நாடு முழுவதும் இன்று கிருஷ்ண ஜெயந்தி கோலாகலமாக கொண்டாடப்பட்டு வருகிறது. தமிழ் திரையுலகில் கிருஷ்ணரின் புகழை போற்றியும், கிருஷ்ண புராணங்கள் பற்றியும் ஏராளமான திரைப்படங்கள் வெளியாகியுள்ளது. திரை பிரபலங்களும் தங்களது குழந்தைகளுக்கு கிருஷ்ணர் மற்றும் ராதை வேடமிட்டு அழகு பார்ப்பார்கள்.
கிருஷ்ணர் வேடம் தரித்த விஜய்:
பிரபலங்கள் தங்களது சிறு வயதில் அவர்களது பெற்றோர்களால் கிருஷ்ணர் வேடமிடப்பட்டும் இருப்பார்கள். அந்த வகையில் தமிழ் சினிமாவின் உச்சநட்சத்திரமாக திகழ்பவர் த.வெ.க. தலைவர் நடிகர் விஜய். நடிகர் விஜய்க்கு 5 வயதாக இருந்தபோது அவரது பெற்றோர்களான எஸ்.ஏ.சந்திரசேகரும், ஷோபாவும் அவருக்கு கிருஷ்ணர் வேடமிட்டு அழகு பார்த்துள்ளனர்.
கிருஷ்ணர் வேடமிட்ட விஜய் கையில் புல்லாங்குழல் ஊதும் புகைப்படம் தற்போது வைரலாகி வருகிறது. நெற்றியில் கிருஷ்ணருக்கு இடும் திலகம், தலைப்பாகையுடன் குட்டி கிருஷ்ணராக இருக்கும் விஜய்யின் புகைப்படத்தை தற்போது அவரது ரசிகர்கள் இணையத்தில் பகிர்ந்து வருகின்றனர்.
GOAT-க்கு காத்திருக்கும் ரசிகர்கள்:
விஜயகாந்த் நடித்த வெற்றி என்ற படத்தின் மூலமாக குழந்தை நட்சத்திரமாக விஜய் திரையில் அறிமுகமானார். அதன்பின்பு, நாளைய தீர்ப்பு என்ற படம் மூலமாக கதாநாயகனாக அறிமுகமான விஜய் தொடர்ந்து தனது நடிப்பாலும், நடனத்தாலும் தனக்கென தனி ரசிகர்கள் பட்டாளத்தை உருவாக்கி தற்போது தனக்கென கோடிக்கணக்கான ரசிகர்களை உருவாக்கிக் கொண்டுள்ளார்.
விஜய் இதுவரை 68 படங்களில் நடித்திருந்தாலும் கடவுள் வேடங்களில் பெரிதாக எந்த படத்திலும் நடிக்கவில்லை என்பதும் குறிப்பிடத்தக்கது. விஜய் நடிப்பில் வரும் செப்டம்பர் 5ம் தேதி தி கோட் படம் வெளியாக இருக்கிறது. இந்த படத்திற்கு அவர் எச்.வினோத் இயக்கத்தில் நடிக்க உள்ள திரைப்படமே கடைசி திரைப்படம் என்பதும் குறிப்பிடத்தக்கது.