குழந்தைகள் வளர தாய்ப்பால் மிகவும் அவசியமாகும். அந்த குழந்தை வளரும் நேரத்தில் தாய் செய்யும் சிறிய தவறும் குழந்தையை கடுமையாக பாதிக்கும். இப்படியான நிலையில் குழந்தைப் பெற்ற பெண்கள் என்ன மாதிரியான உணவை எடுத்துக் கொள்ள வேண்டும், தவிர்க்க வேண்டும் என்பதை ஒவ்வொரு தாயும் கண்டிப்பாக தெரிந்துக் கொள்ள வேண்டும். அதனைப் பற்றிக் காணலாம்.
இதுதொடர்பாக மருத்துவர்கள் தெரிவித்துள்ள கருத்தின்படி, “ஒரு தாய் தன் குழந்தைக்குத் தாய்ப்பால் கொடுக்கும்போது உண்ணும் உணவு மிகவும் முக்கியமானது. இந்தக் காலகட்டத்தில் உடலுக்குக் கூடுதல் ஆற்றல், புரதம், வைட்டமின்கள் மற்றும் தாதுக்கள் தேவைப்படுகின்றன.
அதேசமயம் குழந்தையைப் பராமரிப்பதால் தூக்கம், உணவு போன்றவை போதிய அளவில் தாய்க்கு இருக்காது. ஆனால் தாயின் ஆரோக்கியத்திற்கும் தாய்ப்பால் கொடுக்கும் செயல்முறைக்கும் தேவையான ஊட்டச்சத்துக்கள் கிடைப்பதை உறுதிசெய்ய, சமச்சீரான உணவை உண்பது முக்கியம் என்று சொல்லப்படுகிறது.
சேர்த்துக்கொள்ள வேண்டிய உணவுகள்
தாய்ப்பால் கொடுக்கும் காலத்தில் பருப்பு வகைகள், பீன்ஸ், கொண்டைக்கடலை, ராஜ்மா, முட்டை, மீன், கோழி, தயிர் மற்றும் பால் போன்ற புரதச்சத்து நிறைந்த உணவுகளை சமச்சீரான உணவில் சேர்த்துக்கொள்ள வேண்டும். இவற்றிலிருந்து கிடைக்கும் புரதம், உடல் திசுக்களைச் சரிசெய்யவும் தசை ஆரோக்கியத்தைப் பராமரிக்கவும் உதவுகிறது.
மேலும் கீரை மற்றும் வெந்தயம் போன்ற பச்சை காய்கறிகளையும், கேரட், பீட்ரூட், சீமை சுரைக்காய், குடைமிளகாய் போன்ற பல்வேறு வகையான காய்கறிகளையும் உணவில் சேர்த்துக்கொள்ள வேண்டும். இவை வைட்டமின்கள், தாதுக்கள் மற்றும் நார்ச்சத்தை வழங்குகின்றன. ஆப்பிள், வாழைப்பழம், ஆரஞ்சு, பப்பாளி, கொய்யா மற்றும் மாதுளை போன்ற பழங்களை தினசரி உணவில் சேர்த்துக்கொள்ளலாம். பழங்கள் மூலம் தாய்க்கு நார்ச்சத்து, வைட்டமின்கள் மற்றும் தாதுக்கள் கிடைக்கின்றன.
பழுப்பு அரிசி, ஓட்ஸ், ராகி, சோளம், தினை மற்றும் கோதுமை ஆகியவை ஆற்றலையும் நார்ச்சத்தையும் வழங்குகின்றன. கொட்டைகள், விதைகள், அவகேடோ மற்றும் மீன் போன்ற உணவுகளில் காணப்படும் ஆரோக்கியமான கொழுப்புகளும் நன்மை பயக்கும். நிறைய தண்ணீர், சூப்கள் மற்றும் மோர் போன்ற பானங்களை அருந்தலாம்.
எந்த உணவுகளை தவிர்க்க வேண்டும்?
கேக்குகள், இனிப்புகள், குக்கீகள், சாக்லேட்டுகள் மற்றும் சர்க்கரை பானங்கள் போன்றவற்றை தவிர்க்க வேண்டும். சிப்ஸ், பிரெஞ்சு பிரைஸ், பாக்கெட் தின்பண்டங்கள், ஃபாஸ்ட் ஃபுட் உணவுகள் போன்றவற்றை தவிர்க்க வேண்டும். காபி, தேநீர், எனர்ஜி பானங்கள் மற்றும் சில குளிர்பானங்களில் காஃபின் உள்ளது. இவற்றை அதிகமாக உட்கொள்வது உங்கள் குழந்தைக்கு எரிச்சலையும், தூங்குவதில் சிரமத்தையும் ஏற்படுத்தும்.
சில உணவுகள் குழந்தைக்கு வாயுத்தொல்லை அல்லது ஒவ்வாமையை ஏற்படுத்தக்கூடும் என்று எண்ணி, தாய்ப்பால் கொடுக்கும் போது பால், தயிர், பருப்பு வகைகள் மற்றும் காய்கறிகள் போன்ற பல உணவுகளைத் தவிர்க்கிறார்கள். அவ்வாறு செய்வது தாய்க்குத் தேவையான ஊட்டச்சத்துக்களைக் குறைத்துவிடும்.
குழந்தைக்கு தோல் தடிப்பு, வாந்தி, வயிற்றுப்போக்கு, மலத்தில் இரத்தம், அல்லது கடுமையான எரிச்சல் போன்ற அறிகுறிகள் தென்பட்டால், குழந்தை நல மருத்துவரை அணுக வேண்டும்.