அஜித் ஹெலிகாப்டர் இயக்கும் வீடியோ தற்போது சமூக வலைதளங்களில் வெளியாகி வைரலாகி வருகிறது.
நடிகர் அஜித்தின் அடுத்த அடுத்த படங்களின் அப்டேட்களை விட அவரது பைக் பயண ஃபோட்டோக்களும் வீடியோக்களும் தான் தற்போதைய ட்ரெண்டிங்காக உள்ளது. போனி கபூர் தயாரிப்பில் ஹெச். வினோத் இயக்கத்தில் AK 61 எனப்படும் பெயரிடப்படாத படத்தில் அஜித் நடித்து வருகிறார்.
‘நேர்கொண்ட பார்வை’, ‘வலிமை’ படங்களை தொடர்ந்து இந்தக் கூட்டணி மூன்றாவது முறையாக இணைந்துள்ளதாலும், ‘வலிமை’ எதிர்பார்ப்பை பூர்த்தி செய்யாத காரணத்தினாலும் ‘ஏகே 61’ படத்தை ரசிகர்கள் ஆவலுடன் எதிர்பார்த்து காத்து இருக்கின்றனர். இந்தப்படத்தில் அஜித்துக்கு ஜோடியாக பிரபல மலையாள நடிகையான மஞ்சு வாரியர் நடிக்கிறார். வரும் 2023ஆம் ஆண்டு பொங்கலுக்கு இப்படம் வெளியாகும் என எதிர்பார்க்கப்படுகிறது.
இந்தப்படத்தின் படப்பிடிப்பு வேகமாக நடந்து கொண்டிருந்த நிலையில், அஜித் ஐரோப்பிய நாடுகளில் சுற்றுப்பயணம் மேற்கொண்டார். அது தொடர்பான புகைப்படங்களும் சமூக வலைதளங்களில் வைரலானது. அதனைத்தொடர்ந்து படப்பிடிப்பில் அஜித் கலந்து கொண்டார். இறுதிக்கட்ட படப்பிடிப்பு மும்மரமாக நடந்து வரும் நிலையில் அஜித் லடாக் பயணத்தை மேற்கொண்டார். சென்னையில் இருந்து விமானம் மூலம் லடாக் சென்ற அவர் அங்கிருந்து பைக் மூலம் பயணம் செய்து வருகிறார்.
கடந்த சில நாட்களாக, அது தொடர்பான புகைப்படங்களும், அவர் கார்கில் நினைவிடத்தில் அஞ்சலி செலுத்தியது தொடர்பான புகைப்படங்களும் சமூக வலைதளங்களில் வைரலானது.
புத்த விகாரம் ஒன்றில் நடிகர் அஜித் வழிபடும் காட்சியும் இணையத்தில் வெளியாகி ஹிட் அடித்தது.
அந்த வரிசையில் தற்போது அஜித் ஹெலிகாப்டர் இயக்கும் வீடியோ மற்றும் புகைப்படங்கள் வெளியாகி இணையத்தில் வைரலாகி உள்ளன.
தமிழ் சினிமாவில் விமானத்தை இயக்குவதற்கான லைசன்ஸ் அஜித்திடம் மட்டுமே இருப்பதும், அவர் ஒரு பயிற்சி பெற்ற விமானி என்பதும் குறிப்பிடத்தக்கது.