இயக்குநர் வெற்றி மாறன் இயக்கியுள்ள விடுதலை படத்தின் முதல் பாகம் இன்று தியேட்டரில் வெளியாகியுள்ள நிலையில் முதல் காட்சி பார்த்த ரசிகர்கள் சமூக வலைத்தளங்களில் தங்கள் கருத்துகளை பதிவிட்டு வருகின்றனர்.
ஆர்.எஸ். இன்போடெயின்மென்ட் நிறுவனத்தின் சார்பில் எல்ரெட் குமார் தயாரித்துள்ள படம் “விடுதலை”. எழுத்தாளர் ஜெயமோகனின் 'துணைவன்' நாவலை அடிப்படையாக கொண்டு உருவாகியுள்ள இப்படத்தை தமிழ் சினிமாவின் முக்கிய இயக்குநர்களில் ஒருவரான வெற்றி மாறன் இயக்கியுள்ளார். விடுதலை படத்தில் கதையின் நாயகனாக சூரி நடித்துள்ளார். மேலும் விஜய் சேதுபதி, பவானி ஸ்ரீ, சேத்தன், கௌதம்மேனன், ராஜீவ்மேனன் உள்ளிட்ட பலரும் இப்படத்தில் நடித்துள்ளனர்.
வேல்ராஜ் ஒளிப்பதிவு செய்துள்ள இந்த படத்துக்கு இளையராஜா இசையமைத்துள்ளார். முதல்முறையாக வெற்றிமாறன் - இளையராஜா கூட்டணி இணைந்துள்ளதால் இந்த படத்திற்கு பெரும் எதிர்பார்ப்பு நிலவியது. முன்னதாக படத்தின் பாடல்கள், ட்ரெய்லர் எல்லாம் வெளியாகி ரசிகர்களிடத்தில் நல்ல வரவேற்பை பெற்றது. சுமார் நான்கு ஆண்டுகளாக எடுக்கப்பட்டு வந்த இப்படம் இன்று தியேட்டரில் வெளியாகியுள்ளது.
முன்னதாக வெற்றிமாறன் விடுதலை படத்தில் தன்னுடன் பணிபுரிந்த 25 பேருக்கு தலா ஒரு கிரவுண்ட் நிலத்தை பரிசாக வழங்கினார். மேலும் தயாரிப்பு நிறுவனம் சார்பில் படப்பிடிப்பில் பணியாற்றிய தொழிலாளர்களுக்கு தங்கக்காசு வழங்கப்பட்டது. முதல் காட்சி பார்த்த ரசிகர்கள் ட்விட்டரில் விடுதலை படம் தொடர்பான விமர்சனங்களை பதிவிட்டு வருகின்றனர். அவற்றில் சிலவற்றை நாம் காணலாம்.