ப்ரோ படத்தின் போஸ்டரை நடிகர் சாய் தரம் தேஜ் டிவிட்டரில் பகிர்ந்துள்ளார். இப்படம் ஜூலை 28ஆம் தேதி வெளியாகிறது. சமுத்திரகனி இயக்கி நடித்த ’வினோதய சித்தம்’ என்ற திரைப்படம் கடந்த 2021-ஆம் ஆண்டு வெளியாகி நல்ல வரவேற்பு பெற்ற நிலையில் இந்த படம் தற்போது தெலுங்கில் ”ப்ரோ” என்ற பெயரில் ரீமேக் செய்யப்பட்டு வருகிறது.
இந்த படத்தில், சமுத்திரகனி கடவுளாக நடித்துள்ளார். உதவி ஜெனரல் மேனேஜராக இருக்கும் தம்பி ராமையா திடீரென ஒரு விபத்தில் இறந்துவிடுகிறார். அவர் மேலோகம் செல்லும்போது கடவுள் அவருக்கு ஒரு வாய்ப்பு கொடுக்கிறார். தம்பி ராமையா அவரது குடும்ப சுமைகளை நிறைவேற்றிவிட்டு மீண்டும் 90 நாட்களுக்குள் திரும்பி வரவேண்டும் என்று நிபந்தனை விதிக்கிறார் கடவுள். மேலும் அதுவரை தம்பி ராமையாவின் கூடவே தானும் இருப்பேன் என்றும் சொல்கிறார். அதன் பிறகு என்ன நடந்தது என்பதுதான் இந்த படத்தின் மீதிக் கதை.
இந்த படம் கொரோனா வைரஸ் ஊரடங்கு நேரத்தில் ஓடிடியில் வெளியாகி நல்ல வரவேற்பை பெற்ற நிலையில் தற்போது இந்த படம் தெலுங்கில் ப்ரோ என்ற பெயரில் ரீமேக் ஆகிறது. சமுத்திரக்கனி வேடத்தில் தெலுங்கு திரை உலகின் மாஸ் நடிகர் பவன் கல்யாண் நடிக்கின்றார். இந்த படத்தை சமுத்திரகனி எழுதி இயக்குகிறார் என்றும் விரைவில் இப்படத்தின் டீசர் வெளியாகும் என்றும் படக்குழு அறிவித்துள்ளது.
அதே போல் தம்பி ராமையா கேரக்டரில் பவன் கல்யாணின் நெருங்கிய உறவினரான சாய்தரம் தேஜ் என்பவர் நடிக்க உள்ளார். இப்படத்தில் ஒரு சிறப்பு பாடலுக்கு பாலிவுட் நடிகை ஊர்வசி ரவுத்தேலா ஒப்பந்தம் செய்யப்பட்டுள்ளார். இப்படத்திற்கு தமன் இசையமைக்கிறார். தற்போது படத்தின் இறுதிக்கட்ட பட பிடிப்பு நடந்து வரும் நிலையில் படத்தின் போஸ்ட் ப்ரொடக்ஷன் பணிகள் விரைவில் தொடங்க உள்ளதாக கூறப்படுகிறது.
இப்படம் குறித்த புகைப்படங்கள் இணையதளங்களில் வைரலாகி வருகிறது. ஜூன் 17-ஆம் தேதி வெளியிடப்பட்ட போஸ்டரில் பவன் மற்றும் சார்ய் ஆகிய இருவரும் லுங்கி அணிந்து காணப்படுகின்றனர். இப்படத்தின் டீசர் ஐதராபாத்தில் நடைபெறும் பிரமாண்ட விழாவில் வெளியிடப்படும் என எதிர்பார்க்கப்படுகிறது.
மேலும் படிக்க