கடந்த 2023 ஆம் ஆண்டு சுதிப்தோ சென் இயக்கத்தில் வெளியான கேரளா ஸ்டோரி திரைப்படம் நாடு முழுவதும் பெரும் அதிர்வலைகளை ஏற்படுத்தியது. இந்து பெண்களை காதலிப்பதாக ஏமாற்றி அவர்கள் இஸ்லாம் மதத்திற்கு மாற்றப்படுவதாக இப்படம் சித்தரித்தது. இப்படத்திற்கு கேரளா அரசு சார்பாக கடும் எதிர்ப்பு கிளம்பியது. அதே நேரம் தமிழ்நாடு உள்ளிட்ட பல்வேறு மாநிலங்களில் இப்படம் வெளியாக தடை விதிக்கப்பட்டது. ஆனால் இந்தி மொழியில் இப்படம் வசூல் ரீதியாக பெரிய வெற்றிபெற்றதாக தகவல்கள் வெளியாகின. முதல் பாகத்தைத் தொடர்ந்து தற்போது இப்படத்தின் இரண்டாம் பாகத்தின் டிரெய்லர் வெளியாகி பெரியளவில் சர்ச்சையை ஏற்படுத்தியுள்ளது .
த கேரளா ஸ்டோரி 2 டிரெய்லர்
சன்ஷைன் பிக்ச்சர்ஸ் சார்பாக விபுல் அம்ருத்லால் ஷா இந்த படத்தை தயாரித்துள்ளார். அமர்நாத் ஷா இந்த படத்தை இயக்கியுள்ளார். ஐஸ்வர்யா ஓஜா , உல்கா குப்தா , அதிதி பாடியா இப்படத்தில் முக்கிய கதாபாத்திரங்களில் நடித்துள்ளார்கள். முதல் பாகத்தின் அதே கதைதான் இரண்டாம் பாகமும். அப்பாவி இந்துப் பெண்களை காதலித்து அவர்களை இஸ்லாம் மதத்திற்கு மாற்றி திருமணம் செய்துகொள்கிறார்கள். எல்லா விதங்களிலும் வெளிப்படையான இஸ்லாமிய வெறுப்பை வெளிப்படுத்தும் படமாக இப்படம் உருவாகியுள்ளது. வரும் பிப்ரவரி 27 ஆம் தேதி இப்படம் திரையரங்கில் வெளியாக இருக்கிறது.
சமூக வலைதளத்தில் சர்ச்சை
த கேரளா ஸ்டோரி 2 படத்தின் டிரெய்லர் வெளியாகி சமூக வலைதளத்தில் பெரியளவில் பேசுபொருளாகியுள்ளது. குறிப்பாக இந்துப் பெண்களுக்கு வலுகட்டாயமாக மாட்டிறைச்சி கொடுக்கும் காட்சிக்கு கேரள மாநிலத்தைச் சேர்ந்தவர்கள் கடுமையான எதிர்ப்பு தெரிவித்து வருகிறார்கள்.