நடிகை சமந்தா ரூத் பிரபு மற்றும் இயக்குநர் ராஜ் நிடிமோரு தம்பதிக்கு ஆண் குழந்தை பிறந்துள்ளது. தங்களுக்கு மகன் பிறந்த மகிழ்ச்சியான செய்தியை சமந்தா தனது சமூக வலைதளப் பக்கத்தில் பகிர்ந்துள்ளார். மேலும், குழந்தைக்கு ‘தேவ் நிடிமோரு’ எனப் பெயர் சூட்டியிருப்பதையும் அவர் அறிவித்துள்ளார்.
தென்னிந்தியத் திரையுலகில் பிரபலமான நடிகையாக வலம் வருபவர் சமந்தா. தமிழ், தெலுங்கு உள்ளிட்ட மொழிகளில் பல திரைப்படங்களில் நடித்துள்ள இவர், ‘தி ஃபேமிலி மேன் 2’ இணையத் தொடர் மூலம் இயக்குநர் ராஜ் நிடிமோருவுடன் இணைந்து பணியாற்றினார். தொடர்ந்து இருவரும் காதலித்து வந்த நிலையில், கடந்த 2025ஆம் ஆண்டு டிசம்பர் 1ஆம் தேதி கோவையில் உள்ள ஈஷா யோகா மையத்தில் திருமணம் செய்துகொண்டனர்.
திருமணத்திற்குப் பிறகு இருவரும் தங்களது தனிப்பட்ட வாழ்க்கை குறித்த தகவல்களை அதிகம் பகிராமல் இருந்து வந்தனர். இந்நிலையில், சமந்தா கர்ப்பமாக இருப்பதாகத் தகவல்கள் வெளியான நிலையில், தனது கர்ப்ப காலப் புகைப்படங்களையும் அவ்வப்போது சமூக வலைதளங்களில் பகிர்ந்து வந்தார். குழந்தையை வரவேற்பதற்கான ஏற்பாடுகளிலும் இருவரும் ஈடுபட்டிருந்தனர்.
ஆண் குழந்தைக்கு தாயானார் சமந்தா
கடந்த நவம்பர் 17ஆம் தேதி சமந்தா மற்றும் ராஜ் நிடிமோரு தங்களது வீட்டில் குடும்பத்தினருடன் இணைந்து பாரம்பரிய பூஜை நடத்தினர். இதுதொடர்பான புகைப்படங்களையும் சமந்தா பகிர்ந்திருந்தார். இந்த நிலையில், நவம்பர் 19ஆம் தேதி தங்களுக்கு ஆண் குழந்தை பிறந்துள்ளதாக தற்போது அறிவித்துள்ளனர்.
குழந்தையின் கையை சமந்தாவும் ராஜ் நிடிமோருவும் பிடித்திருக்கும் புகைப்படத்தைப் பகிர்ந்த சமந்தா, “எங்கள் அழகான ஆண் குழந்தை தேவ் நிடிமோரு. 19.11.2026. எங்கள் இதயங்கள் இதுவரை இல்லாத அளவுக்கு மகிழ்ச்சியில் நிறைந்துள்ளன” எனப் பதிவிட்டுள்ளார். இந்தப் பதிவைத் தொடர்ந்து திரையுலகினர் மற்றும் ரசிகர்கள் தம்பதிக்கு வாழ்த்து தெரிவித்து வருகின்றனர்.
