பெரியவர்கள் மட்டுமல்லாது குழந்தைகளையும் தனது ரசிகர்களாக பெற்றிருக்கும் நடிகர் சிவகார்த்திகேயன். தற்போது இவரது நடிப்பில் வெளியீட்டிற்கு தயாராக இருக்கும் திரைப்படம் “டாக்டர்”. இந்த படத்தை இயக்குநர் நெல்சன் இயக்கியுள்ளார். படத்தை கே.ஜே.ஆர் ஸ்டூடியோஸ் மற்றும் சிவகார்த்திகேயனின் சொந்த நிறுவனமான எஸ்.கே.புரொடக்ஷன் இணைந்து தயாரித்துள்ளது. படத்தில் பிரியங்கா மோகன் சிவகார்த்திகேயனுக்கு ஜோடியாக நடித்திருக்கிறார். தவிற யோகி பாபு, வினய் உள்ளிட்ட ஏராளமான நடிகர் பட்டாளங்கள் நடித்துள்ளனர்.
மேலும் சிவாவின் நண்பர் அனிருத் படத்திற்கு இசையமைத்துள்ளார். கடந்த மார்ச் மாதமே இந்த திரைப்படம் வெளியாகும் என அறிவிக்கப்பட்ட நிலையில் தமிழகத்தில் சட்டமன்ற தேர்தல் நடைபெற்றதால் அப்போது படத்தின் ரிலீஸ் தேதியை தள்ளி வைத்தது படக்குழு. கடந்த மே மாதம் 11 ஆம் தேதி படத்தை வெளியிட திட்டமிட்டிருந்த நிலையில் கொரோனா இரண்டாம் அலை காரணமாக ஊரடங்கு பிறப்பிக்கப்பட்டதால், படம் வெளியிடப்படாமல் முடங்கி போனது. இதனால் ரசிகர்கள் மிகுந்த ஏமாற்றம் அடைந்தனர். இந்நிலையில் படம் மீண்டும் திரையரங்கம் திறந்த பிறகு வெளியாகும் என எதிர்பார்க்கப்பட்ட நிலையில், ஓடிடியில் வெளியிடுவதற்கான முடிவு எடுக்கப்பட்டுள்ளதாக தெரிகிறது.
இந்நிலையில் சிவகார்த்திகேயனின் அடுத்தப்படம் குறித்த தகவல் கசிந்துள்ளது. தெலுங்கு இயக்குநரான அனுதீப், சிவகார்த்திகேயனின் அடுத்தப்படத்தை இயக்கப்போவதாக தகவல் வெளியாகியுள்ளது. இவர் தெலுங்கில் இயக்கிய முழு நீள காமெடி படமான ’ஜாதி ரத்னாலு’ மிகப்பெரிய வரவேற்பை பெற்றது. இந்தியா மட்டுமின்றி வெளிநாடுகளில் பட்டையைக் கிளப்பியது ஜாதி ரத்னாலு. அமெரிக்காவிலும் இந்தப் படம் அதிக வசூலைப் பெற்றது. வெளியான ஒரு மாதத்துக்குள் கிட்டத்தட்ட ஒரு மில்லியன் டாலர்களை வசூலித்தது. அதாவது ரூ. 7.25 கோடி. 6 கோடி ரூபாய் பட்ஜெட்டில் உருவான இந்தப் படம் ஏற்கனவே இந்தியாவில் கிட்டத்தட்ட 70 கோடி ரூபாயை வசூலித்தது குறிப்பிடத்தக்கது.
ஜாதி ரத்னாலுவின் வெற்றியை அடுத்தே அனுதீப்பை சிவகார்த்திகேயன் டிக் செய்துள்ளதாக தெரிகிறது. படத்தில் நாயகியாக ராஷ்மிகா நடிக்கவுள்ளதாகவும் கூறப்படுகிறது. கீதா கோவிந்தம் மூலம் பெரிய ரசிகர் கூட்டத்தை வைத்துள்ள ராஷ்மிகாவுக்கு தமிழிலும் ரசிகர் வட்டம் உண்டு. இவர் தமிழில் சுல்தான் திரைப்படத்தில் நடித்திருந்தார். இந்நிலையில்தான் சிவகார்த்திகேயனுடன் ராஷ்மிகா ஜோடி சேரவுள்ளதாக கூறப்படுகிறது. இந்தப்படம் தமிழ், தெலுங்கில் வெளியாகும் எனவும், அனிருத் இசையமைக்க வாய்ப்புண்டு என்பதும் கூடுதல் தகவலாக வெளியாகியுள்ளது.
இதற்கிடையே, விஜயை அடுத்து இயக்கப்போவது தெலுங்கு இயக்குநர் எனவும் கூறப்படுகிறது. தெலங்கு இயக்குநர் வம்சி தான் தளபதி 66ன் இயக்குநர் என தகவல் வெளியாகியுள்ளது. இந்நிலையில் சிவகார்த்திகேயனின் அடுத்தப்படத்தையும் தெலுங்கு இயக்குநர் கைப்பற்றி இருப்பதாக தகவல் வெளியாகியுள்ளது கோலிவுட்டில் கவனம் பெற்றுள்ளது