சர்க்கரை வியாதி காரணமாக கடுமையாக பாதிக்கப்பட்டுள்ள பிதாமகன் படத்தின் தயாரிப்பாளர் துரை(VA Durai ) மருத்துவ உதவி வேண்டி வீடியோ வெளியிட்டுள்ளார்.
தமிழ் சினிமாவில் பாலா இயக்கி வெளியான பிதாமகன், விஜயகாந்த் நடிப்பில் வெளியான கஜேந்திரா போன்ற பல படங்களைத் தயாரித்தவர் வி.ஏ.துரை. EVERGREEN MOVIES என்ற பெயரில் தயாரிப்பு நிறுவனம் தொடங்கி என்னம்மா கண்ணு, லூட்டி உள்ளிட்ட பல படங்களை துரை தயாரித்துள்ளார்.
கடந்த சில ஆண்டுளாக சர்க்கரை வியாதி காரணமாக தயாரிப்பாளர் துரை கடுமையாக பாதிக்கப்பட்டிருந்த நிலையில், மருத்துவமனையில் சிகிச்சை பெறக்கூட பணம் இல்லாமல் துரை அவதிப்பட்டு வருவது பற்றி முன்னதாக வீடியோ ஒன்று வெளியாகியுள்ளது.
முன்னதாக திரைத்துறையில் ஏற்பட்ட நஷ்டத்தால் தன் அனைத்து சொத்துகளையும் துரை இழந்த நிலையில், சூப்பர் ஸ்டார் நடிகர் ரஜினிகாந்திடம் தன் நிலையை எடுத்துக்கூறி உதவுமாறும், திரைத்துறையினரும் தயாரிப்பாளர் சங்கமும் மருத்துவ உதவிகள் கிடைக்க தனக்கு உதவ வேண்டும் எனவும் சக கோரிக்கை விடுக்கப்பட்டுள்ளது.
சர்க்கரை வியாதி காரணமாக தனது காலில் உள்ள எலும்பு வெளியே தெரியும் அளவுக்கு துரை கடுமையாக அவர் பாதிக்கப்பட்டு இருப்பதாக இந்த வீடியோவில் தெரிவிக்கப்பட்டுள்ளது. இந்நிலையில் சிகிச்சைக்கு பணமின்றி அவதிப்படும் தயாரிப்பாளர் துரை இயன்றவர்கள் உதவும்படி இந்த வீடியோவில் கோரப்பட்டுள்ளது. இந்நிலையில் முன்னதாக தயாரிப்பாளர் துரையின் நிலையை அறிந்த நடிகர் சூர்யா அவருக்கு 2 லட்ச ரூபாய் பண உதவி அளித்ததாகவும் தகவல் வெளியாகியுள்ளது.