தமிழ் திரையுலகின் முன்னணி இயக்குனர்களில் ஒருவராக உலா வருபவர் லோகேஷ் கனகராஜ். இவரது இயக்கத்தில் தற்போது சூப்பர்ஸ்டார் ரஜினிகாந்த் நடிக்கும் கூலி படத்தை இயக்கி வருகிறார். இந்த படத்தின் படப்பிடிப்பு விறுவிறுப்பாக நடைபெற்று வருகிறது.
இதுவரை ஆக்ஷன் படம் எடுக்கவில்லை:
லோகேஷ் கனகராஜ் சமீபத்தில் நிகழ்ச்சி ஒன்றில் பங்கேற்றார். அப்போது, அவரிடம் உங்கள் படங்களில் வன்முறையை சரியான அளவில்தான் பயன்படுத்துகிறேன் என்று உணர்கிறீர்களா? என்று கேட்கப்படடது. இந்த கேள்விக்கு பதில் அளித்த லோகேஷ் கனகராஜ், “ உங்கள் கேள்விக்கு நியாயமாக பதில் அளிக்க வேண்டும் என்றால் நான் எடுக்க வேண்டும் என்று நினைத்த ஆக்ஷன் படத்தை இதுவரை எடுக்கவில்லை. முதல்முறை கைதிக்கு சென்சார் போய் வந்தது முதலே எனக்கு இந்த சிக்கல் இருக்கிறது. அடுத்து, எது எதற்கு? எங்கெல்லாம் பிரச்சினை வரப்போகிறது என்று இருந்தது.
படம் எடுக்க முடியாது:
அப்படியே ஒரு ஆக்ஷன் படத்தை ஸ்டார் ஹீரோக்களை வைத்து எடுக்க முடியாது. குடும்பங்களும் வரப்போகிறார்கள். அனைவரும் பார்க்கப்போகிறார்கள். நான் என்னுடைய ஸ்டண்ட் மாஸ்டரிம் முன்னாடியே ரோப் செட்டுக்குள் வரக்கூடாது என்று சொல்லிவிடுவேன். இரண்டாவது எந்த கதாபாத்திரம் எப்படி சண்டை செய்யப்போகிறது என்பதையும் செட் செய்யப்போகிறோம். கில் பில் படத்தை எடுத்து நமது ஊரில் ரிலீஸ் செய்ய முடியாது. கில் பில் படத்தை நமது ஊருக்கு ஏற்றாற்போல எடுக்க வேண்டும் என்பது எனது ஆசை. ஓடிடியில் கூட ரிலீஸ் செய்ய முடியாது. அது அத்தனை விருதுகளை வென்றுள்ளது. அதை நமது ஊரில் எடுக்கவும் முடியாது. ரிலீஸ் செய்யவும் முடியாது.”
இவ்வாறு அவர் கூறினார்.
கூலி:
தமிழ் சினிமாவின் முன்னணி இயக்குனராக உலா வரும் லோகேஷ் கனகராஜ் மாநகரம் படம் மூலமாக முதன்முறையாக இயக்குனராக அறிமுகமானார். பின்னர், கைதி படத்தை இயக்கி அனைவரையும் திரும்பி பார்க்க வைத்தார். விஜய்யை வைத்து மாஸ்டர் படத்தை இயக்கி உச்ச இயக்குனராக புகழ்பெற்றார். பின்னர், லியோ படத்தை இயக்கினார். தற்போது கூலி படத்தை இயக்கி வருகிறார். லோகேஷ் கனகராஜ் இயக்கும் படங்களில் போதைப்பொருட்களின் பயன்பாடு அதிகளவில் இருப்பதாக தொடர் குற்றச்சாட்டுகள் இருக்கிறது என்பது குறிப்பிடத்தக்கது.
கூலி படத்தில் நடிகர் ரஜினிகாந்துடன் சத்யராஜ், நாகர்ஜூனா, உபேந்திரா, ஸ்ருதிஹாசன் உள்ளிட்ட பலர் நடிக்கின்றனர். இவர்களுடன் பாலிவுட் நடிகர் அமீர்கானும் இந்த படத்தில் நடிக்க இருப்பதாக தகவல் வெளியாகியுள்ளது. ப்ளாக்பஸ்டர் வெற்றி படங்களை இயக்கிய லோகேஷ் கனராஜே தான் எடுக்க நினைத்த ஆக்ஷன் படத்தை இதுவரை எடுக்க முடியவில்லை என்று கூறியிருப்பது ரசிகர்கள் மத்தியில் ஆச்சரியத்தையும், அதிர்ச்சியையும் ஏற்படுத்தியுள்ளது.