விக்ரமின் துருவ நட்சத்திரம் படத்தில் இருந்து வெளியாக உள்ள இரண்டாவது பாடலுக்கான புரோமோவை இயக்குனர் கவுதம் மேனன் வெளியிட்டுள்ளார்.


புரோமோ வெளியீடு:


துருவநட்சத்திரம் படத்தில் இடம்பெற்றுள்ள்ள ”His Name Is John” என்ற பாடலுக்கான புரோமோ இன்று வெளியாகும் எனவும், முழு பாடல் வரும் 19ம் தேதி வெளியாகும் எனவும் அப்படத்தின் இயக்குனர் கவுதம் மேனன் அறிவித்து இருந்தார். அதன்படி, காலை 11 மணியளவில் பாடலுக்கான புரோமோ வெளியாகியுள்ளது.






பாடல் வரிகள்.. 


20 விநாடிகள் ஓடும் அந்த புரோமோவில், துருவ நட்சத்திரம் படம் முழுமையாக ஆக்‌ஷன் கதைக்களத்தை மையமாக கொண்டது என்பதை உணர்த்தும் விதமாக துப்பாக்கிகள் கொண்டு டைட்டில் கார்ட் போடப்பட்டுள்ளது. அதைதொடர்ந்து, ”அவன் போறா பிளைட்டுல, இப்ப பறந்துபுட்டான் ஐட்டுல, உன்ன போட போறான் காட்டுல, அவன் கையில இன்னும் நீ மாட்டல” என பாடல் வரிகள் இடம்பெற்றுள்ளன. முழு பாடல் வரும் 19ம் தேதி வெளியாகும் எனவும் இயக்குனர் கவுதம் மேனன் தெரிவித்துள்ளார். 


துருவ நட்சத்திரம்:


தமிழ் சினிமாவின் முன்னணி இயக்குனராக உள்ள கவுதம் வாசுதேவ் மேனன் இயக்கத்தில் கடந்த 2017 ஆம் ஆண்டு “துருவ நட்சத்திரம்” படம் தொடங்கப்பட்டது. நடிகர் சூர்யாவுக்கு என எழுதப்பட்ட கதையில் அவர் நடிக்க மறுத்தார். இதையடுத்து,  கதையில் சில மாற்றங்கள் செய்யப்பட்டு விக்ரம் ஹீரோவாக நடிக்க ஒப்பந்தம் செய்யப்பட்டார். மேலும் இந்த படத்தில் ஐஸ்வர்யா ராஜேஷ், ரித்து வர்மா, ப்ரித்விராஜ் சுகுமாறன், பார்த்திபன், சிம்ரன் உள்ளிட்ட பலரும் நடித்துள்ளனர். ஹாரிஸ் ஜெயராஜ் இசையமைத்துள்ள இப்படத்தின் டீசர் 2017 ஆம் ஆண்டு வெளியாகி ரசிகர்களை பெரும் எதிர்பார்ப்பை ஏற்படுத்தியது.


தொடரும் ஏக்கம்..!


டீசரை தொடர்ந்து “ஒரு மனம்” பாடலும் வெளியாகி ரசிகர்களிடையே பெரும் வரவேற்பை பெற்றிருந்தது. அதன்பிறகு எந்தவித அப்டேட்டும் படக்குழு சார்பில் வெளியாகவில்லை. ஏற்கனவே கௌதம் மேனன் இயக்கிய ‘எனை நோக்கி பாயும் தோட்டா’ படமும் பல ஆண்டுகள் கழித்து தான் ரிலீசானது. இதனால் ரசிகர்கள் துருவ நட்சத்திரம் படமும் வெளியாகுமா இல்லையா என குழம்பி தவித்தனர்.


தூசி தட்டப்படும் துருவ நட்சத்திரம்:


இந்நிலையில் சில மாதங்களுக்கு முன் துருவ நட்சத்திரம் படம் முடிவடைய உள்ளதாகவும், இன்னும் சில தினங்களில் போஸ்ட் புரொடக்‌ஷன்ஸ் பணிகள் தொடங்கும் எனவும் இயக்குநர் கவுதம் மேனன் தெரிவித்திருந்தார். அதனைத் தொடர்ந்து இசையமைப்பாளர் ஹாரிஸ் ஜெயராஜ் துருவ நட்சத்திரம் படத்தின் பின்னணி இசை தொடங்கியதாக தெரிவித்தார். இதனால் ரசிகர்கள் மகிழ்ச்சியடைந்தனர். இப்படியான நிலையில் துருவ நட்சத்திரம் படத்தின் 2வது பாடல் "His Name is John" ஜூலை 19 ஆம் தேதி வெளியாகும் என தெரிவிக்கப்பட்டுள்ளது. அதைதொடர்ந்து, துர்வ நட்சத்திரம் படமும் விரைவில் வெளியாகும் என எதிர்பார்க்கப்படுகிறது.