தமிழ் சினிமாவின் முன்னணி இயக்குநர், நடிகர், திரைக்கதை ஆசிரியர் என பன்முகத் திறமையால் தனக்கென ஒரு தனி இடத்தைப் பிடித்த கே. பாக்யராஜின் மறைவு திரையுலகையே சோகத்தில் ஆழ்த்தியுள்ளது. தமிழ் மற்றும் இந்தியில் 25க்கும் மேற்பட்ட திரைப்படங்களை இயக்கிய பாக்யராஜ் 50 க்கும் மேற்பட்ட படங்களில் நடித்துள்ளார். அந்த வகையில் பாக்யராஜ் கடைசியாக நடித்த ஹாய் திரைப்படம் ரசிகர்களிடம் கவனமீர்த்துள்ளது.
இயக்குநரும் நடிகருமான பாக்யராஜின் இறுதி ஊர்வலம் இன்று சென்னை முழுவதும் அரசு மரியாதையுடன் நடைபெற்றது. அவரது உடல் பொதுமக்கள் அஞ்சலிக்குப் பிறகு ஊர்வலமாக எடுத்துச் செல்லப்பட்டு, சென்னை பெசன்ட் நகர் மின் மயானத்திற்கு கொண்டு செல்லப்பட்டது. அங்கு அரசு மரியாதையுடன் இறுதிச் சடங்குகள் நடைபெற்றன. பின்னர், அவரது உடல் பெசன்ட் நகர் மின் மயானத்தில் தகனம் செய்யப்பட்டது. இறுதிச் சடங்கில் குடும்பத்தினர், திரையுலகினர், அரசியல் பிரமுகர்கள் மற்றும் அரசு அதிகாரிகள் கலந்து கொண்டனர். தமிழக அரசு அறிவித்தபடி அரசு மரியாதை செலுத்தப்பட்ட நிலையில், காவல்துறையினர் அணிவகுப்பு மரியாதையும் வழங்கினர்.
பாக்யராஜின் கடைசி படம்
இந்த நிலையில், பாக்யராஜ் நடித்துள்ள 'ஹாய்' திரைப்படம் ரசிகர்களிடையே அதிக எதிர்பார்ப்பை ஏற்படுத்தியுள்ளது. கவின் மற்றும் நயன்தாரா முன்னணி கதாபாத்திரங்களில் நடித்துள்ள இந்தப் படத்தில் பாக்யராஜ் முக்கிய கதாபாத்திரத்தில் நடித்துள்ளார். அவர் மறைவுக்கு முன்பே தனது படப்பிடிப்பு காட்சிகளை முழுமையாக நிறைவு செய்திருந்ததால், இந்தப் படம் அவரது இறுதி திரைத்தோற்றமாக அமைய உள்ளது.
பிரபு, ராதிகா சரத்குமார், கே. பாக்யராஜ், பூர்ணிமா பாக்யராஜ் உள்ளிட்டோர் முக்கிய வேடங்களில் நடித்துள்ளனர். பாடலாசிரியராக அறியப்பட்ட விஷ்ணு எடவன் இந்தப் படத்தின் மூலம் இயக்குநராக அறிமுகமாகிறார். செவன் ஸ்கிரீன் ஸ்டூடியோ சார்பில் எஸ்.எஸ். லலித் குமார் தயாரித்துள்ள இப்படத்திற்கு ஜென் மார்ட்டின் இசையமைத்துள்ளார். காதல், குடும்ப உறவுகள் மற்றும் உணர்வுபூர்வமான சம்பவங்களை மையமாகக் கொண்டு உருவாகியுள்ள 'ஹாய்' திரைப்படம் விரைவில் திரையரங்குகளில் வெளியாக உள்ளது. பாக்யராஜின் அனுபவமிக்க நடிப்பு இந்தப் படத்திற்கு கூடுதல் பலமாக இருக்கும் என படக்குழு நம்பிக்கை தெரிவித்துள்ளது.