சிலம்பரசன் மற்றும் வெங்கட் பிரபு கூட்டணியில் முதன் முறையாக வெளியான திரைப்படம் மாநாடு. இந்த திரைப்படம் பட்டி தொட்டியெங்கும் சூப்பர் ஹிட். படம் வெளியாவதற்கு முன்பு பல இன்னல்களை சந்தித்திருந்தாலும் , வெளியான பிறகு பாக்ஸ் ஆஃபிஸ் கலெக்ஷனை குவித்து வருகிறது. முன் எப்போதும் சிம்பு படங்களுக்கு கிடைக்காத வெற்றி மாநாடு படத்திற்கு கிடைத்திருக்கிறது. சமீப காலமாக கோலிவுட்டில் நிறைய பிரச்சனைகளை சந்தித்து வந்த சிலம்பரசனுக்கு , மாநாடு திரைப்படம் மாபெரும் கம் பேக்காக பார்க்கப்படுகிறது. படம் வெளியாகி ஒரு வாரம் ஆன நிலையில் , இன்றும் ரசிகர்கள் படத்தை கொண்டாடி வருகின்றனர். இந்நிலையில் ரசிகர்களுக்கு நன்றி தெரிவிப்பதற்காக ட்விட்டர் ஸ்பேஸில் ரசிகர்களுடன் கலந்துரையாடினார். அப்போது ரசிகர் ஒருவர் மாநாடு 2 உருவாக வாய்ப்பிருக்கிறதா என்ற கேள்வி கேட்க , அதற்கு பதிலளித்த வெங்கட் பிரபு , நிச்சயமாக மாநாடு 2 எடுப்பதற்கான திட்டம் இருக்கிறது. அதில் மாநாடு படத்தில் பிரபலமான டைம் லூப்பை பயன்படுத்தி மங்காத்தா மற்றும் மாநாடு கதாபாத்திரங்களை ஒன்றாக இணைக்கும் திட்டம் தனக்கு இருப்பதாக தெரிவித்துள்ளார்.
தற்போது தனக்கான கமிட்மெண்டுகளை முடித்து மீண்டும் மாநாடு 2 படத்திற்கான படப்பிடிப்புகளை துவங்குவாராம் வெங்கட் பிரபு. மாநாடு திரைப்படத்தை சுரேஷ் காமாட்சி தயாரிக்க , யுவன் சங்கர் ராஜா,இசையமைத்துள்ளார். 'மாநாடு' படத்தில் கல்யாணி பிரியதர்ஷன், பிரேம்கி அமரன், கருணாகரன், எஸ்.ஏ.சந்திரசேகர், ஒய்.ஜி.மகேந்திரன் மற்றும் பலர் நடித்துள்ளனர்.படத்தில் சிம்பு அப்துல் காதர் என்னும் இஸ்லாமிய இளைஞராக வலம் வருகிறார். தனது நண்பனுக்காக இரத்த தானம் செய்ய முற்படும் பொழுது , சிம்பு டைம் லூப்பில் மாட்டிக்கொள்கிறார். அப்போது நடக்கும் பிரச்சனைகளும் அதற்கான தீர்வும்தான் படத்தின் கதை.படம் முதல் வாரத்தில் 30 கோடி ரூபாயை தாண்டி வசூல் வேட்டை நடத்தியது என்பது குறிப்பிடத்தக்கது.