பிரபல நடிகையும் பாடகியுமான ஸ்ருதி ஹாசன், தமிழ் சினிமாவின் நடிகைகளுக்கான பொதுவான இலக்கணத்தில் அடங்காமல், நடிப்பு, இசை, ஆல்பம் பாடல்கள் என பல விஷயங்களில் கவனம் செலுத்தி தனித்து வலம் வருகிறார்.
முன்னதாக பெண்களுக்கு பெருமை செலுத்தும் வகையிலும் அவர்களது போராட்டங்களை எடுத்துச் சொல்லும் வகையிலும் ‘ஷீ இஸ் எ ஹீரோ’ (She is a hero) எனும் பாடலை ஸ்ருதி வெளியிட்டிருந்தார்.
இந்தப் பாடலை கோலிவுட் தொடங்கி பாலிவுட் வரை பல பிரபலங்களும் பகிர்ந்து நடிகை ஸ்ருதி ஹாசனைப் புகழ்ந்து வருகின்றனர்.
எம் சி அல்தாஃப் உள்ளிட்ட பல திறமையான கலைஞர்களுடன் இப்பாடலில் பணியாற்றியுள்ள ஸ்ருதி ஹாசன், தனது காதலர் சாந்தனு ஹசாரிகாவுடன் முதன்முறையாக இப்பாடலில் இணைந்து பணியாற்றியுள்ளார்.
இப்பாடலின் கிரியேட்டிவ் இயக்குனராகவும் கலை வடிவமைப்பாளராகவும் சாந்தனு பணியாற்றியுள்ளார்.
இந்நிலையில், தன் காதலருடல் இப்பாடலில் இணைந்து பணியாற்றியது குறித்து ஸ்ருதி மனம் திறந்துள்ளார். ”அவரது கலைத்திறனை நான் ஒருபோதும் சாதாரணமாக எடுத்துக் கொண்டதில்லை.
இந்த ப்ராஜக்டின் ஒரு பகுதியாக அவர் இருப்பதும், இந்தப் பாடலுக்கான அவரது பங்களிப்பும் அற்புதமான விஷயம்” என ஸ்ருதி தெரிவித்துள்ளார்.
முன்னதாக ’பொன்னியின் செல்வன்’ படம் மூலம் தமிழில் அறிமுகமாக இருக்கும் பிரபல நடிகை ஷோபிதா, ஸ்ருதியின் இப்பாடலை வெகுவாகப் புகழ்ந்து பதிவிட்டிருந்தது குறிப்பிடத்தக்கது.
இந்நிலையில், தனது பாடலுக்கு பல நடிகர், நடிகைகள், இயக்குனர்கள் ஆதரவு தெரிவித்து வருவதற்கு நன்றி தெரிவித்த ஸ்ருதி, நான் வெளியிடும் இதுபோன்ற வித்தியாசமான படைப்புகளை ஆதரிப்பதற்கு நன்றி எனவும் தெரிவித்துள்ளார்.