மதுரையில் NIRS-IVUS தொழில்நுட்பத்தில் 100 இதய சிகிச்சை மைல்கல்!

பக்கவாதம் தடுக்க, விரைந்து செயல்பட: முன்கூட்டியே கண்டறிவதன் முக்கியத்துவம் குறித்து வலியுறுத்தல்

அருண் சின்னதுரை — Sat, 31 Oct 2026 16:34:26 +0530

பக்கவாத விழிப்புணர்வு தினம் அனுசரிப்பு: தடுப்பது மற்றும் முன்கூட்டியே கண்டறிவதன் முக்கியத்துவம் குறித்து வலியுறுத்தல்.

பக்கவாதம் வராமல் தடுப்பது, அதன் அறிகுறிகளை அடையாளம் காண்பது,

மதுரை மீனாட்சி சூப்பர் ஸ்பெஷாலிட்டி மருத்துவமனையில் பக்கவாத விழிப்புணர்வு தினம் இன்று அனுசரிக்கப்பட்டது. பக்கவாதம் வராமல் தடுப்பது, அதன் அறிகுறிகளை ஆரம்பத்திலேயே அடையாளம் காண்பது, சரியான நேரத்திற்குள் சிறப்பு சிகிச்சையை நாடிப்பெறுவது ஆகியவற்றின் முக்கியத்துவத்தை வலியுறுத்துவதே இந்நிகழ்வின் நோக்கமாகும். “ஒவ்வொரு நிமிடமும் முக்கியம் - விரைந்து செயல்படுங்கள் (#ActFAST)” என்ற விழிப்புணர்வுச் செய்தியின் மூலம், பக்கவாத எச்சரிக்கை அறிகுறிகளை அடையாளம் காணும் திறனை மக்களுக்கு வழங்குவது இந்நிகழ்வின் இலக்காகும். அறிகுறிகளை அடையாளம் கண்டவுடன், உடனடியாக மருத்துவ சிகிச்சையைப் பெறுவது, நோயாளிகளின் உயிரைக் காப்பதோடு நீண்டகால உடல் பாதிப்பையும் குறைக்கும் என்பதைப் புரியவைப்பதும் உலக பக்கவாத தின அனுசரிப்பின் நோக்கமாகும்.

பக்கவாதம் வராமல் தடுப்பது மற்றும் சிகிச்சை முறைகள்

பக்கவாதம் வராமல் தடுப்பது மற்றும் சிகிச்சை முறைகள் குறித்த விழிப்புணர்வை மக்களிடம் ஏற்படுத்தும் குறிக்கோளோடு ஆண்டுதோறும் அக்டோபர் 29-ஆம் தேதி 'உலக பக்கவாத தினம்' கடைப்பிடிக்கப்படுகிறது. உலக பக்கவாத அமைப்பின் (WSO) 2025-ஆம் ஆண்டின் தரவுகளின்படி, உலகெங்கிலும் ஒவ்வொரு ஆண்டும் சுமார் 1.2 கோடி பேருக்குப் புதிதாகப் பக்கவாத பாதிப்புகள் ஏற்படுகின்றன; அதாவது ஒவ்வொரு மூன்று வினாடிக்கும் ஒருவர் பக்கவாதத்தால் பாதிக்கப்படுகிறார். இந்தியாவில், பக்கவாதம் தொடர்ந்து உயிரிழப்புக்கும் உடல் இயக்கத்திறன் குறைபாட்டிற்கும் முக்கியக் காரணமாக இருந்து வருகிறது. இது பொதுமக்களிடையே விழிப்புணர்வை ஏற்படுத்த வேண்டியதன் அவசியத்தையும், நேரத்தை வீணடிக்காமல் விரைவாகச் சிறப்பு சிகிச்சையைப் பெற வேண்டியதன் அவசரத் தேவையையும் உணர்த்துகிறது.

நரம்பியல் அறுவைசிகிச்சை போன்ற நவீன சிகிச்சை

விரைவான அவசரகால மதிப்பீடு, உடனடியாக மூளை மீதான ஸ்கேன் சோதனை, உரிய நேரத்தில் சிகிச்சையை வழங்குவது மற்றும் பல்வேறு துறைகளின் ஒருங்கிணைந்த பராமரிப்பு ஆகியவை பக்கவாதத்தைத் திறம்படக் கையாளவும், பாதிப்புகளைக் குறைத்து நோயாளிகளை மீட்கவும் மிகவும் அவசியம் என்று நிபுணர்கள் தெரிவித்தனர். இங்குள்ள நிபுணர்கள் ஒன்றிணைந்து, நோயாளிகளுக்கு ஆரம்பகட்ட நிலைப்படுத்தல் முதல் முழுமையான மீட்பு வரை விரிவான சிகிச்சைத் திட்டத்தைச் செயல்படுத்துகின்றனர். மூளைக்கு இரத்தஓட்டத் தடையால் ஏற்படும் பக்கவாதத்திற்குத் தகுதியின் அடிப்படையில் 'நரம்பு வழி த்ரோம்போலிசிஸ்' சிகிச்சை வழங்கப்படுகிறது. மூளையின் பெரிய ரத்த நாளங்களில் ஏற்படும் அடைப்புகளுக்கு 'மெக்கானிக்கல் த்ரோம்பெக்டமி' சிகிச்சையும், மூளையில் ரத்தக்கசிவால் ஏற்படும் பக்கவாதம் தொடர்பான தீவிர சிக்கல்களுக்கு நரம்பியல் அறுவைசிகிச்சை போன்ற நவீன சிகிச்சைகளையும் இம்மருத்துவமனை வழங்கி வருகிறது.

பக்கவாதத்தை முன்கூட்டியே கண்டறிவதற்கான வழிகள் குறித்துப் பேசிய நிபுணர்கள், பொதுமக்கள் நினைவில் கொள்ள வேண்டிய எளிய BE FAST நெறிமுறையைப் பரிந்துரைத்தனர்:

· B - சமநிலை: திடீரென உடல் சமநிலையை இழப்பது அல்லது தடுமாறுவது.

· E - கண்கள்: திடீரெனப் பார்வை மங்கலாவது அல்லது பார்வை இழப்பு.

· F - முகம்: சிரிக்கும்போது முகத்தின் ஒரு பக்கம் கோணுவது அல்லது தொங்குவது.

· A - கைகள்: திடீரென கைகளில் ஏற்படும் பலவீனம் அல்லது கையைத் தூக்க முடியாமல் கீழ்நோக்கிச் சரிவது.

· S - பேச்சு: குழறலான பேச்சு, பேசுவதில் அல்லது பிறர் பேசுவதைப் புரிந்துகொள்வதில் சிரமம்.

· T - நேரம்: மேற்கண்ட அறிகுறிகளுள் ஏதாவது தென்படுமானால், நேரத்தை வீணாக்காமல் உடனடியாக அவசர சேவைகளை அழைக்கவும்; மருத்துவமனைக்கு விரைவாகச் செல்லவும்.

பெரும்பாலான பக்கவாத பாதிப்புகள் வராமல் தடுக்க ஆபத்து காரணிகளைக் கட்டுப்படுத்துவதும், ஆரோக்கியமான பழக்கவழக்கங்களைப் பின்பற்றுவதும் பெரிதும் உதவும் என்று அவர்கள் கூறினர். இரத்த அழுத்தத்தைக் கண்காணிப்பது, சர்க்கரை நோய் மற்றும் கொலஸ்ட்ராலைக் கட்டுக்குள் வைப்பது, புகைப்பிடிப்பதை நிறுத்துவது, சத்தான உணவை உட்கொள்வது, உடற்பயிற்சி செய்வது, ஆரோக்கியமான உடல் எடையைப் பராமரிப்பது மற்றும் மது அருந்துவதைக் கட்டுப்படுத்துவது ஆகியவை பக்கவாத ஆபத்துக்கான வாய்ப்புகளைக் குறைக்கும் என்பதால், இவற்றை மக்கள் பின்பற்றுமாறு இம்மருத்துவமனை ஊக்குவிக்கிறது. சீரற்ற இதயத் துடிப்பு போன்ற பிரச்சனைகளுக்குப் பரிசோதித்து உரிய சிகிச்சை பெற வேண்டும்; மருத்துவரின் ஆலோசனையின்றி மருந்துகளை நிறுத்தக் கூடாது. மீனாட்சி சூப்பர் ஸ்பெஷாலிட்டி மருத்துவமனை பல ஆண்டுகளாக மக்கள் விழிப்புணர்வுத் திட்டங்கள் மூலம் பக்கவாத விழிப்புணர்வை ஊக்குவித்து வருகிறது. குறிப்பாக, ஆரம்பக்கட்ட அறிகுறிகளை அறிந்துகொள்வதையும், முதல் சில மணிநேரங்களில் சிகிச்சையைப் பெறுவதன் அவசியத்தையும் வலியுறுத்துகிறது.

நடமாடும் ஆம்புலன்ஸ் சேவைகள் மூலமாகவே 'ஸ்ட்ரோக் த்ரோம்போலிசிஸ்' சிகிச்சையை வழங்கும் எதிர்காலத் தொழில்நுட்ப முன்னேற்றங்களைச் செயல்படுத்தவும் திட்டமிட்டுள்ளது. இந்த முன்னெடுப்பின் மூலம், பக்கவாத எச்சரிக்கை அறிகுறிகளைப் பற்றித் தெரிந்துகொள்ளவும், காலம் தாழ்த்தாமல் செயல்பட்டு, விழிப்புணர்வுள்ள சமுதாயத்தை உருவாக்க உதவவும் சமூகங்களுக்கு இம்மருத்துவமனை அழைப்பு விடுக்கிறது.

Fasting Facts: 36 மணி நேர விரதம் நல்லதா? உடலில் ஏற்படும் மாற்றங்கள் என்ன? ஆபத்துகள், யாருக்கு செட் ஆகாது?

குலசேகரன் முனிரத்தினம் — Fri, 30 Oct 2026 08:13:28 +0530

36 Hour Fasting Facts: உடலில் பல மாற்றங்களுக்கு வழிவகுக்கக் கூடிய 36 மணி நேர விரதத்தை யாரெல்லாம் பின்பற்றக்கூடாது என கீழே விவரிக்கப்பட்டுள்ளது.

36 மணி நேர விரதம்:

உடல் நலன் மற்றும் வளர்சிதை மாற்றங்களில் விரைவான முன்னேற்றம் காண விரும்பும், உடற்பயிற்சி ஆர்வலர்கள் மத்தியில் 36 மணி நேர விரதம் என்பது மிகவும் பரவலாக விவாதிக்கப்படும் நடைமுறையாக உருவெடுத்துள்ளது. இதுமிகவும் பிரபலமான உணவு பழக்கமாக மாறி வந்தாலும், நீண்ட நேர உணவு விடுப்பானது எல்லோருக்குமானது கிடையாது என மருத்துவ வல்லுநர்கள் எச்சரிக்கின்றனர். மருத்துவ தரவுகளின்படி இந்த விரத்தின் சாத்தியமான நன்மைகள், கவனிக்கப்படாத அபாயங்கள் மற்றும் இந்த விரத முறையைக் கருத்தில் கொள்ளும் எவரும் மனதில் கொள்ள வேண்டிய அத்தியாவசிய முன்னெச்சரிக்கைகள் ஆகியவை கீழே விவரிக்கப்பட்டுள்ளன.

உணவு தவிர்க்கப்படும் விரத நேரம்

36 மணி நேர விரதத்தின் போது, தனிநபர்கள் தண்ணீர், இனிப்பூட்டிகள் சேர்க்காத சாதாரண தேநீர் அல்லது கருப்பு காபியை மட்டுமே உட்கொள்கிறார்கள். இந்த நேரத்தில் சிலர் மனரீதியாக அதிக சுறுசுறுப்புடன் உணர்ந்தாலும், மற்றவர்கள் தங்களின் அன்றாடப் பழக்கவழக்கங்கள், உள்ளார்ந்த உடல்நலக் கோளாறுகள் மற்றும் செயல்பாட்டு நிலைகளைப் பொறுத்து சிரமப்படக்கூடும் என்று மருத்துவர்கள் எச்சரிக்கின்றனர்.

36 மணி நேர விரதத்தின் நன்மைகள் என்ன?

ஆரோக்கியமான சிலர் 36 மணி நேர விரதத்தைக் கடைப்பிடிக்கும்போது நேர்மறையான பலன்களைப் பெறலாம் என மருத்துவர்கள் விளக்குகின்றனர். நீண்ட உண்ணாவிரத காலங்கள் இன்சுலின் உணர்திறனை மேம்படுத்தி, கலோரி உட்கொள்ளலைக் கட்டுப்படுத்த உதவும். சேதமடைந்த செல்களை அகற்றும் உடலின் இயற்கையான செயல்முறையான ஆட்டோஃபேஜியும் ஓரளவிற்குத் தூண்டப்படலாம், இருப்பினும் மனிதர்களிடம் இதற்கான சான்றுகள் குறைவாகவே உள்ளன என்று கூறப்படுகிறது. விரதக் காலத்தில் பலரும் தங்களுக்குக் கவனம் தெளிவாகவும், ஒருமுகத்தன்மை கூர்மையாகவும் இருப்பதாகத் தெரிவிக்கின்றனர். உடல் கொழுப்பை எரிக்கும் நிலைக்கு மாறி, மூளைக்கு மாற்று ஆற்றல் மூலமாகச் செயல்படக்கூடிய கீட்டோன்களை உற்பத்தி செய்வதே இதற்குக் காரணமாக இருக்கலாம். இதுபோன்ற விரதங்கள் தனிநபர்கள் தங்களின் உண்மையான பசி உணர்வுகளை அறியவும், தேவையற்ற சிற்றுண்டிகளைக் குறைக்கவும் உதவக்கூடும். இது நீண்ட காலத்திற்கு மேம்பட்ட உணவுப் பழக்கங்களுக்கு வழிவகுக்கும்.

இதையும் படியுங்கள்: Tasmac: டாஸ்மாக்கில் அதிரடி மாற்றம்..! நவ.1 முதல் உயரும் சரக்கு பாட்டில் விலை - எந்த கடையிலும் ரூ.10 கிடைக்கும்

36 மணி நேர விரதத்தின் அபாயங்கள்:

விரதம் தொடர்பான இணைய விவாதங்கள் பெரும்பாலும் நன்மைகளை முன்னிலைப்படுத்தினாலும், நீண்டகால உண்ணாவிரதங்கள் முக்கியமான உடல்நல அபாயங்களையும் கொண்டுள்ளன. சோடியம் மற்றும் பொட்டாசியம் போன்ற அத்தியாவசிய தாதுக்கள் மீண்டும் நிரப்பப்படாததால், நீண்ட காலத்திற்கு தண்ணீரை மட்டுமே குடிப்பது நீரிழப்பு மற்றும் எலக்ட்ரோலைட் சமநிலையின்மைக்கு வழிவகுக்கக் கூடும். இது எளிதில் பாதிக்கப்படக்கூடிய நபர்களுக்கு பலவீனம் மற்றும் தலைச்சுற்றலைத் தூண்டக்கூடும்.
குறைந்த ரத்தச் சர்க்கரை அளவு ஏற்பட்டு அதனால் தலைச்சுற்றல், எரிச்சல் மற்றும் தலைவலி போன்ற அறிகுறிகள் உண்டாகலாம். விரதத்தின் போது தொடர்ந்து கடுமையான உடல் செயல்பாடுகளில் ஈடுபடும் நபர்களுக்கு இந்த ஆபத்து அதிகரிக்கிறது. அதிகரித்த கார்டிசோல் அளவுகள் தூக்கத்தைக் கெடுத்து, இரவில் அமைதியின்மையை ஏற்படுத்தக்கூடும். குறிப்பாக, வழக்கமான உணவு நாட்களில் போதுமான புரதம் கிடைக்காதபோது, அடிக்கடி மேற்கொள்ளப்படும் நீண்ட விரதங்கள் தசை இழப்புக்கு வழிவகுக்கும். வெறும் வயிற்றில் தேநீர் அல்லது காபி அருந்தும்போது, அமிலத்தன்மை அல்லது இரைப்பை அழற்சி போன்ற செரிமானப் பிரச்சனைகளும் மோசமடையக்கூடும்.

36 மணி நேர விரதம் - யாருக்கு செட் ஆகாது?

நீண்டகால உண்ணாவிரதம் சிலருக்கு நிச்சயமாக பொருத்தமற்றது. நீரிழிவு நோயாளிகளுக்கு ரத்தச் சர்க்கரை குறைவு ஏற்படும் அபாயம் அதிகமாக உள்ளது, அதே சமயம் சிறுநீர்ப்பெருக்கிகளை உட்கொள்ளும் உயர் ரத்த அழுத்த நோயாளிகளுக்கு அபாயகரமான திரவ மற்றும் உப்பு சமநிலையின்மை ஏற்படலாம். மிகக் குறைந்த உடல் நிறை குறியீட்டெண் (BMI) கொண்டவர்கள் அல்லது உண்ணுதல் கோளாறுகள் அல்லது உணவு தொடர்பான பதற்றத்தால் பாதிக்கப்பட்ட நபர்களும் இந்தப் பழக்கத்தைத் தவிர்க்க வேண்டும். அதிகரித்த ஊட்டச்சத்துத் தேவைகள் காரணமாக, கர்ப்பிணி மற்றும் பாலூட்டும் தாய்மார்கள் இதுபோன்ற நீண்டகால உண்ணாவிரதங்களை மேற்கொள்ள வேண்டாம் என்று அறிவுறுத்தப்படுகிறார்கள். நச்சு நீக்கத்திற்கான ஒரு தீர்வாக விரதம் இருப்பது என்பது தவறான கருத்து என்றும் மருத்துவர்கள் குறிப்பிடுகின்றனர். கல்லீரலும் சிறுநீரகங்களும் கழிவுப் பொருட்களைத் தொடர்ந்து வடிகட்டி, உடலின் உள் சமநிலையைப் பராமரிப்பதால், பல இணைய பதிவுகள் கூறுவது போல, நச்சுகளை அகற்ற உடலுக்கு விரதம் தேவைப்படாது.

36 மணி நேர விரதம் - கவனத்தில் கொள்ளவேண்டியவை

36 மணி நேர விரதம் போன்றவற்றை முயற்சித்துப் பார்க்க விரும்பும் ஆரோக்கியமான நபர்கள் பல அத்தியாவசிய முன்னெச்சரிக்கை நடவடிக்கைகளை கவனத்தில் கொள்ள வேண்டும். அதன்படி,

விரதக் காலம் முழுவதும் கனிமங்களின் அளவைப் பராமரிக்க, சாதாரண நீருக்குப் பதிலாக எலக்ட்ரோலைட் நிறைந்த நீரைத் தேர்ந்தெடுக்கலாம்.
கடுமையான உடற்பயிற்சிகளைத் தவிர்க்க வேண்டும்.ஏனெனில் அவை சோர்வு, குறைந்த ரத்த சர்க்கரை மற்றும் நீரிழப்பு ஏற்படும் அபாயத்தை அதிகரிக்கின்றன.
செரிமான அசௌகரியத்தைக் குறைப்பதற்காக, புரதம் நிறைந்த இலகுவான உணவுகளுடன் தொடங்கி, விரதத்தை மெதுவாக முடிக்க வேண்டும்.
நீண்ட விரதங்களை அடிக்கடி மேற்கொள்ளக்கூடாது.
பெரும்பாலான ஆரோக்கியமான நபர்களுக்கு, மாதத்திற்கு ஒரு முறை என்பது பொதுவாக பாதுகாப்பானது என மருத்துவர்கள் எச்சரிக்கின்றனர்.

மழைக்காலத்தில் கேள்விக்குறியாகும் உடல்நலம்: உணவையே மருந்தாக்குவது எப்படி?

விவேக் தங்கராஜ் — Sat, 24 Oct 2026 12:28:42 +0530

பருவக்காலத்திற்கு ஏற்ப ஒவ்வொரு காலநிலையும் மாறும் போது அதற்கேற்றாற்போல் உடல் வெப்பநிலை, உணவுகள், உடைகளை நாம் தகவமைத்துக்கொள்வது அவசியமாகிறது. திடீரென மாறும் காலநிலையை உடல் ஏற்றுக்கொள்ள சிறுது காலம் தேவைப்படும் எனவே அதுவரை வெப்ப மற்றும் குளுமை மாறுபாடுகளை நாம் கவனிக்க வேண்டியுள்ளது. இதன் சமநிலை தவறும் போது உடல் நலக்கோளாறுகள் ஏற்பட்டு நாம் மருந்துகளை தேடிச்செல்லும் சூழல் உருவாக்கூடும்.

வந்தாச்சு மழைக்காலம்! உடல்நலத்தை பேணுவது அவசியம்

உணவே மருந்து, மருந்தே உணவு என்பதன் அடிப்படையில் இயற்கையோடு இணைந்து வாழ்வை மேற்கொள்வது தமிழர்களின் வழக்கமாக உள்ளது. இதன்படி உடல்நலக் கோளாறுகளுக்கு நமது அன்றாட உணவையே மருந்துகளாக்கிய பெருமை தமிழர்களுக்கு உண்டு. மழைக்காலம் என்றாலே ஜில் என்ற காலநிலை, குறைந்த வெப்பம் நிலவும் நிலையில் சிலருக்கு மழையில் நனைவது, ஐஸ்கிரீம் சாப்பிடுவது உள்ளிட்ட பழக்கங்கள் பலருக்கு பிடித்தமானவை. அதீத குளுமை மற்றும் உடல் வெப்பச்சமநிலை இன்மை காரணமாக பொதுவாக சளி, காய்ச்சல், இருமல், தொண்டை வலி உள்ளிட்ட உடல்நலக்கோளாறுகள் ஏற்படும்.

உணவையே மருந்தாக்குவது எப்படி?

சளி, இருமல் வந்து வந்தபிறகு மட்டுமின்றி மழைக்காலத்தில் பொதுவாகவே வெந்நீர் அருந்துவது நன்மை பயக்கும். குடிநீரில் உள்ள கிருமிகளை அழிக்கும் வெந்நீருக்கு தொண்டை வீக்கத்தை சீர்செய்யும் தன்மையும் உண்டு. மேலும், தினந்தோறும் உணவில் மிளகு சேர்த்துக்கொள்வது மற்றும் சிறிதளவு தேனை வெதுவெதுப்பான நீர் அல்லது இஞ்சி கலந்த மூலிகைத் தேநீரில் கலந்து குடிப்பது சளித்தொல்லையிலிருந்து விடுபட பேருதவியாக இருக்கும். மேலும் தூதுவளையை துவையல் அல்லது ரசம் வைத்து உண்பது, நாளுக்கு ஒருமுறையாவது வெற்றிலை எடுத்துக்கொள்வதும் ஆகியவையும் உடலுக்கு நன்மை பயக்கும்.

தொற்றுகளில் இருந்து தற்காப்பு அவசியம்

குளுமையால் ஏற்படும் உடல்நலக்கோளாறுகளை கடந்து கொசுக்கள் மூலமாகவும், நீர்த்தொற்றுக்கள் மூலமாகவும் பரவும் நோய்களில் இருந்து நம்மை நாம் பாதுகாத்துக் கொள்ள இன்றியமையாதது.பொதுவாக மழைநேரங்களில் நீர்த்தேங்குவதன் மூலமாக உருவாகும் கொசுக்களால் டெங்கு மலேரியா உள்ளிட்ட நோய்களும், அசுத்தமான நீரின் மூலம் காலரா, டைபாய்டு உள்ளிட்டவையும் பரவக்கூடும். தூய்மையான நீரை பயன்படுத்துவது வெளியில் சென்றுவிட்டு வீட்டுக்குள் வரும்முன் கை, கால்களை சுத்தப்படுத்துவது உள்ளிட்டவை முதன்மையான தற்காப்பு நடவடிக்கைகள் ஆகும்.
தீதும் நன்றும் பிறர்தர வாரா என்பதை போல 80 சதவீத உடல்நலக்கோளாறுகளை நாம் விழிப்புடன் இருந்தால் தடுக்க முடியும் என்பது நிதர்சனம்.

செயற்கை நுண்ணறிவுடன் கூடிய MISSO ரோபோடிக் தொழில்நுட்பம்: முழங்கால் மாற்று சிகிச்சையில் புதிய புரட்சி..

எஸ்.ஜெகநாதன், மயிலாடுதுறை — Fri, 23 Oct 2026 15:32:23 +0530

சென்னை: மேம்பட்ட எலும்பியல் சிகிச்சையில் ஒரு முக்கிய மைல்கல்லாக, முழங்கால் மூட்டு மாற்று அறுவை சிகிச்சைகளுக்காகச் சென்னையின் முதல் செயற்கை நுண்ணறிவு சார்ந்த MISSO ரோபோடிக் தொழில்நுட்பத்தைச் சிவம் ஆர்த்தோ மருத்துவமனை நிறுவியுள்ளது. நவீனத் தொழில்நுட்பத்தின் உதவியுடன் மேம்பட்ட மூட்டு மாற்று சிகிச்சைகளை நோயாளிகளுக்குக் கொண்டு சேர்ப்பதில் இது ஒரு குறிப்பிடத்தக்க முன்னேற்றமாகக் கருதப்படுகிறது.இந்த புதிய தொழில்நுட்ப அறிமுகமானது பொதுமக்களிடையே பெரும் வரவேற்பைப் பெற்றுள்ளதுடன், மருத்துவத்துறையில் ஒரு புரட்சிகரமான மாற்றமாகவும் பார்க்கப்படுகிறது.

தொழில்நுட்பத்தின் சிறப்பம்சங்கள் மற்றும் தயாரிப்புப் பின்னணி

இந்தியாவின் வாபியைத், குஜராத் மாநிலத்தைத் தலைமையிடமாகக் கொண்டு செயல்படும் உலகளவில் முன்னணி மருத்துவச் சாதன உற்பத்தி நிறுவனமான மெரில் லைஃப் சயின்சஸ் நிறுவனம், செயற்கை நுண்ணறிவின் அடிப்படையில் இயங்கும் இந்த MISSO முழங்கால் மூட்டு மாற்று ரோபோடிக் தொழில்நுட்பத்தைத் தயாரித்துள்ளது. இந்தியாவிலேயே முழுமையாக வடிவமைக்கப்பட்டு உருவாக்கப்பட்டுள்ள இந்த MISSO அமைப்பு, உயர்தர மருத்துவத் தொழில்நுட்பப் புதுமைகளில் நாட்டின் வளர்ந்து வரும் திறனை மிகச் சிறப்பாகப் பிரதிபலிக்கிறது.

இந்தியா முழுவதும் தற்போது 150-க்கும் மேற்பட்ட இடங்களில் நிறுவப்பட்டுள்ள இந்த அமைப்பு, மூட்டு மாற்று அறுவை சிகிச்சை முறைகளில் படிப்படியாகப் பெரிய மாற்றங்களை ஏற்படுத்தி வருவதுடன், பெருநகரங்களுக்கு அப்பாலும் மேம்பட்ட எலும்பியல் சிகிச்சைகள் தடையின்றி கிடைக்க வழிவகுத்து வருகிறது.

மருத்துவமனையின் ஈடுபாடு மற்றும் சிறப்புத் தலைமை

சிவம் ஆர்த்தோ மருத்துவமனையின் நிறுவனர் மற்றும் இயக்குநர் டாக்டர் வி. சிவகுமார் தலைமையில் இந்த நவீன ரோபோடிக் அமைப்பு வெற்றிகரமாக நிறுவப்பட்டுள்ளது. அறுவை சிகிச்சையின் துல்லியத்தையும், நோயாளிகளின் சிகிச்சைப் பலன்களையும் தொடர்ந்து மேம்படுத்தும் அடுத்த தலைமுறை மருத்துவத் தொழில்நுட்பங்களைப் பயன்படுத்துவதில் சிவம் ஆர்த்தோ மருத்துவமனை கொண்டுள்ள அசைக்க முடியாத உறுதிப்பாட்டை இந்தச் செயல் வலுப்படுத்துகிறது. நோயாளிகளுக்கு உலகத்தரம் வாய்ந்த சிகிச்சையை வழங்குவதே இந்த மருத்துவமனையின் முக்கிய நோக்கமாகும்.

செயற்கை நுண்ணறிவின் செயல்பாடு மற்றும் துல்லியம்

அறுவை சிகிச்சைக்கு முன்பான விரிவான திட்டமிடல், அறுவை சிகிச்சையின்போது வழங்கப்படும் நிகழ்நேர வழிகாட்டுதல் மற்றும் செயற்கை மூட்டைத் துல்லியமாகப் பொருத்துவது ஆகியவற்றுக்கு MISSO ரோபோடிக் அமைப்பு செயற்கை நுண்ணறிவை முழுமையாகப் பயன்படுத்துகிறது. ஒவ்வொரு நோயாளியின் தனித்துவமான உடற்கூறு சார்ந்த தரவுகளின் அடிப்படையில் முழங்கால் மூட்டு மாற்று அறுவை சிகிச்சையைத் துல்லியமாகத் திட்டமிட்டு மேற்கொள்ள இந்த நவீன அமைப்பு அறுவை சிகிச்சை நிபுணர்களுக்குப் பெரிதும் உதவுகிறது. இதன் மூலம் மூட்டின் சரியான சீரமைப்பையும், அதைச் சுற்றியுள்ள மென்மையான திசுக்களின் சரியான சமநிலையையும் மேம்படுத்தி, ஒவ்வொரு நோயாளியின் உடல் அமைப்புக்கும் ஏற்றவாறு சிகிச்சையை வெற்றிகரமாக முடிக்க முடிகிறது.

மருத்துவரின் கருத்து மற்றும் எதிர்கால நோக்கம்

இதுகுறித்துச் சிவம் ஆர்த்தோ மருத்துவமனையின் நிறுவனர் டாக்டர் வி. சிவகுமார் கூறியதாவது: “செயற்கை நுண்ணறிவு சார்ந்த ரோபோடிக் தொழில்நுட்பத்தின் இந்த அறிமுகம், சென்னையில் முழங்கால் மூட்டு மாற்று அறுவை சிகிச்சையின் புதிய மற்றும் பொன்னான அத்தியாயத்தைக் குறிக்கிறது. MISSO ரோபோடிக் அமைப்பின் மூலம் ஒவ்வொரு நோயாளிக்கும் முற்றிலும் ஏற்ற அறுவை சிகிச்சைத் திட்டமிடலையும், செயற்கை மூட்டைப் பொருத்துவதில் அசாத்திய துல்லியத்தையும் உறுதிப்படுத்த எங்களால் முடிகிறது. இதன் வாயிலாகச் சிகிச்சைப் பலன்களையும், நோயாளிகளின் ஒட்டுமொத்த சௌகரியத்தையும் மேம்படுத்துவதை நாங்கள் முக்கிய நோக்கமாகக் கொண்டுள்ளோம். ரோபோடிக் தொழில்நுட்பத்தின் மிகச்சிறந்த துல்லியத்துடன் எங்களது அறுவை சிகிச்சை நிபுணத்துவத்தை இணைத்து, செயற்கை மூட்டின் பொருத்துநிலை, மூட்டுச் சீரமைப்பு மற்றும் மென்மையான திசுக்களின் சமநிலையை மேம்படுத்துவதே எங்கள் பணியாகும். இது மூட்டின் பல வருட நிலைத்தன்மையையும் மேம்பட்ட செயல்பாட்டையும் நோயாளிகளுக்கு வழங்க பெரிதும் உதவும்.

நோயாளிகளுக்குக் கிடைக்கும் நன்மைகள் மற்றும் நவீன சிறப்புகள்

வழக்கமான அறுவை சிகிச்சை முறைகளுடன் ஒப்பிடுகையில், MISSO அமைப்பின் உதவியுடன் மேற்கொள்ளப்படும் ரோபோடிக் முழங்கால் மூட்டு மாற்று அறுவை சிகிச்சைகள் அதிகத் துல்லியம், மென்மையான திசுக்களுக்கு ஏற்படும் பாதிப்பைக் பெருமளவு குறைத்தல், அறுவை சிகிச்சைக்குப் பிந்தைய வலியைக் கணிசமாகக் குறைத்தல், நோயாளிகள் விரைவாக இயல்பு நிலைக்குத் திரும்புதல் மற்றும் செயற்கை மூட்டின் ஆயுட்காலத்தை மேம்படுத்துதல் உள்ளிட்ட பல்வேறு சிறப்பான நன்மைகளை வழங்குகின்றன. செயற்கை நுண்ணறிவின் உதவியுடன் ஒவ்வொரு நோயாளியின் தனித்துவமான உடல் அமைப்புக்கும் ஏற்ப சிகிச்சையைத் திட்டமிட முடிவதால், மூட்டின் செயல்பாட்டிலும் நீண்டகால நோயாளி திருப்தியிலும் மிகப்பெரிய முன்னேற்றம் ஏற்பட இது வழிவகுக்கிறது.

மருத்துவத் திறனை உயர்த்தும் பெருமை

நாடு முழுவதும் MISSO பயன்பாடு தொடர்ந்து அதிகரித்து வருவது, உள்நாட்டில் உருவாக்கப்பட்ட நவீன ரோபோடிக் தொழில்நுட்பம் எலும்பியல் சிகிச்சையில் அதிகளவில் ஒருங்கிணைக்கப்படுவதை மிகச் சிறப்பாகப் பிரதிபலிக்கிறது. சென்னையில் இந்த அதிநவீன அமைப்பு நிறுவப்பட்டிருப்பது, நகரின் மேம்பட்ட அறுவை சிகிச்சைத் திறன்களை மேலும் பலமடங்கு வலுப்படுத்துகிறது. குறிப்பாக, முழங்கால் மூட்டு மாற்று அறுவை சிகிச்சையில் நோயாளிக்கேற்ற தனித்துவமான திட்டமிடல், செயற்கை மூட்டின் துல்லியமான பொருத்துதல் மற்றும் நேர்த்தியான சீரமைப்பு ஆகியவற்றுக்கு இது எதிர்காலத்தில் மிக முக்கியத் துணையாக நிற்கும் என மருத்துவ வல்லுநர்கள் தெரிவித்துள்ளார்.

500 ரோபோட்டிக் அறுவைசிகிச்சைகள் நிறைவு... தென் தமிழகத்தில் மருத்துவப் புரட்சி !

அருண் சின்னதுரை — Wed, 21 Oct 2026 16:23:15 +0530

டா வின்சி’ ரோபோட்டிக் கருவி மூலம் சுமார் 350 அறுவைசிகிச்சைகளும், ‘டூமாய்’ கருவி மூலம் 150-க்கும் மேற்பட்ட அறுவைசிகிச்சைகளும் இங்கு செய்யப்பட்டுள்ளன.

10 ஆண்டுகளில் 500 ரோபோட்டிக் அறுவைசிகிச்சை

மீனாட்சி மிஷன் மருத்துவமனை மற்றும் ஆராய்ச்சி மையம் (MMHRC) மற்றும் மீனாட்சி சூப்பர் ஸ்பெஷாலிட்டி மருத்துவமனை (MSSH) ஆகியவை கடந்த 10 ஆண்டுகளில் 500 ரோபோட்டிக் அறுவைசிகிச்சைகளைச் செய்து புதிய மைல்கல்லை எட்டியுள்ளன. மிகத் துல்லியமான மருத்துவச் சேவைக்காக நவீன ரோபோட்டிக் தொழில்நுட்பத்தைப் பயன்படுத்துவதில் இது ஒரு மாபெரும் முன்னேற்றமாகும். குடல் மற்றும் கல்லீரல், சிறுநீரகம், மகளிர் மருத்துவம், மார்பகம் மற்றும் தைராய்டு, குழந்தைகள் அறுவை சிகிச்சை, புற்றுநோய் அறுவைசிகிச்சை மற்றும் இதயவியல் என பல்வேறு மருத்துவப் பிரிவுகளில் இந்த ரோபோட்டிக் சிகிச்சைகள் உள்ளடக்கியுள்ளன.

முதன்முதலில் இம்மருத்துவமனைகள் அறிமுகப்படுத்தியுள்ளன

தென் தமிழகத்தில் ரோபோ உதவியுடன் செய்யப்படும் பல அறுவைசிகிச்சை முறைகளை முதன்முதலில் இம்மருத்துவமனைகள் அறிமுகப்படுத்தியுள்ளன. கணையம், உணவுக்குழாய், கல்லீரல், இரைப்பை மற்றும் பெருங்குடல் போன்ற உறுப்புகளில் ஏற்படும் சிக்கலான பிரச்னைகளுக்கு ரோபோட்டிக் தொழில்நுட்பத்தை இப்பகுதியில் முதல்முறையாகப் பயன்படுத்திய பெருமை இம்மருத்துவமனையையே சாரும். கடந்த பத்து வருடங்களாக, நவீன ரோபோட்டிக் தொழில்நுட்பங்களைத் தொடர்ந்து பயன்படுத்தி, தங்களின் அறுவைசிகிச்சைத் திறனை இவர்கள் மேம்படுத்தி வருகின்றனர்.

டா வின்சி' ரோபோட்டிக் சிஸ்டம்

2016-ஆம் ஆண்டு முதல் பயன்பாட்டில் உள்ள 'டா வின்சி' ரோபோட்டிக் சிஸ்டம் மூலம் சுமார் 350 அறுவைசிகிச்சைகளும், இந்த ஆண்டின் தொடக்கத்தில் அறிமுகப்படுத்தப்பட்ட நவீன 'டூமாய்' ரோபோட்டிக் சிஸ்டம் மூலம் 150-க்கும் மேற்பட்ட அறுவை சிகிச்சைகளும் செய்யப்பட்டுள்ளன. இந்த நவீன கருவிகள், வழக்கமான மற்றும் லேப்ராஸ்கோப்பிக் தொழில்நுட்பங்களுக்கு பக்கபலமாக இருப்பதுடன், நோயாளிகளின் தனிப்பட்ட உடல்நிலைக்கேற்ப மிகச்சிறந்த சிகிச்சை முறையைத் தேர்வு செய்ய மருத்துவக் குழுவினருக்கு இவை பெரிதும் உதவுகின்றன.

மீனாட்சி சூப்பர் ஸ்பெஷாலிட்டி மருத்துவமனை

இது குறித்து மீனாட்சி சூப்பர் ஸ்பெஷாலிட்டி மருத்துவமனையின் மருத்துவ இயக்குநரும், குடல் மற்றும் இரைப்பை சிகிச்சை பிரிவின் முதுநிலை மருத்துவருமான டாக்டர் ரமேஷ் அர்த்தநாரி பேசுகையில்: “ரோபோ உதவியுடன் செய்யப்படும் அறுவை சிகிச்சைகளில் 500 என்ற மைல்கல்லை எட்டியிருப்பது, மருத்துவ நிபுணத்துவம், தொழில்நுட்ப முன்னேற்றம் மற்றும் பல்வேறு துறைகளை உள்ளடக்கிய கூட்டு முயற்சி ஆகியவற்றில் எமது தொடர்ச்சியான அர்ப்பணிப்பைக் காட்டுகிறது. கடந்த 10 ஆண்டுகளில், இத்தொழில்நுட்பத்தின் மூலம் மிகவும் சிக்கலான அறுவைசிகிச்சைகளையும் எங்களால் மிகத்துல்லியமாகவும், பாதுகாப்பாகவும் செய்ய முடிகிறது. இனிவரும் காலங்களில், உறுப்பு மாற்று அறுவைசிகிச்சை உள்ளிட்ட பல்வேறு சிகிச்சைகளுக்கும் ரோபோட்டிக் தொழில்நுட்பத்தை விரிவுபடுத்த உள்ளோம். தென் தமிழக மக்களுக்கு மிகச்சிறந்த மற்றும் நவீன மருத்துவச் சிகிச்சைகள் எளிதாகக் கிடைப்பதை உறுதி செய்வதே எமது முக்கிய நோக்கமாகும்,” என்று தெரிவித்தார்.

குடல் மற்றும் இரையக குடலியல் அறுவைசிகிச்சை பிரிவின் தலைவரும் முதுநிலை நிபுணருமான டாக்டர் மோகன் கூறுகையில்: “ரோபோட்டிக் அறுவைசிகிச்சையானது, அதிக துல்லியம், மேம்பட்ட கருவி கட்டுப்பாடு மற்றும் மேம்படுத்தப்பட்ட முப்பரிமாணக் காட்சிப்படுத்தல் ஆகியவற்றை வழங்கும் வகையில் பரிணாம வளர்ச்சி கண்டுள்ளது. சிக்கலான அறுவைசிகிச்சைகளைக் கூட மருத்துவர்களால் எளிதாகச் செய்ய முடிகிறது. இத்தொழில்நுட்ப வளர்ச்சியானது எதிர்காலத்தில் 'டெலி-சர்ஜரி' எனப்படும் தொலைதூர அறுவைசிகிச்சைகளுக்கும் வழிவகுக்கும். இதன்படி, மருத்துவர்கள் வேறு இடத்தில் இருந்தபடியே இணையத்தின் மூலம் நோயாளிகளுக்கு அறுவைசிகிச்சை செய்ய முடியும். ரோபோ உதவியுடன் செய்யப்படும் அறுவை சிகிச்சையின் முக்கிய நன்மைகளில், அறுவை சிகிச்சையின் துல்லியம் அதிகரித்தல், இரத்த இழப்பு மற்றும் அறுவை சிகிச்சைக்குப் பிந்தைய வலி குறைதல் மற்றும் மருத்துவமனையில் தங்கும் காலம் குறைதல் ஆகியவை அடங்கும். லேப்ராஸ்கோப்பி மூலம் செய்யப்படும் பல அறுவைசிகிச்சைகளை, ரோபோட்டிக் தொழில்நுட்பத்தின் மூலம் இன்னும் தெளிவாகவும், துல்லியமாகவும் செய்ய முடியும். தொழில்நுட்பம் மேலும் வளரும்போது, பெரிய தழும்புகளற்ற, சிறிய துளைகள் மூலம் பல சிக்கலான அறுவைசிகிச்சைகளை எளிதாகச் செய்ய முடியும்,” என்றார்.

காசநோய் ஒழிப்புக்கு இளைஞர் சக்தி: 'ஜோஷ்' அணியை தொடங்கி வைத்தார் ஆட்சியர்!

அருண் சின்னதுரை — Fri, 9 Oct 2026 11:56:59 +0530

காச நோய் இல்லா இந்தியா இயக்கதினை - 'ஜோஷ்' (JOSH TEAM) மாவட்ட ஆட்சித்தலைவர் ஷரண்யா அறி, தொடங்கி வைத்தார்.

காசநோய் இல்லா இந்தியா இயக்கம் துவக்க விழா

விருதுநகர் மாவட்ட ஆட்சியர் அலுவலகத்தில் இன்று(08.10.2026) காசநோய் இல்லா இந்தியா இயக்கம் துவக்க விழா மாவட்ட ஆட்சித்தலைவர் ஷரண்யா அறி, தலைமையில் நடைபெற்றது. நிகழ்வில் காசநோய் குறித்த விழிப்புணர்வு உறுதிமொழியினை மாவட்ட ஆட்சித்தலைவர் அவர்கள் தலைமையில் அனைவரும் ஏற்றுக்கொண்டனர். இதனைத் தொடர்ந்து 2025-ஆம் ஆண்டில் காசநோய் இல்லாத 24 ஊராட்சிகளுக்கு பாராட்டு சான்றிதழ்களையும், காசநோய் ஒழிப்பு குறித்த பல்வேறு விழிப்புணர்வு போட்டிகளில் வெற்றி பெற்ற தன்னார்வ மாணவர்களுக்கு பாராட்டு சான்றிதழ்களையும் மாவட்ட ஆட்சித்தலைவர் அவர்கள் வழங்கினார். இந்நிகழ்ச்சியில் மாவட்ட ஆட்சித்தலைவர் ஷரண்யா அறி தெரிவித்ததாவது, காசநோய் இல்லா இந்தியா இயக்கத்தின் ஒரு முக்கியப் பகுதியாக, காசநோய் ஒழிப்பில் இளைஞர்களின் பங்களிப்பை மேம்படுத்துவதற்காக 'ஜோஷ்' (JOSH - Joint Squad for Health) அணிகள் தொடங்கி வைக்கப்பட்டுள்ளது. இந்த அணிகள் காசநோய் தொற்று குறித்து வீடு தோறும் நடைபெறும் கணக்கெடுப்பில், மை பாரத் (My Bharat) தன்னார்வலர்கள் மற்றும் தேசிய மாணவர் படையினர் (NCC) இணைந்து கண்காணிப்பு அலுவலரின் மேற்பார்வையில் மதிப்பீடு செய்வார்கள். இம்முயற்சியின் மூலம் சமூகத்தின் பங்கேற்பை வலுப்படுத்துவதுடன், காசநோய் அறிகுறிகள் உள்ளவர்கள் தாமதமின்றி மருத்துவப் பரிசோதனை மேற்கொண்டு, உரிய நோயறிதல் மற்றும் சிகிச்சை சேவைகளைப் பெற ஊக்குவிக்கப்படுவார்கள்.

மறைமுக காசநோயின் தொற்றால் பாதிக்கப்பட்டுள்ளனர்.

மக்கள் தொகை அடர்த்தி அதிகமாக உள்ள இந்தியாவில் மக்கள் வெளியே தெரியாத மறைமுக காசநோயின் தொற்றால் பாதிக்கப்பட்டுள்ளனர். 2030ம் ஆண்டிற்குள் காசநோயை ஒழித்துவிட வேண்டும் என்கிற நோக்கில் நடவடிக்கைகளை அரசு எடுத்து வருகிறது. விருதுநகர் மாவட்டத்தில் 1450 காசநோய் பயனாளிகள் சிகிச்சை எடுத்து வருகின்றனர். 11 காசநோய் அலகுகளிலும் CBNAAT காசநோய் சளி பரிசோதனை அனைத்து அரசு மருத்துவமனைகளிலும் இலவசமாக வழங்கப்படுகின்றது. நடமாடும் எக்ஸ்ரே வாகனம் மூலம் (X -Ray) வீடுகளுக்கே சென்று இலவசமாக பரிசோதனை செய்யப்படுகின்றது. 2030-ஆம் ஆண்டிற்குள் காசநோயை முடிவுக்கு கொண்டு வர முனைப்புடன் செயல்படும் அரசோடு, அனைத்து அரசு, தனியார் துறைகள், இளைஞர்கள் மற்றும் சமூக நல அக்கறை உள்ள நிறுவனங்கள் இணைந்து செயல்பட்டு காசநோய் இல்லாத இந்தியாவை உருவாக்கிட வேண்டும் என மாவட்ட ஆட்சித்தலைவர் தெரிவித்தார். இந்நிகழ்ச்சியில் விருதுநகர் அரசு மருத்துவக்கல்லூரி முதல்வர் மரு.அமுதா ராணி, மாவட்ட சுகாதார அலுவலர்(விருதுநகர்) மரு.யசோதாமணி, துணை இயக்குநர் (காசம்) மரு.கே.பி.இராஜன், இளைஞர் நல அலுவலர் திருமதி காவியா முத்துலட்சுமி, மாவட்ட காசநோய் திட்ட ஒருங்கிணைப்பாளர்கள், ஊராட்சி செயலாளர்கள், தன்னார்வ மற்றும் தேசிய மாணவர் படை மாணவர்கள் உட்பட பலர் கலந்து கொண்டனர்.

குழந்தை இதய சிகிச்சையில் சென்னை அப்போலோவின் உலக சாதனை !! திறந்த இதய அறுவை சிகிச்சைக்கு விடை

சேர்மசாமி — Tue, 6 Oct 2026 19:15:27 +0530

"இதய நோய் - ஃபோன்டன் சிகிச்சை"

ஒற்றை வென்ட்ரிக்கிள் இதய நோய் உள்ள குழந்தைகளுக்கு , ஃபோன்டன் சிகிச்சை முறை செய்வதன் மூலம் திறந்த இதய அறுவை சிகிச்சைக்கு ஒரு மாற்று வழியை வழங்குகிறது. சென்னை அப்போலோ குழந்தைகள் மருத்துவமனை , உலகில் முதல் முறையாக குழந்தைகளுக்கான இதய சிகிச்சையில் உலக சாதனை படைத்துள்ளது. இதை அறிவிக்கும் நிகழ்வாக சென்னை தேனாம்பேட்டையில் உள்ள தனியார் விடுதியில் அப்பல்லோ நிறுவனம் சார்பாக அவர்கள் செய்த சாதனையை அறிவிக்கும் நிகழ்ச்சி நடைபெற்றது.

அப்போது சிகிச்சை குறித்து பேசிய டாக்டர் சி.எஸ். முத்துகுமரன் ;

ஒற்றை வென்ட்ரிக்கிள் இதய நோய் உள்ள குழந்தைகள் , ஃபோன்டான் நிலைக்கு முன்பாகப் பல பெரிய இதய அறுவை சிகிச்சைகளுக்கு உள்ளாகின்றனர். உடற்கூறியலும் இரத்த ஓட்ட இயக்கவியலும் பொருத்தமாக இருந்தால் , வடிகுழாய் அடிப்படையிலான அணுகுமுறையானது , மற்றொரு பெரிய திறந்த இதய அறுவை சிகிச்சை இன்றி ஃபோன்டான் சிகிச்சை முறையை நிறைவு செய்ய நமக்கு உதவும்.

ஏற்கெனவே ஒரு பெரிய இதய சிகிச்சையை மேற்கொண்ட ஒரு குழந்தைக்கு, மற்றொரு பெரிய செயல்முறையின் சுமையைக் குறைப்பதே இதன் நோக்கமாகும் என்று கூறினார்.

மேலும் இது குறித்து இயக்குநர் டாக்டர் நெவில் ஏ. ஜி. சாலமன் பேசிய போது ,

இது அறுவை சிகிச்சைக்குப் பதிலாக ஒரு புதிய நுட்பத்தைப் பயன்படுத்துவது பற்றியது அல்ல. ஒவ்வொரு குழந்தைக்கும் சிறந்த எதிர்காலத்தை தீர்மானிப்பதற்காக தான். மேலும் குழந்தை இதயவியல் மற்றும் இதய அறுவை சிகிச்சையை ஒன்றிணைப்பதே இதன் நோக்கம் என்று கூறினார்.

தொடர்ந்து அப்போலோ மருத்துவமனைகளின் வியூக இயக்குநர் சிந்துரி ரெட்டி கூறுகையில் ;

ஒரு சிக்கலான நோய்க்கு எவ்வாறு சிகிச்சை அளிக்கலாம் என்பதை நாம் ஒவ்வொரு முறையும் மறுபரிசீலனை செய்யும் போது, ஒரு குழந்தைக்கும் அவர்களது குடும்பத்திற்கும் என்ன நடக்குமோ அதை மட்டுமே கூறி செயல்படுத்துகிறோம்.

பெர்குடேனியஸ் ஃபோன்டன் செயல்முறைகளை எட்டியிருப்பது அந்த அணுகுமுறையைப் பிரதிபலிக்கிறது. இது, முறையாகத் தேர்ந்தெடுக்கப்பட்ட குழந்தைகளுக்கு மற்றொரு பெரிய திறந்த இதய அறுவை சிகிச்சைக்கு மாற்றாக, குறைந்த பாதிப்பை ஏற்படுத்தும் ஒரு சிகிச்சை முறையை வழங்குகிறது.

அப்போலோவில் , மருத்துவ நிபுணத்துவம், தொழில்நுட்பம் மற்றும் புதுமைகளை ஒன்றிணைத்து, எங்கள் இளம் நோயாளிகளுக்கு என்ன சாத்தியம் என்பதை மாற்றுவதன் மூலம் , அந்த எல்லையைத் தொடர்ந்து விரிவுபடுத்துவதே எங்கள் லட்சியமாகும் என தெரிவித்தார்.

இந்நிகழ்ச்சியில் , அப்போலோ மருத்துவமனையின் சென்னை மண்டலத்தின் தலைமைச் செயல் அதிகாரி டாக்டர் இளங்குமரன் காளிமூர்த்தி, அப்போலோ மகளிர் மற்றும் குழந்தைகள் மருத்துவமனைகள், சென்னையின் பிரிவுத் தலைவர் டாக்டர் சுஷிலா நாராயணசாமி ஆகியோர் மருத்துவக் குழுவினருடன் கலந்து கொண்டனர்.

108 ஆம்புலன்ஸ் ஊழியர்கள் வேலை நிறுத்தம்: நவம்பர் 4 முதல் தமிழகத்தில் சேவை முடங்கும் அபாயம்!

அருண் சின்னதுரை — Mon, 5 Oct 2026 12:57:29 +0530

கோரிக்கைகளை தமிழ்நாடு அரசு நிறைவேற்றவில்லை என்றால் நவம்பர் 4 ஆம் தேதி இரவு 8 மணி முதல் கால வரையற்ற வேலை நிறுத்த போராட்டத்தில் ஈடுபட திட்டமிட்டுள்ளதாகவும் தெரிவித்தனர்.

தொழிலாளர் தீர்ப்பாயம் தீர்ப்பை உடனடியாக அமல்படுத்த வேண்டும்

தமிழ்நாடு 108 அவசர ஊரில் தொழிலாளர்கள் சங்கத்தின் பொதுச் செயலாளர் இருளாண்டி மதுரை மாவட்ட ஆட்சியரிடம் மனு அளித்த பின்பு செய்தியாளர்களை சந்தித்து பேசுகையில்... "108 அவசர ஊர்தி சேவையை தமிழ்நாடு அரசு நேரடியாக ஏற்று நடத்த வேண்டும், தொழிலாளர் தீர்ப்பாயம் தீர்ப்பை உடனடியாக அமல்படுத்த வேண்டும், 8 மணி நேர வேலையை அமல்படுத்தி தொழிலாளர்களின் ஊதியப் பலன்களை பாதுகாக்க வேண்டும். 2026 ஆம் ஆண்டிற்கான ஊதிய உயர்வை 25 சதவீதமாக வழங்க வேண்டும், பெண் தொழிலாளர்களுக்கு சம்பளத்துடன் ஒரு ஆண்டு மகப்பேறு விடுப்பு மற்றும் மருத்துவ காப்பீடு 5 லட்சமாக உயர்த்த வேண்டும், பணியின் போது 50 இலட்சம், பணிக்கு வெளியே 30 இலட்சம் என உயிரிழப்புக்கான காப்பீட்டுத் தொகை உயர்த்தி வழங்க வேண்டும், உள்ளிட்ட 11 அம்ச கோரிக்கைகளை வலியுறுத்தி அக்டோபர் 14 ஆம் தேதி மதுரை பழங்காநத்தத்தில் பட்டினி போராட்டத்தில் ஈடுபட உள்ளோம். இதன் தொடர்ச்சியாக அக்டோபர் 3 ஆம் தேதி இரவு 8 மணி முதல் 4 ஆம் இரவு 8 மணி வரை 24 மணி நேர வேலை நிறுத்த போராட்டம் நடத்துகிறோம், கோரிக்கைகளை தமிழ்நாடு அரசு நிறைவேற்றவில்லை என்றால் நவம்பர் 4 ஆம் தேதி இரவு 8 மணி முதல் கால வரையற்ற வேலை நிறுத்த போராட்டத்தில் ஈடுபட திட்டமிட்டுள்ளோம்" என கூறினார்.

108 ஆம்புலன்ஸ் ஊழியர்கள் வேலை நிறுத்தம் தமிழகத்தில் தொடர்ந்தால் மருத்துவ சேவை முடங்கும் அபாயம், ஏற்படும் என சொல்லப்படுகிறது.

சிவகங்கை செவிலியர் காலிப்பணியிடம்: சான்றிதழ்களை சமர்ப்பிக்க நாளை அக்டோபர் 3 கடைசி நாள்!

அருண் சின்னதுரை — Fri, 2 Oct 2026 13:22:12 +0530

03.10.2026 மாலை 5.00 மணிக்குள் நேரில் சமர்ப்பிக்குமாறு சம்மந்தப்பட்ட விண்ணப்பதாரர்கள் கேட்டுக் கொள்ளப்படுகிறார்கள்.

ஒப்பந்த அடிப்படையிலான செவிலியர் காலிப்பணியிடங்கள்

தேசிய நலவாழ்வு குழுமத்தின் கீழ் சிவகங்கை மாவட்டத்தில் ஒப்பந்த அடிப்படையிலான செவிலியர் காலிப்பணியிடங்களுக்கு விண்ணப்பங்கள் கடந்த 13.09.2026 முதல் 25.09.2026 வரை சிவகங்கை மாவட்ட சுகாதார அலுவலகத்தில் பெறப்பட்டது. பெறப்பட்ட பல விண்ணப்பங்களில் தேவையான சான்றிதழ்கள் இணைக்கப்படாத காரணத்தினால் இவ்விண்ணப்பங்களை முழுமையாக பரிசீலிப்பதில் சிரமம் ஏற்பட்டுள்ளது. எனவே விடுபட்ட சான்றிதழ்களை மாவட்ட நலவாழ்வுச் சங்கம், மாவட்ட சுகாதார அலுவலர், மாவட்ட சுகாதார அலுவலகம், முதன்மை கல்வி அலுவலர் அலுவலக மேல்தளம், மாவட்ட ஆட்சியர் வளாகம், சிவகங்கை - 630562 என்ற முகவரிக்கு 03.10.2026 மாலை 5.00 மணிக்குள் நேரில் சமர்ப்பிக்குமாறு சம்மந்தப்பட்ட விண்ணப்பதாரர்கள் கேட்டுக் கொள்ளப்படுகிறார்கள். மேலும், இது தொடர்பான விபரங்களுக்கு மாவட்ட சுகாதார அலுவலக தொலைபேசி எண். 04575 240524 என்ற எண்ணை தொடர்பு கொள்ளலாம் மற்றும் விடுபட்ட விபரங்கள் அடங்கிய எக்ஸல் படிவத்தினை சிவகங்கை மாவட்ட வலைதளம் https://sivaganga.nic.in/ வேலைவாய்ப்பு பிரிவில் தாங்கள் பதிவிறக்கம் செய்து கொள்ளலாம் என மாவட்ட ஆட்சித்தலைவர் ப.ஆகாஷ், தெரிவித்துள்ளார்.

மதுரையில் NIRS-IVUS தொழில்நுட்பத்தில் 100 இதய சிகிச்சை மைல்கல்!

அருண் சின்னதுரை — Wed, 30 Sep 2026 11:17:36 +0530

NIRS-IVUS தொழில்நுட்பத்தின் உதவியுடன் இதயத்தமனி மருத்துவ சிகிச்சை செயல்முறைகளில் 100 என்ற மைல்கல்லை எட்டிய மீனாட்சி சூப்பர் ஸ்பெஷாலிட்டி மருத்துவமனை.

100 இதய தமனி (கரோனரி) சிகிச்சை

தென்தமிழகத்தின் முதன்மை மருத்துவமனையான மீனாட்சி சூப்பர் ஸ்பெஷாலிட்டி மருத்துவமனை (MSSH), மதுரை அதிநவீன NIRS மற்றும் IVUS ஒருங்கிணைந்த இமேஜிங் தொழில்நுட்பத்தைப் பயன்படுத்தி 100 இதய தமனி (கரோனரி) சிகிச்சைகளை வெற்றிகரமாக செய்து, மேம்பட்ட இதய சிகிச்சையில் ஒரு முக்கிய சாதனையை நிகழ்த்தியுள்ளது. சிக்கலான இதய தமனி நோய்களைக் கண்டறிதல், அதன் தன்மையை ஆராய்தல் மற்றும் சிகிச்சை அளிப்பதில் உதவும் இமேஜிங் திறனை மேம்படுத்தும் இந்த அதிநவீன இரட்டை-தொழில்நுட்பத்தை இப்பிராந்தியத்தில் முன்னோடியாக அறிமுகப்படுத்திய பெருமையை MSSH பெறுகிறது. புதிய NIRS-IVUS தளமானது ஒன்றுக்கொன்று துணையாக உள்ள தகவல்களின் இரண்டு வடிவங்களை ஒரே இமேஜிங் அமைப்பில் ஒருங்கிணைத்து வழங்குகிறது. ரத்தக்குழாயின் உட்பகுதி (lumen), அடைப்பின் அளவு, ரத்தக்குழாயின் பருமன் மற்றும் திசுக்களின் அமைப்பு பற்றிய விரிவான தகவல்களை IVUS வழங்குகிறது. அதே நேரத்தில், இதய தமனியில் படிந்துள்ள கொழுப்புப் படிமங்கள் பற்றிய தகவல்களை NIRS வழங்குகிறது. ஆஞ்சியோகிராபி ரத்தக்குழாயின் இரு பரிமாண வெளித்தோற்றத்தை மட்டுமே காட்டுவதாலும் கொழுப்பு படிமங்களின் கட்டமைப்பை துல்லியமாக அறிய இந்த நவீன தொழில்நுட்பம் மிகவும் அவசியமாகிறது.

ரத்தக்குழாய் மீதான இமேஜிங்

ரத்தக்குழாய் மீதான இமேஜிங் திறனை தொடர்ந்து மேம்படுத்தி வரும் MSSH இரத்த நாளத்தினுள் அதிநவீன இமேஜிங் செயல்பாட்டை அறிமுகம் செய்து, பயன்படுத்துவதில் முன்னோடியாகத் திகழ்கிறது. 2006 முதல் IVUS தொழில்நுட்பத்தையும், 2015-ல் ஒளியியல் ஒத்திசைவு டோமோகிராபி (OCT) தொழில்நுட்பத்தையும் இந்த மருத்துவமனை அறிமுகப்படுத்தியது. 2017-ஆம் ஆண்டில் ஒருங்கிணைந்த OCT அமைப்பைப் பெற்றதன் மூலம், இந்தியா மற்றும் ஆசியா-பசிபிக் பிராந்தியத்திலேயே இந்த நவீன சாதனத்தை நிறுவிய முதல் மருத்துவ மையம் என்ற பெருமையை MSSH பெற்றது. இரத்தநாளத்திற்குள் இமேஜிங் செயல்முறையை இதுவரை 15,000-க்கும் மேற்பட்ட நோயாளிகளுக்கு வெற்றிகரமாக செய்திருக்கும் இம்மையம், OCT செயல்முறைக்கான பயிற்சி மையமாகவும் திகழ்கிறது. NIRS-IVUS செயல்தளத்தின் அறிமுகம், முன்னேற்றத்தை நோக்கிய இந்தத் தொடர்ச்சியான பரிணாம வளர்ச்சியின் அடுத்த கட்டமாகும். 100 மருத்துவ செயல்முறைகளை வெற்றிகரமாக முடித்துள்ள MSSH, இத்தொழில்நுட்பத்தில் சிறப்பான மருத்துவ அனுபவத்தையும், திறனையும் பெற்றிருக்கிறது. சிக்கலான இதய தமனி சிகிச்சைகளுக்கு உட்படும் நோயாளிகளின் மருத்துவ மேலாண்மையில் இந்த நவீன செயல்முறையை சிறப்பாக ஒருங்கிணைத்து வழங்குகிறது.

NIRS தொழில்நுட்பம் ஏன் முக்கியமானது?

இதய தமனியில் உள்ள அடைப்பில் படிந்துள்ள கொழுப்பை அடையாளம் கண்டு அதன் அளவை துல்லியமாக கணக்கிடும் திறனே NIRS தொழில்நுட்பத்தின் தனித்துவமான பலங்களில் ஒன்றாகும். வெறும் ஆஞ்சியோகிராபியால் மட்டும் அடைப்பின் தன்மையை அறிய முடியாது என்பதால், கொழுப்பு நிறைந்த அடைப்பை கண்டறிவது மருத்துவ ரீதியாக முக்கியமானது. NIRS அமைப்பானது, கொழுப்பு-மையச் சுமை குறியீடு (LCBI) உட்பட கொழுப்பின் அளவு குறித்த தெளிவான தகவல்களை உருவாக்குகிறது. இது, ரத்தக்குழாய் சுருக்கத்தின் அளவை அளவிடுவதற்கும் கூடுதலாக, அடைப்பின் தன்மையையும் புரிந்துகொள்ள இதயநோய் நிபுணர்களுக்கு உதவுகிறது. இந்த கூடுதல் தகவல்கள் சிக்கலான அல்லது நடுத்தர அளவிலான அடைப்புகள் உள்ளவர்கள், கடுமையான இதய நோய்க்குறிகள் உள்ளவர்களுக்கு சிகிச்சையளிக்க மிகவும் பயனுள்ளதாக இருக்கும். மேலும், நோயாளிகளுக்கு தேவைப்படும் கொழுப்பு குறைப்பு சிகிச்சையின் தீவிரத்தன்மை மற்றும் நீண்ட கால ஆபத்து-காரணி மேலாண்மை குறித்த முடிவுகளை மருத்துவர் எடுக்கவும் இது உதவும். OCT இமேஜிங்கிற்கு தேவைப்படுவது போல கூடுதல் 'கான்ட்ராஸ்ட்' சாயத்திரவம் இல்லாமல் NIRS-IVUS இந்த தகவலை வழங்குகிறது என்பது முக்கியமானது. சிறுநீரகக் கோளாறு உள்ள நோயாளிகளுக்கோ அல்லது சிக்கலான சிகிச்சைகளின் போது மீண்டும் மீண்டும் இமேஜிங் செய்ய வேண்டிய நிலை ஏற்படும்போதோ, கான்ட்ராஸ்ட் மருந்தின் பயன்பாட்டைக் குறைக்க இது மிகவும் உதவியாக இருக்கும். மீனாட்சி சூப்பர் ஸ்பெஷாலிட்டி மருத்துவமனையின் இடையீட்டு இதயவியல் சிகிச்சைப் பிரிவின் இயக்குநர் டாக்டர் S. செல்வமணி இது குறித்து கூறியதாவது: "ஒரு ரத்தக்குழாய் அடைப்பை ஆஞ்சியோகிராம் காட்டும் தோற்றத்திற்கும் அப்பால் சென்று பார்க்க மருத்துவருக்கு உதவுவதே NIRS-IVUS தொழில்நுட்பத்தின் சிறப்பாகும். IVUS ரத்தக்குழாய் மற்றும் அடைப்பின் அமைப்பு பற்றிய தகவல்களை வழங்குகிறது. NIRS, அடைப்பில் உள்ள கொழுப்பின் அளவு பற்றிய தகவலை சேர்த்து தருகிறது. இந்த இரண்டு தகவல்களும் இணையும் போது நோயாளிகளின் இதய நோய் குறித்த முழுமையான சித்திரம் நமக்குக் கிடைக்கிறது."

சிக்கலான இதய தமனி சிகிச்சைகளில் இதன் பயன்பாடுகள்

இதய இரத்தக் குழாய்களில் உள்ள கால்சியம் படிந்த சிக்கலான அடைப்புகளில் ஸ்டென்ட் பொருத்துவதும் அதை விரிவாக்குவதும் மிகவும் சவாலானது. அத்தகைய சூழ்நிலைகளில் IVUS பெரிதும் உதவியாக இருக்கும். ரத்தக்குழாயின் அளவு மற்றும் அடைப்பின் தன்மையைத் தீர்மானிக்கவும், நவீன தொழில்நுட்பங்களைப் பயன்படுத்துவதற்கும் இரத்த நாளத்திற்குள் படம் பிடிக்க இந்த உத்தி உதவுகிறது. மாரடைப்புக்கான முதன்மை ஆஞ்சியோபிளாஸ்டி சிகிச்சையின் போது, இந்தத் தொழில்நுட்பங்கள் கூடுதல் தகவல்களை வழங்கி சிகிச்சையின் முடிவை மதிப்பிட உதவுகின்றன. வழக்கமான ஆஞ்சியோகிராபி மூலம் பெற முடியாத, கொழுப்பு நிறைந்த அடைப்புகளைக் கண்டறியும் திறனை NIRS வழங்குகிறது.

விரிவான மற்றும் அதிநவீன இமேஜிங் வசதிகள்

NIRS-IVUS சாதன அறிமுகத்தின் மூலம், IVUS, OCT மற்றும் NIRS-IVUS உள்ளிட்ட அனைத்து முக்கிய அதிநவீன இமேஜிங் வசதிகளையும் MSSH கொண்டுள்ளது. MSSH-ல் வெற்றிகரமாக செய்யப்பட்டிருக்கும் இந்த 100 NIRS-IVUS இமேஜிங் செயல்முறை சிகிச்சைகள், மதுரை மற்றும் அதனைச் சுற்றியுள்ள பகுதி மக்களுக்கு அதிநவீன இதய சிகிச்சை தொழில்நுட்பங்களை வழங்குவதற்கான மருத்துவமனையின் தொடர் செயல்பாட்டின் ஒரு முக்கிய மைல்கல்லாகும்.