மும்பையில் 2024 ஆம் ஆண்டுக்கான தாதா சாகிப் பால்கே சர்வதேச திரைப்பட விருதுகள் வழங்கும் விழா நேற்று நடைபெற்றது. இதில் ஜவான் படத்துக்காக சிறந்த நடிகைக்கான விருதை நடிகை நயன்தாரா பெற்றார். இந்த விருதை அப்படத்தில் நடித்த பாலிவுட் சூப்பர் ஸ்டார் ஆன ஷாருக்கான் வழங்கினார். இந்த விருது வழங்கும் விழாவில் மஞ்சள் நிற சேலையில் வருகை தந்திருந்த நயன்தாராவின் புகைப்படங்கள் மற்றும் வீடியோக்கள் இணையத்தில் வைரலாகி வருகிறது. ஜவான் படத்துக்காக தாதாசாகேப் விருதினைப் பெற்றுள்ள நடிகை நயன்தாராவுக்கு பலரும் வாழ்த்துகளைத் தெரிவித்து வருகின்றனர்.
இந்நிலையில் நடிகை நயன்தாரா தான் பெற்றுக்கொண்ட தாதா சாகேப் பால்கே சர்வதேச திரைப்பட விருதுடன் அவர் எடுத்துக் கொண்ட புகைப்படங்களை தனது சமூக வலைதளப் பக்கத்தில் வெளியிட்டுள்ளார். இதற்கு பலரும் லைக்குகளையும் கமெண்டுகளையும் வாரி வழங்கி வருகின்றனர். குறிப்பாக நடிகையும் பாடகியுமான ஸ்ருதிஹாசன், ”ரொம்ப பிரிட்டி” என கமெண்ட் செய்துள்ளார்.
தாதா சாகேப் பால்கே சர்வதேச திரைப்பட விருதினைப் பெற்ற நயன்தாரா தனது இன்ஸ்டாகிராம் பக்கத்தில், ”தாதா சாகேப் பால்கே விருதினைப் பெற்றதால் மிகவும் மகிழ்ச்சியாகவும் ஆசிர்வதிக்கப்பட்டதாகவும் கருதுகின்றேன்” என தெரிவித்துள்ளார்.
தமிழில் ராஜா ராணி, தெறி, மெர்சல், பிகில் உள்ளிட்ட படங்களை இயக்கிய அட்லீ, இந்தியில் இயக்குநராக ஜவான் படத்தில் அறிமுகமானார். ரெட் சில்லி எண்டர்டெயின்மெண்ட் நிறுவனம் தயாரித்த இந்த படத்தில் ஷாருக்கான், நயன்தாரா, விஜய் சேதுபதி, தீபிகா படுகோனே, யோகிபாபு, சஞ்சய் தத், பிரியாமணி , சஞ்சீதா பட்டாசார்யா, சன்யா மல்ஹோத்ரா உள்ளிட்ட பலரும் நடித்திருந்தனர். அனிருத் இசையமைத்த ஜவான் படத்தில் அப்பா - மகன் என இரட்டை வேடத்தில் நடித்திருந்தார்.
2023 ஆம் ஆண்டு செப்டம்பர் 7 ஆம் தேதி உலகமெங்கும் 10 ஆயிரத்துக்கும் அதிகமாக திரையரங்கங்கத்தில் வெளியான ஜவான் படம் தமிழ், இந்தி, தெலுங்கு, கன்னடம் உள்ளிட்ட மொழிகளில் ரிலீஸ் செய்யப்பட்டது. கதையில் பல படங்களை வழக்கம் போல கலந்து கட்டி அடித்திருந்தார் அட்லீ. ஆனால் இப்படத்தை பாலிவுட் ரசிகர்கள் கொண்டாடினர். ஜவான் திரைப்படம் வசூலில் ரூ.1000 கோடியை கடந்து சாதனைப் படைத்ததாக ரெட் சில்லி நிறுவனம் அதிகாரப்பூர்வமாக அறிவித்தது. வெறும் 17 நாட்களில் 1000 கோடி இலக்கை எட்டியது மிகப்பெரிய சாதனையாக பார்க்கப்பட்டது குறிப்பிடத்தக்கது.