சிவகார்த்திகேயன் நடிக்கும் ’பிரின்ஸ்’ படத்தில் முதல் பாடல் வெளியாகியுள்ள நிலையில், லிரிக்கல் வீடியோவில் நாயகன் சிவகார்த்திகேயனின் பெயர் எழுத்துப் பிழையுடன் இடம்பெற்றுள்ளது.
நடிகர் சிவகார்த்திகேயன், மரியா ரியாபோஷப்கா நடிப்பில் விரைவில் வெளியாக உள்ள படம் ப்ரின்ஸ்.
’டான்’ படத்தின் வெற்றியைத் தொடர்ந்து சிவகார்த்திகேயன் நடிக்கும் இப்படம் தமிழ், தெலுங்கு இரு மொழிகளில் தயாராகி வருகிறது. உக்ரைன் நடிகை மரியா ரியாபோஷப்கா சிவாவுக்கு ஜோடியாக இப்படத்தில் நடிக்கும் நிலையில், தெலுங்கு இயக்குநர் அனுதீப் படத்தை இயக்குகிறார்.
இப்படம் வரும் தீபாவளியன்று ரிலீசாகும் என எதிர்பார்க்கப்படுகிறது. சத்யராஜ் இப்படத்தில் முக்கிய வேடத்தில் நடித்துள்ளார். தமன் இசையமைத்துள்ளார்.
இப்படத்தின் ஃபர்ஸ்ட் சிங்கிள் ஏற்கெனவே தெரிவித்தபடி இன்று வெளியாகியுள்ளது. ’பிம்பிலிக்கா பிலாப்பி’ எனும் இப்பாடலின் லிரிக்கல் வீடியோவில் இடம்பெற்றுள்ள சிறு பிழை தற்போது இணையவாசிகள் மத்தியில் பேசுபொருள் ஆகியுள்ளது.
அதன்படி நடிகர் சிவகார்த்திகேயன் பெயர் தவறுதலாக ’சிவகாத்திகேயன்’ என ‘ர்’ விடுபட்டு எழுத்துப்பிழையுடன் வீடியோவில் இடம்பெற்றுள்ளது.
இந்நிலையில், ”வேறு எதாவது பிழை இருந்தாலும் ஓகே, படத்தில் நாயகன் பெயரிலேயே எடுத்ததும் பிழையா” என சிவகார்த்திகேயன் ரசிகர்களும் இணையவாசிகளும் அங்கலாய்த்து வருகின்றனர்.
இதேபோல் ஏற்கெனவே பொன்னியின் செல்வன் படத்தின் கதாபாத்திரங்கள் அறிமுகப்படுத்தப்பட்டபோது அதன் போஸ்டர்களில் பிழை இருந்ததாக ரசிகர்கள் சுட்டிக்காட்டி அதிருப்தி தெரிவித்தனர்.
ப்ரின்ஸ் சிவகார்த்திகேயன் நேரடியாக தெலுங்கில் நடிக்கும் முதல் திரைப்படமாகும். முன்னதாக ப்ரின்ஸ் படத்துக்காக தெலுங்கில் சரளமாக பேசுவதற்காக பல நுட்பங்களை கற்றுள்ளார் சிவகார்த்திகேயன். ஒரே நேரத்தில் தமிழ் மற்றும் தெலுங்கு என இரு மொழிகளிலும் இப்படம் படமாக்கப்பட்டுள்ளது.
ப்ரின்ஸ் திரைப்படத்தில் சிவகார்த்திகேயன் ஒரு ஆசிரியர் கதாபாத்திரத்தில் நடித்துள்ளார் என்றும், இதன் படப்பிடிப்பு தமிழ்நாடு, ஹைதராபாத் மற்றும் பாண்டிச்சேரி, லண்டன் போன்ற இடங்களில் நடைபெற்றது என்றும் முன்னதாகத் தகவல்கள் வெளியாகியுள்ளன.