்வேத்தியம் செய்யப்பட்டு, விசேஷ அபிஷேகம், அலங்காரம் மற்றும் பூஜைகள் நடைபெறுவது வழக்கம். இந்நிலையில், கோயிலில் மகா கும்பாபிஷேகத்தையொட்டி யாகசாலை பூஜைகள் செப்டம்பர் 11ம் தேதி முதல் 17ம் தேதி வரை நடைபெற உள்ளன. இதன் காரணமாக, வரும் செப்டம்பர் 14-ம் தேதி நடைபெறும் விநாயகர் சதுர்த்தியன்று முக்குறுணி விநாயகருக்கு வழக்கமான கொழுக்கட்டை நெய்வேத்தியம் மற்றும் விசேஷ பூஜை, அலங்காரங்கள் நடைபெறாது என தெரிவிக்கப்பட்டுள்ளது. அடுத்த ஆண்டு முதல் வழக்கம்போல் முக்குறுணி விநாயகருக்கு விநாயகர் சதுர்த்தி சிறப்பு பூஜைகள் மற்றும் கொழுக்கட்டை நெய்வேத்தியம் நடைபெறும் என்றும் கோயில் இணை ஆணையர் தெரிவித்துள்ளார்.

Sugar Cut: ஒரு மாதம் சர்க்கரை சாப்பிடுவதை நிறுதினால்...! உடலில் ஏற்படும் முக்கிய 5 மாற்றங்கள் என்ன?

குலசேகரன் முனிரத்தினம் — Sun, 30 Aug 2026 09:19:31 +0530

Sugar Cut: ஒரு மாதத்திற்கு சர்க்கரை சாப்பிடுவதை நிறுத்தினால் உடலில் ஏற்படும் 5 முக்கிய மாற்றங்கள் கீழே பட்டியலிடப்பட்டுள்ளன.

உணவில் சர்க்கரை கட்..!

இன்றை தினசரி வாழ்க்கை பயன்பாட்டில் உள்ள உணவு மற்றும் பானங்களில் சர்க்கரை பரவலாகப் பயன்படுத்தப்படுகிறது. தேநீர், காஃபி, இனிப்புகள், பிஸ்கட்டுகள், கேக்குகள் மற்றும் பல பொட்டல உணவுகளில் சர்க்கரை இடம்பெற்றுள்ளது. இது பல்வேறு விதங்களில் உடலில் எதிர்மறையான தாக்கத்தை ஏற்படுத்துகிறது. மருத்துவர்களின் கருத்துகளை அறிந்து, உணவுப்பொருட்களில் சர்க்கரையை தவிர்ப்பது என்பது தற்போது பொதுமக்களிடையே அதிகரித்து வருகிறது. அந்த வகையில், ஒருவர் ஒரு மாதத்திற்கு சர்க்கரையைத் தவிர்க்க முடிவு செய்தால், உடலில் ஏற்படக்கூடிய மாற்றங்களைப் புரிந்துகொள்வது அவசியம். ஆரம்பத்தில், இனிப்புகளின் மீதான ஆசை வலுவாக இருக்கலாம், சிலருக்கு அசௌகரியமும் ஏற்படலாம். இருப்பினும், காலப்போக்கில், இனிப்புகளின் மீதான ஆசை குறையக்கூடும். ஒரு மாதத்திற்கு சர்க்கரை உட்கொள்ளலைக் குறைத்த பிறகு உடலில் காணக்கூடிய மாற்றங்கள் கீழே பட்டியலிடப்பட்டுள்ளன.

சுகர் கட்டால் ஏற்படும் டாப் 5 மாற்றங்கள்:

1. இனிப்பு சாப்பிடும் ஆசை படிப்படியாக குறையக்கூடும்

தேநீர், இனிப்புகள், சாக்லேட், பிஸ்கட் அல்லது பிற உணவுகள் மூலம் நீங்கள் தினமும் அதிக சர்க்கரையை உட்கொண்டால், அதைத் திடீரென நிறுத்துவது சற்று கடினமாக இருக்கலாம். ஆரம்பத்தில், உங்களுக்கு மீண்டும் மீண்டும் சர்க்கரை சாப்பிட வேண்டும் என்ற ஏக்கம் ஏற்படலாம். ஆனால் சிறிது காலத்திற்குப் பிறகு, உங்கள் உடல் குறைந்த சர்க்கரைக்கு பழகிவிடும். பழங்கள் போன்ற இயற்கையாகவே இனிப்பான உணவுகள் கூட முன்பை விட இனிப்பாகத் தோன்றலாம்.

2. உடல் எடையைக் குறைக்க உதவலாம்

அதிக சர்க்கரை கொண்ட உணவுகளில் கலோரிகளும் அதிகம். குளிர்பானங்கள், இனிப்புகள், கேக்குகள் மற்றும் சர்க்கரை கலந்த பொட்டல உணவுகளைக் குறைப்பது உங்கள் தினசரி கலோரி உட்கொள்ளலைக் குறைக்க உதவும். சமச்சீரான உணவைப் பின்பற்றி, ஒரு மாதத்திற்கு இந்த உணவுகளைத் தவிர்ப்பது உடல் எடையைக் குறைக்க உதவும். இருப்பினும், உடல் எடையைக் குறைக்க சர்க்கரையை மட்டும் தவிர்ப்பது மட்டுமே ஒரே வழி அல்ல.

3. நாள் முழுவதும் ஆற்றலில் மாற்றத்தை உணரக்கூடும்

அதிக சர்க்கரை சாப்பிடுவது உங்கள் உடலுக்கு தற்காலிகமாக ஆற்றலை அளித்தாலும், அது பிற்காலத்தில் சோர்வுக்கும் வழிவகுக்கும். அதிக சர்க்கரை உள்ள உணவுகளைக் குறைப்பது உங்கள் உணவுப் பழக்கத்தை மேம்படுத்தி, நாள் முழுவதும் ஏற்படும் ஆற்றல் ஏற்ற இறக்கங்களைக் குறைக்கும். சரியான அளவு சாப்பிடுவதும், போதுமான அளவு தண்ணீர் குடிப்பதும் அவசியமாகும்.

இதையும் படியுங்கள்: பேருந்தில் இருந்து குதித்து, 500 படிகள் ஏறி..! நேபாள வெள்ளத்தில் உயிர் பிழைத்த இந்தியர்களின் திக் திக் நிமிடங்கள்

4. பற்களுக்கு நன்மை பயக்கலாம்

அதிகப்படியான சர்க்கரையை உட்கொள்வது பல் சொத்தை ஏற்படும் அபாயத்தை அதிகரிக்கும். வாயில் உள்ள பாக்டீரியாக்கள் சர்க்கரையைப் பயன்படுத்தும்போது, அது பற்களைச் சேதப்படுத்தும் அமிலங்களை உற்பத்தி செய்யக்கூடும். எனவே, ஒரு மாதத்திற்கு இனிப்புகள், சர்க்கரை பானங்கள் மற்றும் பிற சர்க்கரை உணவுகளைக் குறைப்பது பல் ஆரோக்கியத்திற்கு நன்மை பயக்கும். தினமும் பல் துலக்குவதும், நல்ல வாய் சுகாதாரத்தைப் பேணுவதும் அவசியமாகும்.

5. உணவுப் பழக்கங்களை மேம்படுத்த முடியும்

ஒரு மாதத்திற்கு சர்க்கரையைத் தவிர்ப்பது, நீங்கள் ஒவ்வொரு நாளும் எவ்வளவு சர்க்கரையை உட்கொள்கிறீர்கள் என்பதைப் புரிந்துகொள்ள உதவும். ஆரம்பத்தில் இது கடினமாகத் தோன்றினாலும், சர்க்கரை மீதான உங்கள் வேட்கை படிப்படியாகக் குறையக்கூடும். மேலும், சேர்க்கப்பட்ட சர்க்கரைக்காக உணவு பழக்கவழக்கங்களில் நீங்கள் கவனம் செலுத்தத் தொடங்குவீர்கள். இது நீண்ட காலத்திற்கு உங்கள் உணவுப் பழக்கத்தை மேம்படுத்த உதவும்.

FSSAI: தரமற்ற பெருங்காயம் விற்பனை.. எல்ஜி, எவரெஸ்ட் நிறுவனங்களுக்கு தடை.. கேள்விக்குறியாகும் மக்களின் ஆரோக்கியம்!

பேச்சி ஆவுடையப்பன் — Sun, 30 Aug 2026 07:10:26 +0530

உணவுச்சந்தையில் பிரபலமான எவரெஸ்ட் ஃபுட் ப்ராடக்ட்ஸ் பிரைவேட் லிமிடெட் மற்றும் லால்ஜி கோது அண்ட் கம்பெனி ஆகியவற்றின் தயாரிப்புகள் தரம் குறைந்தவையாகக் கண்டறியப்பட்டுள்ளதால் வாடிக்கையாளர்கள் அதிர்ச்சியடைந்துள்ளனர். அந்நிறுவனங்கள் தங்க பெருங்காயப் பொடியை விற்பனை செய்ய தடை விதித்து உணவு ஒழுங்குமுறை ஆணையம் உத்தரவிட்டுள்ளது.

சந்தையில் விற்கப்படும் பொருட்கள்

உணவுச்சந்தையில் உப்பு தொடங்கி பல்வேறு விதமான உணவுப் பொருட்கள், சமையலறை சாதனங்கள் என அனைத்தும் பல விதமான நிறுவனங்களால் சந்தைப்படுத்தப்படுகின்றன. இந்தியாவில் FSSAI எனப்படும் உணவு பாதுகாப்பு மற்றும் தர நிர்ணய ஆணையம் செயல்பட்டு வருகிறது. பொதுமக்களுக்குப் பாதுகாப்பான, ஆரோக்கியமான உணவு கிடைப்பதை உறுதி செய்யும் பொருட்டு ஒவ்வொரு உணவுப் பொருட்களையும் இந்நிறுவனம் ஆய்வக சோதனை நடத்தி அதன் முடிவுகளை வெளியிடுவது வழக்கம்.

அப்படியாக சமீபத்தில் FSSAI நிறுவனம் நடத்திய ஆய்வில் எவரெஸ்ட் ஃபுட் ப்ராடக்ட்ஸ் மற்றும் லால்ஜி கோது அண்ட் கம்பெனி ஆகிய நிறுவனங்களின் பெருங்காயத் தூள் தயாரிப்புகள் தரம் குறைந்தவையாகக் கண்டறியப்பட்டுள்ளது. இதனை சமூக வலைத்தளப் பதிவு மூலம் FSSAI வாடிக்கையாளர்களுக்கு தெரிவித்துள்ளது.

சிக்கலில் எவரெஸ்ட், எல்ஜி பெருங்காயத்தூள்

எவரெஸ்ட் நிறுவனத்தைப் பொறுத்தவரை, கலப்பு பெருங்காயத்தின் (பெருங்காயத் தூள்) பல்வேறு வகைகளின் விற்பனைக்கு FSSAI உடனடியாகத் தடை விதித்துள்ளது. இதன் பெருங்காயத்தூள் தரமற்றவையாக இருந்ததோடு, தவறான தகவல்களுடன் முத்திரையிடப்பட்டதையும் அதிகாரிகள் கண்டறிந்துள்ளனர்.

ஆயுர்வேத அல்லது மூலிகை மருந்துகளின் தரக்கட்டுப்பாட்டின் படி ஆல்கஹாலில் கரையக்கூடிய சாற்றின் அளவு நிர்ணயிக்கப்பட்ட அளவான 5 சதவீதத்திற்கும் குறையாமல் இருக்க வேண்டிய நிலையில் உணவு பாதுகாப்பு விதிகளை அந்நிறுவனம் மீறியதாக தெரிவிக்கப்பட்டுள்ளது. எவரெஸ்ட் நிறுவனத்தில் மஞ்சள் நிற பெருங்காயத்தூள் சதவிகிதம் 3.29 மற்றும் கருப்பு நிற பாக்கெட்டின் சதவிகிதம் 4.4 சதவிகிதமாக இருந்தது தெரிய வந்தது. எவரெஸ்ட் நிறுவனம் தவறுகளைத் திருத்திக் கொள்ளாவிட்டால், மேலும் நடவடிக்கை எடுக்கப்படும் எனவும் எச்சரிக்கை விடுக்கப்பட்டுள்ளது.

அதேசமயம் எல்ஜி நிறுவனத்தைப் பொறுத்தவரை அந்நிறுவனத்தின் பெருங்காயத் தூள் மற்றும் கட்டி பெருங்காயம் தரம் குறைந்ததாகவும் கலப்படம் செய்யப்பட்டதாகவும் கண்டறியப்பட்டுள்ளது. இதன் பெருங்காயத்தில் உள்ள மாவுச்சத்தின் (ஸ்டார்ட்ச்) அளவு எடையின் அடிப்படையில் 1 சதவீதத்திற்கு மிகாமல் இருக்க வேண்டும். ஆனால் இதில் 15 சதவிகிதத்திற்கும் மேல் இருப்பது கண்டறியப்பட்டதால் விற்பனைக்கு தடைவிதிக்கப்பட்டுள்ளது.

மூலிகையாக வகைப்படுத்தப்பட்டுள்ள பெருங்காயத்தில் மாவுச்சத்து அதிகமாக இருந்தால் மருத்துவ வீரியம் குறைவதோடு, சமையல் தரம் மற்றும் நுகர்வோர் ஆரோக்கியமும் பாதிக்கப்படும். சந்தையில் விற்கப்படும் தூள் பெருங்காயத்தில் கோதுமை மாவு அல்லது அரிசி மாவு சேர்க்கப்படுவது இயல்புதான் என்றாலும், அது அனுமதிக்கப்பட்ட அளவை விட அதிகமாகும் போது பிரச்னைகள் ஏற்படுகிறது. பெருங்காயத்தின் உண்மையான மருத்துவக் குணங்கள் அதன் Oleogum-resin எனப்படும் பசை பிசினில் தான் உள்ளது. மாவுச்சத்து அதிகமாகும்போது இந்த பிசின் அளவு குறைகிறது. இதனால் வாயு, அஜீரணம் போன்ற வயிறு சம்பந்தப்பட்ட பிரச்னைகள் ஏற்படுகிறது என்பது குறிப்பிடத்தக்கது.

பள்ளிகளில் மத நிகழ்வுகள் தடை... அரசாணையில் சில பகுதிகளை ரத்து செய்யக் கோரி வழக்கு !

அருண் சின்னதுரை — Mon, 24 Aug 2026 23:19:24 +0530

பள்ளிகளில் மதம் தொடர்பான நிகழ்வுகளை நடத்த தடை விதித்த பள்ளிக்கல்வித்துறையின் அரசாணையில் சில பகுதிகளை ரத்து செய்யக் கோரிய வழக்கு.

தமிழக அரசிடம் உரிய விளக்கம் பெற்று தெரிவிக்க அரசு வழக்கறிஞருக்கு மதுரை அமர்வு உத்தரவு

மதுரை சேர்ந்த தாண்டீஸ்வரன் உயர்நீதிமன்ற மதுரை அமர்வில், " மதுரை அருள்மிகு மீனாட்சி சுந்தரேஸ்வரர் திருக்கல்யாணத்தை முன்னிட்டு திருவருள் முருகன் பக்த சபை அறக்கட்டளையால் வழங்கப்படும் விருந்து பக்தர்களின் எண்ணிக்கை அதிகரித்ததால் சேதுபதி மேல்நிலைப்பள்ளி மைதானத்திற்கு மாற்றப்பட்டது. இந்நிலையில் கடந்த ஜூலை 29ஆம் தேதி பள்ளிக்கல்வித்துறை பிறப்பித்த அரசாணை பள்ளிகளில் மதம் தொடர்பான நிகழ்வுகளை நடத்த தடை விதித்துள்ளதால், திருக்கல்யாண விருந்தை மதுரை சேதுபதி பள்ளி மைதானத்தில் வழங்குவதில் சிரமம் எழுந்துள்ளது. எனவே, பள்ளிகளில் மதம் தொடர்பான நிகழ்வுகளை நடத்த தடை விதித்த பள்ளிக்கல்வித்துறையின் அரசாணையில் சில பகுதிகளை ரத்து செய்து உத்தரவிட வேண்டும்"என கூறியிருந்தார். இந்த வழக்கை விசாரித்த நீதிபதிகள் சி.வி.கார்த்திகேயன், சக்திவேல் அமர்வு வழக்கு தொடர்பாக, தமிழக அரசிடம் உரிய விளக்கம் பெற்று தெரிவிக்க உத்தரவிட்டு வழக்கை ஒத்திவைத்தனர்.