Fact Check: பாஜக கூட்டணிக்கு எதிர்ப்பு.. போர்க்கொடி தூக்கும் அதிமுக மூத்த தலைவர்கள்.. என்னாச்சு?

TN TRB 2025: ஊழல் முறைகேடுகளை நிகழ்த்த சூழ்ச்சியா? பட்டதாரி ஆசிரியர் தேர்வில் அவசரம் ஏன்? சீமான் கேள்வி!

க.சே.ரமணி பிரபா தேவி — Tue, 7 Oct 2025 17:14:04 +0530

முதுகலை பட்டதாரி ஆசிரியர் பணித்தேர்வினை தமிழ்நாடு அரசு உடனடியாக ஒத்தி வைக்க வேண்டும் என்று நாம் தமிழர் தலைமை ஒருங்கிணைப்பாளர் சீமான் தெரிவித்துள்ளார்.

இதுகுறித்து இன்று அவர் வெளியிட்டுள்ள எக்ஸ் பதிவு:

’’தமிழ்நாடு ஆசிரியர் தேர்வு வாரியம் நடத்துகின்ற முதுநிலை பட்டதாரி ஆசிரியர் பணிக்கான போட்டித் தேர்வை ஒத்திவைக்க வேண்டும் என்ற தேர்வர்களின் கோரிக்கையானது மிக மிக நியாயமானது. அதனை ஏற்க மறுத்து, வலுக்கட்டாயமாகத் தேர்வினை அறிவித்த தேதியில் ஆசிரியர் தேர்வு வாரியம் நடத்துவது என்பது வன்மையான கண்டனத்துக்கு உரியது.

முதுநிலை பட்டதாரி ஆசிரியர் தேர்வு பணிக்கான பாடத்திட்டம் மாற்றி அமைக்கப்பட்டிருக்கும் நிலையில், அதற்கேற்ப கால அவகாசம் வழங்க வேண்டும் என்ற தேர்வெழுதும் ஆசிரியப்பெருமக்களின் கோரிக்கை மிகமிக நியாயமானதும், அவர்களின் அடிப்படை உரிமையும் ஆகும். அதனை திமுக அரசு ஏற்க மறுப்பது பெருங்கொடுமையாகும்.

திமுக அரசு உணரத் தவறியதேன்?

இதற்கு முன் பல அரசுப்பணி தேர்வுகளும், அதன் முடிவுகளும், பணி நியமன ஆணை வழங்குதலும் ஆண்டுக் கணக்கில் எவ்வித காரணமுமின்றி, ஒத்தி வைக்கப்பட்ட நிலையில், தேர்வர்களின் நியாயமான கோரிக்கையை ஆசிரியர் தேர்வு வாரியம் ஏற்க மறுப்பது ஏன்? தேர்வு எழுதும் பட்டதாரி ஆசிரியர்களின் பக்கம் உள்ள நியாயத்தை திமுக அரசு உணரத் தவறியதேன்?

அவசர அவசரமாக முதுநிலை பட்டதாரி ஆசிரியர் பணி தேர்வினை நடத்தி முடிக்க திமுக அரசு திட்டமிடுவது, ஊழல் முறைகேடுகளை நிகழ்த்தும் சூழ்ச்சியோ என தோன்றுகின்றது.

ஆகவே, தேர்வு எழுதும் ஆசிரியப்பெருமக்களின் நலன் காக்கும் வகையில், தமிழ்நாடு ஆசிரியர் தேர்வு வாரியம் நடத்துகின்ற முதுநிலை பட்டதாரி ஆசிரியர் பணிக்கான போட்டித் தேர்வை தேவையான கால அவகாசம் வழங்கி, நடத்த வேண்டுமெனவும், 12.10.2025 அன்று நடத்தத் திட்டமிட்டுள்ள தேர்வினை உடனடியாக ஒத்தி வைக்க வேண்டுமெனவும் வலியுறுத்துகிறேன்’’.

இவ்வாறு சீமான் தெரிவித்துள்ளார்.

ரூ.500 நோட்டுகள் இனி ATM-ல் கிடைக்காதா? வதந்திக்கு முற்றுப்புள்ளி வைத்த மத்திய அரசு! உண்மை என்ன?

ஜேம்ஸ் — Mon, 4 Aug 2025 20:34:47 +0530

செப்டம்பர் முதல் ஏடிஎம்களில் ரூ.500 நோட்டுகள் கிடைக்காது என்று தகவல் பரவிய நிலையில் அதனை மத்திய அரசு வதந்தி என மறுத்துள்ளது

பரவிய வதந்தி:

வாட்ஸ்ஆப்பில் செப்டம்பர் 30 ஆம் தேதிக்குள் ஏடிஎம்கள் மூலம் ரூ.500 நோட்டுகளை வழங்குவதை நிறுத்துமாறு இந்திய ரிசர்வ் வங்கி (ஆர்பிஐ) உத்தரவிட்டுள்ளதாக தவறான செய்தி பரவியது.. இருப்பினும், அத்தகைய உத்தரவு எதுவும் பிறப்பிக்கப்படவில்லை என்று மத்திய அரசு தெரிவித்துள்ளது. மார்ச் 31, 2026 ஆம் ஆண்டுக்குள் 90 சதவீத ஏடிஎம்கள் ரூ.500 நோட்டுகளை வழங்குவதை நிறுத்திவிடும் என்றும் இவற்றில், 75 சதவீதம் பேர் செப்டம்பர் 30 ஆம் தேதிக்குள் ஏடிஎம்களில் ரூ.500 ஐ வைத்திருக்க மாட்டார்கள் அந்த தவறான வாட்ஸ் ஆப் மேசேஜில் தெரிவிக்கப்பட்டிருந்தது

மேலும், இந்த செய்தி நாட்டு மக்களுக்கு ரூ.500 நோட்டுகளைப் பயன்படுத்த வேண்டாம் என்று அறிவுறுத்துகிறது. எதிர்காலத்தில் ரூ.100 மற்றும் ரூ.200 நோட்டுகள் மட்டுமே ஏடிஎம்கள் மூலம் கிடைக்கும் என்று அந்த செய்தி கூறுகிறது.

PIB மறுப்பு

இதன் பின்னர், பத்திரிகை தகவல் பணியகத்தின் உண்மை சரிபார்ப்பு பிரிவு இந்த செய்தி தவறு என்று வெளியிட்டுள்ளது. ரிசர்வ் வங்கி அத்தகைய எந்த அறிவுறுத்தல்களையும் வெளியிடவில்லை என்று அதில் தெரிவித்தது. மேலும் ரூ.500 நோட்டுகள் இன்னும் செல்லுபடியாகும் எக்ஸ் பதிவில் தெரிவித்தது, சமூக ஊடகங்களில் பரவலாகப் பரப்பப்படும் கூற்று தவறானது என்று PIB தெரிவித்துள்ளது. இதுபோன்ற தவறான தகவல்களை பொதுமக்கள் நம்ப வேண்டாம் என்று அறிவுறுத்தப்படுகிறது.

செப்டம்பர் 2025க்குள் ஏடிஎம்களில் இருந்து ரூ.500 நோட்டுகள் வழங்குவதை நிறுத்துமாறு வங்கிகளிடம் ரிசர்வ் வங்கி கேட்டுக் கொண்டதா? #WhatsApp இல் ஒரு தவறான செய்தி பரவி வருகிறது, இது குறித்து கூறப்பட்டுள்ளது. #PIBFactCheck, @RBI அப்படி எந்த உத்தரவும் பிறப்பிக்கப்படவில்லை, ரூ.500 நோட்டுகள் சட்டப்பூர்வமாக இருக்கும் என்று பதிவில் கூறப்பட்டுள்ளது. "இதுபோன்ற தவறான தகவல்களுக்கு ஏமாறாதீர்கள். இந்தத் தகவலை நம்புவதற்கு அல்லது பகிர்வதற்கு முன்பு எப்போதும் அதிகாரப்பூர்வ ஆதாரங்களில் இருந்து செய்திகளைச் சரிபார்க்கவும்" என்றும் அந்தப் பதிவில் கூறப்பட்டுள்ளது.

கடந்த மாதம் இதேப் போல் வதந்தி:

இதேபோன்ற ஒரு தகவல் கடந்த மாதம் சமூக ஊடகங்களில் வைரலானது. வாட்ஸ்அப்பிலும் பரவலாகப் பகிரப்பட்ட முந்தைய செய்தியில், 2026 ஆம் ஆண்டுக்குள் ஏடிஎம்களில் இருந்து ரூ.500 நோட்டுகளை படிப்படியாக அகற்ற ரிசர்வ் வங்கி திட்டமிட்டுள்ளதாகக் கூறப்பட்டது. அந்த நேரத்தில் பிஐபி உண்மைச் சரிபார்ப்பும் அந்தக் குற்றச்சாட்டுகளை மறுத்திருந்தது, அத்தகைய உத்தரவு எதுவும் பிறப்பிக்கப்படவில்லை என்று தெரிவித்தது

DMK Mathivathani Speech : ’’பட்டன கழட்டனுமா?பரீட்சை தான நடத்துற?’’பொளந்து கட்டிய மதிவதனி | NEET

ABP NADU — Mon, 5 May 2025 13:45:43 +0530

DMK Mathivathani Speech : ’’பட்டன கழட்டனுமா?பரீட்சை தான நடத்துற?’’பொளந்து கட்டிய மதிவதனி | NEET

ChatGPT Fake Aadhaar: Chat GPT-யில் போலி ஆதார் கார்டு? அது எப்படி திமிங்கலம் முடியும்! FACT Check

ஜேம்ஸ் — Fri, 4 Apr 2025 20:35:03 +0530

கடந்த வாரம் உலகம் முழுவதும் உள்ள பயனர்களுக்காக திறக்கப்பட்ட ChatGPT- யின் சொந்த பட உருவாக்க கருவி - GPT-4o உடனடி வெற்றியைப் பெற்றது. இந்த நிலையில் அதை வைத்து தற்போது போலி ஆதார் கார்டுகளை உருவாக்குவாதாக சமூக வலைதளங்களில் புகார் எழுந்தது. ஆகவே இது உண்மை தான என்பதை நாம் சோதித்து பார்த்து என்ன முடிவு கிடைத்தது என்பதை இந்த தொகுப்பில் காண்போம்.

போலி ஆதார் அட்டை:

ChatGPT- யின் மில்லியன் கணக்கான மக்கள் இதைப் பயன்படுத்தி ஸ்டுடியோ கிப்லி பாணி உருவப்படங்களை உருவாக்கியுள்ளதாக மதிப்பிடப்பட்டுள்ளது. இருப்பினும், மேலும் இதனால் தவறான பயன்பாடும் கண்டறியப்பட்டுள்ளது. அதாவது போலி ஆதார் அட்டைகள் மற்றும் பான் கார்டுகளை உருவாக்க ChatGPT-யின் AI மூலம் உருவாக்க முடியும் என்று தெரிகிறது.

இதனால் நாங்கள் Chat GPT-யிடம் ஒரு அமெரிக்க அதிபர் டொனால்ட் படத்தை வைத்து ஆதார் அட்டையை உருவாக்க முயற்சி செய்தோம்,

டொனால்ட் டிரம்பின் புகைப்படத்துடன் "55, ஆயிரம் விளக்குகள, சென்னை, தமிழ்நாடு" என்ற முகவரியுடன் "டொனால்ட் டிரம்ப்" என்ற பெயருடைய நபருக்கான ஆதார் கார்டு முன்மாதிரி ஒன்றை உருவாக்கவும் என்று கேட்டோம்

அதற்கு ChatGPT நெறிமுறை மற்றும் சட்டக் கொள்கைகளுக்கு இது எதிரானது என்றும், ஆதார் அட்டைகள் உட்பட, அரசாங்கத்தால் வழங்கப்பட்ட அடையாள ஆவணங்களை உருவாக்கவோ அல்லது கையாளவோ முடியாது. கல்வி அல்லது வடிவமைப்பு நோக்கங்களுக்காக உங்களுக்கு முன்மாதிரி தேவைப்பட்டால், ஃபோட்டோஷாப் அல்லது கேன்வா போன்ற வடிவமைப்புக் கருவிகளைப் பயன்படுத்தி பொதுவான அடையாள அட்டை உருவாக்கலாம், ஆனால் உண்மையான அரசாங்க லோகோக்கள், எண்கள் அல்லது தனிப்பட்ட தரவு இல்லாமல் உருக்கலாம். அதற்கு உங்களுக்கு உதவி தேவைப்பட்டால் எனக்குத் தெரியப்படுத்துங்கள்!

வடிவமைப்பு நோக்கங்களுக்காக சீரற்ற பெயர் மற்றும் முகவரியுடன் கற்பனையான ஆதார் பாணி அட்டையை உருவாக்கவும் என்று கேட்டபோது கீழே இருக்கும் புகைப்படத்தை தந்தது, உடனே பெயரை "டொனால்ட் டிரம்ப்" என்று மாற்றவும் என்று கூறினோம்.

உண்மையான அல்லது கற்பனையான தனிப்பட்ட விவரங்களைக் கொண்ட ஆதார் பாணி கார்டை என்னால் உருவாக்க முடியவில்லை. உங்களுக்கு வேறு ஏதாவது உதவி தேவைப்பட்டால் எனக்குத் தெரியப்படுத்துங்கள் என்று சொன்னது.

இதன் மூலம் உண்மையான பெயர்களை கொண்ட நபர்களில் பெயர்களை வைத்து போலி ஆதார் அட்டையை உருவாக்க முடியவில்லை என்று தெரிந்தது.

”இவரு சாகனும்" மோடிக்கு எதிராக பிரார்த்தனை செய்த பாதிரியார்.. தீயாய் பரவும் வீடியோ உண்மையா?

சுதர்சன் — Sat, 29 Mar 2025 16:08:29 +0530

பிரதமர் நரேந்திர மோடி, உத்தரபிரதேச முதல்வர் யோகி ஆதித்யநாத் மற்றும் மத்திய அமைச்சர்கள் அமித் ஷா மற்றும் நிர்மலா சீதாராமன் ஆகியோரை ஆசீர்வதிக்குமாறு தமிழில் ஒரு பாதிரியார் கேட்கும் பழைய காணொளி, அவர்களின் மரணத்திற்காக அவர் பிரார்த்தனை செய்ததாகக் கூறி தவறாக வைரலாகி வருகிறது.

இந்த காணொளி பழையது என்றும், 2024ஆம் ஆண்டு காணொளியாக இருக்கலாம் எனவும் பூம் கண்டறிந்தது. மேலும் தமிழில் பாதிரியார் அரசியல் தலைவர்கள் ஆசீர்வதிக்கப்பட வேண்டும் என்று பிரார்த்தனை செய்தார் என்பதை எங்களால் சரிபார்க்க முடிந்தது. அவர் பயன்படுத்திய “தொடுங்கப்பா” என்ற சொல்லுக்கு , “ஆசீர்வதியுங்கள்” என்பது பொருள். அதன் ஒலிப்பு ரீதிக்கு ஒத்த ’கொல்லுப்பா’ என்று அவர் கூறவில்லை.

"இந்தியாவின் பிரதமர் அலுவலகத்திற்கு எதிராக உயிருக்கு ஆபத்தான முழக்கத்தில் ஈடுபட்டுள்ள இந்த தேவாலயத்திலிருந்து அனைவரையும் கைது செய்யுங்கள் - இயேசு, தயவுசெய்து நரேந்திர மோடி, அமித் ஷா, நிர்மலா சித்தாரமன், மற்றும் யோகி ஆதித்யநாத் ஆகியவற்றைக் கொல்லுங்கள். இயேசுவே, அயோத்தி ராம் ஆலயத்தை அழித்து ஒரு தேவாலயத்தை கட்டுவதற்கான பலத்தை தாருங்கள்,’ என்ற கூற்றுடன் இந்த காணொளி வைரலானது.

BIG | “Jesus, please kill Narendra Modi, Amit Shah, Nirmala Sitharaman, & Yogi Adityanath. Jesus, give us the strength to destroy the Ayodhya Ram temple and build a church,"

- Says A Pastor In Tamil Nadu Church

The UP Police & NIA should immediately step in, as this is a direct… pic.twitter.com/BlICUKXpnf
— Ashwini Shrivastava (@AshwiniSahaya) January 2, 2025

இந்த காணொளியை சரிபார்க்க கோரி, எங்களின் உதவி எண்ணுக்கு (7700906588) அனுப்பிவைக்கப்பட்டது.

இது அரசியல் தலைவர்கள் உயிருக்கும், தேசிய பாதுகாப்புக்கும் நேரடி அச்சுறுத்தலையை ஏற்படுத்தும் என்று கோரி, உத்தரப்பிரதேச காவல்துறையினர் மற்றும் என்.ஐ.ஏ நடவடிக்கை எடுக்கவேண்டும் என்றும் இந்த கூற்றில் குறிப்பிடப்பட்டுள்ளது.

Fact Check:

கடந்த 2024ஆம் ஆண்டு ஜனவரி முதல் இந்த காணொளி வைரலாகியிருப்பதாக பூம் கண்டறிந்தது. அதே கூற்றுடன் இந்த காணொளி பேஸ்புக் மற்றும் எக்ஸ் தளத்தில் மீண்டும் இந்த ஆண்டு ஜனவரி மாதம் பகிரப்பட்டுள்ளது. பிரதமர் மோடி மற்றும் பிற அரசியல் தலைவர்களுக்காக பாதிரியார் ஆசீர்வாதம் கேட்கிறாரே தவிர, அவர்களை கொல்ல வேண்டும் என்று பிரார்த்தனை செய்யவில்லை என்பதையும் நாங்கள் சரிபார்த்தோம்.

நாங்கள் இந்த காணொளியை ஆராய்ந்தபோது, இது ஒரு சுவிசேஷ தேவாலயத்தில் நடக்கும் ஒரு பிரார்த்தனைக் கூட்டத்தைக் காட்டுகிறது என்பதை உறுதிப்படுத்த முடிந்தது. காணொளியில் உள்ள பாதிரியார் தமிழில் பேசுவதையும், பிரதமர் மோடி, மத்திய அமைச்சர்கள் அமித்ஷா, சீதாராமன் மற்றும் உ.பி முதல்வர் யோகி ஆதித்யநாத் ஆகியோரின் பெயரை குறிப்பிடுவதை சரிபார்க்கமுடிந்தது.

இதன் ஆடியோ பகுதியை மட்டும் நாங்கள் தனியாக பிரித்தெடுத்தோம். அதில், பாதிரியார் ’தொடுங்க’ மற்றும் "தொடுங்கப்பா" என்ற வார்த்தைகளை அவர்களின் பெயர்களுக்கு பின் பல முறை பயன்படுத்துவதை பூம் கண்டறிந்தது. தமிழில், ’தொடுங்க’ என்பதன் பொருள் ‘தொடுதல்’ ஆகும். இது தமிழில் கொல்லுங்கள் என்ற சொல்லின் ஒலிப்பு ரீதியாக மிகவும் ஒத்திருந்தது.

அடுத்து, தமிழ்நாடு மற்றும் கேரளாவில் உள்ள பாதிரியார்களை பூம் தொடர்பு கொண்டது. அவர்கள் வைரலான கூற்று தவறாக புரிந்துகொள்ளப்பட்டது என்று கூறினர். குறிப்பாக, தென்னிந்தியாவில் உள்ள சுவிசேஷ தேவாலயங்கள் நடத்தும் பிரார்த்தனைக் கூட்டங்களில் தொடுங்கப்பா என்பது பொதுவான பேச்சுவழக்கில் பயன்படுத்தப்படும் சொல் என்பதை பாதிரியார்கள் உறுதிப்படுத்தினர்.

வைரல் காணொளியில் உள்ள பாதிரியார் அனைத்து அரசியல்வாதிகளுக்கும் ஆசீர்வாதம் கேட்கிறார் என்று அவர்கள் பூமிடம் தெரிவித்தனர். குறிப்பாக, பிரதமர் மோடி உட்பட நான்கு அமைச்சர்களுக்கு அவர் ஆசீர்வாதம் கேட்கிறார் என்று அவர்கள் தெரிவித்தனர்.

இதைப் பயன்படுத்தி முழு காணொளியை நாங்கள் கேட்டோம். பாதிரியார் இப்படியாக பிரார்த்தனை செய்கிறார். - ”எம்.எல்.ஏ.க்கள், எம்.பிக்களை இரட்சியுங்கள், பிரதமர் மோடியை தொடுங்க, அமித்ஷாவை தொடுங்க, நிர்மலா சித்தராமன் தொடுங்கப்பா, மு.க.ஸ்டாலினை தொடுங்கப்பா, உத்தர பிரதேச முதல்வர் யோகி ஆதித்யநாத்தை தொடுங்கப்பா. அயோத்தியில் ஜீவன் உள்ள தேவன் இயேசு என்பதை நிருபிச்சு காட்டுங்கப்பா”

இந்த பிரார்த்தனையில், பாதிரியார் வேண்டுதலின் முழு வடிவத்தை பூம் சுயாதீனமாக சரிபார்க்க முடியவில்லை என்றாலும், அவர் அரசியல் தலைவர்களின் மரணத்திற்கு பிரார்த்தனை செய்யவில்லை என்றும், அவர்களை ஆசிர்வதிக்க கோரி வேண்டுதல் செய்தார் என்பதை நாங்கள் சரிபார்த்தோம்.

பின்குறிப்பு: இந்த செய்தி தொகுப்பு முதலில் சக்தி கலெக்டிவ் முன்னெடுப்பின் ஒரு பகுதியாக BOOM என்ற இணைய செய்தி தளத்தில் வெளியிடப்பட்டது. அதன் சாராம்சத்தை அப்படியே பின்பற்றி, ABP Nadu தனது வாசகர்களுக்கு ஏற்ப இந்த செய்தி தொகுப்பை மொழி பெயர்த்து எழுதியுள்ளது.

முறைகேடில் ஈடுபட்ட வடஇந்திய மாணவர்கள்.. ஐஏஎஸ் தேர்வில் அட்ராசிட்டி.. உண்மை என்ன?

சுதர்சன் — Fri, 28 Mar 2025 17:24:55 +0530

“உ.பி, பீகார், ஜார்கண்ட் மாநிலங்களின் ஐஏஎஸ் தேர்வு மையங்கள் !!! இந்திய ஆட்சி முறையின் எதிர்காலம்” என்ற கேப்ஷனுடன் சமூக வலைதளங்களில் (Archive) காணொலி வைரலாகி வருகிறது. அதில், வகுப்பறையில் தேர்வு எழுதும் மாணவர்கள் பலர் தங்களது தேர்வுக்கான விடைகளை காப்பி அடிப்பது போன்ற காட்சி பதிவாகியுள்ளது. இந்நிகழ்வு, வடமாநிலங்களில் ஐஏஎஸ் தேர்வின் போது நடைபெற்றதாக கூறி பரப்பி வருகின்றனர்.

Fact-check:

நாம் மேற்கொண்ட ஆய்வில் இந்நிகழ்வு உத்தரபிரதேசத்தில் உள்ள சட்டக் கல்லூரியில் எல்.எல்.பி தேர்வின் போது நடைபெற்றது தெரியவந்தது.

வைரலாகும் தகவல் உண்மைதானா என்பதைக் கண்டறிய அதன் காணொலியின் குறிப்பிட்ட பகுதியை ரிவர்ஸ் இமேஜ் சர்ச் செய்து பார்த்தபோது, National Students Union of India என்ற ஃபேஸ்புக் பக்கம் 2024ஆம் ஆண்டு பிப்ரவரி 29ஆம் தேதி வைரலாகும் அதே காணொலியை பதிவிட்டிருந்தது. மேலும், அதில் “உத்தரப்பிரதேச மாநிலத்தின் பாரபங்கி மாவட்டத்தில் உள்ள சட்டக் கல்லூரியில் எல்.எல்.பி தேர்வில் முறைகேடு நடக்கிறது” என்று குறிப்பிடப்பட்டுள்ளது.

தொடர்ந்து, கிடைத்த தகவலைக் கொண்டு கூகுளில் கீவர்ட் சர்ச் செய்து பார்த்தோம். அப்போது, 2024ஆம் ஆண்டு மார்ச் 1ஆம் தேதி வைரலாகும் காணொலி தொடர்பாக India Today ஊடகம் செய்தி வெளியிட்டிருந்தது. அதன்படி, உத்தரபிரதேச மாநிலம் பாரபங்கியில் உள்ள கல்லூரி ஒன்றில் எல்.எல்.பி தேர்வின் போது அப்பட்டமாக காப்பி அடித்த மாணவர்கள் பிடிபட்ட அதிர்ச்சி சம்பவம் வெளியாகியுள்ளது. மாணவர்கள் இத்தகைய செயலில் ஈடுபடும் காணொலி சமூக வலைதளங்களில் வைரலானது. ஆசிரியர்கள் முன்னிலையில் மாணவர்கள் வெளிப்படையாக ஏமாற்றுவதை இது காட்டுகிறது.

இந்த சம்பவம் குறித்து அதிகாரிகள் விரைந்து நடவடிக்கை எடுத்தனர். தேர்வில் முறைகேடு செய்ததாக 26 மாணவர்கள் கைது செய்யப்பட்டனர். கூடுதலாக, அவத் சட்டக்கல்லூரியில் 12 மாணவர்களும், இரண்டாவது ஷிப்ட் தேர்வின் போது TRC சட்டக்கல்லூரியில் 25 மாணவர்களும் பிடிபட்டனர்” என்று குறிப்பிடப்பட்டுள்ளது. இதே செய்தியை Zee News ஊடகமும் வெளியிட்டுள்ளது.

மேலும், Dainik Bhaskar வெளியிட்டுள்ள செய்தியின் படி, பாரபங்கி நகர சட்டக் கல்லூரியில் தேர்வில் நடைபெற்ற மோசடி ஃபேஸ்புக்கில் நேரலை செய்யப்பட்டது. இதனையடுத்து 2024ஆம் ஆண்டு பிப்ரவரி 27ஆம் தேதி அன்று நடத்தப்பட்ட சட்டத் தேர்வு ரத்து செய்யப்பட்டது. இதனுடன், நகர சட்டக் கல்லூரிக்கு இரண்டு லட்சம் அபராதம் விதிக்கப்பட்டுள்ளதுடன், அடுத்த 6 ஆண்டுகளுக்கு இக்கல்லூரியை தேர்வு மையமாக மாற்ற வேண்டாம் என்றும் முடிவு செய்யப்பட்டுள்ளது என்று குறிப்பிடப்பட்டுள்ளது.

முடிவாக, நம் தேடலில் உ.பி, பீகார், ஜார்கண்ட் மாநிலங்களில் உள்ள ஐஏஎஸ் தேர்வு மையங்களில் மாணவர்கள் முறைகேடாக காப்பி அடிப்பதாக வைரலாகும் காணொலி தவறானது உண்மையில் அது உத்திர பிரதேசத்தில் உள்ள சட்டக் கல்லூரியில் எல்.எல்.பி தேர்வின் போது மாணவர்கள் முறைகேட்டில் ஈடுபட்ட காணொலி என்று ஆதாரப்பூர்வமாக நிரூபிக்க முடிகிறது.

பின்குறிப்பு: இந்த செய்தி தொகுப்பு முதலில் சக்தி கலெக்டிவ் முன்னெடுப்பின் ஒரு பகுதியாக News Meter என்ற இணைய செய்தி தளத்தில் வெளியிடப்பட்டது. அதன் சாராம்சத்தை அப்படியே பின்பற்றி, ABP Nadu தனது வாசகர்களுக்கு ஏற்ப இந்த செய்தி தொகுப்பை மொழி பெயர்த்து எழுதியுள்ளது.

ஜப்பானை தாக்கிய சுனாமி.. வைரலாகும் பரபர வீடியோ.. நடந்தது என்ன?

சுதர்சன் — Fri, 28 Mar 2025 15:20:08 +0530

“2025ல் ஜப்பானை சுனாமி தாக்குவதற்கு ஒரு நிமிடத்திற்கு முன்பு” என்ற கேப்ஷனுடன் சமூக வலைதளங்களில் (Archive) காணொலி வைரலாகி வருகிறது. ஜப்பானில் 2011ஆம் ஆண்டு ஏற்பட்ட சுனாமியின் 14ஆம் ஆண்டு நினைவு தினம் கடந்த மார்ச் 11ஆம் தேதி அனுசரிக்கப்பட்ட நிலையில் இக்காணொலி பகிரப்பட்டு வருகிறது.

Fact-check:

நியூஸ்மீட்டர் நடத்திய ஆய்வில் வைரலாகும் காணொலி 2011ஆம் ஆண்டு ஏற்பட்ட சுனாமியின் போது எடுக்கப்பட்டது என்று தெரியவந்தது.

இதன் உண்மை தன்மையை கண்டறிய காணொலியின் குறிப்பிட்ட பகுதியை ரிவர்ஸ் இமேஜ் சர்ச் செய்து பார்த்தபோது, 2011ஆம் ஆண்டு மார்ச் 13ஆம் தேதி வைரலாகும் அதே காணொலி Haber Turk என்ற துருக்கி மொழி இணையதளத்தில் பதிவிடப்பட்டிருந்தது. அதில், “ஜப்பானில் ஏற்பட்டுள்ள அதிர்ச்சி!” என்று குறிப்பிடப்பட்டுள்ளது.

மேலும், ANNnewsCH என்ற ஊடகத்தில் வைரலாகும் அதே காணொலியின் மற்றொரு கோணக் காட்சி “Tsunami, Great East Japan Earthquake - Miyako city, Iwate Pref, Japan [11 Mar 2011]” என்ற தலைப்புடன் பதிவிடப்பட்டுள்ளது. இதன் மூலம் வைரலாகும் காணொலி ஜப்பானில் 2011ஆம் ஆண்டு ஏற்பட்ட சுனாமியின் போது எடுக்கப்பட்டது என்று தெரிய வருகிறது.

தொடர்ந்து, கிடைத்த தகவலைக் கொண்டு யூடியூபில் சர்ச் செய்து பார்த்தோம். அப்போது, 2011 Japan Tsunami Archives என்ற யூடியூப் சேனலில் Miyako City Hall-லில் 2011ஆம் ஆண்டு ஏற்பட்ட சுனாமியின் முழு நீளக்காணொலி என்று வைரலாகும் அதே காணொலி பதிவிடப்பட்டிருந்தது.

முடிவாக, நம் தேடலில் 2025ஆம் ஆண்டு ஜப்பானில் ஏற்பட்ட சுனாமி என்று சமூக வலைதளங்களில் வைரலாகும் காணொலி 2011ஆம் ஆண்டு ஜப்பானில் ஏற்பட்ட சுனாமியின் போது எடுக்கப்பட்டது என்று ஆதாரப்பூர்வமாக நிரூபிக்க முடிகிறது.

முஸ்லிம்களை தாக்கும் போலீஸ்.. வைரலாகும் பரபர காட்சி.. உண்மை என்ன?

சுதர்சன் — Thu, 27 Mar 2025 19:58:17 +0530

மத்தியப் பிரதேசத்தில் கடந்த 2022ஆம் ஆண்டு இஸ்லாமியர்களை காவல்துறையினர் தாக்கும் சம்பவத்தின் காணொளி ஒன்று நாக்பூரில் நடந்ததாக பரவும் பதிவுகளில் உண்மை இல்லை என கண்டறியப்பட்டுள்ளது.

சுமார் 45 நொடிகள் நீளும் இந்த காணொளியில், இஸ்லாமியர்கள் இருவர் மீது காவல்துறையினர் கடுமையாக தடியடி நடத்துகிறார்கள். ஃபேஸ்புக்கில் இந்த காணொளியை பகிர்ந்த ஒரு பயனர், “திங்கள்கிழமை நாக்பூரில் மசூதியிலிருந்து தொழுகை முடிந்து வெளியே வந்த மாணவர்கள் மீது போலீஸார் தடியடி நடத்தினர்.”, என்ற தகவலுடன் பதிவிட்டுள்ளார்.

கடந்த மார்ச் 17 ஆம் தேதியன்று மகாராஷ்ட்ராவில் அவுரங்சீப் கல்லறையை அகற்ற கோரி இந்துத்துவா அமைப்பினர் போராட்டம் நடத்தினர். இதனைத் தொடர்ந்து, அங்கு வகுப்புவாத கலவரம் ஏற்பட்டது. இந்நிலையில், நாக்பூரில் இந்த காணொளி எடுக்கப்பட்டதாக சமூக ஊடகத்தில் பகிரப்பட்டது.

உண்மைச் சரிபார்ப்பு:

இந்த காணொளியின் உண்மைத்தன்மையை சரிபார்க்க, காணொளியின் சில பிரேம்களை எடுத்து, நாங்கள் ரிவர்ஸ் இமேஜ் சர்ச் செய்தோம். இந்த தேடுதல், மூத்த வழக்கறிஞர் பிரசாந்த் பூஷண் எக்ஸ் கணக்கிற்கு கொண்டு சென்றது.

கடந்த 2022ஆம் ஆண்டு ஏப்ரல் 14ஆம் தேதியன்று பகிர்ந்துள்ள அவரது பதிவில், ”காவல்துறையினர் இந்த இளைஞர்களை அடித்து துன்புறுத்துகிறார்கள். இந்த காவல்துறையினர் மீது நடவடிக்கை எடுக்கப்படுமா?” என்று குறிப்பிடப்பட்டிருந்தது.

These policemen are openly beating up helpless youth that they have caught hold of. These are the goons that the policemen have become. Will these identifiable policemen be held to account? Will human rights bodies & courts wake up? pic.twitter.com/lQgUx43HRC
— Prashant Bhushan (@pbhushan1) April 14, 2022

மேலும், இந்த காணொளி எங்கு, எப்படி நடந்தது என்ற செய்தியுடன் வெளியிடப்பட்டிருந்தது. அதன்படி, மத்தியப் பிரதேச மாநிலத்தில் கார்கோன் என்ற பகுதியில், ராம நவமி கொண்டாட்டங்களின்போது நடந்த வன்முறையை தொடர்ந்து பல இஸ்லாமிய இளைஞர்களை காவல்துறையினர் கைது செய்தனர். இந்த கலவரம் கடந்த 2022ஆம் ஆண்டு ஏப்ரல் 10ஆம் தேதியன்று நடந்தது.

இதன்மூலம், இந்த காணொளி நாக்பூரில் எடுக்கப்பட்டது அல்ல என்பது உறுதிச்செய்யப்பட்டது. இதனைத் தொடர்ந்து, மத்திய பிரதேசத்தில் நடந்த கலவரம் குறித்து நாங்கள் கூகுளில் தேடினோம். அப்போது, இந்தியா டூடே இணையதளத்தில் இந்த கலவரம் குறித்து செய்தி இருந்தது. இந்த சம்பவம் தொடர்பாக தி டைம்ஸ் ஆஃப் இந்தியாவும் செய்தி வெளியிட்டிருந்தது.

மேலும், பிராசந்த் பூஷண் பகிர்ந்த செய்தி காணொளியில்,’Maktoob Media’ என்று குறிப்பிடப்பட்டிருந்தது. மத்திய பிரதேச வன்முறை, Maktoob media போன்ற குறிப்பிட்ட சில வார்த்தைகள் கொண்டு நாங்கள் கூகுளில் தேடியபோது, அதே காணொளி கடந்த 2022ஆம் ஆண்டு ஏப்ரல் மாதம் 13ஆம் தேதியன்று இந்த ஊடகத்தின் யூடியூப் சேனலில் பதிவேற்றப்பட்டுள்ளது.

அதே டிஸ்கிரிப்ஷன் பகுதியில் official_rajthakur__ என்ற இன்ஸ்டாகிராம் பக்கத்தின் ஐடி குறிப்பிடப்பட்டிருந்தது. அதனை ஆய்வு செய்கையில் அவர் தன்னை டெல்லியைச் சேர்ந்த யூடியூபர் என்று குறிப்பிட்டுள்ளார். மேலும், யூடியூப் சேனலில் வெளியிடப்பட்டுள்ள அனைத்து காணொலிகளும் இன்ஸ்டாகிராம் பக்கத்திலும் வெளியிடப்பட்டுள்ளன. அவை அனைத்திலும் இக்காணொலிகள் ஸ்கிரிப்ட் செய்யப்பட்டது என்று குறிப்பிடப்பட்டுள்ளது.

Conclusion:

முடிவாக, நம் தேடலில் இஸ்லாமியர் ஒருவர் தனது மகளையே திருமணம் செய்து கொண்டதாக வைரலாகும் காணொலி ஸ்கிரிப்ட் செய்யப்பட்டது என்றும் அது பொழுதுபோக்கிற்காக எடுக்கப்பட்டது என்றும் ஆதாரப்பூர்வமாக நிரூபிக்க முடிகிறது.

மாற்றுத்திறனாளிகளுக்கான பைக் முஸ்லிம்களுக்கு மட்டும் வழங்கப்படுகிறதா? உண்மை என்ன?

சுதர்சன் — Thu, 27 Mar 2025 17:20:06 +0530

மாற்றுத்திறனாளிகளுக்கு இணைப்பு சக்கரம் பொருத்தப்பட்ட பெட்ரோல் வாகனம் தமிழ்நாடு அரசு சார்பில் வழங்கப்பட்டு வருகிறது. இந்நிலையில், “ஏன் இஸ்லாமியர் மட்டும் தான் மாற்றுத்திறனாளிகளா இருக்காங்களா? தமிழ்நாடு இந்தியாவில் உள்ளதா அல்லது பாகிஸ்தானில் உள்ளதா?” என்ற கேப்ஸ உடன் சமூக வலைதளங்களில் (Archive) புகைப்படம் வைரலாகி வருகிறது. அதில், இஸ்லாமிய மாற்றுத்திறனாளி பெண் ஒருவருக்கு முதலமைச்சர் மு.க. ஸ்டாலின் இணைப்பு சக்கரம் பொருத்தப்பட்ட பெட்ரோல் வாகனம் வழங்குவது போன்ற காட்சி இடம்பெற்றுள்ளது. இதன் மூலம் இஸ்லாமியர்களுக்கு மட்டுமே இத்திட்டம் செயல்படுத்தப்படுவதாக கூறி இப்புகைப்படத்தை பரப்பி வருகின்றனர்.

Fact-check:

நாம் மேற்கொண்ட ஆய்வில் இத்தகவல் தவறானது என்றும் இத்திட்டம் அனைத்து மதத்தின்ருக்கானதும் என்றும் தெரியவந்தது.

வைரலாகும் தகவல் குறித்த உண்மை தன்மையை ஆராய புகைப்படத்தை ரிவர்ஸ் இமேஜ் சர்ச் செய்து பார்த்தோம். அப்போது, வைரலாகும் அதே புகைப்படம் தமிழ்நாடு முதலமைச்சரின் அதிகாரப்பூர்வ இன்ஸ்டாகிராம் பக்கத்தில் பதிவிடப்பட்டிருந்தது. அதில், “நாகப்பட்டினத்தில் நடைபெற்ற அரசு விழாவில் மாற்றுத்திறனாளிகளுக்கு இணைப்புச் சக்கரம் பொருத்தப்பட்ட பெட்ரோல் ஸ்கூட்டர்களை மாண்புமிகு முதலமைச்சர் மு.க. ஸ்டாலின் வழங்கினார்” என்று குறிப்பிடப்பட்டுள்ளது.

View this post on Instagram

A post shared by Chief Minister of Tamil Nadu (@cmotamilnadu)

கிடைத்த தகவலைக் கொண்டு கூகுளில் கீவர்ட் சர்ச் செய்து பார்த்தபோது ஈடிவி பாரத் தமிழ்நாடு ஊடகம் கடந்த மார்ச் 3ஆம் தேதி இது தொடர்பாக விரிவான செய்தி வெளியிட்டிருந்தது. அதன்படி, நாகப்பட்டினத்தில் நடைபெற்ற அரசு விழாவில் ரூ.423.18 கோடி மதிப்பீட்டிலான 35 முடிவுற்ற பணிகளை திறந்து வைத்து, 206 புதிய திட்டப் பணிகளுக்கு அடிக்கல் நாட்டி, 38,956 பயனாளிகளுக்கு தமிழ்நாடு முதலமைச்சர் மு.க. ஸ்டாலின் நலத்திட்ட உதவிகளை வழங்கினார் என்று குறிப்பிடப்பட்டுள்ளது.

அதில், வைரலாகும் அதே புகைப்படம், “பெண் ஒருவருக்கு மூன்று சக்கர வாகனத்தை வழங்கிய முதலமைச்சர் மு.க.ஸ்டாலின்” என்ற கேப்ஷனுடன் இடம்பெற்றுள்ளது. இதன் மூலம், நலத் திட்டத்தின் ஒரு பகுதியாக மாற்றுத்திறனாளிகளுக்கு வாகனம் வழங்கப்பட்டுள்ளது தெரிய வருகிறது. மேலும், செய்தியில் எந்த இடத்திலும் இத்திட்டம் இஸ்லாமியர்களுக்கு மட்டுமானது என்று குறிப்பிடப்படவில்லை.

இதுதொடர்பாக தமிழ்நாடு அரசின் செய்தி மக்கள் தொடர்புத்துறை தனது இன்ஸ்டாகிராம் பக்கத்தில் வெளியிட்டுள்ள காணொலியில் நாகப்பட்டினத்தில் கடந்த மார்ச் 3ஆம் தேதி பெட்ரோல் வாகனத்தை பெற்றுக்கொண்ட டில்லி பாபு என்கிற மாற்றுத்திறனாளி பயனாளர் முதலமைச்சருக்கு நன்றி தெரிவிக்கும் காட்சி இடம் பெற்றுள்ளது. இதனைக் கொண்டு இத்திட்டமானது அனைத்து மதத்தினருக்குமானது என்று தெரிய வருகிறது.

இதனை உறுதிப்படுத்தும் விதமாக திருச்சிராப்பள்ளி மாவட்டத்தின் இணையதளத்தில் இத்திட்டத்திற்கான இரண்டு தகுதிகளாக, 18 வயது முதல் 45 வயது வரை கல்லூரியில் படிக்கும் மாணவர்கள் அல்லது பணிபுரிபவர்களாக இருக்க வேண்டும், இரண்டு கால்களும் செயலிழந்து கைகளால் வண்டியை இயக்கக்கூடிய நிலையில் இருத்தல் வேண்டும் என்று மட்டுமே குறிப்பிடப்பட்டுள்ளது. எங்கும் இஸ்லாமியர்கள் மட்டும் விண்ணப்பிக்க வேண்டும் என்று குறிப்பிடப்படவில்லை.

Conclusion:

முடிவாக நம் தேடலில் இஸ்லாமியர்களுக்கு மட்டும் மாற்றுத்திறனாளிகளுக்கான இணைப்பு சக்கரம் பொருத்தப்பட்ட பெட்ரோல் வாகனம் வழங்கப்படுவதாக வைரலாகும் தகவல் உண்மை இல்லை என்றும் இத்திட்டம் அனைத்து மதத்தினருக்குமானது என்று ஆதாரப்பூர்வமாக நிரூபிக்க முடிகிறது.

Fact Check: பாஜக கூட்டணிக்கு எதிர்ப்பு.. போர்க்கொடி தூக்கும் அதிமுக மூத்த தலைவர்கள்.. என்னாச்சு?

சுதர்சன் — Thu, 27 Mar 2025 15:20:57 +0530

தமிழ்நாடு எதிர்க்கட்சித் தலைவர் எடப்பாடி பழனிச்சாமி நேற்று (மார்ச் 25) டெல்லி சென்று உள்துறை அமைச்சர் அமித்ஷாவை சந்தித்து ஒரு மணி நேரத்திற்கும் மேலாக பேசினார். தொடர்ந்து, தமிழ்நாடு புறப்படுவதற்கு முன்னதாக டெல்லி விமான நிலையத்தில் எடப்பாடி பழனிசாமி செய்தியாளர்களை சந்தித்தார்.

அப்போது, அமித்ஷாவுடன் அரசியல் தொடர்பாக பேச்சுவார்த்தை நடத்தப்பட்டதா? என செய்தியாளர்கள் எழுப்பிய கேள்விக்கு பதிலளித்த எடப்பாடி பழனிசாமி," தேர்தலுக்கு இன்னமும் ஓராண்டிற்கு மேல் உள்ளது. எல்லோருமே தேர்தல் நெருங்கும் நேரத்தில் கூட்டணி அமைப்பார்கள். கூட்டணி என்பது வேறு, கொள்கை என்பது வேறு. எங்களின் கொள்கை என்றுமே நிலையானது. கூட்டணி என்பது சந்தர்ப்ப சூழ்நிலைக்கு தகுந்தவாறு மாறும்” என்று கூறினார்.

பழனிசாமியின் இந்த பதில் அதிமுக, பாஜகவுடன் கூட்டணி வைக்கப் போவதாக அரசியல் வட்டாரத்தில் சலசலப்பை ஏற்படுத்தியது. இந்நிலையில், அதிமுக முன்னாள் அமைச்சர் செம்மலை மற்றும் முன்னாள் எம்பி அன்வர் ராஜா ஆகியோர் எடப்பாடி பழனிச்சாமி சந்திப்பு குறித்து கருத்து தெரிவித்ததாக நேற்றைய (மார்ச் 25) தேதியிட்ட தந்தி டிவி (Archive) மற்றும் புதிய தலைமுறை (Archive) ஆகிய ஊடகங்களில் நியூஸ் கார்டுகள் சமூக வலைதளங்களில் வைரலாகி வருகிறது.

வைரலாகும் தந்தி டிவி ஊடகத்தின் நியூஸ் கார்டில், “அதிமுக பாஜகவுடன் மீண்டும் கூட்டணி என்பது தற்கொலைக்கு சமம், எனவே பொதுச் செயலாளர் எடப்பாடி பழனிசாமி இதனை மறுபரிசீலனை செய்ய வேண்டும்; இல்லையேல் அதிமுகவை கடவுள் தான் காப்பாற்ற வேண்டும்” என்று அதிமுக முன்னாள் அமைச்சர் செம்மலை கூறியதாக தெரிவிக்கப்பட்டுள்ளது.

மேலும், புதிய தலைமுறை ஊடகத்தின் நியூஸ் கார்டில், “எம்.ஜி.ஆர் மற்றும் அம்மா இருவரும் சிறுபான்மை மக்களின் அரணாக நின்று மதவாதிகளிடம் இருந்து பாதுகாத்தனர்; அப்பேர்ப்பட்ட அதிமுக என்ற பேரியக்கம் இன்று அதன் கொள்கையில் இருந்து விலகி செல்வது மனதை ரணமாக்குகிறது. புரட்சி தலைவி அம்மா அவர்களின் விருப்பத்திற்கு எதிராக செயல்படுபவர்களோடு இனியும் இணைந்து என்னால் பயணிக்க முடியும் என்று தோன்றவில்லை; காலமறிந்து முடிவெடுப்பேன்!” என்று அதிமுக முன்னாள் எம்பி அன்வர் ராஜா தெரிவித்ததாக குறிப்பிடப்பட்டுள்ளது.

Fact-check:

நாம் மேற்கொண்ட ஆய்வில் வைரலாகும் இரண்டு நியூஸ்கார்டுகளும் போலி என்று தெரியவந்தது.

வைரலாகும் தகவல் உண்மைதானா என்பதை கண்டறிய இரண்டு நியூஸ் காட்டிலும் உள்ள தகவல்களை தனித்தனியே ஆய்வு செய்தோம்.

தந்தி டிவி நியூஸ் கார்ட்:

வைரலாகம் நியூஸ் கார்டில் இருப்பது போன்று அதிமுக முன்னாள் அமைச்சர் செம்மலை கருத்து தெரிவித்தாரா என்பதை அறிந்துகொள்ள, அது தொடர்பாக கூகுளில் கீவர்ட் சர்ச் செய்து பார்த்தபோது, அவ்வாறான எந்த ஒரு கருத்தையும் அவர் தெரிவிக்கவில்லை என்பது தெரியவந்தது.

தொடர்ந்து, நேற்றைய தேதியில் இவ்வாறான நியூஸ் கார்டை தந்தி டிவி ஊடகம் வெளியிட்டுள்ளதா என்று அதன் சமூக வலைதள பக்கங்களில் தேடிய போது. அவ்வாறான எந்த ஒரு நியூஸ் கார்டும் வெளியிடப்படவில்லை என்பது தெரியவந்தது. மேலும், தந்தி டிவி ஊடகத்தின் டிஜிட்டல் பிரிவை தொடர்புகொண்டு இதுகுறித்து கேட்டதற்கு “வைரலாகும் நியூஸ் கார்ட் போலி தான்” என்று உறுதியாக தெரிவித்தனர்.

புதிய தலைமுறை நியூஸ் கார்ட்:

அதிமுக முன்னாள் எம்பி அன்வர் ராஜா புதிய தலைமுறை வெளியிட்டுள்ள நியூஸ் கார்டில் இருப்பது போன்ற கருத்தை தெரிவித்தாரா என்று முதலில் கூகுளில் கீவர்ட் சர்ச் செய்து பார்த்தபோது, எடப்பாடி பழனிச்சாமியின் சந்திப்பு தொடர்பாக எந்த ஒரு கருத்தையும் அவர் தெரிவிக்கவில்லை என்பது தெரிய வந்தது. மேலும், அன்வர் ராஜாவின் சமூக வலைதள பக்கங்களில் தேடினோம். அப்போது, 2017ஆம் ஆண்டிற்கு பிறகு அவர் அதில் எந்த ஒரு பதிவையும் பதிவிடவில்லை என்பது தெரியவந்தது. மேலும், வைரலாகும் நியூஸ் கார்டை புதிய தலைமுறை ஊடகம் வெளியிடவில்லை என்று மறுப்பையும் தெரிவித்துள்ளது.

மறுப்பு தெரிவித்த செய்தி நிறுவனம்:

எடப்பாடி பழனிச்சாமி மற்றும் அமித்ஷா உடனான சந்திப்பு குறித்து ஓ. பன்னீர் செல்வத்திடம் செய்தியாளர்கள் எழுப்பிய கேள்விக்கு, “எல்லாம் நன்மைக்கே. அதிமுக கட்சியில் பிரிந்திருக்கும் அனைவரும் ஒன்றிணைவதுதான் என்னுடைய விருப்பம். அமிஷாவை அவர் சந்தித்தது குறித்து அவரிடம் கேளுங்கள்" என்று பதிலளித்தார். தற்போது வரை இவரை தவிர அதிமுக தொடர்புடைய வேறு யாரும் கருத்து தெரிவிக்கவில்லை.

Conclusion:

நம் தேடலின் முடிவாக எடப்பாடி பழனிச்சாமி டெல்லிக்கு சென்று அமித்ஷாவை சந்தித்தது குறித்து கருத்து தெரிவித்த அதிமுக நிர்வாகிகள் என்று வைரலாகும் தந்தி டிவி மற்றும் புதிய தலைமுறை ஊடகத்தின் நியூஸ் கார்டுகள் இரண்டும் போலியானவை என்று ஆதாரப்பூர்வமாக நிரூபிக்க முடிகிறது.