நடிகர் சிவகார்த்திகேயன் நடித்துள்ள மாவீரன் படத்தின் இரண்டாவது பாடல் வெளியாகும் தேதி அறிவிக்கப்பட்டுள்ளது.
தமிழ் சினிமாவில் முன்னணி நடிகராக உயர்ந்து வரும் நடிகர் சிவகார்த்திகேயன் கடைசியாக பிரின்ஸ் படத்தில் நடித்திருந்தார். கடந்தாண்டு தீபாவளிக்கு வெளியான இப்படம் படுதோல்வி அடைந்தது. இதனால் தனது அடுத்தடுத்த படங்களை மிக கவனமுடன் தேர்வு செய்து வருகிறார் சிவகார்த்திகேயன். அடுத்ததாக அவர் நடிப்பில் அயலான், மாவீரன் உள்ளிட்ட படங்கள் வெளியாகவுள்ளது.
இதில் தேசிய விருது வென்ற மண்டேலா திரைப்படத்தின் இயக்குநர் மடோன் அஸ்வின் இயக்கத்தில் “மாவீரன்” படம் உருவாகியுள்ளது. இதில் சிவகார்த்திகேயனுக்கு ஜோடியாக அதிதி ஷங்கர் நடிக்கிறார். மேலும் நடிகை சரிதா, இயக்குநர் மிஷ்கின், யோகி பாபு, டோலிவுட் நடிகர் சுனில் உள்ளிட்ட பலரும் இப்படத்தில் நடித்துள்ளனர். மண்டேலா படத்தின் இசையமைப்பாளர் பரத் சங்கர் மாவீரனுக்கு இசையமைத்துள்ளார்.
முன்னதாக சிவகார்த்திகேயன் பிறந்தநாளை முன்னிட்டு இப்படத்தின் முதல் பாடலாக ‘சீனா சீனா’ பாடல் வெளியாகி வரவேற்பை பெற்றது. இதனைத் தொடர்ந்து முதலில் மாவீரன் படம் ஆகஸ்ட் 11-ஆம் தேதி வெளியாகும் என அறிவிக்கப்பட்டது. ஆனால் எதிர்பாராதவிதமாக ஆகஸ்ட் 10 ஆம் தேதி ரஜினி நடித்த ஜெயிலர் படம் வெளியாகவுள்ளதாக தெரிவிக்கப்பட்டதால் மாவீரன் படத்தின் ரிலீஸ் தேதி ஜூலை 14 ஆம் தேதி வெளியாகும் என தெரிவிக்கப்பட்டுள்ளது.
இதனிடையே மாவீரன் படத்தின் 2 ஆம் பாடல் ஜூன் 14 ஆம் தேதி வெளியாகும் என தெரிவிக்கப்பட்டுள்ளது. ‘வண்ணாரப்பேட்டையில’ என தொடங்கும் இப்பாடலை சிவகார்த்திகேயன், அதிதி ஷங்கர் இருவரும் இணைந்து பாடியுள்ளனர். யுகபாரதி பாடல்களை எழுதியுள்ளார் என தெரிவிக்கப்பட்டுள்ளது. இதனால் ரசிகர்கள் மகிழ்ச்சியடைந்துள்ளனர்.