பெரும் போராட்டங்களுக்குப் பின் திரையரங்கில் வெளியான வா வாத்தியார் திரைப்படம் ரசிகர்களிடம் மிகச்சுமாரான வரவேற்பைப் பெற்றது மட்டுமில்லாமல் திரைக்கு வந்த இரண்டே வாரங்களில் ஓடிடி தளத்தில் வெளியாக இருக்கிறது.
ஸ்டுடியோ கிரீன் தயாரிப்பில் நலன் குமாரசாமி இயக்கத்தில் கார்த்தி நடித்த படம் வா வாத்தியார். சூது கவ்வும் , காதலும் கடந்து போகும் போன்ற தனித்துவமான படங்களுக்குப் பின் நலன் மற்றும் கார்த்தி கூட்டணி இணைந்தது. இந்த கூட்டணிக்காக ரசிகர்கள் கடந்த இரு ஆண்டுகளாக காத்திருந்து வந்தனர். கடந்த ஆண்டு டிசம்பர் மாதம் வெளியாக இருந்த வா வாத்தியார் தயாரிப்பு நிறுவனத்தின் கடன் பிரச்சனைகளால் ரிலீஸில் பல பிரச்சனைகளை சந்தித்தது.
தயாரிப்பாளர் செலுத்தவேண்டிய 21 கோடி கடனை முழுவதுமாக சொத்தாட்சியருக்கு செலுத்தாமல் படத்தை வெளியிட தடை விதித்தும் மேலும் படத்தின் உரிமைகளை ஏலத்தில் விடமும் சென்னை உயர் நீதிமன்றம் உத்தரவிட்டது.
இரண்டே வாரங்களில் ஓடிடியில் வெளியாகும் வா வாத்தியார்
விஜயின் ஜனநாயகன் திரைப்படத்தின் ரிலீஸ் ஒத்திவைக்கப்பட்டதால் கடனை திருப்பிக் கொடுத்து வா வா வாத்தியார் படத்தை பொங்கலுக்கு வெளியிட்டது படக்குழு. ஆனால் 2 ஆண்டுகள் இப்படத்திற்காக காத்திருந்த ரசிகர்களுக்கு ஏமாற்றமளிக்கும் விதமாக அமைந்தது படம். தெலுங்கில் இப்படம் வெளியாகவேயில்லை. திரையரங்கில் வெளியான இரண்டே வாரங்களில் தற்போது வா வாத்தியார் படத்தின் ஓடிடி ரிலீஸ் தேதி அறிவிப்பு வெளியாகியுள்ளது.
தற்போது நாளை ஜனவரி 28 ஆம் தேதி அமேசான் பிரைமில் வா வாத்தியார் படம் வெளியாக இருக்கிறது.கார்த்தி நடிப்பில் கடைசியாக வெளியான மெய்யழகன் திரைப்படம் விமர்சன ரீதியாக பாராட்டுக்களைப் பெற்றாலும் வசூல் ரீதியாக பின்னடைவை சந்தித்தது . தற்போது வா வாத்தியார் திரைப்படம் விமர்சன ரீதியாகவும் வசூல் ரீதியாகவும் மிகப்பெரிய தோல்வியை தழுவியுள்ளது. இதனால் படத்தை வேறு வழியில்லாமல் ஓடிடியில் வெளியிடும் கட்டாயத்திற்கு படக்குழு தள்ளப்பட்டுள்ளது.