யூடியூபில் பல்வேறு திரைப்படங்களுக்கு விமர்சனம் அளித்து பரவலாக கவனமீர்த்தவர் சத்யேந்திரன். நடிகராக வேண்டும் என்கிற கனவில் சென்னை வந்த சத்யேந்திரன் கடந்த 45 ஆண்டுகளுக்கு மேலாக சென்னையில் வசித்து வந்தார். சத்யேந்திரன் இன்று சென்னையில் உடல் நலக் குறைவால் காலமானதாக தகவல் வெளியாகியுள்ளது.
யார் இந்த சத்யேந்திரன் ?
எடிட்டர் லெனின் இயக்கிய knock out குறும் படத்தில் ஒரு முக்கிய கதாபாத்திரத்தில் இறந்துபோனவராக சத்யேந்திரன் நடித்தார் . இந்த கதாபாத்திரத்திற்காக அவருக்கு பல அங்கீகாரங்கள் கிடைத்தன. சத்யேந்திரன் ச8 மொழிகளில் சுமார் 175 படங்கள் வரை நடித்துள்ளார். 6 மெகா சீரியல்களில் , ஒரு ஹாலிவுட் திரைப்படம் , ஒரு ஜெர்மன் மொழி படத்தில் நடித்துள்ளார் . கமல் போன்ற முன்னணி நடிகர்களின் படங்களில் நடித்துள்ளார். பகுதி நேரமாக ஜெர்மன் மொழி ஆசிரியராக பணியாற்றி வந்தார்.
பெங்களூரை பூர்வீகமாக கொண்ட சத்யேந்திரன் கன்னட மொழியில் இளங்கலை பட்டம் பெற்றவர். கல்லூரி காலத்தில் நிறைய புத்தகங்கள் வாசிப்பதும் பல்வேறு உலக மொழி படங்களை பார்ப்பதும் பழக்கமாக கொண்டிருந்தார். கிரிஷ் கர்னாட் இயக்கிய நாடகத்தில் நடித்துள்ளார். 1978 ஆம் ஆண்டு கன்னடத்தில் கிரஹனா என்கிற படத்தில் சத்யேந்திரன் முக்கிய கதாபாத்திரத்தில் நடித்தார்.
இந்த படத்தில் தனக்கு கிடைத்த வரவேற்பைத் தொடர்ந்து சினிமாவில் தொடர்ந்து நடிப்பதற்கு வாய்ப்பு தேடி சென்னை வந்தார். கடந்த 45 ஆண்டுகளுக்கும் மேலாக சென்னையில் வசித்து வந்தார். 1982 ஆம் ஆண்டு ஏழாவது மனிதன் படத்தில் ரகுவரனின் ரூம் மேட்டாக இவர் நடித்திருந்தார். ஜெர்மன், பிரென்ச், ஜப்பானிய மொழி, இந்தி, தமிழ் & ஆங்கிலம் ஆகிய மொழிகளில் புலமை கொண்டவர். சென்னையில் எந்த இடத்தில் உலக திரைப்படங்கள் திரையிடப்பட்டாலும் அங்கு சத்யேந்திரனை நிச்சயம் நாம் பார்க்கலாம். சமீபத்தில் இவர் லியோ மற்றும் பிற கமர்சியல் படங்களுக்கு அளித்த விமர்சனங்கள் வைரலாகின. இத்தனை வயதிலும் சத்யேந்திரன் சினிமாவின் மீது கொண்டிருந்த ஆர்வத்தை அனைவரும் பாராட்டினார்கள். சத்யேந்திரன் இன்று காலமானதாக தகவல்கள் வெளியாகியுள்ளன பெங்களூருவில் உள்ள அவரது உறவினர்களை இதுவரை தொடர்புகொள்ள முடியாததால், அவரது உடல் மருத்துவமனை பிணவறையில் வைக்கப்பட்டுள்ளது.