தாகூர் இன்டர்நேஷனல் ஃபிலிம் ஃபெஸ்டிவலில் மாமனிதன் திரைப்படம் 3 விருதுகளை வென்றுள்ளது.
இயக்குநர் சீனு ராமசாமி இயக்கத்தில் நான்காவது முறையாக விஜய்சேதுபதி இணைந்த படம் 'மாமனிதன்'. பிரபல இசையமைப்பாளர் யுவன்ஷங்கர் ராஜா தயாரித்த இந்தப்படம் இந்தப்படத்திற்கு அவரும், இளையராஜாவும் இணைந்து இசையமைத்து இருந்தனர்.
ஆனால் சீனு ராமசாமிக்கும் இளையராஜாவுக்கும் இடையே பிரச்னை நடந்த நிலையில், அதன் காரணமாக நீண்ட நாட்களாக இந்தப்படம் வெளியாகமலேயே இருந்தது. அதன் பின்னர் பிரபல தயாரிப்பாளர் ஆர்.கே.சுரேஷ் மாமனிதன் படத்தை வாங்கி வெளியிட்டார்.
ஆனால் படம் வெளியாகி கலவையான விமர்சனங்களையே பெற்றது. படத்தை பார்த்த நடிகர் ரஜினிகாந்த், ஷங்கர் உள்ளிட்ட பல பிரபலங்கள் சீனுராமசாமியை அழைத்து பாராட்டினார். ஆஹா ஓடிடி தளத்தில் வெளியிடப்பட்ட மாமனிதன் படம் டோக்கியோ பட விருதுகள் விழாவில், சிறந்த ஆசியப்பட பிரிவில் கோல்டன் விருதை வென்றது.
இந்த நிலையில் தற்போது தாகூர் இன்டர்நேஷனல் பட விழாவில் மாமனிதன் திரைப்படம் 3 விருதுகளை வென்றுள்ளது என அப்படத்தின் இயக்குநர் சீனுராமசாமி தனது ட்விட்டர் பக்கத்தில் தெரிவித்து இருக்கிறார். அந்தப்பதிவில், “ தாகூர் இன்டர்நேஷனல் ஃபிலிம் ஃபெஸ்டிவலில் சிறந்த நடிகருக்கான விருது, சிறந்த சாதனைக்கான விருது, விமர்சகர்கள் தேர்வு விருது என சேர்த்து மொத்தம் 3 விருதுகளை மாமனிதன் திரைப்படம்வென்றுள்ளது” என குறிப்பிட்டு இருக்கிறார்.