மருத்துவ சிகிச்சைக்காக அமெரிக்கா சென்றுள்ள பிரபல இயக்குநர் டி.ராஜேந்திரன் புகைப்படம் ஒன்று இணையத்தில் வைரலாகியுள்ளது.
இயக்குநர், நடிகர், இசையமைப்பாளர், அரசியல் கட்சி தலைவர் என பன்முகம் கொண்டவரான டி.ராஜேந்தர் உடல் நல பாதிப்பு காரணமாக சென்னை போரூரில் உள்ள ராமசந்திர மருத்துவ கல்லூரி மருத்துவமனையில் கடந்த மே மாதம் 19 ஆம் தேதி அனுமதிக்கப்பட்டார். இதனைத் தொடர்ந்து அவரது மகனும், நடிகருமான சிம்பு வெளியிட்ட அறிக்கையில், எனது தந்தைக்கு திடீரென நெஞ்சு வலி ஏற்பட்ட நிலையில், அவரை தனியார் மருத்துவமனையில் சேர்த்தோம். அங்கு பரிசோதனையில், அவருக்கு வயிற்றில் சிறிய இரத்த கசிவு ஏற்பட்டுள்ளதாகவும், அவருக்கு உயர் சிகிச்சை தரவேண்டும் எனவும் மருத்துவர்கள் அறிவுறுத்தியதால், அவர் உடல் நலன் கருதியும், உயர் சிகிச்சைக்காகவும், தற்போது வெளிநாட்டுக்கு அழைத்து செல்கிறோம். அவர் முழு சுய நினைவுடன், நலமாக உள்ளார். கூடிய விரைவில் சிகிச்சை முடிந்து, உங்கள் அனைவரையும் சந்திப்பார். உங்கள் பிரார்த்தனைகளுக்கும், அனைவரின் அன்புக்கும் நன்றி. என தெரிவித்திருந்தார்.
இதனையடுத்து டி.ராஜேந்தருக்கு தொடர் சிகிச்சை தேவைப்படுவதால் அவர் வெளிநாட்டிற்கு அழைத்துச் செல்லப்படுவார் என தெரிவிக்கப்பட்ட நிலையில் இதற்கான செலவுகளை பிரபல தயாரிப்பாளர் ஐசரி கணேஷ் செய்வதாக கூறப்பட்டது. இதற்கிடையில் டி.ராஜேந்தர் சிகிச்சை பெற்று வந்த மருத்துவனைக்கு நேரில் சென்று முதலமைச்சர் மு.க.ஸ்டாலின்,நடிகர் கமல்ஹாசன் ஆகியோர் நலம் விசாரித்தனர். இதனைத் தொடர்ந்து தந்தையின் சிகிச்சைகளை கவனிக்க சிம்பு முன்கூட்டியே அமெரிக்கா செல்ல டி.ராஜேந்தர், மனைவி உஷாவுடன் ஜூன் 14 ஆம் தேதி அமெரிக்காவுக்கு பயணம் செய்தார்.
அங்கு அவருக்கு தொடர் சிகிச்சைகள் அளிக்கப்பட்டு வரும் நிலையில், நடிகர் சிம்பு தனது தந்தை டி.ஆர்., மற்றும் தாய் உஷாவுடன் இருக்கும் புகைப்படம் ஒன்று இணையத்தில் வைரலாகியுள்ளது. டி.ஆர்., என்றாலே அனைவருக்கும் அவரின் தாடியும், சிகையும், அடுக்குமொழியும் தான் நியாபகம் வரும். ஆனால் இந்த புகைப்படத்தில் அவர் தாடியில்லாமல் உள்ளார். சிம்புவோ பத்து தல படத்திற்காக தாடி வளர்த்துள்ளார் என்பது குறிப்பிடத்தக்கது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்