தமிழ் திரையுலகின் முன்னணி நடிகரான விஜய் நடிப்பில் கடந்த 2012-ஆம் ஆண்டு வெளியான திரைப்படம் துப்பாக்கி. இந்த படத்தை ஏ.ஆர்.முருகதாஸ் இயக்கியிருந்தார்.இந்த திரைப்படம் விஜய் நடித்த படங்களில் அவருக்கு முக்கியமான திரைப்படமாக கருதப்படுகிறது. அதேபோல இயக்குநர் முருகதாஸ் வாழ்கையிலும் இந்த படம் பல திருப்புமுனைகளை ஏற்படுத்தியது. துப்பாகி படத்தின் பாடல் காட்சிகள், ஆக்ஷன் காட்சிகள், டயலாக்குகள் என அனைத்தும் விஜய் ரசிகர்களுக்காகவே உருவாக்கப்பட்டது போல கச்சிதமாக இருந்தன. மேலும் படத்தில் இடம்பெற்றிருந்த “ஐயம் வெயிட்டிங்” என்ற டயலாக் இன்றளவும் பிரபலம். துப்பாக்கி படத்தில் விஜய் ராணுவ உளவுத்துறை அதிகாரியாக நடித்திருப்பார். இந்த திரைப்படத்திற்கு கிடைத்த வெற்றியை தொடர்ந்து இதன் இரண்டாம் பாகத்தை எடுக்க இருப்பதாக தகவல் வெளியானது. அதனை உறுதிப்படுத்தும் வகையில் இயக்குநர் ஏ.ஆர். முருகதாஸ் இரண்டாம் பாகத்திற்கான கதையை தயார் செய்துவிட்டதாக அவருக்கு நெருக்கமான வட்டாரங்கள் தெரிவிக்கின்றன.
முன்னதாக துப்பாக்கி படத்தின் இரண்டாம் பாகத்தை எடுக்க தான் ஆர்வமாக உள்ளதாகவும், அந்த படத்திற்கான கதையை க்ளிக் ஆனவுடன் அதனை நிச்சயம் இயக்குவேன், அப்படி உருவாகும் இரண்டாம் பாகம் முதல் பாகத்தோடு இணைந்த ஒன்றாக இருக்கும் என தெரிவித்திருந்தார். இந்நிலையில் கதை தயாராகிவிட்டதால் துப்பாக்கி முதல் பாகத்தில் நடித்த தளபதி விஜயே அடுத்த பாகத்திலும் நடிப்பார் என எதிர்பார்க்கப்பட்ட நிலையில் முருகதாஸ் விஜயை நடிக்க வைக்க ஆர்வம் காட்டவில்லை என கூறப்படுகிறது. முன்னதாக விஜயின் 65 வது படத்தை முருகதாஸ் இயக்க ஆர்வம் காட்டினார், அதற்கான கதையை விஜயிடம் கூறவே, கதை பிடிக்காத விஜய் அதனை மறுத்துவிட்டதாக செய்திகள் வெளியாகின. தற்பொழுது விஜய் 65 படத்திற்கு “பீஸ்ட்” என பெயர் வைக்கப்பட்டுள்ளது. இதனை நெல்சன் திலீப்குமார் இயக்குகிரார். இந்த சம்பவம் காரணமாகத்தான் தற்போது முருகதாஸ் விஜயை அனுகவில்லை என கோலிவுட் வட்டாரத்தில் கிசு கிசுக்கப்படுகிறது. மேலும் துப்பாக்கி படத்தின் இரண்டாம் பாகத்தில் கமலை நடிக்க வைக்க பேச்சுவார்த்தை நடந்து வருவதாக கூறப்படுகிறது. கதையை கமலுக்கான கோணத்தில் உருவாக்கும் முயற்சியில் உள்ளாராம் முருகதாஸ் .ஆனால் இது குறித்த அதிகாரப்பூர்வ தகவல்களை கமல் மற்றும் முருகதாஸ் தரப்பு உறுதி செய்யவில்லை.
விஜயை வைத்து கத்தி, சர்க்கார் போன்ற படங்களை முருகதாஸ் இயக்கினார். இந்த இரு படங்களின் கதைகளும் திருடப்பட்டதாக வழக்குதொடரப்பட்டது. அதில் சர்க்கார் திரைப்படம் நீதிமன்றம் வரையில் சென்றுவிட்டது. இந்த சம்பவத்திற்கு பிறகு முருகதாஸ் மீது ரசிகர்களுக்கு இருந்த பிம்பம் முற்றிலும் மாறிவிட்டது. மேலும் ரஜினியை வைத்து இவர் இயக்கிய தர்பார் படமும் எதிர்பார்த்த வெற்றியை தரவில்லை.இந்நிலையில் துப்பாக்கி 2 படத்தை மட்டுமே நம்பி முழு முயற்சியில் இறங்கியுள்ளாராம் முருகதாஸ். இது குறித்த அறிவிப்பு இன்னும் சில நாட்களில் வெளியாகும் என எதிர்பார்க்கப்படுகிறது