துணிவு படம் தெலுங்கில் தெகிம்பு எனும் பெயரில் சங்கராந்தி ஸ்பெஷல் ரிலீசாக இன்று வெளியான நிலையில், டோலிவுட் ரசிகர்கள் மத்தியில் பாசிடிவ் விமர்சனங்களையும் பாராட்டுகளையும் பெற்று வருகிறது.
கோலிவுட் பொங்கல் வெளியீட்டுக்கு இணையாக டோலிவுட்டிலும் ஆண்டு தோறும் சங்கராந்தி ஸ்பெஷல் படங்கள் ரிலீசாவது வழக்கம்.
அந்த வகையில் இந்த ஆண்டு டோலிவுட்டின் மெகா ஸ்டாராக வலம் வரும் நடிகர் சிரஞ்சீவியின் படமும், தெலுங்கு சினிமா உச்ச நட்சத்திரமும் தெலுங்கு தேசம் கட்சி எம்.எல்.ஏ.வுமான பாலகிருஷ்ணா படமும் இந்த சங்கராந்தி பண்டிகைக்கு நேரடியாக மோதவுள்ளன.
டோலிவுட் மெகா ஸ்டார் சிரஞ்சீவி மற்றும் முன்னணி நடிகர் ரவி தேஜா இணைந்து நடித்துள்ள ‘வால்டர் வீரய்யா’ படம் ஜனவரி 13ஆம் தேதியும், பாலகிருஷ்ணாவின் வீர சிம்மா ரெட்டி படம் ஜனவரி 12ஆம் தேதியும் ரிலீசாக உள்ள நிலையில் கோலிவுட்டைப் போல் டோலிவுட் வட்டாரமும் களைகட்டியுள்ளது.
மற்றொருபுறம் அஜித்தின் துணிவு படம் தெகிம்பு எனும் பெயரிலும், விஜய்யின் வாரிசு படம் வாரசுடு எனும் பெயரிலும் ரிலீஸ் ஆகின்றன.
வாரசுடு படம் தெலுங்கில் ஜனவரி 14ஆம் தேதி வெளியாகும் என முன்னதாக அறிவிக்கப்பட்ட நிலையில், துணிவு படத்தின் தெலுங்கு டப்பிங்கான தெகிம்பு இன்றே வெளியானது.
டோலிவுட்டில் நடிகர் சூர்யா - கார்த்தி, சிம்பு உள்ளிட்டோருக்கு ஏற்கெனவே நல்ல மார்க்கெட் உருவாகியுள்ள நிலையில், இந்த ஆண்டு தல - தளபதியின் படங்கள் உச்ச நட்சத்திரங்களின் படங்களைக் கடந்து வெற்றிவாகை சூடுமா என எதிர்பார்ப்பு எகிறியது.
இந்நிலையில், துணிவு படம் தெலுங்கில் பாசிட்டிவ் விமர்சனங்களை அள்ளி வருவதாகத் தகவல்கள் வெளியாகியுள்ளன. படம் முடித்து வெளியேறும் ரசிகர்கள் நேர்மறையான விமர்சனங்களைப் பகிர்ந்து கொள்ளும் வீடியோக்கள் இணையத்தில் ட்ரெண்ட் ஆகி வருகின்றன.
சங்கராந்தி ரிலீஸ் வரிசையில் முதல் படமாக வெளியாகியுள்ள துணிவு படம் பாசிட்டிவ் ரிவ்யூக்களை அள்ளி வரும் நிலையில், வாரசுடு எந்த மாதிரியான விமர்சனங்களைப் பெறும் என எதிர்பார்த்து விஜய் ரசிகர்கள் காத்துள்ளனர்.
ஹெச்.வினோத் இயக்கத்தில் நடிகர்கள் அஜித்குமார் நடித்துள்ள படம் துணிவு. இந்த படத்தில் மஞ்சு வாரியர் ஹீரோயினாக நடித்துள்ள நிலையில், சமுத்திரகனி, பகவதி பெருமாள், மோகன சுந்தரம், ஜான் கொக்கைன், அஜய் உள்ளிட்ட பலரும் நடித்துள்ளனர். போனி கபூர் இப்படத்தை தயாரித்துள்ள நிலையில், ஜிப்ரான் இசையமைத்துள்ளார். துணிவு படம் பொங்கலை முன்னிட்டு இன்றைய தினம் உலகமெங்கும் வெளியாகியுள்ளது.