தமிழ் சினிமாவில் நடிகர்களுக்கு பற்றாக்குறையோ என்னவோ இயக்குநர்கள் எல்லாம் நடிக்கத் தொடங்கிவிட்டார்கள். கெளதம் வாசுதேவ் மேனன், பாலாஜி சக்திவேல், மகேந்திரன், பாரதிராஜா, ஆகியவர்களைத் தொடர்ந்து தற்போது தற்போது நடிகராக மாஸ் காட்டிக்கொண்டிருக்கிறார் மிஸ்கின். லியோ, மாவீரன் படத்தைத் தொடர்ந்து அடுத்ததாக விக்னேஷ் சிவன் இயக்கும் அடுத்தப் படத்தில் நடிக்க இருக்கிறார் இயக்குநர் மிஸ்கின்.
மிஸ்கின்
தமிழ் சினிமாவில் தனி அடையாளத்தைக் கொண்ட இயக்குநர்களில் மிஸ்கினும் ஒருவர். சித்திரம் பேசுதடி, அஞ்சாதே ஆகியப் படங்களில் அனைவராலும் பாராட்டப்பட்டார். யுத்தம் செய், ஓநாயும் ஆட்டுக்குட்டியும் பிசாசு, சைக்கோ, துப்பறிவாளன் ஆகியப் படங்களில் தனது தனித்துவமான ஒரு ஸ்டைலை உருவாக்கினார் மிஸ்கின். தற்போது மிஸ்கின் இயக்கியிருக்கும் திரைப்படம் பிசாசு படத்தின் இரண்டாம் பாகம். ஆண்ட்ரியா இந்தப் படத்தின் கதாநாயகியாக நடித்திருக்கிறார். விரைவில் இந்தப் படம் குறித்தான தகவல் வெளியாக இருக்கிறது.
நடிகராக மிஸ்கின்
படங்களை இயக்குவது மட்டுமில்லாமல் நடிப்பதிலும் ஆர்வம் காட்டி வருகிறார் மிஸ்கின். சவரகத்தி, சூப்பர் டீலகஸ் ஆகியப் படங்களில் தனது கதாபாத்திரங்களை திறம்பட நடித்திருக்கிறார். மிஸ்கினின் நடிப்பிற்கு தனி ரசிகர்களே இருக்கிறார்கள். தற்போது மிஸ்கின் நடிகர் விஜய் நடிக்கும் லியோ படத்தில் நடித்திருக்கிறார். மேலும் மடோன் அஸ்வின் இயக்கி சிவகார்த்திகேயன் நடிப்பில் உருவாகியிருக்கும் மாவீரன் திரைப்படத்தில் முக்கிய வில்லனாக நடித்திருக்கிறார் மிஸ்கின்.
அடுத்தது என்ன
அண்மையில் பேட்டி ஒன்றில் தான் நடிக்க இருக்கும் அடுத்தப் படத்தை பற்றியான தகவலை கசிய விட்டிருக்கிறார். ”போடா போடி, நானும் ரவுடிதான், காத்துவாக்குல ரெண்டு காதல் ஆகியப் படங்களை இயக்கிய விக்னேஷ் சிவன் இயக்கும் அடுத்த படத்தில் நான் நடிக்கலாம்” என்கிற தகவலை வெளியிட்டிருக்கிறார். விக்னேஷ் சிவன் தன்னிடம் ஒரு அற்புதமான கதையை சொல்லியிருப்பதாகவும் அது தனக்கு அதிகம் பிடித்திருந்ததாகவும் மிஸ்கின் கூறியுள்ளார்.
நடிப்பில் ஆர்வம் இல்லை
நடிப்பதில் தற்போது பிஸியாக தோன்றும் மிஸ்கின் தான் எழுதுவதில் தான் அதிக பிஸியாக இருப்பதாக தெரிவித்தார். மேலும் தனக்கு நடிப்பதில் பெரிய ஆர்வம் இல்லையென்கிற உணமையைக் கூறியுள்ளார். நடிப்பதற்காக தான் தனியாக நேரம் எடுத்துக்கொண்டு அதற்கு உழைப்பு செலுத்த வேண்டியதாக இருப்பதாகவு தெரிவித்தார் மிஸ்கின்.
மாவீரன்
மண்டேலா படத்தை இயக்கி தேசிய விருது வென்ற இயக்குநர் மடோன் அஸ்வின் இயக்கியிருக்கும் படம் மாவீரன். சிவகார்த்திகேயன் , மிஸ்கின், அதிதி ஷங்கர், மிஸ்கின் , யோகி பாபு ஆகியவர்கள் இந்தப் படத்தில் முக்கிய கதாபாத்திரத்தில் நடித்திருக்கிறார்கள். வரும் ஜூலை 14 ஆம் தேதி மாவீரன் படம் திரையரங்குகளில் வெளியாக இருக்கிறது.