ஆயுத பூஜைக்கு வெளியாகும் சிவகார்த்திகேயனின் சேயோன்..?வசூலை குவிக்க பக்கா ஸ்கெட்ச்

ராஜ்கமல் தயாரிப்பில் சிவகார்த்திகேயன் நடிக்கவிருக்கும் சேயோன் திரைப்படம் வரும் அக்டோபர் மாதம் வெளியாக இருப்பதாக தகவல் வெளியாகியுள்ளது

சிவகார்த்திகேயன் , சேயோன்

Source : X

ராஜ்கமல் ஃபிலிம்ஸ் இண்டர்நேசனல் மற்றும் டர்மரிக் மீடியா இணைந்து சிவகார்த்திகேயன் நடிப்பில், சிவகுமார் முருகேசன் இயக்கத்தில் உருவாகும் சேயோன் படத்தின் ப்ரோமோ இன்று வெளியாகியுள்ளது. பல வருடங்களுக்குப் பின் மீண்டும் கிராமத்து கதைக்களத்தில் சிவகார்த்திகேயன் நடிக்க இருப்பது படம் குறித்த எதிர்பார்ப்புகளை அதிகரித்துள்ளது.

அனைத்து தரப்பின் பாராட்டுதலோடு, வசூல் ரீதியாகவும் பெரும் சாதனை படைத்த 'அமரன்' படத்தின் பிரம்மாண்ட வெற்றிக்குப் பிறகு, சிவகார்த்திகேயன் மீண்டும் ராஜ்கமல் ஃபிலிம்ஸ் இண்டர்நேசனல் நிறுவனத்துடன் இணைவது ஒரு முக்கியமான மைல்கல்லாகப் பார்க்கப்படுகிறது. அனுபவமும் இளமையும் கைகோர்க்கும் இந்த வெற்றிக் கூட்டணி மாநில மொழி எல்லைகளைக் கடந்து புதிய உயரங்களை எட்டும் என்பதில் ஐயமில்லை.

கமல்ஹாசன் மற்றும் ஆர். மகேந்திரன் தயாரிப்பில் உருவாகும் சேயோன், வலிமையான கதைக்களத்தையும் ஈர்க்கக்கூடிய திரைக்காட்சிகளையும் ஒன்றிணைக்கிறது. விரைவில் வெளியாகவிருக்கும் ‘தாய்க்கிழவி’ படத்தை இயக்கிய இயக்குனர் சிவகுமார் முருகேசனின் இரண்டாவது படம் இது.  முதன்முறையாக ராஜ்கமலுடனும், சிவகார்த்திகேயனுடன் இசையமைப்பாளர் சந்தோஷ் நாராயணன் இணைந்திருப்பது இத்திரைப்படத்தின் பாடல்கள் குறித்த பெரும் எதிர்பார்ப்பை ஏற்படுத்தியுள்ளது.  இப்படத்தின் இதர நடிகர்கள், தொழில்நுட்பக் கலைஞர்கள் மற்றும் வெளியாகும் தேதி குறித்த கூடுதல் தகவல்கள் விரைவில் அறிவிக்கப்படும்.

சாமர்த்தியாமக முடிவெடுத்த சிவகார்த்திகேயன் 

பராசக்தி படத்தைத் தொடர்ந்து சிவகார்த்திகேயன் வெங்கட் பிரபு இயக்கத்தில் சைன்ஸ் ஃபிக்‌ஷன் படத்தில் நடிக்க இருப்பதாக தகவல்கள் வெளியாகின. இந்த படத்தின் பட்ஜெட் பெரிதாக இருந்த காரணத்தினால் தயாரிப்பு நிறுவனத்துடன் பேச்சுவார்த்தை படப்பிடிப்பில் தாமதம் ஏற்படுத்தியது. அதே நேரம் ராம்குமார் பாலகிருஷ்ணன் இயக்கத்தில் முன்னதாக சிம்பு நடிக்க இருந்த இருந்த கதையில் சிவகார்த்திகேயன் நடிக்க உள்ளார். இந்த படத்திற்கு என்.ஓ.சி பிரச்சனைகள் இருப்பதால் இப்படமும் தாமதமானது. இப்படியான சூழலில் துரிதமாக செயலபட்ட சிவகார்த்திகேயன் சிவகுமார் முருகேசனின் படத்தில் நடிக்க முடிவு செய்தார். 

ஆயுத பூஜை ரிலீஸ் 

மதுரை மற்றும் அதனை சுற்றியுள்ள பகுதிகளில் இப்படத்தின் படப்பிடிப்பு நடைபெற இருக்கிறது. மொத்தம் 60 நாட்கள் படப்பிடிப்பு நடக்க இருக்கிறது. படத்தின் அறிவிப்புடன் படத்தின் ரிலீஸ் தேதியையும் சேர்த்து படக்குழு முடிவு செய்துள்ளது. வரும் அக்டோபர் மாதம் ஆயுத பூஜையை ஒட்டி 5 நாள் விடுமுறையை கணக்கு வைத்து  சேயோன் திரைப்படம் வெளியாக இருப்பதாக தகவல்கள் வெளியாகியுள்ளன. அமரன் படத்தைப் போல் சேயோன் திரைப்படமும் ராஜ்கமல் நிறுவனத்திற்கு வசூல் ரீதியாக மிகப்பெரிய வெற்றிப்படமாக அமையும் என்று எதிர்பார்க்கப்படுகிறது.