அஜித்துடன் மோதும் விஜய்.. மங்காத்தாவுடன் மல்லுகட்டும் தெறி..! தேர்தல் நேரத்தில் தேவையா?

அஜித்தின் மங்காத்தா படம் 23ம் தேதி ரீ ரிலீஸ் ஆகும் என்று அறிவிக்கப்பட்டு இருந்த நிலையில், விஜய்யின் தெறி படம் அதற்கு போட்டியாக அதே நாளில் ரீ ரிலீஸ் ஆகிறது.

மங்காத்தா - தெறி

Source : twitter

தமிழ் திரையுலகின் உச்சநட்சத்திரமாக திகழ்பவர் நடிகர் விஜய். தமிழக வெற்றிக் கழகத்தை தொடங்கிய பிறகு இவர் அரசியலில் முழு நேரமும் கவனம் செலுத்த வேண்டும் என்பதற்காக, திரைப்படங்களில் நடிப்பதில் இருந்து விலகுவதாக அறிவித்தார். 

தெறி ரீ ரிலீஸ்:

இந்த நிலையில், இவர் நடித்த கடைசி படமான ஜனநாயகன் இந்த பொங்கலுக்கு வெளியாகும் என்று எதிர்பார்க்கப்பட்டது. ஆனால், சென்சார் விவகாரத்தில் சிக்கிய ஜனநாயகன் பொங்கலுக்கு வெளியாகாத நிலைக்கு ஆளாகி நீதிமன்ற வழக்கில் சிக்கியுள்ளது. 

இந்த நிலையில், விஜய் ரசிகர்களை திருப்திப்படுத்துவதற்காக தெறி படம் பொங்கல் விருந்தாக கடந்த 15ம் தேதி வெளியாகும் என்று அந்த படத்தின் தயாரிப்பாளர் கலைப்புலி தாணு அறிவித்திருந்தார். ஆனால், புதிய படங்களான வா வாத்தியாரே, தலைவர் தம்பி தலைமையில் படங்களின் வெளியீட்டிற்காக தெறி படத்தின் ரீ ரிலீஸ் ஒத்திவைப்பதாக அறிவிக்கப்பட்டது. 

மங்காத்தாவிற்கு போட்டி:

இந்த நிலையில், தெறி படம் வரும் 23ம் தேதி ரீ ரிலீஸ் ஆகும் என்று படத்தின் தயாரிப்பாளர் தாணு அறிவித்துள்ளார். இதே 23ம் தேதி அஜித்குமார் நடித்து மாபெரும் வெற்றி பெற்ற மங்காத்தா படம் ரீ ரிலீஸ் ஆகும் என்று ஏற்கனவே அறிவிக்கப்பட்டு இருந்தது.  இந்த நிலையில், மங்காத்தா படத்திற்கு போட்டியாக தெறி படம் வெளியாகிறது. 

தமிழ்நாட்டில் அதிகளவு ரசிகர்களை கொண்ட நடிகர்கள் விஜய் மற்றும் அஜித். இருவரும் சமகாலத்தில் வளர்ந்து தங்களுக்கென கோடிக்கணக்கான ரசிகர்களை உருவாக்கிக் கொண்டவர்கள். இவர்கள் இருவரது படங்களும் திரையரங்கில் மோதிக் கொண்ட தருணத்தில், இவர்களது ரசிகர்கள் இணையத்தில் மோதிக் கொள்வதை வழக்கமாக வைத்திருந்தனர். 

ஆனால், விஜய் அரசியலுக்கு வந்த பிறகு அனைத்து தரப்பு ரசிகர்களையும் கவர்வதற்கு மிகவும் கவனமாக இருந்து வருகிறார். குறிப்பாக, அஜித் ரசிகர்களின் வாக்குகளை தன் பக்கம் இழுக்க வேண்டும் என்பதில் விஜய் தீவிரமாக உள்ளார். இதற்காக அவர் பல இடங்களில் அஜித்தின் பெயரை நண்பர் அஜித் என்று குறிப்பிட்டு வருகிறார். 

வாக்கு வங்கி பாதிப்பு:

கரூர் விவகாரம், ஜனநாயகன் பிரச்சினை, ரஜினி ரசிகர்களுடன் விஜய் ரசிகர்கள் இணையத்தில் மல்லுகட்டுவது போன்ற பல விவகாரங்கள் தவெக-விற்கு எதிராகவே இருக்கும் நிலையில், தற்போது அஜித் ரசிகர்களை சீண்டுவது போல மங்காத்தாவிற்கு போட்டியாக தெறி படம் ரீ ரிலீஸ் ஆகிறது. 

தெறி படத்தை ரீ ரிலீஸ் செய்வது படத்தின் தயாரிப்பாளர் முடிவாக இருந்தாலும், இதனால் பாதிக்கப்படுவது விஜய்யின் தவெக வாக்கு சதவீதமே ஆகும். விஜய் ரசிகர்களும், தவெக தொண்டர்கள் பலருமே மங்காத்தாவிற்கு போட்டியாக தெறி படத்தை ரீ ரிலீஸ் செய்வது தேவையற்ற வேலை என்று கருத்து தெரிவித்து வருகின்றனர். 

விஜய்க்கு பின்னடைவு:

இதனால், மீண்டும் இணையத்தில் விஜய் - அஜித் ரசிகர்கள் மோதல் உருவாவதற்கு வாய்ப்புகள் பிரகாசமாக இருப்பதாகவும், இது இன்னும் 4 மாத காலத்திற்குள் நடக்க உள்ள தேர்தலிலும் எதிரொலிக்கும் என்றும் கருதப்படுகிறது. விஜய்க்கு திரையுலக தரப்பில் இருந்து வெளிப்படையான அரசியல் ஆதரவு பெரியளவில் வராத நிலையில், மீண்டும் விஜய் - அஜித் ரசிகர்கள் மோதல் உருவானால் விஜய்க்கு மிகப்பெரிய பின்னடைவை உண்டாக்கும்.