தமிழ் சினிமாவின் பிரபல இசையமைப்பாளரான அனிருத் தெலுங்கில் தான் இசையமைக்கப்போகும் படத்திற்கான பணிகளை தொடங்கியுள்ளார்.
இயக்குநர் கொரோடலா சிவா தனது அடுத்தப்படத்தில் நடிகர் ஜூனியர் என்.டி.ஆருடன் கைகோர்க்கிறார். கடந்த மார்ச் மாதம் ராஜமௌலி இயக்கத்தில் வெளியான ஆர்.ஆர்.ஆர். படத்தின் வெற்றியால் ஜூனியர் என்.டி.ஆர் மார்க்கெட் எகிறியுள்ள நிலையில், இப்படம் குறித்த அறிவிப்பு வெளியானபோதே பெரும் எதிர்பார்ப்பு நிலவியது. மிரட்டும் கெட்டப்பில் NTR 30 படத்தின் ப்ரோமோ வீடியோ கடந்த மே மாதம் வெளியானது.
தமிழ்,தெலுங்கு, இந்தி, கன்னடம் மற்றும் மலையாள மொழிகளில் பான் இந்தியா படமாக உருவாகும் இப்படத்தில் முதலில் ஹீரோயினாக அலியா பட் ஒப்பந்தம் செய்யப்பட நிலையில், திடீரென சில காரணங்களுக்காக விலகினார். பின்னர் ஜான்வி கபூர், சாய் பல்லவி ஆகியோர் பெயர்கள் அடிப்பட்ட நிலையில், இதுவரை உறுதிப்படுத்தவில்லை. இப்படத்திற்கான முன்கட்ட பணிகள் முழு வீச்சில் நடந்து வரும் நிலையில் இசையமைப்பாளராக அனிருத் ஒப்பந்தம் செய்யப்பட்டுள்ளார்.
இதற்காக கொரட்டால சிவாவிடம் கலந்துரையாடும் புகைப்படத்தை அனிருத் தனது இன்ஸ்டாகிராம் பக்கத்தில் வெளியிட்டார். இந்த படம் ரசிகர்களிடையே பெரும் வரவேற்பை பெற்றுள்ளது. இதுவரை தெலுங்கு திரையுலகில் வெளிவராத பக்கா ஆக்ஷன் எண்டெர்டெயின்மென்ட் ஆக உருவாகவுள்ள NTR 30 படத்தின் பாடல்கள் பிளாக்பஸ்டர் ஹிட் அடிக்கும் என ரசிகர்கள் நம்பிக்கை தெரிவித்துள்ளனர்.