2019ஆம் ஆண்டு கோமாளி படத்தின் மூலம் தமிழ் சினிமாவில் இயக்குநராக அறிமுகமாகி கவனமீர்த்த பிரதீப் ரங்கநாதன், லவ் டுடே பட வெற்றியின் மூலம் மீண்டும் தமிழ் சினிமாவின் பார்வையை தன் பக்கம் திருப்பியுள்ளார்.
2கே கிட்ஸ் எனப்படும் இன்றைய இளைஞர்களின் காதலைப் பற்றிய கதைக்களத்தை மையப்படுத்தி எடுக்கப்பட்டுள்ள இப்படத்துக்கு யுவன் சங்கர் ராஜா இசையமைத்து பலம் சேர்த்துள்ளார். பிரதீப் ரங்கநாதனுடன் நடிகை இவானா, ராதிகா சரத்குமார், சத்யராஜ், யோகி பாபு உள்ளிட்டோர் முக்கியக் கதாபாத்திரங்களில் நடித்துள்ளனர்.
நவம்பர் 4ஆம் தேதி வெளியான இப்படம் அனைத்து தரப்பு ரசிகர்களையும் கவர்ந்து திரையரங்குகளில் நாளுக்கு நாள் நல்ல வரவேற்பைப் பெற்று வருகிறது. முதல் மூன்று நாள்களில் மட்டும் 14 கோடி ரூபாயை இப்படம் வசூலித்துள்ள நிலையில், விமர்சன ரீதியாகவும் இப்படம் பாராட்டுகளைப் பெற்று வருகிறது.
இந்நிலையில், தான் ஹீரோவாக நடித்து இயக்கியுள்ள இப்படத்துக்கு வரும் வரவேற்பைக் கண்டு அகமகிழந்து போயுள்ள பிரதீப் ரங்கநாதன் முன்னதாக இன்ஸ்டாகிராமில் இது குறித்து உணர்ச்சிகரமான பதிவு ஒன்றைப் பகிர்ந்துள்ளார்.
”இது உண்மையில் நடக்கிறதா? நான் கேட்கும் மற்றும் பார்க்கும் விஷயங்கள் உண்மையா? படக் காட்சிகளின் எண்ணிக்கை, நள்ளிரவு காட்சிகளின் எண்ணிக்கை , படம் பார்க்க வருபவர்களின் எண்ணிக்கை நாளுக்கு நாள் அதிகமாகி வருகிறது.
நேற்று திங்கட்கிழமை, நண்பகல் காட்சிகள் கூட திரையரங்கில் ஹவுஸ்ஃபுல்லாக இருப்பதைப் பார்த்தேன், குடும்பங்களும், ரிப்பீட் ஆடியன்சும் மீண்டும் வரத் தொடங்கியுள்ளனர். தமிழ்நாட்டுக்கு வெளியேயும் அதே வரவேற்பு கிடைத்துள்ளது.
நான் நட்சத்திரம் இல்லை, நான் உங்களில் ஒருவன், நீங்கள் என் மீது பொழிந்த இந்த அன்பு மகத்தானது. நான் உங்களை நம்பினேன், நீங்கள் என்னைக் கைவிடவில்லை, அதற்கு மாறாக என்னை ஆகாயத்தில் மிதக்க வைத்து விட்டீர்கள். என்னை நம்பியதற்கு ஏஜிஎஸ் என்டர்டெயின்மென்ட் கல்பாத்தி எஸ்.அகோரம் சாருக்கு நன்றி. நீங்கள் திரையரங்குகளில் சிரித்துக் கொண்டாடுவதை நான் கதவு ஓரங்களில் நின்று பார்த்துக் கொண்டிருக்கிறேன். உங்கள் முகங்களில் உள்ள மகிழ்ச்சியே என் மகிழ்ச்சி, இதையே நான் விரும்பினேன்.
நீங்கள் என்னை நேசிப்பதையும், எனக்கு ஆதரவளிப்பதையும் பார்க்கையில், நான் உங்களை மேலும் அதிகமாக நேசிக்கிறேன் என்பதையே உங்களுக்குத் தெரிவிக்க விரும்புகிறேன்” எனப் பதிவிட்டுள்ளார். பிரதீப் ரங்கநாதனின் இந்தப் பதிவில் ரசிகர்கள் பலரும் தங்களது வாழ்த்துகளைப் பகிர்ந்து வருகின்றனர்.