தமிழ் சினிமா துறையில் முன்னணி இசையமைப்பாளராக இருந்து வரும் டி. இமான் மறுமணம் செய்துகொண்டார். அதற்கான புகைப்படங்கள் தற்போது வெளியாகி இணையத்தில் வைரலாகி வருகிறது.
டி. இமான் மறுமணம் செய்துகொண்ட பெண்ணின் பெயர் எமிலி எனவும், இவர் பிரபல கலை இயக்குநர் உபால்டுவின் மகள் எனவும் கூறப்படுகிறது. இந்த திருமணத்தின்போது நெருங்கிய நண்பர்கள் மற்றும் உறவினர்கள் மட்டுமே பங்கேற்றனர் என தெரிகிறது. மணமகளை வாழ்த்தி திரையுலகினர் வாழ்த்துக்களை குவித்து வருகின்றனர்.
முன்னதாக கடந்த 2008ம் ஆண்டு இசையமைப்பாளர் டி.இமான், மோனிகா ரிச்சர்ட் என்பவரை திருமணம் செய்துகொண்டார். இரு குழந்தைகளுக்கு பெற்றோர்களான இந்த தம்பதியினர் கடந்தாண்டு இறுதியில் விவகாரத்து செய்தனர். 13 ஆண்டுகள் இணைந்து வாழ்ந்த இமான் மற்றும் மோனிகா ரிச்சர்ட் தம்பதியினர் விவகாரத்து அப்போது திரை பிரபலங்கள் இடையே அதிர்ச்சியை ஏற்படுத்தியது.
விவாகரத்திற்கு பிறகு டி. இமான் சென்னை சேர்ந்த பெண்ணுடன் பழகி வருவதாகவும், இருவரும் வெளியிடங்களுக்கு ஒன்றாக சென்று வருவதாகவும் செய்திகள் பரவியது. இந்தநிலையில், தற்போது டி. இமான் எமிலி என்ற பெண்ணுடன் மறுமணம் செய்துள்ளார். பல திரைபிரபலங்கள் தற்போது இவருக்கு வாழ்த்து தெரிவித்து வருகின்றனர்.
தமிழ் திரையுலகின் முன்னணி இசையமைப்பாளரான இமான் தமிழ் மட்டுமின்றி தெலுங்கு, கன்னடம் மற்றும் மலையாளம் ஆகிய மொழிப்படங்களுக்கும் இசையமைத்துள்ளார். அவரது இசையில் இதுவரை 100க்கும் மேற்பட்ட படங்கள் வெளியாகியுள்ளது. அஜித் நடிப்பில் வெளியாகி பிரம்மாண்ட வெற்றி பெற்ற விஸ்வாசம், ரஜினிகாந்த் நடிப்பில் வெளியாகிய அண்ணாத்த ஆகிய படங்களுக்கு இமான்தான் இசையமைத்திருந்தார்.
இதுமட்டுமின்றி இவரது இசையில் விரைவில் நடிகர் சூர்யா நடிப்பில் எதற்கும் துணிந்தவன் படம் வெளியாக உள்ளது. மேலும், இவரது இசையில் கேப்டன், யுத்தசத்தம், பொய்க்கால் குதிரை, மை டியர் பூதம் ஆகிய படங்கள் உருவாகி வருகிறது. இசையமைப்பாளராக மட்டுமின்றி பாடகராகவும் இமான் ஏராளமான பாடல்களை பாடியுள்ளார். விஸ்வாசம் படத்திற்காக சிறந்த இசையமைப்பாளருக்கான தேசிய விருதையும் வென்றார் என்பது குறிப்பிடத்தக்கது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்